Leoleomalu Neʻi Faasesēina

O SE tala lauiloa i se alii e igoa iā Don Quixote, na tusia i le senituri lona 16 e se tusitala Sepania e igoa iā Miguel de Cervantes. Ua taʻua i lenā tala e faapea, e tumu le mafaufau o Don Quixote i talafatu ma tala faaanamua e uiga i alii totoa, e oofu i ofu tau feʻilafi, o loo fesoasoani i tamaʻitaʻi ua lamatia o latou ola. E leʻi umi ae manatu Don Quixote, o ia foʻi o se toa agaalofa. I se tasi vaaiga i le tala, na ia osofaʻia ai fale e iai peʻapeʻa e taavili i le matagi, ona sa manatu o ia o nei fale o ni sauʻai mataʻutia. Na talitonu o ia ua ia faia le mea e fiafia i ai le Atua i le fasiotia o na sauʻai, ae e na o le māsiasi na iʻu i ai ona e sesē ona manatu.

O lenei alii o Don Quixote ua na o se talafatu, peitaʻi e lē o se mataupu e manatu māmā i ai le faasesēina o manatu o se isi. O se faataʻitaʻiga, e manatu se tagata inutele e pule o ia i le tele o lana inu. Peitaʻi, e iʻu ina faaleagaina ai lona soifua mālōlōina, ma afāina ai lona aiga. E faapena foʻi se tagata e maʻi paee, ona e manatu o ia o loo malosi ma mālōlōina, ae o le mea moni ua fāi atu lona malosi.

Faamata e ono faasesēina foʻi i tatou? O le mea moni, e mafai ona faasesēina i tatou uma. E aofia ai le faasesēina i talitonuga faalelotu, ma iʻu ai i mala. I le ā le itu? E faapefea ona puipuia i tatou mai i le faasesēina?

Mataʻutia o le Faasesēina

I se tasi lomifefiloi, o le uiga o le faasesēina, “o le taliaina lea o se manatu sesē e faapea, e moni ma aogā.” E iai foʻi ma le uiga o le “faaofi atu o se manatu po o se talitonuga e sesē ma valea, e fenuminumiaʻi ai, ma lagona ai le leai o se faamoemoe.”  O le uiga autū o le upu, e aofia ai upu e pei o le “ ʻolegia” ma le “taufaasee,” o le taʻitaʻisesēina lea o se tasi i auala faaalatua. O le mea moni, o sē e “lē iloa lona valea, ma ua fenuminumiaʻi ma lagona le leai o se faamoemoe,” ua iai o ia i se tulaga mataʻutia.

O le mea e sili ona faanoanoa ai, ona e taofimau pea le tagata ua faasesēina i ona talitonuga, e ui ina mautū faamaoniga e sesē. Atonu e pele iā te ia ona talitonuga, ma lē fia talia ai faamaoniga e lē o talafeagai.

Po o Lamatia ai i Tatou?

E lē o se manatu soonafai le faapea atu, e ono faasesēina i tatou uma e tusa ai ma talitonuga faalelotu, ona ua maumauaʻi Satani le Tiapolo “le tamā o le pepelo,” e faasesē i tatou uma. (Ioane 8:44) Ua taʻua foʻi Satani i le Tusi Paia, o “le atua o lenei faiga o mea.” Ua ia “faatauasoina manatu” o le faitau miliona o tagata i le faagasologa o le talafaasolopito. (2 Korinito 4:4) Ua ia “faasesēina le lalolagi uma” e oo mai lava i le taimi nei.—Faaaliga 12:9.

