O Auala e Fiafia ai le Aiga

Ia Āva i Lou Toʻalua Faaipoipo

Ua fai mai Uili *: “A tigā le loto o Rasela, e umi lava se taimi o tagi. Pe a ma taumafai e talanoa, e maitaita o ia pe lē fia talanoa mai foʻi. Ua ou lē iloa le mea a fai ma ua tauau ina ou fiu.”

Ua fai mai Rasela: “E sau Uili i le fale o oʻu tagi. Na ou taumafai e faamatala atu le mea ua ou tagi ai, ae faasalavei mai. Na fai mai o ia e lē tāua lenā mea, ma e sili ona faagalo. Na atili ai loʻu tagi.”

PE NA iai se taimi na tutusa ai ou lagona ma lagona o Uili ma Rasela? E mananaʻo e talatalanoa, ae e lē taitai iʻu lelei na talanoaga. Aiseā?

E eseese lava auala e faaali ai manatu o tamāloloa ma fafine, ma e eseese foʻi o latou faanaunauga. Atonu e naunau se fafine e faaleo atu ona faalogona i taimi uma. Ae o le tele o tamāloloa, e mananaʻo e tausi le filemu, e ala i le vave foʻia o le faafitauli ma ʻalofia mataupu faigatā. E faapefea la ona foʻia nei feeseeseaʻiga, ma talanoa lelei ma lau tane po o lau avā? E ala i le āva i lou toʻalua.

O le tagata faaaloalo e na te faatāua isi ma taumafai e malamalama i o latou faalogona. Na aʻoaʻoina oe mai i lou laʻitiiti ia faaaloalo i ē e iai le pule, pe sili atu lo latou poto masani. Ae ona ua e faaipoipo, e lē faigofie ona e āva i lou toʻalua o sē e taitutusa o oulua tausaga ma tulaga. Ua faapea mai Lina ua valu tausaga talu ona faaipoipo: “Na ou iloa e faalogologo lelei ma onosaʻi Filipo i faamatalaga a isi. Na ou manaʻo ia faapena mai foʻi iā te aʻu.” E lē taumatea ua e faalogo ma le onosaʻi, ma tautala ma le faaaloalo i au uō ma tagata e te lē masani ai. Ae faamata o e faia faapena i lou toʻalua?

O le leai o se āva i totonu o le aiga, e oo atu ai i faalogona lē fiafia ma le femisaaʻi. Na taʻua e se tupu poto: “E sili le iai o se fasi falaoa ua magumagu a o iai le filemu, nai lo o le fale ua tumu i manu ua fasia a ua iai le femisaaʻi.” (Faataoto 17:1) Ua faatonuina e le Tusi Paia le tane ina ia āva ma faaaloalo i lana avā. (1 Peteru 3:7) E ao foʻi i le ʻavā ona matuā faaaloalo i lana tane.’—Efeso 5:33.

 E faapefea ona lua fetalanoaaʻi ma le faaaloalo? Seʻi manatunatu i fautuaga aogā mai i le Tusi Paia.

Pe a Fia Fai se Tala a Lou Toʻalua

Le Faafitauli: E toʻatele tagata e fiafia e tautatala atu ae e lē fia faalogo. Pe e te faapena? Ua taʻua i le Tusi Paia, o se tagata e ʻtali atu i se mataupu ae e leʻi faalogo i ai’ e valea o ia. (Faataoto 18:13) O lea, a o leʻi fai atu se tala, ia faalogo muamua. Aiseā? Ua faapea mai Tala ua 26 tausaga talu ona faaipoipo: “Ou te lē manaʻo e foʻia e laʻu tane le faafitauli i le taimi lava lenā. E lē manaʻomia foʻi ona ioe mai o ia, pe saʻili i le māfuaaga o le faafitauli. E pau le mea ou te manaʻo i ai, o le faalogo mai ma malamalama i oʻu faalogona.”

Ae e faigatā i isi tane ma avā ona taʻu atu o latou faalogona, ma e lē fiafia pe a tauanau e o latou taʻitoʻalua e faia faapea. Ua iloa e Lagi, o sē e leʻi leva ona faaipoipo, e umi se taimi faatoʻā faailoa mai e lana tane ona faalogona. Ua fai mai o ia: “E tatau ona ou onosaʻi ma faatali seʻia oo i le taimi e fia talanoa ai o ia.”

