E Mafai e le Tusi Paia Ona Suia Olaga

NA FAAPEFEA ona avea se tamāloa e leʻi fiafia lona olaga tuputupu aʻe, o se tamā ma se tane fiafia ma taulau manuia? O le ā na uunaʻia ai se fafine na iai ni ana masaniga leaga, ina ia faamamā lona olaga? Faitau i a la tala.

“Sa ou lagona le lē aogā.”—VÍCTOR HUGO HERRERA

TAUSAGA FANAU: 1974

ATUNUU: CHILE

TALAAGA: PULEA E LE ʻAVA MALOSI

OLAGA SA IAI: Sa ou fanau i le aai o Angol, i le itu i saute o Chile. Ou te leʻi iloa lava po o ai loʻu tamā, ma o le tolu o oʻu tausaga sa matou siitia ai ma loʻu tinā ma loʻu uso, i le laumua o Chile o Santiago. Sa matou nonofo i se tamaʻi potu mo tagata matitiva na leai ni fale, faaaogāina se falelētaʻua na faaaogā e le lautele, ma maua a matou vai mai i se paipa e faaaogā e le ʻau tinei mū.

Na maua so matou tamaʻi fale mai i le malo ina ua mavae le lua tausaga. Peitaʻi, o le tele o tagata sa i lo matou vaipanoa, sa faaaogāina fualaau faasāina, o le ʻava malosi, faia solitulafono, ma faiga faatalitane.

Sa feiloaʻi loʻu tinā ma se isi tamāloa, ma na la faaipoipo mulimuli ane. O loʻu tamāfai o se tagata e inu tele, ma e na te fasia aʻu ma loʻu tinā. E masani ona ou tagi na o aʻu ma ou mafaufau, maʻimau pe ana iai soʻu tamā e puipuia aʻu.

E ui e galue mamafa loʻu tinā e tausia i matou, ae sa matou matitiva pea, ma o nisi o taimi e pau la matou mea e ʻai o le susu pauta ma le suka. E masani ona ma sosola ma loʻu uso e matamata atu i le faamalamalama o la matou tuaoi i lana TV, ae ina ua ia maua i maʻua, na ma lē toe ō ai loa.

O nisi taimi pe a lē onā loʻu tamāfai, e na te faatauina mai ni meaʻai mo i maʻua ma loʻu uso. I se tasi o aso sa ia faatauina mai ai se tamaʻi TV, ma o se tasi na o taimi na ou fiafia ai.

O le 12 o oʻu tausaga na aʻo ai laʻu faitau, ma o le tausaga na sosoo ai na ou tuua ai le aʻoga ae faigaluega faasolo atoa. Pe a mānava le galuega, e matou te ō ma aʻu uō e matou te patī ma onanā ai, ma faaaogā fualaau faasāina, ma e leʻi umi ae fai ma aʻu masani.

O le 20 o oʻu tausaga na ma feiloaʻi ai ma Cati, o lē na mulimuli ane ma faaipoipo. Na sologa lelei mea i le amataga, ae e leʻi umi ae ou toe foʻi i loʻu olaga tuai ma ua faateteleina loʻu leaga. Sa ou iloa ane, ou te ono falepuipui po ou te oti foʻi, ona o loʻu olaga o loo ou ola ai. O le mea e sili ona leaga, o mea sa oo iā  te aʻu a o ou laʻitiiti, o lea foʻi ua mafatia ai si oʻu atalii o Víctor. Sa ou lagona le lē aogā, faanoanoa, ma le ita.

O le 2001 na asiasi mai ai ni Molimau a Ieova se toʻalua i lo matou fale ma suʻesuʻe ai ma Cati i le Tusi Paia, ma sa papatiso o ia i le 2003. O loʻu fia iloa na ou suʻesuʻe ai foʻi i le Tusi Paia.