Na faasesēina e Satani tagata mai lava i le amataga. O se faaaʻoaʻoga, na ia faasesēina Eva e manatu, e lē aafia o ia i tulafono a Lē na faia o ia, ma e mafai ona “pei o ia o le Atua, e iloa le lelei ma le leaga,” pe filifili e ia lava le mea e lelei ma leaga mo ia. (Kenese 3:1-5) O le uluaʻi taufaasesē sili lea, ona e ui ua avatu i le tagata le saʻolotoga e filifili ai, ae e leʻi faia i latou e filifili e i latou lava le mea e saʻo po o le mea e sesē. E na o le Atua e iai le aiā ma le pule, ona o Ia na faia i tatou ma o le Pule Silisili Ese. (Ieremia 10:23; Faaaliga 4:11) Ua matuā sesē lava le manatu e faapea, o le iai o le aiā e filifili ai i le mea e lelei ma le mea e leaga, ua iai foʻi ma le aiā e pule ai po o le ā le mea e lelei ma le mea e leaga! E faanoanoa ai ona ua faigofie ona faasesēina i tatou i lea manatu.

Pe e Mafai Ona Tupu iā te Oe?

Atonu ua autausagā talu ona iai talitonuga faalelotu e pele iā te oe, ma ua tuufaasolo mai ai i lea tupulaga ma lea tupulaga. Ae e lē faapea ai e moni. Aiseā? Ua faailoa mai i le Tusi Paia, e leʻi umi talu ona maliliu le ʻauaposetolo o Keriso, ae faasesēina le faapotopotoga Kerisiano e ni tane na latou “faauiga sesē mea, ina ia fetoso ese ai soo e mulimuli atu iā i latou.” (Galuega 20:29, 30) Na popoto i latou e oole tagata i “faamatalaga taufaasesē,” ma “filosofia ma manatu taufaasesē e lē aogā e tusa ma tū masani a tagata.”—Kolose 2:4, 8.

Pe e iai se eseesega ma aso nei? E leai, ona na lapataʻi mai le aposetolo o Paulo, o le a sili ona leaga “aso e gata ai,” le taimi lenei ua tatou ola ai. Na tusi mai o ia: “A o tagata amioleaga ma ē taufaasesē, e faateteleina pea lo latou leaga, o loo faasesē atu i nisi ma ua faasesēina foʻi i latou.”—2 Timoteo 3:1, 13.

O lea, o se gaoioiga poto le utagia o le lapataʻiga a le aposetolo o Paulo: “O lē ua manatu o loo tū o ia, ia faaeteete neʻi paʻū.” (1 Korinito 10:12) E mautinoa o loo faatatau le tala a Paulo i le tulaga o le tagata i le silafaga a le Atua. O le mea moni, afai e te manatu e lē taitai ona ʻolegia oe e Satani, ua matuā faasesēina lava oe. E leai lava se isi e lē faia i ai “togafiti” a Satani. (Efeso 6:11) O le māfuaaga lenā o le popole o le aposetolo i ona uso Kerisiano, ‘⁠ina neʻi pei ona faasesēina o Eva e le gata i ana togafiti, e faapena foʻi ona faaleagaina o latou mafaufau, ia liliuese mai i le faamaoni ma le amio mamā e tatau.’—2 Korinito 11:3.

E Faapefea Ona Puipuia Mai i le Faasesēina?

E faapefea ona puipuia oe mai i le faasesēina e Satani? E faapefea ona e mautinoa  o loo e ‘⁠tapuaʻi i le Atua i le agaga ma le upu moni’? (Ioane 4:24) Ia faaaogā mea ua foaʻi mai e Ieova le Atua iā te oe. Muamua lava, ua ia foaʻi mai le “mafaufau” ina ia e iloa ai le upu moni mai aʻoaʻoga sesē. (1 Ioane 5:20) O Ia foʻi ua mafai ai ona e malamalama i togafiti a Satani. (2 Korinito 2:11) Ua ia tuuina atu iā te oe mea uma lava e manaʻomia, e tetee ai i taumafaiga a Satani e faasesē oe.—Faataoto 3:1-6; Efeso 6:10-18.

O le mea e sili ona tāua, e iai se mea maufaatuatuaina ua ia saunia e puipuia ai oe. O le ā lenā mea? O le mea lava e tasi lea na faalaeiauina ai e Paulo lona soa o Timoteo, e faalagolago i ai pe a oo i mataupu tau tapuaʻiga. Ina ua uma ona lapataʻi atu Paulo e faatatau i “tagata amio leaga ma ē taufaasesē,” ona fai atu lea iā Timoteo, ia teena i latou e ala i “tusitusiga paia,” po o le Tusi Paia.—2 Timoteo 3:15.

