Ua Fesili Mai le ʻAufaitau . . .

Po o Iesu o Mikaele le Agelu Sili?

▪ Pe a faafaigofie, o le tali, ioe. O le faaigoa o se tagata i ni igoa e sili atu i le tasi, o se tū masani i le tele o aganuu. O le tulaga foʻi lea e tasi i igoa i le Tusi Paia. O se faaaʻoaʻoga, na faaigoa foʻi le augātamā o Iakopo iā Isaraelu. (Kenese 35:10) E lima igoa eseese na faaigoa ai le aposetolo o Peteru—o Simeona, Simona, Peteru, Kefa, ma Simona Peteru. (Mataio 10:2; 16:16; Ioane 1:42; Galuega 15:7, 14) E faapefea ona tatou iloa o Mikaele o le isi igoa o Iesu? Seʻi iloilo faamaoniga nei mai i le Tusi Paia.

E faalima ona taʻua i le Tusi Paia le agaga malosi o Mikaele. E faatolu ona taʻua i le tusi a Tanielu. I le Tanielu 10:13, 21, ua tatou faitau ai, na laveaʻiina e Mikaele, o lē ua taʻua “o se tasi o perenise tāua” ma “o lo outou perenise,” ia se agelu na auina mai. O le isi, i le Tanielu 12:1, ua tatou iloa ai e faapea, i le taimi o le iʻuga, “o le a tulaʻi ai Mikaele, o le perenise sili o lē o loo tulaʻi ona o tagata o lou nuu.”

Ua toe taʻua foʻi Mikaele i le Faaaliga 12:7, lea e faamatala ai o loo tau e “Mikaele ma ana agelu” se taua tāua, ma iʻu ai ina lafo ifo Satani le Tiapolo ma ana agelu leaga mai i le lagi.

Ia mātau, i tulaga taʻitasi o loo taʻua i luga, ua faamatalaina ai Mikaele o se agelu malosi o loo tau mo tagata o le Atua ma le puipuiga o i latou, ma tetee atu i le fili sili o Ieova, o Satani.

I le fuaiupu e 9 o le Iuta, o loo taʻua ai Mikaele o “le agelu sili.” I le Tusi Paia, o le upu “agelu sili,” e lē o faasino atu i se toʻatele, ae na o le toʻatasi lava. E pau le isi mau o loo taʻua ai le agelu sili, o le 1 Tesalonia 4:16, lea e faamatala ai e Paulo Iesu ua toe faatūina e faapea: “E afio ifo le Alii [Iesu] lava ia mai i le lagi ma le alaga ma le leo o le agelu sili, ma le pū a le Atua.” O lea, ua faamatalaina i inei Iesu, o ia lava o le agelu sili.

E tusa ai ma nei faamatalaga uma, o le ā ua tatou iloa ai? Ua tatou iloa ai, o Iesu Keriso, o Mikaele le agelu sili. O nei igoa e lua—Mikaele (o lona uiga, “O Ai e Pei o le Atua?”) ma Iesu (o lona uiga, “O Ieova o le Faaolataga”)—ua taulaʻi atu ai manatu i lana matafaioi, o lē e sili ona lagolagoina le pule silisili ese a le Atua. Ua taʻua i le Filipi 2:9: “Ua faaeaina ai foʻi o ia [o Iesu ua faamamaluina] e le Atua i se tulaga e sili ona maualuga, ma avatu ma le agalelei iā te ia le suafa e sili i isi igoa uma.”

E tāua ona iloa, o le fanau mai o Iesu o se tagata, e lē o le amataga lenā o lona soifuaga. A o leʻi fanau mai Iesu, na asiasi atu se agelu iā Maria ma taʻu atu iā te ia, o le a tō o ia e ala i le agaga paia, ma e tatau ona ia faaigoa le tamaitiiti iā Iesu. (Luka 1:31) A o faagasolo lana faiva, sa masani ona talanoa Iesu e faatatau i lona olaga i le lagi a o leʻi afio mai i le lalolagi.—Ioane 3:13; 8:23, 58.

O lea la, o Mikaele le agelu sili, o Iesu lea i lona soifuaga i le lagi a o leʻi afio mai i le lalolagi. Ina ua toe faatūina o ia ma afio atu i le lagi, ona toe auauna lea o Iesu e avea o Mikaele le agelu sili, “ina ia faamamaluina ai le Atua le Tamā.”—Filipi 2:11.