Aʻoaʻoga a le Tusi Paia

O Ai Iesu Keriso?

O loo talanoaina i lenei mataupu fesili atonu e te fia malamalama i ai, ma mau o le Tusi Paia e maua ai tali. E fiafia Molimau a Ieova e tou te talanoa i tali o na fesili.

1. O ai Iesu Keriso?

I le lē pei o isi tagata, sa soifua Iesu i le lagi o se agaga, a o leʻi fanau mai i le lalolagi. (Ioane 8:23) O ia o le uluaʻi foafoaga a le Atua, ma sa fesoasoani i le foafoaina o isi mea uma. E na o ia lava na foafoaina tuusaʻo e Ieova, ma ua taʻua ai o le Atalii “e toʻatasi.” Sa avea Iesu ma Fofoga fetalai o le Atua, ma ua taʻua ai foʻi “o le Upu.”—Ioane 1:1-3, 14; Faitau le Faataoto 8:22, 23, 30; Kolose 1:15, 16.

2. Aiseā na afio mai ai Iesu i le lalolagi?

Na auina mai e le Atua lona Alo i le lalolagi, e ala i le tuuina o lona ola mai le lagi i le manava o se taupou Iutaia e igoa iā Maria. O lea la, e leʻi iai se tamā faaletagata o Iesu. (Luka 1:30-35) Na afio mai Iesu i le lalolagi (1) e aʻoaʻo le upu moni e uiga i le Atua, (2) faataatia se faaaʻoaʻoga i le faia o le finagalo o le Atua, ma le (3) foaʻi mai o lona soifua lelei atoatoa e fai ma “togiola.”—Faitau le Mataio 20:28; Ioane 18:37.

3. Aiseā e tatou te manaʻomia ai se togiola?

O le togiola, o se tau e totogi e faasaʻoloto ai se tagata mai le nofo pologa. E leʻi aofia i le uluaʻi fuafuaga a le Atua mo tagata, le oti ma le olaga matua. E faapefea ona tatou iloa lenā mea? Na taʻu atu e le Atua i le uluaʻi tagata o Atamu, afai e na te faia le agasala e pei ona taʻua i le Tusi Paia, o le a oti o ia. Ana lē agasala Atamu, e lē oti lava o ia. E ui e leʻi oti Atamu seʻia mavae ni senituri mulimuli ane, ae na amata ona oti o ia, mai lava i le aso na lē usiusitaʻi ai i le Atua. (Kenese 2:16, 17; 5:5) Ua tuufaasolo atu e Atamu i ē uma na tupuga mai iā te ia le agasala, ma le faasalaga oti. Ona “oo mai ai” lea o le oti i tagata ona o Atamu. O le pogai lenā e tatou te manaʻomia ai le togiola.—Faitau le Roma 5:12; 6:23.

  4. Aiseā na maliu ai Iesu?

O ai e mafai ona totogia le togiola ina ia faasaʻoloto ai i tatou mai le oti? Pe a tatou feoti, e tatou te totogia le sala mo na o a tatou lava agasala. E lē mafai ona totogia e se tagata e lē lelei atoatoa agasala a isi.—Faitau le Salamo 49:7-9.

Talu ai e leʻi aafia Iesu i le lē lelei atoatoa mai se tamā faaletagata, o lea na maliu ai o ia, e lē ona o ana agasala, ae mo agasala a isi. Na auina mai e le Atua lona Alo e maliu mo i tatou, e faaalia ai Lona alofa tele i tagata. Na faaalia foʻi e Iesu lona alofa mo i tatou i le usiusitaʻi i lona Tamā, ma foaʻi mai lona ola mo a tatou agasala.—Faitau le Ioane 3:16; Roma 5:18, 19.

5. O ā mea o faia e Iesu i le taimi nei?

O le faamālōlōina o maʻi, faatutūina o ē ua oti, ma le laveaʻiina o tagata ua puapuagatia, ua faataʻitaʻia ai mea o le a faia e Iesu mo tagata usiusitaʻi uma. (Luka 18:35-42; Ioane 5:28, 29) Ina ua maliu Iesu, na toe faatū mai o ia e le Atua o se peresona agaga. (1 Peteru 3:18) Na faatali Iesu i le itu taumatau o le Atua seʻi oo i le taimi e tuuina atu ai iā te ia le mana e pule ai o se Tupu i le lalolagi aoao. (Eperu 10:12, 13) Ua pule nei Iesu o se Tupu i le lagi, ma o loo folafola atu e ona soo le tala lelei i le lalolagi aoao.—Faitau le Tanielu 7:13, 14; Mataio 24:14.

E lē o toe umi ae faaaogā loa e Iesu lona mana o se Tupu e aveesea ai puapuaga uma, ma i latou o faapogaia. O le faitau miliona ua faaalia le faatuatua ma usiusitaʻi iā Iesu, o le a olioli i le ola i le parataiso i le lalolagi.—Faitau le Salamo 37:9-11.

Mo nisi faamatalaga, tagaʻi i le mataupu e 4 o lenei tusi, O ā Aʻoaʻoga Moni a le Tusi Paia?, lomia e Molimau a Ieova.

[Ata i le itulau 17]

O le faitau miliona ua faaalia le faatuatua ma usiusitaʻi iā Iesu, o le a olioli i le ola i le parataiso i le lalolagi