O le mea moni, atonu e faapea atu nisi afai e te talitonu i le Atua ma talia le Tusi Paia, o Lana Afioga faagaeeina lea, ua faasesēina oe. A o le mea moni, o ē e lē fia amanaʻia faamaoniga o loo soifua Lē na faia mea, ma o le Tusi Paia o Lana Afioga faagaeeina lea, ua faasesēina i latou. *—Roma 1:18-25; 2 Timoteo 3:16, 17; 2 Peteru 1:19-21.

Ia faaaogā le Afioga a le Atua e faamaonia ai le upu moni, ae aua le faasesēina i mea ua “taʻua ma le pepelo o le ‘⁠poto.’ ” (1 Timoteo 6:20, 21) Ia pei o tagata Perea e mafaufau lelei, o ē na talaʻi i ai le aposetolo. Na latou “taliaina le upu ma le fiafia tele.” E lē gata ina latou talitonu atoatoa i mea na aʻoaʻo ai i latou e le aposetolo o Paulo, ae na latou “matuā iloiloina Tusitusiga Paia i aso taʻitasi pe e moni nei mea.”—Galuega 17:11.

E tatau ona e fiafia e iloiloina faapena ou talitonuga, ona ua faalaeiau oe e le Tusi Paia, a o leʻi taliaina se aʻoaʻoga, ia “tofotofo”  muamua pe moni. (1 Tesalonia 5:21) Ina ua lata i le faaiʻuga o le uluaʻi senituri T.A., na uunaʻia ai e le aposetolo o Ioane ona uso Kerisiano e faapea: “Le ʻaupele e, aua tou te talitonu i upu uma mai i agaga, ae ia tofotofo i upu mai i agaga ina ia iloa ai pe e mai i le Atua.” (1 Ioane 4:1) Ioe, e ui e foliga mai e “faagaeeina” pe e mai i le Atua nisi aʻoaʻoga faalelotu, ae o se mea poto le iloilo o le Tusi Paia ina ia faamautinoa ai, e moni.—Ioane 8:31, 32.

Gaoioi i Mea ua E Aʻoaʻoina

Ae e iai se isi mea e manaʻomia. Na tusi Iakopo: “Ia avea outou ma ē e usiusitaʻi i le upu ae e lē na o le faalogologo i ai, ua faasesēina ai outou i o outou lava manatu sesē.” (Iakopo 1:22) E lē lava le tau ina iloa o mea o loo i le Tusi Paia, ae e tatau ona e faatatauina. E faapefea? I le faia o mea ua poloaʻi mai ai le Atua iā te oe e fai, ae aua le faia mea ua ia faasāina.

O se faaaʻoaʻoga, tagaʻi foʻi i amioga paʻū maulalo a tagata o loo siʻomia ai i tatou. Po ua lē o faaalia ai i na amioga le taulau o taumafaiga a Satani e faasesē tagata e mafaufau faapea, e mafai ona latou faagalo tulafono tau i amioga tatau a le Atua, e aunoa ma ni aafiaga leaga e oo iā i latou? O le mea lea na lapataʻi mai ai le aposetolo o Paulo i Kerisiano e faapea: “Aua neʻi faasesēina outou: e lē ulagia le Atua. Auā o le mea e lūlūina e le tagata, o le mea lava lea e na te seleseleina mai.”—Kalatia 6:7.

Aua neʻi pei o le “tagata valea” lea na faamatala e Iesu e faapea, na “faalogo” i ana upu ae leʻi “faia,” e pei o Don Quixote i le tala a Cervantes, o lē na faasesēina i ona lava mafaufauga. Na faasesēina lenā tagata, auā sa manatu o ia, e mafai ona ia fausia se fale mautū ma malosi i luga o se faavae e lē mautū ma lē tumau e pei o le oneone. Ae ia pei o le tagata na “fausia lona fale i luga o le papa” lea na taʻua e Iesu e “faautauta,” auā na faalogo o ia i upu a Iesu ma “faia.”—Mataio 7:24-27.

