“E Paia, e Paia, e Paia Ieova”
Ia Mafuta Atu i le Atua
“E Paia, e Paia, e Paia Ieova”
O LE ā se upu o le a e filifilia e faamatala ai Ieova le Atua? I le senituri lona valu T.L.M., sa iloa ai e le perofeta o Isaia se faaaliga, lea na ia faalogoina ai foafoaga agaga o faaneenee atu iā Ieova e ala i le faaaogāina o le upu paia, e faamatala ai se tasi o itu tāua o ona uiga. O le mea na vaaia ma faalogoina e Isaia e mafai ona faatumulia ai i tatou i le mataʻu, ma mafuta vavalalata ai iā Ieova. A o iloiloina upu o loo i le Isaia 6:1-3, seʻi mafaufau o loo e iai i inā i le mea o loo tupu.
O le ā ua vaaia e Isaia? Ua faapea mai o ia: “Ua ou iloa ai Ieova o loo afio i lona nofoālii sili ma le maualuga.” (Fuaiupu 1) E leʻi vaaitino Isaia iā Ieova le Alii Pule Silisili Ese, auā e lē mafai e mata faaletino ona vaai i se foafoaga agaga. O loo faaalia manino mai i le Tusi Paia e faapea: “E leai lava se tasi ua vaai i le Atua.” (Ioane 1:18) O se faaaliga le mea o loo vaaia e Isaia. * Peitaʻi, sa matuā manino le faaaliga ma sa matuā maofa ai o ia, ma e peiseaʻī ua vaai atu iā Ieova.
Ua sosoo nei ma le vaaia e Isaia o se mea atonu e leʻi vaaia muamua e se tagata i se faaaliga. Na tusi o ia e faapea: “Ua tutū serafi e latalata ane [iā Ieova]. Ua tofu ma apaʻau taʻiono. E lua e na te ufiufi ai ona foliga, e lua e na te ufiufi ai ona vae, ma le isi lua e feleleaʻi ai.” (Fuaiupu e 2) O serafi o ni foafoaga agaga e maualuluga o latou tulaga, ma e na o Isaia le tusitala o le Tusi Paia na taʻua i latou. E nofosauni i latou i taimi uma ina ia ō atu ma faia so o se mea e finagalo iai Ieova. E latou te faaalia le migao ma le faaaloalo mo Ieova, ma o se matuā faaeaga sili le auauna iā te ia.
Na matuā maofa Isaia e lē gata i mea na vaai i ai, ae o mea foʻi na faalogo i ai. Na faia aʻe e serafi se ʻaufaipese i le lagi, o ē o loo pepese leotetele. Na tusi Isaia e faapea: “Ua valaau atu le tasi i le isi ma faapea atu: ʻE paia, e paia, e paia Ieova o ʻau.’” (Fuaiupu e 3) O le upu Eperu ua faaliliuina i le “paia,” e faamatala ai le manatu o le mamā ma le amio saʻo. E aofia ai ma “le manatu o le saʻoloto atoatoa ma le vavaeese mai i mea e agasala ai.” I la latou pese fetaliaʻi lea atonu e faaauau pea, na usuina faatolu ai e serafi le upu “paia” e faamautinoa ai le matuā paia tele o Ieova. (Faaaliga 4:8) O lea la, o le paia o se tasi o uiga e iloa ai o Ia. O le mea moni, e matuā mamā, e amio saʻo, ma e lē ponā Ieova.
O le iloaina o le tulaga paia o Ieova e uunaʻia ai i tatou ina ia mafuta vavalalata atu iā te ia. Aiseā? E saʻoloto atoatoa Ieova mai i le agasala, ma e lē pei o ia o taʻitaʻi faaletagata e leaga ma sauā. O lona tulaga paia ua mafai ona faamautinoa atili mai ai o le a avea pea o ia ma Tamā e lelei atoatoa, o se Pule amiotonu, ma o se Faamasino e lē faailogatagata. Ua iā i tatou la māfuaaga uma e mautinoa ai, o le a lē taitai ona faatigā mai le Atua o lē e paia.
Faitauga Tusi Paia mo Tesema:
[Faaopoopoga i lalo]
^ pala. 4 Ua faamatalaina i le Insight on the Scriptures e faapea: “Pe afai e vaaia e se tasi se faaaliga mai i le Atua a o ala o ia, e foliga mai la o se faaataga i lona mafaufau. Atonu o le a manatuaina le faaaliga i se taimi mulimuli ane, ona faamatalaina lea pe e faamauina e lē na vaaia i ana lava upu.”—Lomia e Molimau a Ieova.
[Faamatalaga faaopoopo i le itulau 26]
O le iloaina o le tulaga paia o Ieova e uunaʻia ai i tatou ina ia mafuta vavalalata atu iā te ia
