Ia Mafuta Atu i le Atua

O le ā le Uiga o le Toe Salamō o le Atua?

FAAMASINO 2:11-18

ONA o lo tatou lē lelei atoatoa, e iai taimi e toe salamō ai ona ua tatou faia se mea sesē. O le mea e ofo ai ona ua taʻua i le Tusi Paia, e lagona foʻi e Ieova le salamō. Ae atonu e te faapea mai, ‘E lelei atoatoa le Atua. E na te lē faia se mea sesē!’ O lea, o le ā le uiga, e lagona e le Atua le salamō? O le malamalama i le tali o lea fesili, o le a faagaeetia ai i tatou ona o se mea e faatatau iā Ieova: E iai ona faalogona, ma e aafia i mea e tatou te faia. Seʻi iloilo upu o loo i le Faamasino 2:11-18, O le Tusi Paia Samoa—Lomiga o le 1884.

O loo taʻua i le tusi o Faamasino se vaitaimi fesouaʻiina i le tala faasolopito o Isaraelu. Ua nonofo le nuu i Kanana, le laueleele na folafola atu e le Atua iā Aperaamo. I le faitau selau o tausaga na sosoo ai, e fā vala o loo faamatalaina ai mea na faia e Isaraelu: o le fulitua, mafatiaga, olega, ma le laveaʻiga. *

Fulitua. Ona o taaʻiga a tagata Kanana na ‘lafoaʻia ai e Isaraelu Ieova’ ma mulimuli atu i isi atua, e ala i le “auauna iā Paala ma tupua o Asaira.” * E tusa ua latou liliuese mai le Atua. O lea, na “latou faatigā ai iā Ieova,” o le Atua o lē na laveaʻiina i latou mai Aikupito.—Fuaiupu 11-13; Faamasino 2:1.

Mafatiaga. O le toʻasā o Ieova ona o a latou amioga, na māfua ai ona ia lē toe puipuia ona tagata ua fulitua iā te ia. Na paʻūū foʻi tagata Isaraelu “i lima o o latou fili,” o ē na faoa o latou laueleele.—Fuaiupu e 14.

Olega. O lo latou mafatia tele na toe salamō ai Isaraelu ma alalaga atu i le Atua mo se fesoasoani. O le faaupuga “ōi ona o ē e faasauā” iā i latou, ua iloa ai na latou ole atu iā Ieova. (Fuaiupu e 18) Sa ole atu pea tagata Isaraelu i le Atua ona o o latou mafatiaga. (Faamasino 3:9, 15; 4:3; 6:6, 7; 10:10) Na faapefea ona tali mai le Atua?

Laveaʻiga. Na faafofoga Ieova i le ōi o Isaraelu ma ia ‘salamō ai.’ O le upu Eperu ua faaliliuina i le “salamō,” e iai le uiga o le “sui o le mafaufau po o faanaunauga o se tasi.” Ua taʻua i se tasi tusi: “Na lagona e Ieova lo latou ōi, ma suia ai le faasalaga i le laveaʻiga.” O le alofa mutimutivale o Ieova, na ‘ia faatūina ai faamasino,’ e laveaʻi lona nuu mai o latou fili.—Fuaiupu e 18.

Po o e mātauina le pogai na toe salamō ai le Atua ma suia ai lona finagalo? Ona na sui uiga o lona nuu. Seʻi faapea na aʻoaʻi e se tamā alofa lona atalii ina ua faia se mea sesē, e ala i le lē faataunuuina o se mea na folafola i ai. Ae ina ua vaai atu ua salamō moni le tamaitiiti, na filifili ai le tamā e toe faataunuu le folafolaga.

O le ā e tatou te aʻoaʻoina e uiga iā Ieova i lenei tala? E tupu lona toʻasā ona o le tagata e agasala ma le loto i ai, ae o lē ua salamō, e alofa mutimutivale i ai o ia. O le mea lea e ao ona manatu mamafa i ai, e aafia faalogona o Ieova i mea e tatou te faia. E manaia pe a e aʻoaʻoina le auala e ‘faafiafia ai le finagalo’ o Ieova. (Faataoto 27:11) E te lē toe salamō mulimuli ai.

[Faamatalaga pito i lalo]