I LANA lauga taʻutaʻua iā Aokuso 28, 1963, na taʻua ai e Martin Luther King, Jr., o se taʻitaʻi faapolotiki, lona faanaunauga sa iai. Na ia tulimataʻia le taimi o le a olioli ai tagata i se olaga e aunoa ma le faailogatagata. E ui ina lauga atu i se aofia i Amerika, ae na lagolagoina e le toʻatele mai i isi atunuu le autū o lana feʻau.

Iā Novema 20, 1963, e silia ma le 100 atunuu na lagolagoina le taʻutinoga aloaʻia na faia e Malo Aufaatasi, e aveesea ai so o se ituaiga o faailogatagata. I tausaga mulimuli ane, na faia ai foʻi isi taʻutinoga. O lea, ua tulaʻi ai se fesili, o ā iʻuga na maua mai i na taumafaiga?

Iā Mati 21, 2012, na faapea mai ai le failautusi o Malo Aufaatasi o Ban Ki-moon: “E tele maliega ma tulafono o loo faia e faigāmalo e taofia ma aveesea atoatoa ai le faailogatagata, feitagaʻi, manatu faapito faapea ma isi uiga e fesootaʻi i le faailogatagata. Peitaʻi, o loo pagatia pea le toʻatele ona o le faailogatagata.”

E oo lava i atunuu ua iai suiga ona o a latou taumafaiga e aveesea le faailogatagata, e tumau pea le fesili: Po ua mafai e na taumafaiga ona aveesea atoatoa uiga faailogatagata ua mauaa i loto o tagata, po ua natia ai o latou faalogona moni? E talitonu nisi, e pau le aogā o le taofia ai lea o le faileagaina o tagata, ae lē mafai ona aveesea ai lagona ita lea e uunaʻia ai le faailogatagata. O le ā le māfuaaga? O le faileagaina o tagata o se gaoioiga e mafai ona faasalaina ai i le tulafono. Ae e lē mafai ona molia se tasi, pe a iai uiga faailogatagata lea e sau mai le loto.

Ina ia aveesea atoatoa le faailogatagata, e lē gata e tatau ona taofia gaoioiga o le faileagaina o tagata, ae e tatau foʻi ona suia uiga ma manatu i tagata o le isi ituaiga. Pe e mafai ona tupu lenā mea? Pe afai e mafai, e faapefea? Seʻi o tatou talanoaina ni mea na tutupu, e faamaonia ai e mafai e tagata ona faia suiga, ma po o le ā foʻi na fesoasoani iā i latou.

Linda: Na ou fanau i Aferika i Saute. Sa masani ona ou manatu i tagata uli o ni ē faatauvaa, lē lava aʻoaʻoga, lē maufaatuatuaina, ma o ni pologa mo tagata papaʻe. Ou te leʻi iloaina ua amata ona ou mafaufau e pei o sē e faailogatagata. Peitaʻi, na amata ona suia oʻu uiga ina ua ou suʻesuʻeina le Tusi Paia. Na ou aʻoaʻoina ai ʻe lē faailogatagata le Atua,’ ma e sili atu ona tāua le loto nai lo o le lanu o o tatou paʻu, faapea le gagana e tautatala ai. (Galuega 10:34, 35; Faataoto 17:3) Na fesoasoani le Filipi 2:3 ou te iloa ai, pe a ou manatu e sili isi iā te aʻu, o le a mafai ona aveesea oʻu uiga faailogatagata. O mataupu silisili faapena, ua fesoasoani iā te aʻu e faaalia ai le naunau i isi e tusa po o le ā lo latou lanu. Ua ou lagona le tuusaʻoloto mai i lenei uiga o le faailogatagata.

Mikaele: Na ou ola aʻe i se vaipanoa i Ausetalia e toʻatele ai tagata papaʻe. O lea, sa amata ai ona iai iā te aʻu ni uiga faailogatagata agaʻi i tagata Asia aemaise lava i tagata Saina. Pe a ou  faimalaga i se taavale ae ou vaaia se tasi e foliga pei o se Asia, e vili i lalo le faamalama ma ou valaau i ai, e toe foʻi i lo latou atunuu. Peitaʻi, ina ua ou suʻesuʻeina le Tusi Paia, na ou aʻoaʻoina ai le silafaga a le Atua i tagata. Po o fea lava e latou te ō mai ai, e alofa le Atua iā i latou. Na pāʻia loʻu loto i lenei mea, ma na suia ai oʻu lagona ita i le alofa. O se suiga na matuā faafiafiaina ai aʻu. Ua ou fiafia foʻi e auaufaatasi ma tagata mai so o se atunuu ma so o se talaaga. Ua fesoasoani lea iā te aʻu e iai se vaaiga paleni i le olaga, ma ua ou maua ai le olioli tele.

