O se Matatiʻa Faaleagaga!

Tatalaina le Tusi Paia o le Faaliliuga a le Lalolagi Fou i le Gagana Samoa

IĀ Novema 6, 2009, na ausia ai se matatiʻa faaleagaga: Na tatalaina ai le lomiga, O le Tusi Paia​—O le Faaliliuga a le Lalolagi Fou i le gagana Samoa.

Ua iai faatasi nei le Faaliliuga a le Lalolagi Fou ma Tusi Paia ua leva ona faaaogā e tagata e matataʻu i le Atua i Samoa. Aiseā ua manaʻomia ai se isi faaliliuga o le Tusi Paia? O ai o lagolagoina le faia o lenei faaliliuga? Ma e faapefea ona e mautinoa e maufaatuatuaina le Faaliliuga a le Lalolagi Fou?

Aiseā ua Tele ai Faaliliuga o le Tusi Paia?

E matuā anoanoaʻi faaliliuga fou o le Tusi Paia na lomia ma faasalalauina i tausaga na seʻi mavae atu. O le faia o faaliliuga fou o le Tusi Paia, ua mafai ai ona maua mo le uluaʻi taimi le Afioga a le Atua i nisi gagana. Ae peitaʻi, ua faia foʻi faaliliuga fou o le Tusi Paia i gagana ua leva ona iai Tusi Paia. O le ā le māfuaaga? Ua taʻua i le tusi a Sakae Kubo ma Walter Specht (So Many Translations?) e faatatau i le tele o faaliliuga e faapea: “E leai se faaliliuga o le Tusi Paia e mafai ona manatu i ai, o le faaliliuga mulimuli lea. E tatau ona faaauau pea ona fetuutuunaʻi faaliliuga ina ia ōgatusa ma le tuputupu pea o le ma­lamalama i le Tusi Paia faapea foʻi suiga o gagana.”

Ua vaaia i le senituri lenei le tupu tele o le malamalama e faatatau i le gagana Eperu, Arama ma le Eleni, o gagana na uluaʻi tusia ai le Tusi Paia. Ua maua foʻi manusikulipi o le Tusi Paia e sili atu ona leva ma sili atu ona saʻo i lo o kopi na faaaogā e tagata faaliliu o le Tusi Paia i tupulaga ua mavae. O lea la, ua sili atu ona saʻo lelei le faaliliuina o le Tusi Paia i aso nei, i lo le taimi muamua!

I le faasino atu i faiga faapisinisi, ua faapea mai le mekasini The Atlantic Monthly: “O le mea e ofo ai ona o le lomia o le Tusi Paia, o se pisinisi e tele lava tupe e maua ai.” Ma i nisi taimi, e sili atu ona tāua le naunau ia tele ni  Tusi Paia e taulia, nai lo o le manatu mamafa i le saʻo aʻiaʻi o le Tusi Paia. Ua saʻoloto se tasi Tusi Paia fou e aveese fuaitau “e lē fiafia i ai ē e faasalalauina.” Ua aveesea foʻi e se tasi Tusi Paia faaupuga e ono tetee ai tagata e faitau i ai i aso nei. O se faataʻitaʻiga, ua taumafai lea Tusi Paia e faafiafia fafine ina ia faitau i ai, i le taʻua o le Atua, o le “Tamā ma le Tinā.”

Nātia le Suafa o le Atua

O le vala e sili ona faanoanoa ai, e faatatau lea i le suafa o le Atua, o Ieova. (Ua faaliliu e nisi tagata atamamai lea suafa o Yahweh po o Iauē.) I tusitusiga anamua o le Tusi Paia, o loo tusia ai le suafa o le Atua i konesane Eperu e fā ua faaliliu saʻo lava i konesane Peretania YHWH po o le JHVH. E toetoe lava faa-7,000 taimi o loo tusia ai lenei suafa iloga i le vaega ua taʻua e le toʻatele o le Feagaiga Tuai. (Esoto 3:​15; Salamo 83:18) E manino mai la, ua finagalo Lē na faia i tatou ina ia iloa e ona tagata tapuaʻi lona suafa ma ia latou faaaogāina!

