Ua Fesili Mai le ʻAufaitau . . .

Pe e ō uma i le lagi Kerisiano faamaoni?

▪ O le toʻatele ua faitau i upu faalaeiau a Iesu: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.” (Ioane 3:16) Po o le uiga o le fetalaiga a Iesu, e ola e faavavau i le lagi i latou uma e tapuaʻi ma le faamaoni i lona Tamā o Ieova?

Mātau mai le fetalaiga tāua a Iesu: “E leai . . . se tasi na alu aʻe i le lagi, e na o lē na alu ifo mai i le lagi, o le Atalii lea o le tagata.” (Ioane 3:13) Ua faaalia i nei upu, e leʻi ō i le lagi tagata tapuaʻi faamaoni anamua, e pei o Noa, Aperaamo, Mose, ma Tavita. (Galuega 2:34) O fea la na ō i ai? O loo momoe i tuugamau nei auauna faamaoni anamua a le Atua, e faatalitali ai le toetū.​—Failauga 9:5, 6; Galuega 24:15.

Na taʻua foʻi e Iesu le faamatalaga muamua o loo i le Tusi Paia e faatatau i le ola i le lagi pe a mavae le oti. Na ia fetalai atu i ona aposetolo o le a ia saunia se nofoaga mo i latou i le lagi. (Ioane 14:2, 3) O se mea fou lenei i tagata o le Atua. Na faamatala mulimuli ane e le aposetolo o Paulo e faapea, ina ua mavae le maliu ma le toetū o Iesu ma ina ua afio i le lagi, na ia ʻtatalaina ai mo ona soo se ala fou e ola ai,’ o se mea e leʻi tupu muamua i se isi tagata.​—Eperu 10:19, 20.

Po o lona uiga, na amata mai i lenā taimi ona ō tagata faamaoni uma i le lagi? E leai, auā o le toetū i le lagi e mo na o se vaega o tagata e maua se tofi faapitoa. I le pō mulimuli na faatasi ai Iesu ma ona soo na ia fetalai iā i latou, o le a latou “nonofo i nofoālii ma faamasino” i lona Malo i le lagi. O lea la, o lo latou tofi o le pule faatasi ma Iesu i le lagi.​—Luka 22:28-30.

E maua foʻi e nisi tagata lenei tofi matagofie, ae lē na o le ʻauaposetolo. Na vaaia e le aposetolo o Ioane i se faaaliga, se vaega o tagata ua toetutū ma faatasi ma Iesu i le lagi, ma ua avea i latou o le ʻmalo ma ositaulaga e pule mai i le lalolagi.’ (Faaaliga 3:21; 5:10) E toʻafia lo latou aofaʻi? O so o se faigāmalo lava, e na o se vaega o tagata e avea ma pule. E faapena foʻi le Malo i le lagi. E 144,000 ē “ua faatauina mai i tagata” o le a pule faatasi ma Iesu le Tamaʻi Mamoe a le Atua.​—Faaaliga 14:1, 4, 5.

E moni o le 144,000 o se fuainumera itiiti, pe a fua i le tele o tagata faamaoni mai anamuā seʻia oo mai i le taimi nei. Ae o se tulaga lea e tatou te faatalitalia, auā e iai se tofiga faapitoa mo le 144,000 pe a toetutū ma ō i le lagi. O se faataʻitaʻiga, pe afai o fia fau sou fale, po o le a e faafaigaluega uma tagata o lou nuu e tomai i le faufale? E leai. E na o ni tagata e manaʻomia mo le galuega. O lea la, e lē filifilia foʻi e le Atua tagata faamaoni uma, mo le faaeaga faapitoa e pule faatasi ma Keriso i le lagi.

O le a faataunuuina e lenei malo i le lagi le finagalo o le Atua mo tagata i le amataga. O le a vaavaaia e Iesu ma le 144,000 le toe faafouina o le lalolagi e avea ma parataiso, e nonofo fiafia ai e faavavau tagata e lē mafaitaulia. (Isaia 45:18; Faaaliga 21:3, 4) E aofia ai foʻi ma ē e toe faatutū mai e le Atua mai i le oti.—Ioane 5:28, 29.

O le a maua e tagata tapuaʻi faamaoni uma o Ieova i aso ua mavae ma aso nei, le meaalofa matagofie o le ola e faavavau. (Roma 6:23) E toʻaitiiti e maua se tofiga faapitoa ma ola ai i le lagi, ae o le toʻatele lava e ola i le parataiso i le lalolagi.