Ia Aʻoaʻo Lau Fanau

Sa Alofagia o Ia e le Atua ma Ana Uō

E LEAI se isi i aso nei e iloa lona igoa. Pau le mea e iloa ai o ia o le igoa o lona tamā, o Iefata. Seʻi o tatou vāai i le Tusi Paia e iloa ai mea e uiga iā i laʻua. E tatou te aʻoaʻoina ai le pogai e lē gata na alofagia ai o ia e Ieova, ae o ana uō foʻi.

E tatou te faitau i le tala e uiga iā Iefata ma lona afafine, i le tusi o Faamasino mataupu e 11. Talu ai sa auauna ma le faamaoni Iefata i le Atua, e lē taumatea la sa ia talanoa e lē aunoa i lona afafine e uiga i Tusitusiga Paia.

Na soifua Iefata a o leʻi oo i le taimi na talosaga atu ai tagata Isaraelu mo se tupu faaletagata e pulea i latou. O Iefata o se tagata malosi ma poto e tau. Sa talosaga atu i ai tagata Isaraelu e taʻimua iā i latou i le taua ma tagata Amonī, o se nuu tuaoi na tau ma Isaraelu.

Sa manaʻomia e Iefata le fesoasoani a le Atua ina ia faatoʻilalo ai tagata Amonī, ma o lea na ia faia ai se folafolaga. Na faapea atu o ia afai e tuu mai e Ieova iā te ia le manumalo, o lē e muamua sau i fafo e faafeiloaʻi o ia pe a toe foʻi atu i lona aiga, o le a tuuina atu iā Ieova. O le a auauna lenā tagata i lona olaga atoa i le faleʻie paia o le Atua—o le nofoaga na tapuaʻi atu ai tagata i le Atua i na aso. Pe e te iloa o ai na muamua sau i fafo?— *

 Ioe, o le afafine o Iefata! Sa matuā faanoanoa Iefata, auā e na o le pau lea o lana fanau. Peitaʻi na ia faia se folafolaga iā Ieova ma e tatau ona ia tausia. Na faapea mai lona afafine: “Loʻu tamā e, afai ua e tautō iā Ieova, ia e faia iā te aʻu e pei ona e tautō ai.” Ona ia talosaga mai lea i lona tamā e tuu atu o ia e alu mo masina e lua i luga o mauga ina ia tagi ai. Aiseā na faanoanoa ai? Auā o le tausia o le tautoga a lona tamā, o le a lē faaipoipo ai ma fai se fanau. E ui i lea, e na te leʻi faatāua ona lava faanaunauga. Sa manaʻo e usitaʻi i lona tamā ma faamaoni atu iā Ieova. O le ā sou manatu, pe sa ia faafiafiaina Ieova ma lona tamā?—

Ona tuu atu lea e Iefata o lona afafine mo masina e lua e ō ma ana uō teine. Ina ua toe foʻi mai o ia, ona faataunuu loa lea e lona tamā o lana tautoga, e ala i le auina atu o ia i le faleʻie paia o le Atua i Sailo mo lona olaga atoa. Na ō atu i tausaga taʻitasi teine talavou o Isaraelu i Sailo ma faalaeiau le afafine o Iefata.

Pe e te iloa ni tamaiti e usiusitaʻi i o latou mātua ma alolofa iā Ieova?—E lelei ona faamasani i na tamaiti ma faauō atu iā i latou. Pe afai e te faaaʻoaʻo i le afafine o Iefata ma usiusitaʻi ma faamaoni, o le a e maua ni uō lelei. O le a e faafiafia ou mātua, ma o le a alofa foʻi Ieova iā te oe.

Faitau i Lau Tusi Paia

Teuteronome 6:4-6

Faamasino 11:30-40

1 Korinito 7:37, 38

[Faamatalaga pito i lalo]