Peitaʻi ane, i senituri anamua, o talitonuga faanuupō na māfua ai ona lē toe taʻua e tagata Iutaia le suafa o le Atua. Mulimuli ane, na aafia ai foʻi le faa-Kerisiano i na talitonuga. (Faatusatusa le Galuega 20:​29, 30; 1 Timoteo 4:1.) Sa avea ma faiga masani a tagata faaliliu o le Tusi Paia le sui o le suafa o le Atua i le taʻu “Alii.” I aso nei, e tele faaliliuga o le Tusi Paia ua aveesea ai le suafa o le Atua. O nisi faaliliuga faa-Peretania o ona pō nei, ua aveesea ai foʻi le upu “suafa” mai le Ioane 17:​6, i le fetalaiga a Iesu e faapea: “Ua ou faailoa atu lou suafa.” I le Tusi Paia Today’s English Version, ua faaliliuina lenei fuaiupu e faapea:“Ua ou faailoa atu oe.”

Aiseā ua tetee ai tagata i le taʻua o le suafa o le Atua? Ia mātau mai faamatalaga mai se tusi o loo iai taʻiala mo ē faaliliuina le Tusi Paia (Practical Papers for the Bible Translator) Tusi e 43, numera 4, 1992, na lomia e Sosaiete Tuufaatasi o le Tusi Paia (UBS), o loo faamaopoopoina taumafaiga i le lalolagi auā le faaliliuina o le Tusi Paia. Ua taʻua i se tasi mataupu e faapea: “Talu ai e mautinoa lava o le YHWH o se suafa moni, o le faaliliu saʻo o mataʻitusi Eperu o lea suafa i mataʻitusi o le isi gagana, o le auala sili lea e faaliliu ai lea suafa.” Ae na lapataʻi mai foʻi lea tusi: “E iai mea moni e tatau ona iloiloina.”

Ae pe e talafeagai na “mea moni”? E tusa ma lenei mekasini, e faapea le manatu o nisi tagata popoto: “Afai tatou te faailoa atu se igoa e pei o Yahweh [i ē e lē o ni Kerisiano], e ono sesē se manatu e oo i ai e faapea . . . , o ‘Yahweh’ o se Atua ese, po o se Atua fou, e ese mai i le Atua ua latou iloa.” Peitaʻi, ua faatāua mai i le Tusi Paia e faapea, o Ieova le Atua e ese mai i atua e tapuaʻi i ai i latou e lē o ni Kerisiano!​—Isaia 43:10-12; 44:8, 9.

Ua faapea mai nisi tagata popoto, o loo latou mulimuli i tū masani ina ua latou suia le suafa o le Atua i le taʻu “ALII.” Ae na taʻusalaina e Iesu le mulimuli i tū masani e lē faamamaluina ai le Atua. (Mataio 15:6) E lē gata i lea, e leai se faavae faale-Tusi Paia o le manatu e faapea e sui le suafa o le Atua i se faalupega. E tele faalupega na faalagilagi ai Iesu, e iai “Le Upu a le Atua” ma le “Tupu o tupu.” (Faaaliga 19:11-16) Pe tatau ona suia le suafa o Iesu i se tasi o nei faalupega?

Ua faapea mai se tasi mataupu i le mekasini na taʻua muamua: “E ao ona ʻalofia le taʻu o ‘Ieova.’” Ona o le ā le māfuaaga? “Ua talitonu tagata popoto, e sili atu ma talafeagai le uluaʻi faaleoga, o ‘Yahweh.’” Peitaʻi ane, o suafa masani o loo iai i le Tusi Paia e pei o Ieremia, Isaia ma Iesu, ua faaliliuina i suafa e ese mai i uluaʻi faaleoga o ia suafa i le gagana Eperu (Yir·meyahʹ, Yeshaʽ·yaʹhu, ma Yehoh·shuʹaʽ). Talu ai o “Ieova” o le auala talafeagai lea e faaliliuina ai le suafa o le Atua, ma ua masani ai le toʻatele o tagata, e leai la se faavae e tetee ai i le faaaogāina o lea suafa. O le mea moni o le lē fia faaaogāina o le suafa o le Atua, e foliga mai e faavae i faalogona ma le taofiofi mamau ae lē o se poto.

