O Auala e Fiafia ai le Aiga

Feagai ai ma Mātua o Lou Toʻalua

Ua fai mai Sieni *: E lē mā lava le tinā o Ryan e faaali mai lona lē fiafia iā te aʻu. Ae na faapena foʻi oʻu mātua iā Ryan. O le mea moni, ou te leʻi vaai muamua o faapea ona la lē migao i se isi! Na avea ai le asiasi atu i o ma mātua ma avega mamafa iā i maʻua.

Ua fai mai Ryan: O le manatu lava o loʻu tinā e maʻimau lana fanau i isi, o lea, mai lava i le amataga, e vaavaai masei lava iā Sieni. Sa faapena foʻi mātua o Sieni iā te aʻu, e faitio lava iā te aʻu. O le faafitauli, e ma te taumafai uma e pupuni o ma mātua ma faitio le tasi i le isi.

O LE feeseeseaʻi ma mātua o lou toʻalua atonu ua fai ai tala mālie a le ʻaufaifaleaitu, ae e lē o se mea e mālie. Na fai mai Rina o se tamaʻitaʻi faiʻaiga i Initia, “E tele tausaga o aiā le tinā o laʻu tane i lo ma aiga. Ma e masani ona faasasao loʻu ita i laʻu tane auā e lē mafai ona ou fai atu i lona tinā. Ua lē iloa e laʻu tane po o ai a faamalie, po o lona tinā po o aʻu.”

Aiseā e aiā ai nisi mātua i aiga o ā latou fanau ua faaipoipo? Na taʻua e Sieni se tasi o māfuaaga. “Atonu e faigatā mo i latou le vaai atu o le a tausia le la tama e se tagata e talavou ma e lē lava le poto masani.” Ua fai maʻi foʻi Dilip, le tane a Rina: “Atonu e lagona e mātua e pei ua lē amanaʻia i laʻua, ae sa la tausi ma ola faataulaga mo la la tama. E ono popole foʻi i laʻua ona e lē o lava se tomai o la la tama ina ia taulau manuia ai lona aiga.”

O le mea moni, i nisi taimi, o mea e fai e le ulugalii e foliga ai ua aiā o la mātua. Seʻi fai ma faaaʻoaʻoga Mikaele ma Liana, o se ulugalii i Ausetalia. Ua fai mai Mikaele: “O Liana e sau i se aiga e fealofani, e fetalanoaaʻi i so o se mataupu. Ina ua uma ona ma faaipoipo, e talanoa ma lona tamā i filifiliga sa manaʻomia ona ma faia. E moni e tele le iloa o lona tamā, ae e tigā  loʻu loto pe a talanoa i lona tamā ae lē talanoa mai iā te aʻu!”

O le mea moni, e ala mai i mātua o se ulugalii omiga i lo la aiga. Pe e faapena ou mātua? O ā mai le tou va ma mātua o lou toʻalua, faapea lou toʻalua ma ou mātua? Seʻi iloilo ni luʻi se lua e ono tulaʻi mai, ma le auala e taulima ai.

LUʻI 1:

E foliga mai e pipii tele le loto o lau paaga i ona mātua. Ua fai mai se tane Sepania e igoa iā Lui: “Na manatu laʻu avā afai ma te lē nonofo faalatalata i ona mātua, e tusa ua lē alofa iā i laʻua.” Ua ia faaopoopo mai: “I le isi itu, ina ua fanau la ma tama tama, e toetoe lava o aso uma e asiasi mai ai oʻu mātua, ma na lē fiafia ai lava laʻu avā. Na māfua ai ona ma misa soo.”

Māfuaaga e feeseeseaʻi ai: Ua faapea mai le Tusi Paia e faatatau i le faaipoipoga, e iai le taimi “e tuua ai e le tane lona tamā ma lona tinā, ma nonofo faatasi ma lana avā, ona avea ai lea o i laʻua ma tino e tasi.” (Kenese 2:24) E lē na o le nonofo faatasi o loo uiga i ai le “tino e tasi.” Ae o loo faatatau tonu i le avea o le tane ma le avā o se aiga fou, e tatau ona la faamuamua i lo o aiga na tupuga mai ai. (1 Korinito 11:3) O le mea moni, e manaʻomia e i laʻua uma ona faaaloalo i o la mātua, ma amanaʻia foʻi. (Efeso 6:2) Ae faapefea pe afai ua lē amanaʻia oe, ona o le auala e taulima ai e lau paaga lenā tulaga?

Le mea e fai: Ia taumafai e malamalama i le tulaga o mea. Pe moni ua ova le māfana o lou toʻalua i ona mātua, pe ai ona e lē faapena le tou faiā ma ou mātua? Afai o lea, faamata o aafia lau vaaiga ona o le siʻomaga na e ola mai ai? Pe atonu foʻi ua e lagona ai le fuā?—Faataoto 14:30; 1 Korinito 13:4; Kalatia 5:26.

Ia suʻesuʻe ifo iā te oe lava ona iloa ai lea o le tali i na fesili. Ae e tāua ona e faia faapea. Auā afai o loo lua pisa soo ona o o oulua mātua, o lona uiga la o oulua le faafitauli, ae lē o lua mātua.

