O Lesona Tatou te Aʻoaʻoina Mai iā Iesu

E Faatatau i le Olaga i le Aiga

O le ā le vaaiga i le faaipoipoga e maua ai le fiafia i aiga?

O le faaipoipoga o se aufaatasiga paia. Ina ua fesiligia Iesu pe faataga ona tatala le faaipoipoga, na ia fetalai e faapea: “Tou te leʻi faitau ea o lē na faia i laʻua i le amataga, na ia faia i laʻua o le tane ma le fafine, ma na ia fetalai atu, ‘O le mea lea e tuua ai e le tane lona tamā ma lona tinā, ma nonofo faatasi ma lana avā, ona avea ai lea o i laʻua ma tino e tasi’? O lea ua lē toe toʻalua ai, ae ua avea i laʻua ma tino e tasi. O ē ua faatasia e le Atua, aua neʻi tuueseeseina e se tagata. . . . Ai se tasi e faateʻa i lana avā ae e leʻi faitaaga lana avā, ma toe faaipoipo i se isi fafine, ua mulilua o ia.” (Mataio 19:4-6, 9) Pe a mulimuli se ulugalii i le fautuaga a Iesu ma faamaoni le tasi i le isi, o le a lagona e tagata uma o le aiga le saogalemu ma le fiafia.

Aiseā e maua ai le fiafia i aiga pe a alolofa i le Atua?

Na fetalai Iesu: “ʻIa e alofa atu iā Ieova lou Atua ma lou loto atoa, ma lou ola atoa, ma lou mafaufau atoa.’ O le poloaʻiga silisili ma le muamua lenā.” O le ā le poloaʻiga silisili lona lua? Na fetalai Iesu: “Ia e alofa atu i lou tuaoi [e aofia ai ē e nonofo faatasi ma oe—o lou aiga] e pei o oe lava iā te oe.” (Mataio 22:37-39) O lea la, o le kī i le mauaina o le fiafia i le aiga, o le iai lea o se faiā lelei ma le Atua auā o le alofa iā te ia e uunaʻia ai i tatou e alofa le tasi i le isi.

 E faapefea i tane ma avā ona faafiafia le tasi i le isi?

E faafiafia e tane a latou avā pe a mulimuli i le faaaʻoaʻoga a Iesu. Sa iā te ia le alofa lē manatu faapito i lana avā faafaatusa, o le faapotopotoga. (Efeso 5:25) Na fetalai Iesu e faapea: “E leʻi sau le Atalii o le tagata ina ia auauna mai tagata iā te ia, ae ia auauna atu.” (Mataio 20:28) E leʻi pulepuletutū Iesu pe soonafai i latou sa i lalo o lana vaavaaiga, ae sa avea o ia ma sē e faafouina ai i latou. (Mataio 11:28) O lea la, e ao i tane ona faatino lo latou tulaga ulu i se auala agalelei e aogā i tagata uma o le aiga.

E aogā foʻi i avā le faaaʻoaʻoga a Iesu. Ua taʻua i le Tusi Paia, “O le ulu o Keriso o le Atua.” O loo faapea mai foʻi “o le ulu o le fafine o le tane.” (1 Korinito 11:3) E leʻi manatu Iesu o se tulaga maulalo le gauaʻi atu i le Atua. Sa faaaloalo loloto o ia i lona Tamā. Na fetalai Iesu, “Ou te faia pea mea e fiafia i ai lona finagalo.” (Ioane 8:29) O se avā e gauaʻi i le tulaga ulu o lana tane ona o le alofa ma le faaaloalo i le Atua, e telē sana vaega fai i le mauaina o le fiafia i le aiga.

O le ā e aʻoaʻoina e mātua mai i le vaaiga a Iesu i tamaiti?

Sa faifaimea faatasi Iesu ma tamaiti, ma sa naunau i o latou manatu ma faalogona. Ua faapea mai le Tusi Paia: “Ua valaau atu Iesu i tamaiti e ō ane iā te ia ma faapea atu: ‘Tuu ai pea tamaiti e ō mai iā te aʻu.’” (Luka 18:15, 16) I se tasi taimi, na faitioina ai e tagata nisi tamaiti na faaalia lo latou faatuatua iā Iesu. Ae na faamālō atu Iesu i tamaiti ma faapea atu i le ʻaufaitio: “Pe tou te leʻi faitau ea e faapea, ‘Ua e saunia le viiga e ala i gutu o tamaiti ma pepe’?”—Mataio 21:15, 16.

O le ā e aʻoaʻoina e fanau mai iā Iesu?

Na faataatia e Iesu se faaaʻoaʻoga lelei mo tamaiti i le naunau i mea faaleagaga. Ina ua 12 ona tausaga, sa maua atu o ia “i le malumalu, o loo nonofo faatasi ma aʻoaʻo, o faalogologo ma tuufesili atu iā i latou.” O le ā le iʻuga? “Ua matuā ofo i latou uma o ē ua faalogologo iā te ia i lona malamalama ma ana tali ua fai atu.” (Luka 2:42, 46, 47) Peitaʻi, e leʻi avea le poto o Iesu ma mea e faamaualuga ai. Nai lo lenā, sa ia faaaloalo ai i ona mātua. Ua taʻua i le Tusi Paia e faapea: “Ua gauaʻi pea o ia iā i laʻua.”—Luka 2:51.

Mo nisi faamatalaga, tagaʻi i le mataupu e 14 o le tusi, O ā Aʻoaʻoga Moni a le Tusi Paia? *

[Faaopoopoga i lalo]