 Peitaʻi, e sili atu isi vala e aofia ai i lo le poto. O se faataʻitaʻiga, na tusia e se alii faufautua mai Initia o le faalapotopotoga o le Sosaiete Tuufaatasi o le Tusi Paia (UBS), ia āuga o le aveese o le suafa o le Atua mai Tusi Paia sa iai muamua, e faapea: “E lē o fia iloa e tagata Hinitū ia faalupega po o taʻu o le Atua; ae e latou te fia iloa lona suafa, ma seʻiloga latou te iloa lona suafa ona mafai lea ona latou fesootaʻi atu i le Atua e ona lea suafa.” O le mea moni, e faapena foʻi i latou uma o loo saʻili i le Atua. E tāua le iloa o le suafa o le Atua ina ia malamalama ai iā te ia, e lē o se malosi e leai se tino ae o lē e mafai ona tatou mafuta atu i ai. (Esoto 34:6, 7) O lea ua faapea mai ai le Tusi Paia: “Auā e faaolaina i latou uma e valaau i le suafa o Ieova.” (Roma 10:13) Ua alagatatau ai i ona tagata tapuaʻi ona faaaogā lona suafa!

Se Faaliliuga e Faamamaluina le Atua

O lea la, o se matatiʻa tāua na ausia i tuā i le 1950, o le taimi muamua lea na lomia ai ma tufaina atu le faaliliuga faa-­Peretania o le Tusi Paia o le Lalolagi Fou o Tusitusiga Eleni. I le isi sefulu tausaga e sosoo ai, na faasalalauina ai ni vaega o tusi sa masani ona taʻua o le Feagaiga Tuai, po o Tusitusiga Eperu. I le 1961 na maua ai le Tusi Paia atoa i le gagana Peretania. O le mea e sili ona tāua, ua faaliliuina e le Faaliliuga a le Lalolagi Fou le suafa o Ieova le Atua i vaega uma o tusia ai, e toetoe 7,000 i le “Feagaiga Tuai.” O le mea e sili ona mataʻina, o le toe faafoʻisia lea o le suafa o le Atua e faa-237 taimi i le “Feagaiga Fou” po o Tusitusiga Kerisiano Eleni.

O le toe faafoʻisia o lena suafa, e lē gata ua faamamaluina ai le Atua, ae ua manino mai ai foʻi ma ni malamalamaga fou. O se faataʻitaʻiga, ua faaliliuina e le tele o faaliliuga le Mataio 22:44 e faapea: “Ua fetalai ane le Alii i loʻu Alii.” Ae o ai o loo fetalai, ma o ai o loo fetalai i ai? Ua faaliliu e le Faaliliuga a le Lalolagi Fou le fuaiupu lenei e faapea: “Ua fetalai atu Ieova i loʻu Alii,” ma ua saʻo ai le faaliliuina o le manatu mai le Salamo 110:1. O lea la, ua mafai ai e le ʻaufaitau ona iloa le tāua o le eseesega i le va o Ieova le Atua ma lona Alo.

O Ai o Lagolagoina?

Ua lomia ma faasalalauina le Faaliliuga a le Lalolagi Fou e le Watch Tower Bible and Tract Society, o le faalapotopotoga faaletulafono ua fai ma sui o Molimau a Ieova. Ua sili atu nei i le selau tausaga o lomia ma faasalalauina e Molimau a Ieova Tusi Paia i le lalolagi atoa. O lenei faaliliuga na tuuina mai i Molimau a Ieova e se vaega o Kerisiano ua taʻua o le Komiti o Faaliliuga o le Tusi Paia o le Lalolagi Fou. E lē o fia lauiloa sui o le Komiti ae ua talosaga mai ina ia aua nei faailoaina atu o latou igoa e oo lava pe a mavae lo latou maliliu.​—Faatusatusa 1 Korinito 10:31.