[Faaopoopoga i lalo]

[Pusa i le itulau 12]

Pe E te Vaai i Mea e Tusa ma o Latou Tino Mai?

I le faagasologa o tausaga o le 1930, na tusia ai ma faasalalau e se tagata tusiata mai Suetena o Oscar Reutersvärd, se faasologa o ata o mea e foliga mai e moni ae e lē moni. O loo faaalia i le itu agavale se faaaʻoaʻoga faaonapōnei o na ata. O le taimi muamua e te tilotilo ai i ai, e foliga mai e moni, ae e manino mai e lē o tusa ma mea e masani ai. A iloilo lelei, ona iloa ai lea o togafiti poto a lē na tusia le ata, e faasesē ai le vaai ma le mafaufau o le tagata e matamata i ai.

Ae peitaʻi, e lē na o ata faapena e foliga e ese mai i mea moni. Ua tusa ma le lua afe tausaga talu ona lapataʻi mai le Tusi Paia: “Ia faaeteete: ina neʻi maileia outou e se tasi i filosofia ma manatu taufaasesē e lē aogā e tusa ma tū masani a tagata, e tusa ma mataupu faavae a le lalolagi, ae e lē tusa ma aʻoaʻoga a Keriso.”—Kolose 2:8.

E tāua lenei lapataʻiga ona sa iai se taimi na faasesēina ai foʻi Paulo, o lē na tusia na upu. E foliga mai e lē o ia o se tagata e mafai ona faasesēina, ona sa aʻoaʻoina o ia e se faiaʻoga faalelotu sa sili ona lauiloa i ona aso, ma sa iai ona sootaga i tagata popoto.—Galuega 22:3.

Sa talitonu Paulo o Taso e faapea, e taʻusalaina se tagata e lē talitonu i ana uputuu ma tū faalotu. Sa manatu o ia o lona tofiga mai le Atua le faasalaina o so o se tasi e lē fia lafoaʻia ona talitonuga faa-Kerisiano, ma sa lagolagoina o ia e taʻitaʻi lotu Iutaia. Sa ia lagolagoina foʻi le fasiotia o se tasi o lona nuu ona o ni moliaga sesē e faapea, ua upuleaga o ia i le Atua.—Galuega 22:4, 5, 20.

I se taimi, na iloa ai e Saulo le upu moni ma iloa ai le eseesega o le mea e saʻo ma le mea e sesē, o mea e fiafia i ai le Atua ma mea e lē fiafia i ai. O le taimi lava na iloa ai e Saulo lona sesē, na suia ai loa lona olaga ma avea ma tagata maelega, ma na lauiloa o ia o Paulo, le aposetolo a Iesu Keriso. E leʻi toe faasesēina o ia ona ua ia maua le tapuaʻiga moni.—Galuega 22:6-16; Roma 1:1.

E toʻatele tagata faamaoni na faasesēina foʻi e pei o Paulo ona o aʻoaʻoga sesē, po o talitonuga e foliga mai e moni, ae e lē faavaeina i le Afioga a le Atua. (Faataoto 14:12; Roma 10:2, 3) Ae na latou maua se fesoasoani, ma ua malamalama lelei ai i talitonuga ma mea o fai e a latou lotu. (Mataio 7:15-20) A o faasolo ina latou maua le poto saʻo mai le Tusi Paia, na suia o latou talitonuga ma o latou olaga, ma maua ai le finagalo malie o le Atua.

Pe e te fia faaaʻoaʻo i le aposetolo o Paulo, ma iloilo ou talitonuga e tusa ma le Afioga a le Atua? E fiafia Molimau a Ieova e fesoasoani atu iā te oe.

[Ē Ana le Ata i le itulau 10]

Engravings by Doré