SUIA E LE TUSI PAIA LOʻU OLAGA: I se tasi o aso, sa ou faitau ai i le Ruta 2:12, e faapea e tauia e Ieova i latou e gaoioi ma le faamaoni, ma sulufaʻi atu iā te ia. Na ou iloa ai, e mafai ona ou faafiafia le Atua ma e na te tauia aʻu pe a ou faia ni suiga. Sa ou mātauina foʻi o loo tele ina taʻusalaina e le Tusi Paia le onā. Na lafoaʻia aʻu masaniga leaga ona o le apoapoaʻiga a le 2 Korinito 7:1, ina ia ʻfaamamā iā i tatou mai i mea uma e faaleagaina ai.’ Sa faateteleina loʻu ita a o amata ona faia suiga i loʻu olaga, ae sa lagolagosua mai pea Cati iā te aʻu.

Na ou tuua laʻu galuega ona na faaosoosoina ai aʻu e ulaula ma inu ʻava malosi. E ui sa lē lava ai le faasoa, ae na ou maua ai le tele o le taimi e suʻesuʻe ai le Tusi Paia, ma agaʻigaʻi ai i luma faaleagaga. E lē taitai ona tagisā Cati, pe e faitio mai i le olaga faafaigofie sa matou ola ai. Ou te lagona le lotofaafetai ona o lana lagolagosua alofa.

Na amata ona matou faifaimea faatasi ma Molimau, ma na latou fesoasoani iā te aʻu ia iloa, e ui i le lē lelei o loʻu tulaga aʻoaʻoina, ae e faatāua e Ieova loʻu faanaunauga faamaoni e auauna iā te ia. Na telē se aafiaga i lo matou aiga ina ua vāai i le alofa ma le autasi o le faapotopotoga Kerisiano, auā e matou te leʻi maua lava lea ituaiga o filemu i se isi mea. O lea, sa ou papatiso ai iā Tesema i le 2004.

AOGĀ IĀ TE AʻU: Ua ou iloa le moni o upu a Ieova i le Isaia 48:17 e faapea: “O aʻu o Ieova, lou Atua, o Lē o loo aʻoaʻo oe i mea e aogā iā te oe.” Na matuā maofa loʻu uso ma loʻu tinā i suiga i loʻu olaga, o lea ua la suʻesuʻeina ai nei le Tusi Paia. E oo lava i o matou tuaoi, ua matuā fiafia i suiga ua latou vaaia iā te aʻu, aemaise le fiafia ua iai lo matou aiga.

Ua ou maua se avā e alofa i le Atua, ma e manatu iā te aʻu o se uō maufaatuatuaina. E ui lava ou te leʻi iloa loʻu tamā, ae ua fesoasoani mai le Tusi Paia i le tausiga o oʻu atalii e toʻatolu, ma e latou te faaaloalogia aʻu. O le mea e sili ona tāua ona e latou te talitonu e iai moni lava Ieova, ma ua latou atiaʻe le alofa mo ia.

Ou te lagona le lotofaafetai, ona e ui sa lē fiafia loʻu olaga a o ou laʻitiiti, ae ua aumaia e Ieova iā te aʻu le avanoa e avea ai o se tane fiafia.

 “O aʻu o se tamaʻitaʻi maitaita ma inainā.”—NABIHA LAZAROVA

TAUSAGA FANAU: 1974

ATUNUU: BULGARIA

TALAAGA: FAATAU ATU FUALAAU FAASĀINA

OLAGA SA IAI: Sa ou fanau i Sofia, i Bulgaria, mai i se aiga e feoloolo le tamaoaiga. Sa faateʻia i matou ina ua tuua e loʻu tamā lo matou aiga i le 6 o oʻu tausaga, ma na ou matuā mafatia ai. Na ou lagona le tuulafoaʻiina ma ou manatu e maʻimau le alofa o isi iā te aʻu. A o ou tuputupu aʻe, sa avea nei faalogona ma pogai o loʻu fouvale. O aʻu o se tamaʻitaʻi maitaita ma inainā.