Aiseā ua taʻu ai lenei Tusi Paia o le Faaliliuga a le Lalolagi Fou? Ua atagia ai i lenei mea le talitonuga mautinoa e faapea, ua iai le fanau a tagata i “faitotoʻa o le lalolagi fou,”e pei ona folafola mai i le 2 Peteru 3:13. E pei ona tusia e le Komiti e faapea, i lenei taimi o“suiga mai i le lalolagi tuai,” e tāua tele i faaliliuga o le Tusi Paia ona faasusulu atu “le upu moni mamā o le Afioga a le Atua.”​—Tagaʻi i Upu Tomua o le lomiga o le 1950.

Se Faaliliuga e Saʻo Aʻiaʻi

Sa ave le faamuamua i le saʻo aʻiaʻi. Na galulue saʻo lava le ʻaufaaliliu o le Tusi Paia faa-Peretania mai i uluaʻi gagana o le faa-­Eperu, Arama ma le faa-Eleni, ma na faaaogā tusi aupito sili ona lelei sa iai. * Sa matuā faaeteete foʻi i le faaliliuina o mau tuai mai le upu i le upu i le mea na mafai ai, ae i se gagana o le a malamalama lelei i ai tagata faitau i aso nei.

 E lē o se mea e ofo ai ona ua viiviia e isi tagata popoto le Faaliliuga a le Lalolagi Fou, ona o le faamaoni ma le saʻo aʻiaʻi. I le 1989, na faapea mai ai le polofesa o Benjamin Kedar o se tagata aʻoga Eperu i Isaraelu: “I aʻu saʻiliʻiliga i gagana e fesootaʻi atu i le Tusi Paia Eperu ma faaliliuga, e masani ona ou suʻe i le Faaliliuga a le Lalolagi Fou i le faa-Peretania. I le faia faapea, na ou lagona ai ua faamautinoa mai pea iā te aʻu e lenei Tusi Paia, se taumafaiga faamaoni ina ia maua se malamalamaga saʻo aʻiaʻi o le tusi.”

Ua Faaliliuina i Isi Gagana

Ua talafeagai la ona faia e Molimau a Ieova nisi Faaliliuga a le Lalolagi Fou ina ia maua e atunuu e lē tautatala i le gagana Peretania. I le taimi nei ua lomia le Tusi Paia atoa po o se vaega, i le silia ma le 70 gagana. Ina ia faatinoina lenei galuega, na faia ai se fuafuaga e faaliliuina le Tusi Paia e faaaogā ai metotia ua tuu faatasi ai upu faa-le Tusi Paia ma le poto faaonapōnei o komepiuta. Na faavae ai foʻi se vaega ua taʻua o le Matagaluega o Faaliliuga e fesoasoani i le ʻaufaaliliu. O loo vaavaaia e le Vaega Pule o Molimau a Ieova le galuega faaliliu o le Tusi Paia e ala i le Komiti o Tusitusiga. Ae e faapefea ona faia lenei galuega?

Muamua, e tofia se vaega o Kerisiano tuuina atu e faia le galuega faaliliu. Ua faaalia i mea e tutupu, pe a galulue faatasi se vaega o tagata faaliliu nai lo le galue toʻatasi, ua saunia ai se faaliliuga e sili atu ona lelei ma malamalamagofie. (Faatusatusa le Faataoto 11:14.) O tagata taʻitoʻatasi o le ʻaufaaliliu, ua latou maua le poto masani i le faaliliuina o lomiga a Molimau a Ieova. E maua foʻi e le ʻaufaaliliu le toleniga māeʻaeʻa i mataupu faavae i faaliliuga o le Tusi Paia ma le faaaogāina o polokalame ua saunia faapitoa e ala i komepiuta.