E tele faafitauli e tulaʻi mai i faaipoipoga ona e lē tutusa uma manatu o ni tagata se toʻalua. Taumafai e vaai i mea e tusa ma le vaaiga a lou toʻalua. (Filipi 2:4; 4:5) O le mea lenā na faia e Adrián o se tane mai Mekisikō. Fai mai o ia: “Na ola aʻe loʻu toʻalua i se aiga e lē fiafia le siʻomaga, ma na ou lē māfana ai i mātua o laʻu avā. Mulimuli ane, e tele tausaga ou te lē fia asia ai i latou. Na tupu ai lo ma pisa ona sa manaʻo pea laʻu avā e mafuta ma lona aiga, aemaise lava lona tinā.”

Na oo ina faasaʻo le vaaiga a Adrián. Ua fai mai o ia: “E ui ua ou iloa e afāina loʻu toʻalua ona o le mafuta ma ona mātua, ae a leai foʻi sa latou fesootaʻiga, e tulaʻi mai ai foʻi ni faafitauli. O lea ua ou taumafai lava ina ia toe faaleleia ma tausisia se faiā lelei ma mātua o loʻu toʻalua.” *

FAATAʻITAʻI MEA NEI: Ia tusi e oulua uma ma lou toʻalua mea e lua te iloa o se popolega autū e faatatau i o oulua mātua. Ia amata faapea, “Ou te lagona . . . ” Ona fesuiaʻi lea o lua pepa. Ia felagolagomaʻi e fetufaaʻi i auala e taulima ai lua popolega.

LUʻI 2:

E malosi le aiā o o oulua mātua i le lua aiga, i le fai atu o fautuaga e lē manaʻomia. Na fai mai Nelia mai Kazakhstan: “O tausaga muamua e fitu o la ma ulugalii na matou nonofo ai ma le aiga o loʻu toʻalua. E matou te pisa soo ona o le auala e tausia ai la ma fanau, ma auala e fai ai aʻu kuka  ma faamamā ai mea. Sa ou talanoa i laʻu tane ma lona tinā e uiga i lea mea, ae na o le tele ai o feeseeseaʻiga!”

Māfuaaga e feeseeseaʻi ai: Pe a e faaipoipo, e te lē o toe i lalo o le pule a ou mātua. Ae ua taʻua i le Tusi Paia, “o le ulu o tane taʻitoʻatasi uma o Keriso; o le ulu o le fafine o le tane.” (1 Korinito 11:3) Ae peitaʻi, e pei ona taʻua muamua, e tatau i le tane ma le avā ona faaaloalo i o la mātua. O le mea moni ua taʻua i le Faataoto 23:22: “Ia e faalogo i lou tamā o lē na māfua ai ona e fanau mai, aua foʻi e te ʻinoʻino i lou tinā ona ua loomatua o ia.” Ae faapefea pe afai e lē amanaʻia e o oulua mātua, o le tane o le ulu o lo oulua aiga, ma uunaʻi atu o latou manatu?

Le mea e fai: I se agaga malamalama, taumafai e iloa le māfuaaga o le aiā atu o mātua. O Ryan lea na taʻua i le amataga, na fai mai: “E fia iloa e nisi mātua o loo tāua pea i latou iā latou fanau.” Atonu e lē o manatu o loo aiā, ma e mafai ona taulimaina i le faatatauina o fautuaga a le Tusi Paia, “ia faaauau ona onosaʻi le tasi i le isi, ma ia fefaamagaloaʻi ma le lotoatoa pe afai ua faia e se tasi se mea e tigā ai le isi.” (Kolose 3:13) Ae ā pe afai ua ova le aiā o mātua, ma ua māfua ai ona lua feeseeseaʻi ma lou toʻalua?

Ua faatulaga e nisi ulugalii le mea e gata ai le aiā atu a o latou mātua. E lē faapea ai o le a lua faia ni tulafono mo i latou. * Ae ua na ona faamanino i au mea e fai, seʻi lua talanoa muamua ma lou toʻalua. O se faaaʻoaʻoga, na fai mai se tane i Iapani e igoa iā Masayuki: “E tusa lava pe faaali mai e mātua o la manatu, aua le vave ioe i ai. Ia manatua, o lea ua fai lou aiga. O lea la, talanoa muamua i lou toʻalua po o le ā sona lagona i le fautuaga.”

FAATAʻITAʻI MEA NEI: Ia talanoa ma lou toʻalua i auala ua avea ai le aiā o o oulua mātua ma māfuaaga e lua te pisa ai. Ia lua tusi i lalo mea e faagata ai le aiā a o oulua mātua, ma le auala e faatatau ai, a o faaalia pea le āva i o oulua mātua.

E mafai ona faaitiitia le feteenaʻi ma mātua o lou toʻalua pe a malamalama i le pogai ua latou faia ai se mea, ma ia lē avea ma mea e pisa ai ma lou toʻalua. Ua faapea mai Sieni: “I nisi taimi e faigatā ona ma talanoa ma loʻu toʻalua e uiga i o ma mātua, ma na iloa ai le tele o lagona tigā pe a talanoa i uiga faalētonu o ō ma mātua. Mulimuli ane, na ma iloa ai e lē tatau ona avea uiga faalētonu o ō ma mātua ma mea e pisa ai, ae ia foʻia le faafitauli. O le iʻuga, ua sili ona māfana le ma ulugalii.”

[Faamatalaga pito i lalo]

FESILI IFO IĀ TE OE LAVA . . .

▪ O ā ni uiga lelei o mātua o loʻu toʻalua?

▪ E faapefea ona ou āva i oʻu mātua ae ia amanaʻia foʻi loʻu toʻalua?