E te Silafia?

O le ā le uiga o upu a le aposetolo o Paulo ua ia tauave i lona tino “le faailoga o se pologa a Iesu”? —Kalatia 6:17.

▪ Atonu na eseese manatu o tagata o le uluaʻi senituri i na upu a Paulo. O se faaaʻoaʻoga, sa faaaogā i aso anamua se uʻamea aasa e faailoga ai pagota o le taua, ʻaufaomea o malumalu ma pologa na sosola. Ina ua faia faapea i tagata, sa manatu i ai i le faailoga o se luma mo i latou.

Peitaʻi, e lē o taimi uma na manatu ai i na faailoga e leaga. O le toʻatele o tagata anamua na faaaogā na mea e iloa ai o i latou o ni tagata o se ituaiga po o se lotu. O se faaaʻoaʻoga, e tusa ai o le Theological Dictionary of the New Testament, “na iloa ua tuuina atu tagata Suria i atua o Hatata ma Atakati, e ala i faailoga na susunu i o latou tapulima po o ua . . . Na susunu se ata o se laulaau i tino o ē e tapuaʻi iā Dionysus.”

Ua faapea mai le toʻatele o le ʻaufaitofā i aso nei, sa faasino atu Paulo i maʻila i lona tino na māfua mai i sauāga na oo iā te ia, a o fai lana galuega faamisionare. (2 Korinito 11:23-27) Peitaʻi, atonu sa faasino atu Paulo i lona olaga lea na iloa ai o ia o se Kerisiano, ae e lē o ni maʻila o le tino.

Pe na avea aai o sulufaʻiga i Isaraelu anamua ma lafitaga o ē solitulafono?

▪ I atunuu faapaupau anamua, o le tele o malumalu sa fai ma nofoaga e sosola i ai ē ua fesolasolataʻi po o ē solitulafono. I lotu i aso ua mavae ua taʻua o Kerisiano, sa avea foʻi falesā ma malumalu o ni nofoaga e sulufaʻi i ai i latou na. Peitaʻi, sa faamautinoa i tulafono o aai o sulufaʻiga i Isaraelu anamua, e lē avea na aai ma lafitaga o ē solitulafono.

I le Tulafono a Mose, na taʻua e na o ē e fasioti tagata paʻivalea na puipuia i aai o sulufaʻiga. (Teuteronome 19:4, 5) E mafai ona sola atu o ia i le aai o sulufaʻiga o lata ane, ina neʻi maua o ia e se tane e aiga vavalalata i lē ua maliu, e mafai ona tauimasui i le toto. Pe a uma ona faamatala atu i toeaina o le aai le mea na tupu, ona ave lea o ia e faamasino i le aai e pulea le nofoaga lea na tupu ai le faalavelave. Ona maua ai lea o le avanoa e faamaonia ai lona lē nofosala. Na iloilo e toeaina le va o lē na sulufaʻi ma lē ua oti, ina ia iloa pe na ʻinoʻino o ia i lē ua oti.—Numera 35:20-24; Teuteronome 19:6, 7; Iosua 20:4, 5.

Pe afai ua taʻumamāina lē na sulufaʻi atu, e tatau ona ia toe foʻi i le aai o sulufaʻiga ma nofo ai pea i inā. O nei aai e lē o ni falepuipui. Sa galue lē na sulufaʻi ma faia ni auaunaga e aogā i tagata o le aai. Ina ua maliu le ositaulaga sili, sa saogalemu loa ona ō ese mai i aai o sulufaʻiga tagata na sulufaʻi atu.—Numera 35:6, 25-28.

[Faafanua i le itulau 15]

(Tagaʻi i le lomiga mo le ata atoa)

AAI O SULUFAʻIGA

1 KETESA

2 KOLENI

3 RAMOTA-KILIATA

4 SEKEMA

5 PESERI

6 HEPERONA

Vaitafe o Ioritana