Se Faafitauli i le Lalolagi Aoao, ua Iai se Vaifofō

UA VAAIA tulaga mafatia i so o se mea, ma o le toʻatele o tagata ua fesoasoani atu ma le alofa i ē o mafatia. O se faataʻitaʻiga, ua galulue mo ni taimi uumi tagata faigaluega o le falemaʻi, ina ia fesoasoani i tagata mamaʻi pe manunuʻa. Ua taumafai le ʻaufuimū, leoleo, le ʻaufaitulafono, ma le ʻau laveaʻi e tau faamāmā pe taofia mafatiaga e ono oo i isi. O na taumafaiga e telē se fesoasoani e avatu ai i tagata, ae e lē mafai e so o se tagata po o se faalapotopotoga ona aveesea mafatiaga i le lalolagi atoa. Ae e mafai, ma o le a aumaia e le Atua le vaifofō i le lalolagi aoao.

E maua le faamautinoaga i le tusi mulimuli o le Tusi Paia: ‘E soloiesea e le Atua loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.’ (Faaaliga 21:4) Seʻi manatu i le toʻatele o tagata o le a aafia i lenā folafolaga. Ua taaofaʻi  mai ai le fuafuaga a le Atua e aumaia le iʻuga i mafatiaga uma. O le a ia faia faapea e ala i le tafiesea o taua i le lalolagi, le fia aai, maʻi, ma faiga lē tonu, faatasi ai ma tagata amioleaga uma. E leai se tagata e mafai ona ia faia lenā tulaga.

Le Mea o le a Faia e le Malo o le Atua

O le a faataunuuina e le Atua ana folafolaga e ala mai i le tagata lona lua e sili ona malosi i le aoao o mea—o Iesu Keriso o lē ua toe faatūina mai. E oo mai le taimi o le a pule mai ai Iesu o se Tupu i le lalolagi atoa, e aunoa ma le faalavelavea. O le a lē toe pulea tagata e tupu faaletagata, peresitene, po o le ʻaufaipolotiki. Nai lo lea, o le a pulea i latou e le Tupu e toʻatasi ma le malo e tasi—le Malo o le Atua.

O le a aveesea e lenā Malo ia malo uma faaletagata. Ua leva ona valoia e le Tusi Paia e faapea: “E faatūina . . . e le Atua o le lagi o le malo e lē faaumatia e faavavau; o lea malo foʻi, e lē tuuina atu ia i se tasi nuu, na te tuʻimomomoina ma faaumatia ia malo uma lava, a o ia e tumau lava e faavavau.” (Tanielu 2:44) O le a autasi tagata uma i lalo o le pulega a le Malo amiotonu e tasi—o le Malo o le Atua.

A o iai Iesu i le lalolagi o se tagata, e tele taimi sa ia talanoa ai e faatatau i lenā Malo. Sa ia faasino atu i lenā Malo i le tatalo faaaʻoaʻo, ma faatonu ona soo e tatalo e faapea: “Ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:10) Mātau foʻi, na taʻua e Iesu, e fesootaʻi atu le Malo i le faia o le finagalo o le Atua i le lalolagi, ma o le finagalo o le Atua ia tafiesea mafatiaga i le lalolagi atoa.

O le a aumaia e le Malo amiotonu a le Atua faamanuiaga lea e lē mafai e se malo faaletagata ona aumaia. Ia manatua, na auina mai e Ieova lona Alo e fai ma togiola ina ia maua ai e tagata le ola e faavavau. I lalo o le pulega alofa a le Malo, o le a faasolo ina lelei atoatoa tagata. O le ā le iʻuga? “E faaumatia e [Ieova] le oti e faavavau; e soloiesea foʻi e le Alii o Ieova o loimata i mata uma lava.”—Isaia 25:8.

E ono fesili nisi: ʻAiseā ua lē gaoioi ai le Atua? O le ā o loo ia faatali i ai?’ Sa ono mafai ona gaoioi Ieova i taimi ua mavae e tafiesea pe taofia mafatiaga uma. Nai lo lea, ua ia faataga se taimi e faaauau ai pea mafatiaga, e lē ona o se māfuaaga manatu faapito, ae e mo le lelei e faavavau o lana fanau i le lalolagi. E faataga e mātua alolofa a latou fanau e feagai ma tulaga faigatā, pe afai latou te iloa o lenei tulaga o le a maua ai ni aogā mo se taimi umi. I se tulaga talitutusa, e iai māfuaaga lelei a Ieova ua faataga ai tagata e mafatia mo se taimi lē tumau, ma o loo faamatalaina i le Tusi Paia nei māfuaaga. E aofia ai mea e pei o le filifiliga saʻoloto, le agasala, ma le finauga e faatatau i le tonu o le pulega a Ieova. Ua faamatala foʻi e le Tusi Paia e faapea, ua faatagaina se foafoaga agaga leaga e pulea le lalolagi mo se taimi faatapulaaina. *

E ui e itiiti le avanoa i inei e tatou te talanoaina ai na māfuaaga uma, ae e lua vala e mafai ona aumaia ai iā i tatou le faamoemoe ma faalaeiauga. Muamua: O le a faamanuia i tatou e Ieova e sili atu nai lo so o se mafatiaga e feagai ma i tatou. E lē gata i lea, ua faamautinoa mai e le Atua iā i tatou: “E lē toe manatua mea na muamua, e lē alu aʻe foʻi i le loto.” (Isaia 65:17) O le a aveesea atoatoa e le Atua puapuaga ma mafatiaga, lea e māfua mai i le faatagaina o le leaga mo se taimi lē tumau.

Lona lua: Ua faatulaga e le Atua se taimi e lē masuia e faaiʻu ai mafatiaga. Manatua na fesili le perofeta o Sapakuka po o le ā le umi o le a faataga ai e Ieova faiga sauā ma feteenaʻiga. Na tali mai Ieova: “O le faaaliga ua tuuina mo ona aso ua tuupōina, . . . e lē faatuai mai.” (Sapakuka 2:3) I le mataupu o sosoo mai, o le a tatou iloa ai, ua lata lenā “aso ua tuupōina.”

[Faaopoopoga i lalo]

 [Pusa i le itulau 7]

O Mau o Loo Faasino Atu i se Lumanaʻi Matagofie

E LĒ TOE IAI NI TAUA:

“Inā ō mai ia, inā vaavaai i galuega a Ieova, o lē ua faia faatafunaga i le lalolagi. Ua faaiʻua e ia o taua e oo lava i tuluʻiga o le lalolagi.”—Salamo 46:8, 9.

TOETUTŪ MAI Ē PELE:

“E toetutū mai tagata amiotonu ma tagata amiolētonu.”—Galuega 24:15.

E IAI TAUMAFA MO TAGATA UMA:

“E taumafa o saito i le nuu i tumutumu lava o mauga; e gasē ona fua.”—Salamo 72:16.

E LĒ TOE IAI NI MAʻI:

“E lē fai mai foʻi se tasi ua mau ai, ‘Ou te maʻi.’”—Isaia 33:24.

O LE A MOU ATU TAGATA AMIOLEAGA:

“A e vavaeeseina o ē amio leaga ai le laueleele, e liaʻiina ai foʻi o ē amio pepelo.”—Faataoto 2:22.

O LE A IAI LE FAAMASINOTONU:

“Faauta, e pule le tupu [Keriso Iesu] ma le amiotonu, e pule foʻi alii ma le tonu.”—Isaia 32:1.

[Ata i le itulau 7]

O le a foʻia e le Malo so o se mafatiaga na feagai ma i tatou