Ia Mafuta Atu i le Atua

Ua Manatua e Ieova o le “Efuefu Lava i Tatou”

U A FAAPEA mai se tamaʻitaʻi Kerisiano e uiga i mea sesē sa ia faia i taimi ua teʻa: “Ou te leʻi talitonu e faamagalo atoatoa aʻu e le Atua, ma sa ou manatu o le a ou amoina lenei avega mamafa i loʻu olaga atoa.” O le mea moni, o se avega mamafa le iai o ni faalogona nofosala. Peitaʻi, ua taʻua i le Tusi Paia le faamāfanafanaga e fesoasoani ai i mafatiaga o ē ua salamō. Mātau upu a le faisalamo o Tavita i le Salamo 103:8-14.

Na iloa lelei e Tavita, e “alofa mutimutivale Ieova” ma “e lē vaavaai masei pea o ia” iā i tatou. (Fuaiupu e 8-10) Pe a silafia e le Atua e iai se māfuaaga e faaalia ai le alofa mutimutivale, e na te faia faapea, ma lē toe taʻua a tatou agasala. Na taʻua e Tavita, o se fatusolo mauupu, ni talafaatusa se tolu e faataʻitaʻia mai ai le matuā tele o le alofa mutimutivale o le Atua.

“Auā e pei ona maualuga atu o le lagi i le lalolagi, e faapea foʻi ona sili atu lona alofa faamaoni iā i latou e matataʻu iā te ia.” (Fuaiupu e 11) Pe a tatou vāai atu i le lagi i se pō maninoa, e lē mafai ona tatou iloa le mamao o fetu mai le lalolagi. Ua faaalia mai e Tavita le matuā tele o le alofa mutimutivale o Ieova, o se tafa o lona alofa faamaoni. E faaalia lenei alofa mutimutivale “iā i latou e matataʻu” i le Atua, ma na taʻua i latou e se tagata atamai, o “ē e lotomaulalo ma faaaloalo loloto i lana pule.”

“E pei ona vavamamao o le mea e oso aʻe ai le lā mai i le mea e goto ifo ai, e faapea foʻi ona faamamao e ia o a tatou solitulafono mai iā i tatou.” (Fuaiupu e 12) Ua taʻua i isi faaliliuga, “e pei ona vavamamao o sasaʻe ma sisifo.” O le ā le mamao? E matuā mamao lava. Ua faapea mai se tasi tusi faale-Tusi Paia: “Seʻi manatu o oe o se manulele ma o loo e lele i le vanimonimo agaʻi i le itu i sasaʻe. O taimi uma e apatā ai ou apaʻau, ua atili ai foʻi ona e mamao ese mai i le itu i sisifo.” Ua faailoa mai e Tavita i inei, pe a faamagalo e le Atua a tatou agasala, e na te faamamao a tatou agasala mai iā i tatou.

“E pei ona alofa mutimutivale o le tamā i lana fanau, e faapea foʻi ona faaalia e Ieova le alofa mutimutivale iā i latou e matataʻu iā te ia.” (Fuaiupu e 13) Ona o Tavita o se tamā, na ia iloa lelei lagona e iai i se tamā alofa. E lagona e se tamā faapena le tigā alofa i lana fanau, aemaise lava pe a mafatia i latou. Ua faaalia e Tavita, e alofa mutimutivale lo tatou Tamā i le lagi i lana fanau i le lalolagi, aemaise lava pe a “momomo ma nutimomoia” loto o ē ua salamō ona o a latou agasala.—Salamo 51:17.

Ina ua uma ona taʻua e Tavita nei talafaatusa e tolu, ona ia faailoa mai lea o le māfuaaga ua alofa mutimutivale ai Ieova i tagata agasala: “Auā ua silafia lelei e ia le mea na faia ai i tatou, ua ia manatua o le efuefu lava i tatou.” (Fuaiupu e 14) Ua silafia e Ieova na faia i tatou i le efuefu, ma e iai o tatou vaivaiga ma mea e gata mai ai lo tatou malosi. O le silafia lelei e Ieova o lo tatou tulaga agasala, ua ia “nofosauni [ai] e faamagalo” i tatou pe a tatou salamō moni.—Salamo 86:5.

Pe e faamāfanafanaina oe i upu a Tavita e uiga i le alofa mutimutivale o Ieova? O le tamaʻitaʻi lea na taʻua i le amataga, sa suʻesuʻe o ia i le Tusi Paia e uiga i le nofosauni o le Atua e faamagalo agasala. Na ia faapea mai: “Ua ou lagona nei, ua mafai ona ou mafuta atu iā Ieova ma ua matuu ese atu se avega mamafa.” * O se mea lelei, pe a e aʻoaʻo atili e uiga i le alofa mutimutivale o le Atua ma le auala e maua ai. Atonu o le a e lagona ai foʻi le matuu ese atu o se avega.

Faitauga Tusi Paia mo Aokuso:

▪ Salamo 87-118

[Faaopoopoga i lalo]

[Ata i le itulau 13]

“Ua ou lagona nei, ua mafai ona ou mafuta atu iā Ieova ma ua matuu ese atu se avega mamafa.”