Na ou sola ese mai i lo matou aiga i le 14 o oʻu tausaga, ma e masani ona ou gaoi ni tupe mai i loʻu tinā po o ona mātua. E masani ona faasala aʻu i le aʻoga ona o loʻu uiga maitaita, ma e na o ni nai tausaga ae ua lima aʻoga na ave i ai aʻu. Na ou tuua le aʻoga a o toe tolu tausaga ou faauu. Na ou ola i se olaga e matuā lē mamā, inu tele i le ʻava malosi, ulaula, patī, ma faaaogā ma faatau atu fualaau faasāina. O loʻu mafatia i puapuaga ma le maliliu o tagata i lenei lalolagi e leai se faamoemoe, sa ou faia ai so o mea na ou fiafia i ai, e aunoa ma le mafaufau po o fea o le a iʻu i ai.

I le tausaga e 1998, ina ua 24 oʻu tausaga, sa puʻea ai aʻu e leoleo i le malae vaalele i São Paulo, i Pasili, ona sa ou tauaveina ni fualaau faasāina, ma na faafalepuipui ai aʻu mo le 4 tausaga.

SUIA E LE TUSI PAIA LOʻU OLAGA: O le 2000 na amata ai ona asiasi atu Molimau a Ieova i le falepuipui i vaiaso taʻitasi. Sa agalelei mai iā te aʻu se Molimau e suafa iā Marines, ma na uunaʻia ai aʻu e suʻesuʻe le Tusi Paia. Talu ai ou te leʻi faalogo lava i Molimau a Ieova, o lea na ou fesili ai i nisi o pagota i so latou manatu. Na faateʻia aʻu ona e leai ma se tasi e fiafia i Molimau, ma na faapea mai se tasi o i latou, e sili loʻu alu i se isi lotu nai lo o Molimau a Ieova. O lenā faamatalaga na ou fia iloa ai le māfuaaga ua matuā itagia ai Molimau a Ieova. Na mulimuli ane ou iloa, o le māfuaaga ona o loo faatino e Molimau le tapuaʻiga moni, auā o loo faapea mai le Tusi Paia, o so o se tagata faamaoni lava e taumafai e mulimuli iā Iesu, o le a sauāina.—2 Timoteo 3:12.

A o faagasolo lenā taimi, na tofia aʻu ou te faigaluega i le ofisa o le pulega a le falepuipui. I se tasi o aso, sa ou maua ai ni pusa o ni mekasini * tuai o Olomatamata ma Ala Mai! O le tele o loʻu faitauina o nei mekasini, na atili ai ona ou lagona ua pei aʻu o se tagata o loo i le toafa, ua faatoʻā maua se vaieli o vai mamā. Ona sa tele loʻu avanoa e maua, o lea sa ou suʻesuʻeina ai le Tusi Paia i aso uma mo le tele o itula.

O se tasi o aso sa aami atu ai aʻu i le ofisa o le falepuipui. Ona na ou manatu o le a tatalaina aʻu, o lea sa ou tapena ai aʻu mea uma, faamavae atu i nisi o pagota, ma tamoʻe atu loa i le ofisa. Peitaʻi ina ua ou taunuu atu i le  ofisa, sa ou iloa ai ua iai se isi moliaga fou e faasaga iā te aʻu, e aofia ai le umia o ni pepa taufaasesē, ma sa toe faasala ai aʻu mo le isi lua tausaga.

E ui lava sa ou mafatia i lenā mea, ae na mulimuli ane na avea ma faamanuiaga, ona sa ou manaʻomia atili se taimi e suia ai loʻu olaga. Auā e ui lava na ou aʻoaʻoina le tele o upu moni mai i le Tusi Paia, ae i loʻu loto, na ou manaʻo lava e toe foʻi i loʻu olaga tuai pe afai ou te magalo.

