“Pe e Alofa Ieova iā i Matou o Initia?”
O se Tusi Mai Mekisikō
“Pe e Alofa Ieova iā i Matou o Initia?”
O SE tagata e igoa iā Melesio e tautala i le gagana O’dam, e masani ona alu ifo mai le mauga e suʻe sana galuega. E auai i sauniga a Molimau a Ieova ma e alu ma ave lomiga e tufa i tagata o lona nuu. Na ia talosaga mai e alu atu se tasi o le ʻauuso e aʻoaʻo i latou e uiga i le Tusi Paia.
O tagata o le nuu o O’dam, e nonofo mamao ese i atumauga o Sierras, i mātū o Mekisikō tutotonu, e tusa ma le 150 maila (240 km) le mamao mai i le faapotopotoga e lata ane o Molimau a Ieova. Na filifili nisi o i matou e asiasi atu iā i latou.
Na maua sa matou pikiapu, faleʻie, ma mea e momoe ai, na lava foʻi meaʻai ma penisini na ave mo aso e tolu, ona matou tuua loa lea o le aai o Durango. Na amata ona matou malaga i le 4 i le vaveao, ma e valu itula na malaga ai i le auala pefu i atumauga, seʻia oo i le mea e gata ai le auala. O i inā e amata ai le vaipanoa o O’dam. I luma atu e iai se vanu ma se isi foʻi mauga.
Na tuu la matou pikiapu i se nuu i inā, ae matou savavali mo le tolu itula, ma ave a matou mea i lalo i le vanu. O i inā na matou tolauapi ai, ao mai fafie o le afi e tutuli ai manufeʻai, ma e taʻi tolu itula na matou momoe feauauaʻi ai e tafu le afi.
I le taeaopō na sosoo ai, na matou āʻea ai le mauga. E tele auala felavasaʻi, ma o nisi taimi e matou te sē ai. E iai se tasi o la matou vaega e tau iloa sina faa-O’dam, o lea na matou talaʻi ai i so o se fale e tau atu i ai. Na faateʻia i matou ina ua faamatala mai e tagata, o le nuu lea e matou te ō i ai o Los Arenales, o loo iai nisi e fai mai o i latou o Molimau a Ieova, ma e fai a latou sauniga faale-Tusi Paia. O se tala na faateʻia, ae na faalaeiau ai foʻi i matou.
E matou te taunuu atu i Los Arenales, ua fulafula o matou vae. O fale o le nuu, e faia i le ele ae ato i pepa malō, ma e leai se aʻoga, e leai foʻi se eletise. E matitiva lava le nuu ona e mamao ese, ma e na o panikeke mafolafola e fai i sana ma nai isi mea e ola ai. Na matou maua Melesio, o se alii talavou e faatinoiti, ma ua fiafia lava ina ua vaai mai iā i matou. Na ia valaaulia i matou i si ona tamaʻi fale ma fai mai, o aso uma lava e tatalo ai o ia iā Ieova ina ia auina mai ni Molimau e aʻoaʻo lona aiga ma tagata o lona nuu i le Tusi Paia. E leʻi mafai ona ia taliina a latou fesili uma.
E talitonu le nuu i faiga faataulāitu. E latou te faaaogā mea e pei o fulu ma ponaivi o aeto e tapuaʻi ai i malosiaga faalenatura, ma ola fefefe ai lava i faataulāitu o ē faileagaina i latou. Na faamatala e Melesio, i ana asiasiga i le aai, na ia iloa ai o Ieova o le Atua moni, ma na ia faatamaʻia uma ana faatusa. Na manatu le nuu o le a faasala i le oti o ia e o latou atua. Ae ina ua lē taunuu lenā mea, na latou iloa ai, e sili atu ona mamana Ieova nai lo o o latou atua. O lea, na amata ai loa ona latou auai i suʻesuʻega faale-Tusi Paia na faia e Melesio ma lona aiga, e faaaogā ai a tatou lomiga.
Na faapea mai Melesio, “Na ou fai i ai, e tatau ona susunu uma a latou tapui ma faatusa.” E toʻatele na lē toe fefefe i faiga faataulāitu, ma e sili atu i le 80 tagata na auai i sauniga. O le fiafia tele, na matou manatu ai e faia se sauniga i lenā lava aoauli. Na matou avatu se feʻau i le nuu e ala i tagata tiʻetiʻe solofanua, i ē e masani ona auai i sauniga i le fale o Melesio. E ui o le ogatotonu o le vaiaso lea ua faia ai le sauniga, toe puupuu le taimi na avatu ai le feʻau, ae e toʻa 25 na savavali pe na tiʻetiʻe mai foʻi i asini.
Na matou taliina fesili faale-Tusi Paia a tagata, ae faaliliu e Melesio. Na latou fesili mai: “Pe e alofa Ieova iā i matou o Initia?” “Pe e faafofoga mai o ia i tatalo i le gagana O’dam?” “Pe a oo mai Amaketo, faamata e manatu mai Ieova iā i matou e ui ina mamao ese mai i aai?” Na matou fiafia e faamautinoa atu mai i le Tusi Paia i nei tagata lotomaulalo, e manatu alofa mai Ieova i ē lotomaulalo, e tusa lava po o le ā le gagana e tautatala ai, ma le mamao o le nuu e nonofo ai. Na latou ʻaiʻoi mai iā i matou e auina mai se tasi e aʻoaʻo atili i latou.
Ina ua uma le sauniga, na matou aai faatasi loa ma a matou uō fou. Ina ua oo i le pō, e ese le mālūlū o lenei nofoaga maualuga, o lea, na matou fiafia ina ua faasino mai se potu fou o loo fai e matou te momoe ai. I le taeao na sosoo ai, na latou ave ifo i matou i se auala puupuu i le mea o loo iai la matou pikiapu, ma na matou toe foʻi ai loa i Durango, e vaivai ae fiafia.
O se faaeaga le feiloaʻi ma nei tagata faamaoni, o le toʻatele o i latou e lē iloa faitau pe tusitusi ma tautatala i le gagana Sepania, ae e mananaʻo e aʻoaʻo e uiga i le Atua moni ma tapuaʻi iā te ia. Talu mai la matou asiasiga, e toʻa ono Molimau na ō atu i le nuu ma nonofo ai mo le tolu vaiaso. Na latou fesoasoani atu faaleagaga i tagata e tusa ma le 45 na mananaʻo moni e auauna iā Ieova. E auai e lē aunoa i latou uma i sauniga.
O se isi tala manaia, o le tamaʻi faleoloa lea e i le nuu o Los Arenales, e lē o toe faatauina ai ni sikaleti. Ona e toʻatele i latou o loo suʻesuʻe i le Tusi Paia ua lē toe ulaula. Ua lesitala foʻi a latou faaipoipoga i le malo.
[Ata i le itulau 24]
O Melesio ma lana avā, o ona afafine e toʻafā, ma le tinā o lana avā
[Ata i le itulau 25]
O se suʻesuʻega faale-Tusi Paia ma se sauniga i Los Arenales
[Ē Ana le Ata i le itulau 25]
Servicio Postal Mexicano, Correos de Mekisikō