O Ai o Talaʻia le Tala Lelei?

“O le a talaʻiina atu . . . i le lalolagi atoa.”—MATAIO 24:14.

UA TALAʻIINA atu e Molimau a Ieova le tala lelei i le lalolagi atoa. E eseese auala e latou te faia ai. O se tasi o auala  . . .

E Ala i le Tautala. E ō atu Molimau a Ieova e talaʻi le tala lelei i tagata e pei ona faia e Iesu ma ona soo. (Luka 8:1; 10:1) E latou te lē faatalitalia tagata e ō mai iā i latou. O le talanoa atu i tagata e uiga i le Malo o le Atua, o se galuega o loo faia e Molimau uma e sili atu i le fitu miliona. E latou te talaʻi mai lea fale i lea fale, i auala tetele, i telefoni, ma isi foʻi auala. I le tausaga ua mavae, e sili atu i le tasi ma le ʻafa piliona itula na faaalu e Molimau a Ieova i lenei galuega.

E lē gata e latou te aʻoaʻo isi e uiga i le Malo o le Atua, a o ʻmea uma na poloaʻi mai ai Iesu.’ (Mataio 28:20) E latou te faia e lē aunoa suʻesuʻega faale-Tusi Paia e silia i le valu miliona, e aunoa ma se totogi.

O loo talaʻi atu Molimau i le lalolagi atoa i atunuu e 236, ma so o se tagata. E talaʻi atu i latou i nuu ma aai, i togāvao o le Amazon ma nofoaga mālūlū i Siberia, i toafa o Aferika ma atumauga o Himalaya. E lē totogia i latou i le faia o lenei galuega, ae e faaaogā a latou tupe ma o latou taimi, ona o le alolofa i le Atua ma tuaoi. E latou te faasalalau atu foʻi le tala lelei e ala i . . .

Lomiga. O le igoa atoa o lenei mekasini, Le Olomatamata Faasilasilaina le Malo o Ieova, ua lomia nei i gagana e 185 ma e sili atu i le 42 miliona kopi ua faasalalauina atu o lomiga taʻitasi. Ua faasalalauina atu foʻi e lona soa o le Ala Mai! le Malo i gagana e 83 ma e tusa ma le 40 miliona kopi o lomiga taʻitasi.

O loo maua tusi, polosiua, sāvali, CD po o MP3, ma DVD o loo faamatala ai aʻoaʻoga a le Tusi Paia i gagana e tusa ma le 540. I le sefulu tausaga ua mavae, na saunia ma tufatufaina ai e Molimau le sili atu i le 20 piliona o nei mea uma, a fua i ai, e tusa ma le tolu mea e maua e tagata uma o loo soifua i le lalolagi!

Ua lomia foʻi e Molimau a Ieova, po ua faatonuina le lomia e isi o faaliliuga eseese o le Tusi Paia. O Le Tusi Paia o le Faaliliuga a le Lalolagi Fou—ua faaliliuina, lomia, ma tufatufaina atu e Molimau, ma ua maua nei le Tusi Paia atoa po o se vaega i gagana e 96, ma e sili atu i le 166 miliona kopi ua tufatufaina atu. E faailoa atu foʻi e Molimau a Ieova le tala lelei o le Malo . . .

I a Latou Sauniga. O sauniga faalevaiaso e faia i Maota mo Sauniga, e lē na o ni sauniga  faalelotu, a ua fuafuaina e aʻoaʻo ai tagata. E faavae lauga i mataupu o le Tusi Paia ma e suʻesuʻeina le Tusi Paia e ala i le faaaogā o le Olomatamata ma isi lomiga. E aʻoaʻoina ai foʻi Molimau ina ia sili atu ona lelei le auala e folafola atu ai le tala lelei.

E tasi le mataupu e suʻesuʻe e Molimau a Ieova i le lalolagi aoao i faapotopotoga e silia ma le 107,000, ma faapena ai ona latou autasi. E valaaulia so o se tagata i nei sauniga. E lē aoina ai ni peleti. O le mea moni, e lē aogā nei mea uma pe afai e lē faatinoina e Molimau mea o loo latou talaʻia. O le mea lea, e latou te taumafai ai e lagolagoina le tala lelei . . .

E Ala i Faaaʻoaʻoga Lelei. E latou te taumafai ina ia avea o ni Kerisiano amiolelei, e faia le mea sili mo le lelei o isi, e pei ona mananaʻo e fai mai e isi iā i latou. (Mataio 7:12) E ui e lē lelei atoatoa ma e iai taimi e sesē ai, ae e latou te faaalia le alofa i tagata uma, e lē gata ina taʻu atu i ai le tala lelei, ae e fesoasoani foʻi i ai pe a manaʻomia.

E lē o taumafai Molimau a Ieova e faaliulotu le lalolagi atoa e ala i la latou talaʻiga. Peitaʻi e finagalo loa Ieova ua lava le molimau ua avatu, ona oo mai loa lea o le iʻuga e pei ona valoia e Iesu. O le ā le uiga o lenā mea mo le lalolagi ma tagata o loo soifua ai?

[Ata i le itulau 7]

Ua talaʻiina atu e Molimau a Ieova le tala lelei i le lalolagi atoa