O nisi o taimi ou te mafaufau e lē mafai ona talia aʻu e le Atua ina ia avea ma ona tagata tapuaʻi. Ae sa ou manatunatu loloto i le 1 Korinito 6:9-11, lea o loo taʻua ai nisi o Kerisiano i le uluaʻi senituri, o ē na avea o ni tagata onanā, gāoi, ma fai mea piʻopiʻo, ae na suia o latou olaga e ala i le fesoasoani a Ieova. O la latou faaaʻoaʻoga sa matuā pāʻia ai loʻu loto.

Sa faigofie ona ou tuua nisi o aʻu masaniga lē lelei e pei o le faaaogā o fualaau faasāina, ae sa faigatā tele ona tuua le ulaula. E silia ma le tausaga o faia taumafaiga e tuua le ulaula ma na ou taulau manuia. O se tasi o mea sa fesoasoani iā te aʻu, o le mafaufau lea i le faaleagaina o le soifua mālōlōina ona o le tapaa. Ae e sili atu i lenā, sa ou taulau ona o le tatalo e lē aunoa iā Ieova.

A o ou mafuta vavalalata atu iā Ieova, sa faasolosolo mālie lava ona mou atu oʻu faalogona lē lelei sa iai ina ua tuua matou e loʻu tamā. Na matuā pāʻia loʻu loto i upu o le Salamo 27:10 e faapea: “E tusa pe tuua aʻu e loʻu lava tamā ma loʻu lava tinā, ae e talia lava aʻu e Ieova.” Ua ou iloa nei ua ou maua se Tamā e sili ona lelei ma e lē taitai ona tuulafoaʻiina aʻu! O lenei ua iai se fuafuaga o loʻu olaga, ma iā Aperila 2004 ina ua 6 masina talu ona ou magalo, sa ou papatiso ai loa e avea ma Molimau a Ieova.

AOGĀ IĀ TE AʻU: Ua ou saʻoloto mai i masaniga leaga, ma ua ou fiafia nei ma maua se soifua mālōlōina lelei i le tino faapea ma faalogona, nai lo o le taimi a o ou laʻitiiti. Ua ou maua se faaipoipoga fiafia, se faauōga māfana ma loʻu Tama i le lagi o Ieova, ma ua ou maua i ona tagata tapuaʻi le tele o tamā, tinā, tuagane, ma uso. (Mareko 10:29, 30) Ou te faafetai, ona sa latou mātauina se mea lelei mai iā te aʻu, e ui sa ou vaai maulalo iā te aʻu lava.

O nisi taimi e lofitūina ai aʻu i faalogona nofosala ona o loʻu olaga tuai. Ae ou te lagona le māfanafana, ona ua folafola mai e le Atua, i le lalolagi fou o le a “lē toe manatua” mea leaga ua tuanaʻi. (Isaia 65:17) Ua fesoasoani foʻi le mea na tupu iā te aʻu, ou te faaalia ai le alofa i ē o feagai foʻi ma tulaga faapea. O se faataʻitaʻiga, i le talaʻiga, e faigofie ona ou talanoa i tagata e faaaogāina fualaau faasāina, ʻava malosi po o ē solitulafono, e aunoa ma le faamasinosino. Ou te mautinoa, afai na ou faia ni suiga e faafiafia ai Ieova, e mafai foʻi la e so o se tasi ona faia faapea!

[Faaopoopoga i lalo]

[Ata i le itulau 26]

[Ata i le itulau 27]

[Faamatalaga faaopoopo i le itulau 27]

“E ui lava ou te leʻi iloa loʻu tamā, ae ua fesoasoani mai le Tusi Paia i le tausiga o oʻu atalii e toʻatolu”

[Ata i le itulau 29]

[Faamatalaga faaopoopoi le itulau 29]

“Ua ou maua se Tamā e sili ona lelei ma e lē taitai ona tuulafoaʻiina aʻu!”