Ua Fesili Mai le ʻAufaitau . . .

Pe e Avea le Faatuatua o se Toomaga mo Ou Faalogona?

▪ O le toomaga mo faalogona, o se faalogona e faapogaia ai se tagata e lē amanaʻia mea moni, ma taofia ai o ia mai le faaalia o le mafaufau lelei. O se faataʻitaʻiga, ua fai e isi le ʻava malosi ma toomaga. I le taimi muamua, e mafai e le ʻava malosi ona faapogaia se tasi e faafetaiaʻia faigatā o le olaga. Ae a o faagasolo taimi, o le a faaleagaina e i latou o loo toomaga atu i le ʻava malosi i latou lava. Pe e faapena foʻi le faatuatua?

E manatu le toʻatele, o se tagata e faatuatua e tutusa ma sē e faaseegofie, ma e musu e fai sana lava faaiʻuga. O nisi tagata faitio, e manatu i tagata e malolosi lo latou faatuatua, e lē amanaʻia mea moni o loo tutupu.

E tele faamatalaga a le Tusi Paia e faatatau i le faatuatua. Ae e lē o faamalosia mai ai i tatou ina ia talitonu pe e faatuatua i upu uma tatou te faalogo ai. Nai lo lea, o loo taʻua i le Tusi Paia tagata e faapena o ni ē e vālea. (Faataoto 14:15, 18) Ioe, o se mea valea le talitonu pe e faatuatua i se faamatalaga e aunoa ma ni faamaoniga! E tai pei lenā o se tagata e pupuni ona mata ma kolosi se auala e pisi i taavale, ona na faatonu o ia e se tasi e fai.

E lē o faapea mai le Tusi Paia ia faatuatua e aunoa ma se faavae, ae ua apoapoaʻi mai e mataala ina ia aua neʻi faasesēina i tatou. (Mataio 16:6) E faaauau ona tatou mataala e ala i le faaaogā o o tatou “mafaufau lelei.” (Roma 12:1) Ua toleniina i tatou e le Tusi Paia e manatunatu i faamaoniga, ma faia faaiʻuga e faavae mai i mea moni ua uma ona suʻesuʻeina. Seʻi iloilo nisi o faataʻitaʻiga mai i tusitusiga a le aposetolo o Paulo.

Ina ua tusi atu Paulo i le faapotopotoga i Roma, e leʻi manaʻo o ia ia latou talitonu i le Atua, ona na ia fai atu ai. Nai lo o lea, na ia faalaeiau i latou e iloilo faamaoniga e iloa ai e moni lava le Atua. Na ia tusi atu: “Auā o ona [Atua] uiga lē vaaia, ua vaaia lava ia talu ona foafoaina le lalolagi, ona ua mafai ona vaaia i mea na faia, e oo foʻi i lona mana e faavavau ma lona tulaga o le Atua, o lea ua lē mautali ai i latou [ē teena le Atua].” (Roma 1:20) Na faaaogā foʻi e Paulo se fautuaga talitutusa ina ua tusi atu i tagata Eperu: “O le mea moni, e tofu lava le fale ma le tagata na ia faia, a o lē na faia mea uma o le Atua lea.” (Eperu 3:4) Ina ua tusi atu foʻi i Kerisiano i Tesalonia, na ia faalaeiau i latou e filifili ma le poto mea o le a talitonu i ai. Na ia manaʻo ina ia latou “tofotofo i mea uma.”—1 Tesalonia 5:21.

E mafai ona avea se faatuatua e lē faavaea o se mea e toomaga i ai, ae e iʻu atu ai i mafatiaga ma faasesēina ai tagata. Na tusi Paulo e uiga i tagata tapuaʻi i ona taimi e faapea: “Ua ou molimau iā i latou, ua latou maelega i le Atua, ae e lē tusa ai ma le poto saʻo.” (Roma 10:2) E tāua tele ona tatou amanaʻia fautuaga a Paulo i le faapotopotoga i Roma! Na ia tusi e faapea: “Ia liliu e ala i le suia o o outou mafaufau, ina ia faamaonia e outou lava po o le ā le finagalo o le Atua, lea e lelei, e mālie, ma lelei atoatoa.” (Roma 12:2) O le faatuatua e faavae mai i le poto saʻo e uiga i le Atua e lē o se toomaga, ae o se “talita telē,” e puipuia ai i tatou mai i le faaleagaina tau i faalogona ma le faaleagaga.—Efeso 6:16.

[Ata i le itulau 23]

O le faatuatua e mafai ona avea ma talita e puipuia ai i tatou