Talu ai o Ieova le Atua * o Lē na foafoaina mea uma ma e ona le malosi uma lava, ua manatu ai le toʻatele o ia le pogai o mea uma o loo tutupu i le lalolagi, e aofia ai ma mea leaga. Peitaʻi, seʻi o tatou iloiloina le manatu o le Tusi Paia e faatatau i le Atua moni:

•  “E amiotonu Ieova i ona ala uma.”​—Salamo 145:17.

• “E tonu ona [Atua] ala uma. O le Atua faamaoni, e lē o iā te ia se faiga lē tonu; E amiotonu ma amio saʻo o ia.”​—Teuteronome 32:4.

• “E alofa faapelepele ma alofa mutimutivale Ieova.”​—Iakopo 5:11.

E lē faapogaia e le Atua mea leaga o loo tutupu. O lea, pe e na te faaosoosoina tagata e faia mea leaga? E mautinoa e leai, auā ua faapea mai le Tusi Paia: “Pe a faaosoosoina se tasi aua neʻi manatu: ʻUa faaosoosoina aʻu e le Atua.’” Aiseā? “E lē mafai ona faaosoosoina le Atua i mea leaga. E lē faaosooso atu foʻi o ia i se tasi.” (Iakopo 1:13) E lē faapogaia e le Atua mea leaga e tutupu pe faaosoosoina isi e fai mea leaga. O lea la, o le ā le māfuaaga o mea leaga ma o ai e tuuaʻia i na mea?

Ua faailoa mai e le Tusi Paia se tasi o māfuaaga ua mafatia ai tagata e faapea: “E tutupu faafuaseʻi mea iā i latou uma i le taimi e leʻi faatalitalia.” (Failauga 9:11) E mafai ona aafia so o se tagata pe a iai i le taimi tonu ma le nofoaga e tupu ai se faalavelave. I le toetoe 2000 tausaga ua mavae, na taʻua ai e Iesu se faalavelave na fasiotia ai ni tagata se toʻa 18, ina ua solo se ʻolo i o latou luga. (Luka 13:1-5) O le mea moni, e leʻi māfua ona feoti nei tagata ona o le auala na ola ai, peitaʻi, ona na iai tonu i le nofoaga na solo ifo ai lenei olo. E leʻi leva talu ai neʻi foʻi, na lūlū ai se mafuiʻe malosi i Haiti iā Ianuari i le 2010; na taʻua i se lipoti mai i le malō o Haiti e silia ma le 300,000 soifua na maʻimau ai. O nei tagata na aafia e eseese uma o latou tausaga ma talaaga. E apoia foʻi tagata i maʻi i so o se taimi.

E ono taumānatu nisi e faapea: ʻPe na mafai e le Atua ona taofia nei mala na tutupu? Pe na mafai e le Atua ona faasaoina tagata lelei mai i nei faalavelave?’ Ina ia fesoasoani le Atua e faasao tagata, e ao ona ia muaʻi silafia mea leaga a o leʻi tutupu. E iai i le Atua le tomai e na te silafia ai mea i le lumanaʻi, peitaʻi o le fesili o le a tatou iloiloina: Pe e faaaogā e le Atua lona mana i taimi uma e silafia ai mea a o leʻi tutupu?​—Isaia 42:9.

Ua taʻua i le Tusi Paia e faapea: “O loo i le lagi lo matou Atua; Ua faia e ia mea uma ua ia finagalo i ai.” (Salamo 115:3) E mafai e Ieova ona faataunuu mea uma, ae e na o mea e finagalo i ai. E faatatau foʻi lenā manatu pe a filifili le Atua e silafia ni mea i le lumanaʻi. O se faataʻitaʻiga, ina ua tupu  tele le amio leaga i aai anamua o Sotoma ma Komoro, na fetalai atu ai le Atua iā Aperaamo e faapea: “Ua ou maumauaʻi e alu ifo ina ia ou iloa ai po ua latou amioaʻi e tusa ma le alaga ua oo mai iā te aʻu, ma afai e leai, ona ou iloa ai lea.” (Kenese 18:20, 21) I se taimi muamua atu, e leʻi finagalo o Ia e muaʻi silafia po o le ā le tele o le amioleaga i na aai. E faapena foʻi i aso nei, e lē finagalo Ieova e na te silafia mea uma e leʻi tutupu. (Kenese 22:12) E lē faapea ai la ua lē taulau Ieova i mea na te faia, auā e “atoatoa ona lelei ana gaoioiga.” E fetaui lelei le faaaogāina e le Atua o lona tomai e silafia ai mea i le lumanaʻi, ina ia ōgatusa ma lona finagalo, ma e na te lē faamalosia tagata e mulimulituʻi i ni gaoioiga patino. * (Teuteronome 32:4) O lea, o le ā sa tatou faaiʻuga? Ua faamaonia le mea moni lenei: E filifili ma le atamai le Atua i le faaaogāina o lona tomai e muaʻi silafia ai mea.

O le isi pogai o mea leaga o loo tutupu, e māfua mai i tagata. Seʻi mātau le faamatalaga a le Tusi Paia i le māfuaaga e faia ai e tagata mea leaga. “A ua faaosoosoina tagata taʻitoʻatasi ona ua tosina ma maileia i ona lava tuʻinanau. Auā a tō le tuʻinanau, ona fanau mai ai lea o le agasala, a matua le agasala ona fanau mai ai lea o le oti.” (Iakopo 1:14, 15) Pe a faatino e se tasi se tuʻinanauga sesē, ma lolo atu i se faanaunauga lē talafeagai, o le a selesele mai ai ni iʻuga leaga. (Roma 7:21-23) Ua faaalia mai e le talafaasolopito o tagata, le matuiā o gaoioiga leaga ua faia, ma ua māfua ai le ogaoga o mafatiaga. E lē gata i lea, ua uunaʻia e tagata leaga isi ina ia aafia i faiga piʻopiʻo, ma ua atili sasao ai le amioleaga.​—Faataoto 1:10-16.