Ua faatonuina le ʻaufaaliliu ina ia saunia se Tusi Paia e (1) saʻo aʻiaʻi, (2) tutusa faaupuga, (3) faaliliu saʻo e tusa ma le gagana ma (4) e faigofie ona malamalama ai tagata lautele. E faapefea ona faia o lenei mea? Seʻi manatu i le Tusi Paia fou lea e leʻi leva talu ona maua. Na amata e le ʻaufaaliliu ona filifilia upu o le gagana Samoa e tutusa ma faaupuga autū o le Tusi Paia o loo faaaogāina i le Faaliliuga a le Lalolagi Fou faa-Peretania. Ua faapolokalameina le komepiuta ina ia faaalia mai ai upu e tutusa pe fesootaʻi uiga ma upu o le Tusi Paia. Ua faaalia mai ai foʻi upu o le gagana Eleni ma le Eperu anamua, ia e maua mai ai upu faa-­Peretania, ina ia suʻesuʻe i ai le tagata faaliliu i auala o faaliliu ai na upu Eleni ma Eperu i isi fuaiupu. O nei mea uma ua fesoasoani i le filifilia o faaupuga e tutusa ma le gagana Samoa. Pe a malilie uma le ʻaufaaliliu i na upu ona amata loa lea ona faaliliu le Tusi Paia, e faaaogā ai le komepiuta e faaali mai upu tutusa o le gagana Samoa a o faaliliu fuaiupu taʻitasi.

Ae peitaʻi, e tele isi mea e aofia i le faaliliu ae lē na o le sui o le upu i le upu. E tele galuega na faia e faamautinoa ai ua saʻo le manatu o mau po o faaupuga o le gagana Samoa ua filifilia. E tatau foʻi ona vaai lelei po o saʻo le kalama ma sologa lelei manatu e tusa o le gagana. Ua manino mai le tele o taumafaiga na faia i lenei fuafuaga. O faaupuga faa-Samoa ua faaaogā e le Faaliliuga a le Lalolagi Fou e faaliliu ai le Afioga a le Atua, e faigofie i le faitau, manino ma malamalamagofie ma e faamaoni e tusa ai ma tusitusiga anamua.

Matou te faalaeiauina oe ina ia e suʻesuʻe i le lomiga, O le Tusi Paia​—O le Faaliliuga a le Lalolagi Fou. E mafai ona e maua se kopi mai i ē o lomia lenei mekasini pe mai i le faapotopotoga o Molimau a Ieova o lou atunuu. E mafai ona e faitau i ai ma lou mautinoa o loo faamatala moni mai ai Afioga a le Atua i lau gagana. E lē taumatea ua e ioe o le mauaina talu ai nei o lenei Tusi Paia, o se matatiʻa faaleagaga!

 [Pusa/Ata i le itulau 22]

Nisi o Vala o le Faaliliuga a le Lalolagi Fou

Manino ma Faigofie ona Faitau

Ua faavasega fuaiupu i palakalafa: Nai lo o le avea o fuaiupu taʻitasi o se palakalafa, ua tuufaatasia fuaiupu i palakalafa. E aogā lea i le ʻaufaitau e mulimuli ai i uiga o manatu o tusitala o le Tusi Paia.

Ulutala Pito i Luga: O loo iai i le tele o itulau, e aogā ina ia vave ai ona maua se mataupu o loo suʻe o le Tusi Paia.

Mau Faasino: E tofu le itulau ma mau e faasino ai le tagata faitau i mau e fesootaʻi ma le mau lea.

Le Lisi o Upu o le Tusi Paia: O le vaega i tua o le tusi ua iai se lisi o upu ua filifilia ma faamatalaga pupuu mai i mau.

Faaopoopoga: O mataupu pupuu e faatatau i aʻoaʻoga faavae o le Tusi Paia ma mea e fesootaʻi i ai.