Ua faatusaina le oti i le moe, auā o ē ua feoti e latou te lē toe iloa se mea ma e leai se gaoioiga e mafai ona toe faia. Peitaʻi, o loo iai i Lē na foafoaina i tatou le mana e toe faatūina ai ē ua feoti. E faamaonia lenā tulaga i le mana na tuuina atu e Ieova iā Iesu, e toe faatūina mai ai le toʻatele o ē na feoti.​—Faitau le Failauga 9:5; Ioane 11:11, 43, 44.

Ua folafola mai e le Atua, o le a ia toe faatūina mai i se lalolagi fou amiotonu i latou uma o loo i tuugamau ae o loo ia manatuaina pea. E latou te iai pea i le tuugamau, seʻia oo i le taimi atofaina e toe faatūina ai e le Atua i latou. O loo matuā naunau le Atua Silisili Ese e faaaogā lona mana e faatūina ai i latou ua feoti.​—Faitau le Iopu 14:14, 15.

Pe a toe faatūina e le Atua ē ua feoti, o le a mafai ona latou iloa i latou lava, o a latou uō ma o latou aiga. E ui lava e pala le tino o le tagata pe a oti, ae e iai i le Atua le mana e toe faatūina mai ai lenā tagata i se tino fou.​—Faitau le 1 Korinito 15:35, 38.

E toʻaitiiti i latou e maua le faamoemoe e ola ai i le lagi. (Faaaliga 20:6) O le toʻatele o i latou o le a toe faatūina mai, o le a ola i se lalolagi parataiso, o se amataga fou lea i o latou olaga, faatasi ai ma le faamoemoe e ola e faavavau.​—Faitau le Salamo 37:29; Mataio 5:5; Galuega 24:15.