Ia Mafuta Atu i le Atua

Po o E Iai i le “Tusi Faamanatu” a le Atua?

PE E mātaulia e Ieova taumafaiga a ona tagata ina ia faafiafia o ia? Ioe! E lē gata e na te mātauina a latou amio Atua ma upu o viiga, ae e na te silafia lelei foʻi o latou manatunatuga e uiga iā te Ia. Ae sili atu i lenā, e na te lē faagaloina ona tagata ma mea o loo latou faia. E faapefea ona tatou iloa? E maua le tali i upu o loo faamauina e le perofeta o Malaki.—Faitau le Malaki 3:16.

A o faia valoaga a le perofeta o Malaki i le senituri lona lima T.L.M., o le taimi lenā na matuā leaga ai amioga ma faiga faalelotu i Isaraelu. Na tuulafoaʻia e ositaulaga a latou matafaioi, ma ua amata ona fai e tagata mea e lē faamamaluina ai le Atua e pei o faiga faataulāitu, mulilua, ma le taufaasesē. (Malaki 2:8; 3:5) Peitaʻi, mai le lotolotoi o na faiga piʻopiʻo, sa iai lava tagata Isaraelu na faamaoni. O ā mea na latou faia?

Na faapea mai Malaki, “E fetautalaaʻi ai i latou o ē e matataʻu iā Ieova.” O le mataʻu i le Atua o se uiga lelei. O loo faamatala e Malaki i inei tagata Isaraelu sa faaalia le faaaloalo loloto i le Atua, ma lē faia ni mea e faatigā ai lona finagalo. Ia mātau, e “fetautalaaʻi ai i latou” e matataʻu i le Atua. O lona uiga, e latou te faatasitasi e talanoa e uiga iā Ieova, ma faalaeiau le tasi i le isi, ina ia aua neʻi lotovaivai, pe pisipisia i faiga piʻopiʻo o loo siʻomia ai i latou.

E iai se isi auala tāua na faaalia ai e tagata Isaraelu faamaoni lo latou alolofa loloto mo Ieova. Na latou “manatunatu i lona suafa.” O loo taʻua i se isi faaliliuga o le Tusi Paia e faapea, “faatāua Lona suafa.” O ē na matataʻu iā Ieova, na latou faamamaluina o ia e ala i o latou manatunatuga. E oo foʻi i o latou loto, na latou manatunatu ai iā Ieova ma lona suafa sili. Po o silafia e Ieova mea o loo latou faia?

Na taʻua e Malaki: “E uaʻi mai pea Ieova ma faafofoga mai i ai.” E ui e maualuga le afioaga o Ieova i le lagi, ae e faafofoga mai pea i viiga a ona tagata a o latou fetalanoaaʻi, ma uaʻi mai i o latou manatunatuga uma. (Salamo 139:2) Ae e sili atu mea e na te faia nai lo na o le faafofoga mai i upu ma manatunatuga lelei a ona tagata.

Ua faapea mai Malaki: “Ona amata ai lea ona tusia le tusi e faamanatu ai i ona luma.” O loo tusia i lenā tusi i latou o loo auauna iā Ieova ma le faamaoni. Ia mātau, o loo taʻua o le “tusi e faamanatu ai i ona luma.” * Ua faailoa mai i lenā tusi, e lē galo iā Ieova ana auauna faamaoni ma mea o loo latou faia e viia ai o ia, e pei o galuega lelei, upu ma manatunatuga. Ae e iai se māfuaaga e manatua ai i latou e le Atua. Na ia folafola mai, o le a maua e i latou e iai pea o latou igoa i lana tusi faamanatu le ola e faavavau. *—Salamo 37:29.

Maʻeu le faamāfanafanaina o i tatou i le iloa, e faatāua e Ieova mea uma e tatou te faia e auauna ai iā te ia i se auala e na te taliaina! O upu o loo i le Malaki 3:16, e uunaʻia ai i tatou e manatunatu i la tatou faiā ma Ieova. E lelei pe a fesili ifo, ʻPo o iai loʻu igoa i le “tusi faamanatu” a le Atua?’ E mafai pe afai e tatou te faia taumafaiga uma e gaoioi, tautatala, ma manatunatu i aso uma i le auala e finagalo malie i ai Ieova.

Faitauga Tusi Paia mo Tesema:

▪ Nauma 1-3–Malaki 1-4

[Faaopoopoga i lalo]