“Toe Tasi Lava se Fagu”

NA AMATA ona faaaogā sesē e Aleni le ʻava malosi i le sefulu tasi o ona tausaga. * Sa taaalo o ia ma ana uō i le togāvao ma faataʻitaʻi mea na latou vāai o fai e tagata i tifaga. E lē moʻi mea o tifaga na kopi ai Aleni ma ana uō, ae o fagu malolosi moʻi na latou inuina.

I le 40 o tausaga o Toni, na faasolo ina tele lana inu i afiafi uma, mai le tasi pe lua fagu, i le lima i le ono fagu. Mulimuli ane, ua na lē iloa pe fia ana fagu e inu i le aso.

Na saʻili e Aleni se fesoasoani ona o lona faafitauli. Ae na teena e Toni le fesoasoani alofa a ona aiga ma ana uō. O lea, o loo soifua pea Aleni e faamatala mai lana tala. Ae i ni nai tausaga ua mavae, na maliu ai Toni i se faalavelave tau taavale, e māfua i le inu tele.

E tusa pe e inutele le tagata na o ia, ae e afāina ai ola o isi tagata, ma e masani ona iʻu i mala. * O le faaaogā sesē o le ʻava malosi e masani ona iʻu i upu sauā ma le faaoolima, faapea le faileagaina o isi ma le fasioti tagata, e tutupu ai faalavelave i galuega ma auala ona o le onā, faapea faafitauli o le soifua mālōlōina. E tele tupe a le malo ua maʻimau i tausaga taʻitasi ona o le inu tele o tagata, ae lē taulia ai le afāina o faalogona o tagata, aiga, ma fanau.

E ui i lea, ua taʻua e le Faalapotopotoga o le Soifua Mālōlōina i Amerika, “e lē o tagata uma e masani i le inu tele, ma e lē inu foʻi i aso uma i latou e inu tele.” O le toʻatele o ē e pulea e le ʻava malosi, ua fai ma masani le inu tele ae lē iloa. O isi e seāseā inu ae silia i le fā po o le lima fagu e inu i le taimi e tasi.

Afai e te manaʻo e inu, e faapefea ona e iloa ua ova lau inu? E faapefea ona e iloa ua lava lau inu ma e lē tatau ona e faapea, “toe tasi lava se fagu”? (Faataoto 23:29, 30, Contemporary English Version) O le a talanoaina ni manatu aogā i mataupu o loo sosoo mai.

[Faamatalaga pito i lalo]