Auala e Foʻia Ai: Pe a e fia talanoa i lou toʻalua i se mataupu maʻaleʻale, e lelei pe a faia a o toʻafilemu ma lelei mea uma. Ae ā pe a lē fia talanoa lou toʻalua? Ia mātau, “o manatunatuga i le loto o le tagata, o vai loloto ia, a o le tagata e iai le faautaga loloto, e na te utufia mai ai.” (Faataoto 20:5) Pe a vave ona e sisi maia i luga se pakete mai i se vaieli, o le a toe masaa ese le tele o vai. E faapena foʻi pe a e tauanau lou toʻalua e talanoa mai, o le a musu o ia ma mou atu ai le avanoa e talanoa faalelei ai. Nai lo o lea, ia fesili atu i se auala lemū ma le faaaloalo, ma ia onosaʻi pe afai e lē faaali vave maia ona faalogona e pei ona e manaʻo ai.

Pe afai ua talanoa atu lou toʻalua, ia “faalogologo lelei, . . . aua le vave ona tautala, ma aua foʻi le vave ona ita.” (Iakopo 1:19) Ia faalogologo lelei pe a talanoa mai lou toʻalua, ma ia taumafai foʻi e malamalama i le māfuaaga o ana faamatalaga. O le auala e te faalogo ai, o le a iloa ai e lou toʻalua pe e te faaaloalo iā te ia pe leai.

Na aʻoaʻoina i tatou e Iesu i le auala e faalogo ai. O se faaaʻoaʻoga, ina ua alu atu iā te ia se tamāloa maʻi mo se fesoasoani, e na te leʻi foʻia loa i le taimi lenā le faafitauli. Muamua, na ia faalogo atu i le talosaga a le tamāloa. O lona faalogologo lelei, na oso aʻe ai lona alofa ma ia faamālōlōina ai loa le tamāloa. (Mareko 1:40-42) E faapena foʻi pe a talanoa mai lou toʻalua. Ia manatua, e manaʻo o ia ina ia e faalogo ma malamalama i ona faalogona, ae e lē o le vave foʻia o le faafitauli. O lea, ia faalogologo lelei, ma ia faaalia le alofa iā te ia, ona mafai ai lea ona e fesoasoani i lou toʻalua. O le faia faapea, e faaalia ai lou āva iā te ia.

FAATAʻITAʻI LE MEA LENEI: O le isi taimi e talanoa atu ai lou toʻalua iā te oe, aua le vave tali atu. Faatali seʻi uma mai lana faamatalaga ma ua e malamalama i lana tala. Fesili i ai i se taimi mulimuli ane: “Pe e te manatu sa ou faalogologo lelei iā te oe?”

Pe a Fia Fai Atu Sau Tala

Le Faafitauli: Ua faapea mai Lina lea na taʻua muamua: “E faaalia i ata faasolo mālie i le TV, e pei e leai se afāina o faamatalaga lē faaaloalo e uiga i le avā po o le tane, ma lafo atu tala faatigā loto iā te ia.” O nisi e ola aʻe i aiga e masani i le faia o faamatalaga lē mafaufau, ma e faapena foʻi pe a oo ina faaipoipo. Ua faapea mai Ivy e nofo i Kanata: “Sa ou ola aʻe i se aiga e masani i le feʻei, faia o faaupuga lē mafaufau ma tala tutui.”

Auala e Foʻia Ai: Pe a e talanoa atu i isi e uiga i lou toʻalua, ia “fai atu ni upu lelei e atiaʻe ai i taimi e tatau ai, ina ia aogā i ē o faalogologo i ai.” (Efeso 4:29) Ia fai ni tala lelei e uiga i lou toʻalua ina ia faaaloalogia ai o ia e isi.

 Ia aua neʻi lafo atu ni faamatalaga lē mafaufau ma ni tala tutui i lou toʻalua, e tusa lava pe a na o oulua. I Isaraelu anamua, sa matuā ita tele Mekala i lana tane, le tupu o Tavita. Sa ia lafo atu ni faaupuga tutui e faapea, ua pei Tavita o se ʻtagata valea.’ O ana upu na matuā tigā ai le loto o Tavita ma lē fiafia ai foʻi le finagalo o le Atua. (2 Samuelu 6:20-23) O le ā le lesona? Ia mafaufau lelei i au upu e fai atu i lou toʻalua. (Kolose 4:6) Ua taʻua e Filipo o lē ua valu tausaga talu ona faaipoipo, e iai taimi e feeseeseaʻi ai i laʻua ma lana avā ma o ana tala e fai atu, e atili ai ona telē le faafitauli. Ua ia faapea mai: “Ua ou iloa, e lē lelei pe a lē fia toʻilalo se tasi i se finauga. E sili atu ona lelei ma aogā le taumafai e faaleleia la ma mafutaga.”