Sandra: Na fanau loʻu tinā i Umunede i Delta State i Nigeria, ae o loʻu tamā e sau mai Edo State, ma e tautala i le gagana Esan. Sa matuā pagatia loʻu tinā seʻia oo lava i le aso na maliu ai, ona o uiga faailogatagata o le aiga o loʻu tamā. O lea, na ou tautō ai ou te lē toe faifaimea faatasi ma tagata e tautatala i le gagana Esan, pe faaipoipo foʻi i se tasi mai le Edo State. Ae na amata ona suia le auala ou te manatu ai ina ua ou suʻesuʻeina le Tusi Paia. Ua faapea mai le Tusi Paia, e lē faailoga tagata le Atua, ma o lē e mataʻu iā te ia, e talia e ia. O lea, o ai la aʻu e ʻinoʻino ai i tagata ona o lo latou ituaiga po o le gagana? Na suia le auala ou te mafaufau ai, ma faaleleia la matou faiā ma le aiga o loʻu tamā. Ua ou maua le fiafia faapea le filemu o le mafaufau, ona o le faatatauina o mataupu silisili o le Tusi Paia. Ua mafai foʻi ona matou faifaimea faatasi ma isi, e tusa po o le ā le talaaga, ituaiga, gagana po o le atunuu. Na iʻu lava ina ou faaipoipo i se tagata mai Edo State, ma e tautala i le gagana Esan.

Ona o le Tusi Paia o le Afioga a le Atua, ua mafai ai ona fesoasoani iā i latou nei faapea isi, ina ia manumalo mai nei uiga faailogatagata. E iai le mana i le Tusi Paia e suia ai uiga o se tasi faapea le auala e manatu ai i isi. E lē gata i lea,  o loo taʻua ai foʻi isi gaoioiga e tatau ona fai ina ia aveesea atoatoa ai so o se ituaiga faailogatagata.

E lua vala e tatau ona aveesea a o leʻi aveesea atoatoa le faailogatagata. Muamua, o le agasala ma le tulaga lē lelei atoatoa. Ua faapea mai le Tusi Paia: “E leai lava se tagata e lē agasala.” (1 Tupu 8:46) Po o ā lava a tatou taumafaiga, e tatou te feagai pea ma le feteenaʻiga sa feagai ma le aposetolo o Paulo, lea na ia taʻua i le Roma 7:21 e faapea, “pe a ou loto atu e fai le mea lelei, ae ua iā te aʻu le leaga.” O lea, mai lea taimi i lea taimi, e lolo atu pea o tatou loto i “mafaufauga leaga,” ma iʻu ai i le faaalia o le faailogatagata.​—Mareko 7:21.

Lona lua, o taaʻiga a Satani le Tiapolo, o lē o loo faamatalaina i le Tusi Paia “o le fasioti tagata,” ma “o lē ua faasesēina le lalolagi atoa.” (Ioane 8:44; Faaaliga 12:9) O le māfuaaga lenā ua taatele ai le faailogatagata, ma foliga mai ai ua lē taulau tagata i le aveesea o le feitagaʻi, faileagaina o tagata, tafiesea atoatoa o se vaega o tagata, ma isi vala e fesootaʻi atu i le faailogatagata.

O lea, a o leʻi aveesea atoatoa le faailogatagata, e tatau ona aveesea muamua le agasala ma le tulaga lē lelei atoatoa, faapea taaʻiga a Satani. Ua faaalia i le Tusi Paia, o le mea lenā o le a faataunuuina e le Malo o le Atua.

Na aʻoaʻoina e Iesu ona soo e tatalo: “Ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:10) E na o le Malo o le Atua e mafai ona aveesea atoatoa faiga lē tonu uma, lea e aofia ai vala uma o le faailogatagata.

Pe a oo i le taimi e pule ai le Malo o le Atua i le lalolagi, o le a “saisai” pe taofia Satani, “ina neʻi faasesēina e ia o atunuu.” (Faaaliga 20:2, 3) Mulimuli ane, ona iai lea o se sosaiete o tagata po o se ʻlalolagi fou e mau ai le amiotonu.’ *​—2 Peteru 3:13.

O le a lelei atoatoa i latou uma e ola i lenā lalolagi fou. (Roma 8:21) I le avea ai ma tagatānuu o le Malo o le Atua, “e latou te lē faia se mea e lamatia ai pe faaleagaina se mea.” Aiseā? “Auā o le a tumu le lalolagi i le poto e uiga iā Ieova.” (Isaia 11:9) O le a aʻoaʻoina e tagata ala o Ieova, ma faaaʻoaʻo i ona uiga alofa. O lea, o le a aveesea atoatoa le faailogatagata, “auā e lē faailoga tagata le Atua.”​—Roma 2:11.