O Mea na Aʻoaʻo e Iesu e Uiga iā te Ia Lava

“Sa silafia lelei lava e Iesu po o ai o ia, le mea na sau ai o ia, le māfuaaga na sau ai i lo tatou lalolagi, ma lona lumanaʻi.”—LE TUSITALA O HERBERT LOCKYER.

AE TATOU te leʻi talia ma faatuatua i mea na aʻoaʻo e Iesu, e tatau ona malamalama lelei e uiga iā te ia. O ai moni lava Iesu? O fea na sau ai o ia? O le ā lona sini i le olaga? I Evagelia a Mataio, Mareko, Luka ma Ioane, o le a tatou maua ai tali mai iā Iesu lava ia.

Na soifua o ia a o leʻi fanau mai i le lalolagi Na fetalai Iesu: “A o leʻi iai Aperaamo, a ua leva ona ou iai.” (Ioane 8:58) Na ola Aperaamo pe tusa ma le 2,000 tausaga a o leʻi fanau mai Iesu. Ae peitaʻi, na soifua Iesu a o leʻi ola lenā augātamā faatuatua i le lalolagi. O fea la na soifua ai Iesu? Na ia faamatala mai: “Na ou sau mai i le lagi.”—Ioane 6:38.

Le Alo o le Atua E toʻatele atalii agelu o Ieova. Ae peitaʻi, e tutasi lava Iesu. Na ia faasino iā te ia lava o le “Atalii e toʻatasi o le Atua.” (Ioane 3:18) O le uiga o lenā faamatalaga, o Iesu, na faia toʻatasi e le Atua. O ia o le Atalii e toʻatasi, ma e ala iā te ia, na foafoaina ai e le Atua isi mea uma.—Kolose 1:16.

“Le Atalii o le tagata” Sa faaaogā soo e Iesu lenei faaupuga nai lo o se isi, e faasino atu iā te ia lava. (Mataio 8:20) O lea, ua ia faaalia ai e lē o ia o se agelu ua liutino tagata po o le atua ua tino tagata. Ae o ia o le tagata moni lava. Na aumaia e le Atua e ala i lona agaga paia, le soifua o lona Alo mai i le lagi i le lalolagi, ma afuafua ai i le manava o le teine taupou o Maria. Na iʻu ai ina fanau mai Iesu o se tagata e lelei atoatoa e leai se agasala.—Mataio 1:18; Luka 1:35; Ioane 8:46.

Le Mesia folafolaina Na faapea atu se fafine Samaria iā Iesu: “Ou te iloa o le a maliu mai le Mesia.” Na tali mai Iesu: “O aʻu lenei o ia, lea o loo tautala atu iā te oe.” (Ioane 4:25, 26) O le upu “Mesia” faapea le upu “Keriso,” e uiga atu “O Lē ua Faauuina.” Na faauuina pe tofia Iesu e le Atua, ina ia faia se matafaioi faapitoa i le faataunuuina o folafolaga a le Atua.

Lana galuega autū Na fetalai Iesu: “E tatau ona ou folafola atu le tala lelei o le malo o le Atua . . . , auā o le mea lea na auina mai ai aʻu.” (Luka 4:43) E ui sa ia faia le tele o galuega lelei mo tagata mafatia, ae o lana galuega autū i le olaga, o le talaʻi atu e uiga i le Malo o le Atua. O le a talanoaina mulimuli ane mea na ia aʻoaʻo e uiga i lenā Malo.

E manino la, o Iesu e lē o se tagata e pei o isi tagata. * O le a tatou iloa, o lona soifuaga i le lagi, ua atili ai ona tāua ana fetalaiga na faia a o iai i le lalolagi. E lē o se mea e ofo ai lona talaʻia o se feʻau, o le a taaʻina ai ola o le faitau miliona o tagata i le lalolagi.

[Faamatalaga pito i lalo]