E faapefea ona maua le finagalo malie o le Atua? Pe e tatau ona tatou usitaʻia ni tulafono se tele? E leai, auā na taʻua e Iesu Keriso, e tasi lava le upu e aotele uma ai mea e faafinagaloina e le Atua mai iā i tatou.​—Faitau le Mareko 12:28-31.

I a Nisani 11 a o lata i le maliu o Iesu, sa ō atu ai ni taʻitaʻi lotu i le malumalu ma fai atu ni fesili tofotofo iā te iā. Peitaʻi, sa matuā lē magagana i latou ona o le atamai o ana tali. O lea na latou fesili atu ai loa: “O lē fea poloaʻiga e sili i poloaʻiga uma?”​—Fuaiupu e 28.

E faigatā tele lenā fesili. Na finauina e isi tagata Iutaia, po o fea le tulafono e sili ona tāua mai i tulafono e silia ma le 600, ia o loo i le Tulafono a Mose. Ae na manatu isi, e tutusa uma le tāua o nei tulafono. O lea, o le a faapefea ona tali atu Iesu?

Na taʻua e Iesu ni poloaʻiga se lua. Muamua: “Ia e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa, ma lou malosi atoa.” (Fuaiupu e 30; Teuteronome 6:5) E taitutusa uiga o le upu “loto,” “ola,” “mafaufau,” ma le “malosi.” O lona uiga: O le alofa iā Ieova e tatau ona aofia ai le tagata atoa ma le auala e mafaufau ai. Ua taʻua atili i se lomifefiloi e faapea: “E tatau ona alolofa atoatoa atu i le Atua.” O lea, o lo tatou alolofa i le Atua, o le a tatou faia ai mea uma ina ia faafiafiaina ai lona finagalo.​—1 Ioane 5:3.

Lona lua, na faapea atu Iesu: “Ia e alofa atu i lou tuaoi e pei o oe lava iā te oe.” (Fuaiupu e 31; Levitiko 19:18) E fesootaʻi le alofa i le Atua ma le alofa i tuaoi, auā o le alofa i le Atua e uunaʻia ai i tatou e alolofa atu foʻi i tuaoi. (1 Ioane 4:20, 21) O le a tatou feutagaʻi ma i latou, i se auala e tatou mananaʻo foʻi i isi ina ia faia mai iā i tatou. (Mataio 7:12) O le faia faapea ua tatou faaalia ai le alofa i le Atua, o lē na faia i tatou uma i lona faatusa.​—Kenese 1:26.

O le ā le tāua o nei poloaʻiga? Na taʻua e Iesu e faapea, “e leai lava se isi poloaʻiga e sili atu i lo o ia poloaʻiga,” ma o nei poloaʻiga e faavae mai ai le Tulafono.​—Fuaiupu e 31; Mataio 22:40.

E lē faigatā le faafiafiaina o Ieova. E tasi le upu e aotele ai mea uma e finagalo ai o ia mai iā i tatou: alofa. E finagalo Ieova i ana auauna ina ia alolofa atu pea iā te ia. O lenā alofa e tatau ona faaalia atu e ala i gaoioiga. (1 Ioane 3:18) Aiseā e te lē aʻoaʻoina atili ai nisi o auala e faaaʻoaʻo ma atiaʻe ai le alofa mo Ieova, le Atua “o le alofa lava ia”?​—1 Ioane 4:8.