I aso anamua, na fautua atu ai se tinā matua ua oti lana tane i avā a lana fanau, ina ʻia maua e i laʻua taʻitoʻatasi le mapusaga i le aiga o lana tane.’ (Ruta 1:9) Pe afai e āva le tasi i le isi, o le a avea ai lo la aiga ma “mapusaga.”

FAATAʻITAʻI LE MEA LENEI: Ia faatulaga se taimi e talatalanoa ai ma lou toʻalua i manatu nei. Ia fesili i lou toʻalua: “Pe a ou talanoa i isi e uiga iā te oe, po o faaaloalogia pe e taʻu faatauvaaina ai oe? O ā ni suiga e manaʻomia ona ou faia?” Ia matuā faalogologo lelei a o faaali mai faalogona o lou toʻalua. Ia taumafai e faaaogā fautuaga a lou toʻalua.

Ia Iloa e Ese Manatu ma Uiga o Lou Toʻalua

Le Faafitauli: Ua faauigasesē e nisi o ulugalii fou le faamatalaga a le Tusi Paia e uiga i le avea ma “tino e tasi” e faapea, e tatau ona tutusa manatu ma uiga. (Mataio 19:5) Peitaʻi, e vave ona la iloa e lē moni lenā manatu, auā pe a mavae sina taimi talu ona faaipoipo, e masani ona mapuna aʻe eseesega i o la manatu ma uiga. Ua toe faapea mai Lina: “E eseese tele i maʻua ma Filipo, ona e lē popolevale e pei o aʻu. E iai taimi ou te popole ai ae e nofonofo lelei lava o ia, e na o loʻu ita ai ona e foliga e lē ano mai i mea ou te popole ai.”

Auala e Foʻia Ai: Ia talia uiga ma manatu o lou toʻalua, e ui ina ese mai iā te oe. O se faataʻitaʻiga: Ina ia mafai ona e kolosi ma le saogalemu i se auala pisi, e ao ona galulue faatasi ou mata ma ou taliga e ui ina eseese aogā. Ua faapea mai Atalina, ua toetoe 30 tausaga talu ona faaipoipo: “Afai e lē feteenaʻi o ma manatu ma le Afioga a le Atua, e ma te lotomalilie la e talia le manatu o le isi e ui ina ese, auā e ui ina ua ma faaipoipo, ae e eseese o ma manatu ma uiga.”

Pe afai e ese manatu po o uiga o lou toʻalua mai iā te oe, ia aua neʻi e manatu na o oe lava. Ia amanaʻia ona faalogona. (Filipi 2:4) Ua taʻutino mai e Keli, le tane a Atalina: “E lē o taimi uma ou te malamalama pe ioe ai i manatu o laʻu avā. Ae ou te taumafai ia manatua, e sili atu ona tāua loʻu toʻalua i lo o oʻu manatu. Ou te fiafia pe a fiafia foʻi o ia.”

FAATAʻITAʻI LE MEA LENEI: Ia faia se lisi o itu e sili ai manatu o lou toʻalua i lo oe, po o auala e na te taulimaina ai mea.—Filipi 2:3.

O le āva, o se tasi lea o auala i le mauaina o se faaipoipoga e fiafia ma tumau. Ua faapea mai Lina: “E maua le fiafia ma le saogalemu i se faaipoipoga, pe a āva le tasi i le isi. E tāua tele lenei uiga.”

[Faaopoopoga i lalo]

FESILI IFO IĀ TE OE LAVA . . .

▪ E faapefea ona aogā i lo ma aiga manatu ma uiga o loʻu toʻalua e ese mai iā te aʻu?

▪ Aiseā e lelei ai ona lolo atu i manatu o loʻu toʻalua pe afai e lē feteenaʻi ma taʻiala o le Tusi Paia?