Ia Aʻoaʻo Lau Fanau

Na Aʻoaʻoina e Iesu le Usiusitaʻi

PE E faigatā i nisi taimi ona e usiusitaʻi?— * E lē o se mea e faateʻia ai pe afai e faapea. I nisi taimi, e faigatā i tagata uma ona usiusitaʻi. Pe e te iloa e oo lava iā Iesu sa ia aʻoaʻoina ia usiusitaʻi?—

Pe e te iloa o ai e tatau ona usiusitaʻi i ai tamaiti uma?— Ioe, o o tatou tamā ma tinā. Ua faapea mai le Tusi Paia: “Ia usiusitaʻi i o outou mātua e tusa ma le finagalo o le Alii.” (Efeso 6:1) O ai le tamā o Iesu?— O Ieova le Atua, ma o ia foʻi o lo tatou Tamā. (Mataio 6:9, 10) E saʻo foʻi oe pe afai na e fai mai o Iosefa o le tamā o Iesu, ma o Maria o lona tinā. Pe e te iloa na faapefea ona avea i laʻua ma ona mātua?—

Na taʻu atu e le agelu o Kaperielu iā Maria le auala o le a avea ai o ia ma tinā, e ui e la te leʻi feusuaʻi ma se tamāloa. Na tō o ia ona o se vavega ofoofogia na faia e Ieova. Na faamatala atu e Kaperielu iā Maria: “E faamalumalu ifo iā te oe le mana o le Silisili Ese. O le mea lea e taʻua ai lē o le a fanau mai, e paia ma o le Alo o le Atua.”—Luka 1:30-35.

Na aumaia e le Atua le ola o lona Alo i le lagi, ma tuu i le manava o Maria. Ona tupu aʻe lea o lenā ola i lona manava, e pei foʻi o isi pepe uma i manava o o latou tinā. E tusa ma le iva masina mulimuli ane, ae fanau mai Iesu. A o leʻi fanau Iesu, a ua uma ona faaipoipo Iosefa iā Maria, ma na manatu ai le toʻatele o Iosefa o le tamā moni lea o Iesu. Ae o le mea moni, o Iosefa o lona tamāfai. O lea la, e mafai ona faapea atu e lua tamā o Iesu!

Ina ua na o le 12 tausaga o Iesu, na ia faia ai se mea e faaalia ai lona alofa tele i lona Tamā i le lagi, o Ieova. I le taimi lea, na malaga ai le aiga o Iesu i se malaga umi i Ierusalema mo le Paseka, e pei o la latou masani. Mulimuli ane, a o foʻi atu i lo latou aiga i Nasareta, e leʻi iloa e Iosefa ma Maria e lē o faatasi Iesu ma i latou. Pe e te iloa e faapefea ona galo o ia iā i laʻua?—

Ia, auā o le taimi lenā ua iai foʻi isi fanau a Iosefa ma Maria. (Mataio 13:55, 56) Masalo foʻi sa iai ni tauaiga na malaga faatasi ma i latou, e pei o Iakopo ma Ioane ma lo la tamā o Sepetaio, ma lo la tinā o Salome, o lē atonu o le uso o Maria. O lea, atonu sa manatu Maria o loo ō faatasi Iesu ma isi o latou tauaiga.—Mataio 27:56; Mareko 15:40; Ioane 19:25.

Ina ua iloa e Iosefa ma Maria e lē o iai Iesu, ona la toe foʻi faanatinati atu lea i Ierusalema. Na la saʻili ma le popole i la laʻua tama. Na la maua atu o ia i le malumalu i le aso lona tolu. Ona fai atu lea o Maria iā te ia: “O le ā le mea ua e faapea mai ai iā i maʻua? Ua ma fiu ma lou tamā e suʻe oe.” Ae na tali mai Iesu: “Aiseā na lua suʻeina ai aʻu? Pe lua te lē iloa ea e tatau ona ou iai i le fale o loʻu Tamā?”—Luka 2:45-50.

O le ā sou manatu, pe sa tatau iā Iesu  ona tali atu faapena i lona tinā?— Ioe, auā sa iloa e ona mātua e fiafia Iesu e tapuaʻi i le fale o le Atua. (Salamo 122:1) O lea la, pe e lē saʻo ea ona manatu Iesu, o le nofoaga muamua e suʻe i ai o ia e ona mātua, o le malumalu o le Atua?— Mulimuli ane, sa mafaufau pea Maria i upu na fai atu ai Iesu.

O ā uiga na faaalia e Iesu iā Iosefa ma Maria?— Ua faapea mai le Tusi Paia: “Ona latou ō lea ma ona mātua i Nasareta, ma ua gauaʻi pea o ia iā i laʻua.” (Luka 2:51, 52) O le ā e tatou te aʻoaʻoina mai i le faaaʻoaʻoga a Iesu?— Ioe, e tatau foʻi ona tatou usiusitaʻi i o tatou mātua.

Ae e leʻi faigofie i taimi uma ona usiusitaʻi Iesu, e oo lava i le usiusitaʻi i lona Tamā i le lagi.

I le pō a o leʻi maliu o ia, na talosaga atu ai Iesu iā Ieova pe mafai ona suia Lona finagalo e tusa ma le mea e finagalo o Ia e na te faia. (Luka 22:42) Ae na usiusitaʻi Iesu i le Atua e ui lava e leʻi faigofie. Ua taʻua i le Tusi Paia, “na ia aʻoaʻoina le usiusitaʻi mai i mea na puapuaga ai o ia.” (Eperu 5:8) O le ā sou manatu, pe e mafai foʻi ona tatou aʻoaʻoina lenā lesona?—

[Faamatalaga pito i lalo]

FESILI:

▪ Na faapefea ona avea Maria ma tinā o Iesu, ma aiseā e faapea atu ai e lua tamā o Iesu?

▪ Aiseā e leʻi iloa ai e mātua o Iesu e lē o faatasi o ia ma i latou?

▪ O fea na manatu Iesu e suʻe i ai o ia e ona mātua?

▪ O le ā e te aʻoaʻoina mai i le faaaʻoaʻoga a Iesu?

[Ata i le itulau 31]

O le ā sou manatu, aiseā sa tatau ai iā Iosefa ma Maria ona saʻili muamua iā Iesu i le malumalu?