E te Silafia?

Aiseā ua taʻu mai ai na nonofo Peteru ma sē e saunia paʻu o manu, a o leʻi faatonuina o ia e alu atu iā Konelio?

▪ O loo taʻua i le Galuega sa nofo Peteru “i Iopa mo ni nai aso, faatasi ma le tasi tagata e igoa iā Simona o lē e galue e saunia paʻu o manu,” e lata lona fale i le sami. (Galuega 9:43; 10:6) Na vaai maulalo tagata Iutaia i le saunia o paʻu o manu o se galuega e lē mamā. I le Tusi Tulafono a tagata Iutaia, e faatauvaa atu i latou e saunia paʻu o manu i lo o ē e aoina otaota o manu. Sa lote e Simona manu ua mamate ona o lana galuega, ma ua lē mamā ai o ia i taimi uma e tusa ma le tulafono a le Atua. (Levitiko 5:2; 11:39) E tusa ai ma tala a isi, e foliga mai sa faaaogā e Simona le suāsami i lana galuega, ma atonu sa i le taufaasiʻusiʻuga o le taulaga lona fale sa galue ai, ona e “manogi leaga” le saunia o paʻu o manu.

E ui i lea, e leʻi musu Peteru e nonofo ma Simona. Ua faailoa mai ai, ua iloa e Peteru e ao ona teena uiga faailogatagata o le ʻau Iutaia i ē e manatu i ai e leaga, e pei foʻi ona sa teena e Iesu.​—Mataio 9:11; Luka 7:36-50.

O le ā le uiga o upu a Iesu, “o lenā tonu lava ua e tali mai ai”?

▪ Ina ua faatonuina Iesu e Kaiafa le ositaulaga sili a Iutaia, ina ia taʻutino mai po o ia o Keriso le Alo o le Atua, na tali atu Iesu: “O lenā tonu lava ua e tali mai ai.” (Mataio 26:63, 64) O le ā le uiga o ana upu?

E leʻi taumafai Iesu e ʻalofia le fesili a Kaiafa. O le faaupuga “o lenā tonu lava ua e tali mai ai,” e foliga mai o se faaupuga e masani ai Iutaia, e iloa ai e moni se faamatalaga. O se faataʻitaʻiga, o loo taʻua i le Tusi Tulafono a Iutaia lea na tuufaatasia i le senituri lona fā T.A., o se alii na fesiligia po ua maliu se tasi o rapi, na tali mai o ia: “O lenā ua e fai mai ai.” O lona uiga, ua maliu le rapi.

Sa iloa e Iesu e iai i le ositaulaga le pule e faatautō ai o ia e taʻutino le mea moni. E lē gata i lea, o le lē tali atu o Iesu, e tusa ua ia faafiti o ia o le Keriso. O le tali atu la a Iesu: “O lenā tonu lava ua e tali mai ai,” o se tali mautinoa lea e avatu i le ositaulaga sili. O le tala a Mareko e uiga i lea lava mataupu, ina ua fesiligia e Kaiafa Iesu ina ia taʻutino mai po o Ia o le Mesia, na tali atu ma le lototele Iesu: “O lea lava.”—Mareko 14:61, 62; tagaʻi i le Mataio 26:25 ma le Mareko 15:2.

[Ata i le itulau 18]

O se fale e saunia ai paʻu o manu i Fez, i Morocco