Pe e mafai ona taofia e le Atua le tagata mai i le faia o mea leaga? Seʻi o tatou iloilo le auala na foafoaina ai e le Atua le tagata. Ua faamatala mai i le Tusi Paia, na foafoaina le tagata i le faatusa o le Atua. O lea, e iai i le tagata le tomai e faaalia ai uiga o le Atua. (Kenese 1:26) Ua tuuina mai i le tagata le meaalofa o le filifiliga saʻoloto, e filifili ai o ia lava pe alofa i le Atua ma faamaoni iā te Ia, e ala i le faia o le mea e tonu i lana silafaga. (Teuteronome 30:19, 20) Pe afai e faamalosia e le Atua se tasi e gaoioi i se auala patino, ua lē aogā la le meaalofa o le filifiliga saʻoloto. E lē pei le tagata o se masini lea e gaoioi e tusa ma le auala na faapolokalame ai. E faapena le tulaga o mea pe afai e tuupōina mea uma, ma pulea mea uma a o leʻi tutupu. Peitaʻi, maʻeu lo tatou lotofaafetai auā ua faamamaluina i tatou e le Atua, e ala i le faataga o i tatou e faia a tatou lava filifiliga. E lē uiga atu lenā manatu e faapea o le a faavavau ona pagatia tagata, ona o a latou mea sesē ma a latou filifiliga e fai.

Pe a e fesili i se isi mai i le lotu Hinitū po o le lotu Puta i le fesili o loo i le faavaa o lenei mekasini, o le a e faalogo ai i le manatu lenei: “E māfua ona tutupu mea leaga i tagata lelei ona o le tulafono o le Karma. E latou te selesele mai iʻuga o a latou amio na fai, a o iai i se isi olaga na ola ai muamua.” *

Peitaʻi, ua faamalamalama mai i le Tusi Paia le māfuaaga o le oti lea e ese mai i le aʻoaʻoga o le Karma. Ina ua foafoaina e le Atua Atamu ma tuu i le faatoʻaga i Etena, na ia faapea atu iā te ia: “E mafai ona e ʻai i laau uma o le faatoʻaga ma e maʻona ai. A o le laau e iloa ai le lelei ma le leaga, aua neʻi e ʻai ai, auā o le aso e te ʻai ai, e te oti ai lava.” (Kenese 2:16, 17) Pe ana lē agasala Atamu e ala i le lē usitaʻi i le Atua, semanū e ola e faavavau. O le oti la o le faasalaga lea o le lē usitaʻi i le faatonuga a le Atua, ma o ē uma na tupuga mai iā te ia, e ʻoo i ai le oti.’ (Roma 5:12) Ua taʻua i le Roma 6:23, “o le totogi o le agasala o le oti.” Ua faamatala atili mai foʻi i le Tusi Paia: “O lē ua oti ua magalo o ia mai i lana agasala.” (Roma 6:7) I nisi faaupuga, o le a lē faaauau ona totogiina e tagata a latou agasala pe a maliliu.

E faitau miliona tagata i aso nei, e manatu e māfua mai le mafatia o tagata ona o le tulafono o le Karma, ma o ē e talitonu i lenā aʻoaʻoga e latou te talia na mafatiaga e aunoa ma le faaseā. Peitaʻi, o le mea moni e lē mafai e lenā talitonuga ona taofia le tutupu pea o mea leaga. E latou te talitonu e pau le auala o le lē toe iai o ni mafatiaga i se isi olaga, o le tauivi e fai amioga e talia e le lautele ma poto i aʻoaʻoga faalelotu i le olaga lenei. Peitaʻi, o lenā manatu e matuā eseese ma le faamatalaga o loo i le Tusi Paia. *

E lē o le tagata le pogai autū o mea leaga. O Satani le Tiapolo, o lē na avea muamua ma agelu faamaoni a le Atua, “e leʻi tumau lava o ia i le upu moni” ma ua ia faapogaia le agasala i le lalolagi. (Ioane 8:44) Na ia faatupu le fouvalega i le faatoʻaga i Etena. (Kenese 3:1-5) Na taʻua e Iesu o ia o “lē o loo leaga” ma o “le pule o le lalolagi.” (Mataio 6:13; Ioane 14:30) Ua mulimuli le toʻatele o tagata iā Satani e ala i le usiusitaʻi i ana faaosoosoga e teena ala o Ieova. (1 Ioane 2:15, 16) Ua faamatala mai i le 1 Ioane 5:19 e faapea: “O le lalolagi atoa o loo nofo toʻilalo i le pule a lē o loo leaga.” Na iai foʻi isi foafoaga agaga na liliu atu i le leaga ma aufaatasi atu iā Satani. Ua faailoa mai i le Tusi Paia o Satani ma ana temoni “ua faasesēina le lalolagi atoa,” ma ua māfua ai le “auē o le lalolagi.” (Faaaliga 12:9, 12) O lea, o Satani le Tiapolo o le pogai autū lea o mea leaga o loo tutupu.

Ua manino mai ai, e lē tuuaʻia le Atua i mea leaga o loo tutupu; ma e na te lē faapogaia foʻi mafatiaga o tagata. Peitaʻi, ua ia folafola mai o le a Ia tafiesea mea leaga, lea o le a faamatala e le mataupu o sosoo mai.