Ia Aʻoaʻo Lau Fanau

Na Taʻua i Laʻua o “Atalii o le Faititili”

I TAIMI o afā malolosi, atonu e te faalogoina ai faititili leotetele. Pe na e fefe ai?— * E toʻalua soo o Iesu na ia taʻua o “Atalii o Faititili.” Seʻi faitau i le māfuaaga sa ia faia ai faapea.

O nei soo e toʻalua o Iesu e igoa iā Iakopo ma Ioane. O i laʻua o se ʻauuso, ma o le fanau tama a Sepetaio ma Salome. O Salome, atonu o se uso o Maria, le tinā o Iesu. E foliga mai la o ni tauusoga o Iesu ia Iakopo ma Ioane, ma atonu sa uō lelei i latou a o feola faatasi aʻe.

O Sepetaio o se faifaiva, ma e faapena foʻi Iakopo ma Ioane. O i laʻua ia sa aofia ai i ē na muamua filifilia e Iesu e avea ma ona soo. Ina ua valaaulia i laʻua e Iesu, ona la tuua loa lea o la la pisinisi faifaiva ma mulimuli atu iā te ia. Mulimuli ane, ona filifilia lea e Iesu ona soo e toʻa 12 e avea ma ona aposetolo. Na aofia ai Iakopo ma Ioane iā i latou nei.

I ni nai masina a o leʻi fasiotia Iesu, na ia savalia ai ma ona aposetolo le vaega maugā o Samaria. Ua amata ona pogisa, ma ua latou lē lavavā. Ae e leʻi mananaʻo tagata Samaria e nonofo Iesu ma ona aposetolo i lo latou aai i le pō. Pe e te iloa le māfuaaga?— Seʻi o tatou vāai.

O Iesu ma ona aposetolo o ni tagata Iutaia, ma o le toʻatele o le ʻau Iutaia e agaleaga i tagata Samaria. Ae e lē faapena Iesu. Na ia faaalia le agalelei i tagata Samaria, ma sa tatau foʻi ona faia faapea e Iakopo ma Ioane. Ae na lē fiafia nei soo e toʻalua i tagata Samaria o ē e  leʻi talia i latou, ma na la faapea atu iā Iesu: ʻE te finagalo ea e ma te fai atu ina ia alu ifo le afi e faaumatia ai i latou?’ Faamata o le ā se tala a Iesu?— Na fetalai atu Iesu e lē tatau ona la tautatala faapea! Sa tele pea mea na manaʻomia ona aʻoaʻoina e Iakopo ma Ioane e uiga i le alofa mutimutivale.

O le isi faafitauli o Iakopo ma Ioane o le fia muamua, ma le fia avea ma ē e sili ona tāua. A o lata i le maliu o Iesu, na auina atu e Iakopo ma Ioane lo la tinā iā te ia ma le talosaga e faapea: “Ia e fetalai ane ina ia nonofo laʻu fanau e toʻalua, o le tasi i lou itu taumatau a o le isi i lou itu tauagavale i lou malo.” O lea, ina ua faalogo isi aposetolo e toʻasefulu i le mea ua faia e Iakopo ma Ioane, ona feita ai lea o i latou. Pe e lē faapena foʻi ou lagona?—

Atonu e faapena foʻi oe, auā e tatou te lē fiafia pe a fia muamua isi ma avea ma ē e sili ona tāua i lo i tatou. Mulimuli ane, na iloa e Iakopo ma Ioane le leaga ma le lē alofa o uiga sa la faaalia, ma na la faia ai loa ni suiga. Na avea i laʻua ma aposetolo e sili ona alolofa ma agalelei. O le ā se lesona mo i tatou?—

Ua tatou aʻoaʻoina mai iā Iesu se lesona ina ia agalelei foʻi le tasi i le isi. Na agalelei foʻi Iesu i tagata, e aofia ai tamāloloa, fafine, ma tamaiti. Po o le a e taumafai malosi pea e manatua lana faaaʻoaʻoga ma faataʻitaʻi i ai?—

Faitau i lau Tusi Paia

Mareko 3:17

Mataio 27:55, 56; Mareko 15:40, 41

Mataio 4:18-22

Ioane 4:4-15, 21-26; Luka 9:51-55

Mataio 20:20-24; Mareko 10:35-37, 41

[Faaopoopoga i lalo]