Ua Fesili Mai le ʻAufaitau . . .

Aiseā ua Ofo Mai ai e le Atua le Meaalofa o le Ola e Faavavau i Tagata?

▪ Ua faapea mai le Tusi Paia, ua ofo mai e le Atua iā i tatou le avanoa e maua ai le “ola e faavavau.” (Ioane 6:40) O le ā na uunaʻia ai o ia e ofo mai lenā faamoemoe? Pe ua na o se faailoaga o lona faamasinotonu?

O le faamasinotonu, e aofia ai le faia i isi e tusa ai o mea ua tonu ma saʻo. Pe e tatau iā i tatou le ola? E leai. Ua taʻua i le Tusi Paia: “E leai se tagata e amiotonu i le lalolagi e na te faia pea le mea lelei ma e lē agasala.” (Failauga 7:20) E iai le faasalaga o le agasala. Na lapataʻia e le Atua Atamu, o le aso e agasala ai o ia e oti ai lava. (Kenese 2:17) Mulimuli ane na faagaeeina le aposetolo o Paulo e tusi e faapea: “O le totogi o le agasala o le oti lea.” (Roma 6:23) O lea afai e tatau ona oti uma fanau a Atamu, aiseā la ua ofo mai ai e le Atua le avanoa i le ola e lē uma?

O le ola e faavavau o se “meaalofa foaʻifua.” Ua faaalia ai le tele ma le anoanoaʻi o le alofa o le Atua ma lona agalelei faifua. Ua faapea mai le Tusi Paia: “Ua agasala tagata uma lava, ma ua lē ausia le mamalu o le Atua, ma o se meaalofa foaʻifua le taʻuamiotonuina o i latou i lona agalelei faifua, ma ua faasaʻolotoina ai e ala i le togiola a Keriso Iesu.”—Roma 3:23, 24.

E ui e tatau ona oti i tatou uma, a ua filifili le Atua e foaʻi atu le ola e faavavau i ē alolofa iā te ia. Pe e fetaui lenā mea? Ua faapea mai le Tusi Paia: “O le ā la sa tatou upu? Po ua fai mea lē tonu ea le Atua? Aua lava neʻi faapea! Ua fetalai atu o ia iā Mose: ‘Ou te alofa mutimutivale i lē ua ou alofa mutimutivale i ai, ma ou te tigā alofa i lē ua ou tigā alofa i ai.’ . . . O ai ea oe ua e finau atu ai i le Atua?”—Roma 9:14-20.

I nisi atunuu, e faamagalo e se alii tāua o le malo po o se faamasino se tagata solitulafono o loo tuli lona faasalaga matuiā. Afai e taumafai le tagata solitulafono e faaōgatusa lona olaga ma faatonuga o lona faasalaga, ma sui ona uiga ma ana amioga, ona filifili lea o le faamasino po o le peresitene e faamagalo o ia, i le faaitiitia o lona faasalaga pe solofua, ma ua faaalia ai lona agalelei faifua.

I se uiga faapena ua filifili ai Ieova e na te lē faataunuu le faasalaga e tatau mo tagata agasala uma. Ae o lona alofa ua ia foaʻi atu ai le ola e faavavau iā i latou e alolofa iā te ia, ma faaōgatusa o latou olaga ma ana tapulaa. Ua faapea mai le Tusi Paia: “E lē faailogaina tagata e le Atua, ae o lē e mataʻu iā te ia i nuu uma lava, ma fai le amiotonu, e talia e ia.”—Galuega 10:34, 35.

O le faailoaga sili o le alofa o Ieova mo i tatou, o le auina mai lea o lona Alo e puapuagatia ma maliu mo i tatou. Na fetalai Iesu e uiga i lona Tamā: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”—Ioane 3:16.

O i latou uma e alolofa iā Ieova ma faia lona finagalo o le a faapena foʻi ona talia e le Atua, e tusa lava po o ā o latou talaaga. O lea, o le faamoemoe o le ola e faavavau o le faailoaga sili lea o le agalelei faifua o le Atua, o se gaoioiga ona o lona alofa silisili.

[Faamatalaga faaopoopo i le itulau 29]

O le faailoaga sili o le agalelei faifua, o se gaoioiga ona o lona alofa silisili