E Mafai e le Tusi Paia Ona Suia Olaga

Na faapefea e se tamāloa sa ulaula mariuana ma tapaa a o laʻitiiti, ona maua le malosi e tuu ai lenā masaniga? O le ā sa fesoasoani i se tagata sauā sa iai i se kegi, e pulea lona ita ma manumalo mai ai i le faailoga lanu? Seʻi mātau mai mea na la taʻua e faatatau i o la olaga.

FAAMATALAGA O LONA OLAGA

IGOA: HEINRICH MAAR

TAUSAGA: 38

ATUNUU: KAZAKHSTAN

TALAAGA: PULEA E LE MARIUANA MA LE TAPAA

O LOʻU OLAGA SA IAI: Sa ou fanau i Kazakhstan i saute, pe tusa ma le 70 maila mai le taulaga o Tashkent. E mātūtū ma vevela lenā vaipanoa i le tau māfanafana, ma e oo atu le vevela i le 110 tikeri Fahrenheit (45 tikeri Celcius), ae e oo atu i le 15 tikeri Fahrenheit (-10 tikeri Celcius) i le tau mālūlū, ma e talafeagai na tau mo le totōina o vine ma mariuana.

O oʻu mātua e tupuga mai i Siamani. Na la faatāuaina uma le Tusi Paia, ae e lē mulimuli i ai. Ae peitaʻi, na la aʻoaʻo aʻu e tauloto le Tatalo a le Alii. E 14 oʻu tausaga i le taimi na faia ai e Molimau a Ieova, lesona faale-Tusi Paia a loʻu tinā ma loʻu tuafafine mo sina taimi. Sa iai se taimi na ou faalogo atu ai o faailoa e Molimau e toʻalua na faia lesona a loʻu tinā, le suafa o le Atua o Ieova iā te ia, i lana lava Tusi Paia. Sa faagaeetia ai aʻu i lenā taimi. Sa faamuta e loʻu tinā le faia o lesona, ma sa leai se isi laasaga na ou faia e aʻoaʻoina atili ai e faatatau i le Atua. Peitaʻi, i se taimi mulimuli ane i le aʻoga, sa taʻua ai e loʻu faiaʻoga so o se faamatalaga sesē e uiga i Molimau a Ieova. Ona sa iai ni sauniga a Molimau a Ieova na ma auai ai ma loʻu tuafafine, na ou faapea atu ai i le faiaʻoga e sesē mea na ia faamatalaina.

Ina ua 15 oʻu tausaga, sa auina atu aʻu i Leningrad, lea ua taʻua nei o St. Petersburg, i Rusia, ina ia aʻoaʻoina se matātā. Na ou taʻu atu i ē na matou potu faatasi ni nai mea na ou iloa e uiga iā Ieova. Peitaʻi, na amata ona ou ulaula. Ina ua ou toe foʻi atu i loʻu aiga i Kazakhstan, na faigofie ona ou faatauina mariuana, e ui lava e faasā i le tulafono. Na malosi foʻi laʻu inu i mea malosi ma le uaina e faia lava i le fale.

Ina ua uma laʻu aʻoga i le matātā eseese, ona ou auai loa lea i vaegaʻau a Rusia mo le lua tausaga. E ui i lea, na ou manatua pea nisi o mea  na ou aʻoaʻoina mai le Tusi Paia a o oʻu laʻitiiti. Pe a maua ni avanoa, ou te talatalanoa atu i oʻu uso a fitafita e faatatau iā Ieova, ma ou teena ni manatu sesē na fai e uiga i Molimau.

Na ou siitia atu i Siamani ina ua uma laʻu auaunaga faavaegāʻau. A o oʻu iai i se nofoaga e nonofo ai tagata aumau, sa ou maua ai se tusi e faia ai lesona faale-Tusi Paia na lomia e Molimau. Sa ou faitauina ma le naunau ma ou iloa ai o mea o loo i le tusi, o le upu moni lea. Ae peitaʻi, sa lē mafai lava ona tuua le puleaina o aʻu e le tapaa ma le mariuana. E leʻi umi ae ou siitia atu loa e lata i le aai o Karlsruhe. O i inā na ou feiloaʻi ai i se Molimau a Ieova, lea na faia aʻu lesona faale-Tusi Paia.

LE AUALA NA SUIA AI E LE TUSI PAIA LOʻU OLAGA: Mo se taimi umi, na ou manatu ai o le Tusi Paia, o le Afioga lea a le Atua. Ma ina ua uma ona ou faitauina le tusi na ou maua, sa faatalitonuina ai aʻu e tali e le Tusi Paia fesili tāua uma i le olaga. Ae umi se taimi o tau suia aʻu masaniga. Na oo ina pāʻia loʻu loto i le fautuaga a le Tusi Paia o loo i le 2 Korinito 7:1, ma ou filifili ai loa e faamamā loʻu olaga mai i “mea uma e faaleagaina ai le tino ma le agaga,” e ala i le tuu o le ulaula mariuana ma le tapaa.

Sa mafai ona vave tuu laʻu ulaula mariuana. Ae e ono masina le umi faatoʻā mafai ona tuu laʻu ulaula tapaa. I se tasi aso na fesili mai le Molimau o loo faia aʻu lesona faale-Tusi Paia, “O le ā se fuafuaga o lou olaga?” Na faateʻia aʻu ma ou toe mafaufau ai i laʻu tapaa lea e faigatā ona tuu. E tele taimi na ou taumafai ai e taofi le ulaula. A o le taimi lea, na ou filifili ai e tatalo a o leʻi ulaina se sikareti, nai lo le ʻaiʻoi atu i le Atua mo se faamagaloga pe a uma ona fai. I le 1993, na ou faatulaga ai loa se aso e tuu ai. Ona o le fesoasoani a Ieova, ou te leʻi toe tago ai lava i se sikareti.

LE AUALA NA AOGĀ AI IĀ TE AʻU: O lea ua ou saʻoloto mai i le taugatā ma aafiaga leaga o le mariuana ma le tapaa, ma ua oo ina faaleleia loʻu ola mālōlōina. I aso nei, ua maua soʻu faaeaga e galue ai o se tagata tauofo i le ofisa o le lālā o Molimau a Ieova i Siamani. Ua ou fiafia ona ua ou iloa faatatau fautuaga a le Tusi Paia i loʻu olaga! O le iloa o mea o loo aʻoaʻoina i le Tusi Paia, ua ou maua ai se fuafuaga moni o loʻu olaga.

FAAMATALAGA O LONA OLAGA

IGOA: TITUS SHANGHADI

TAUSAGA: 43

ATUNUU: NAMIBIA

TALAAGA: TAGATA SAUĀ O SE KEGI

O LOʻU OLAGA SA IAI: Sa ou ola aʻe i Ohangwena, o se nuu maotua i le itu i mātū o Namibia. Na sasaina ma fasiotia tagata o loʻu nuu a o faagasolo le taua na faia i lenā vaipanoa, i vaitausaga o le 1980. I loʻu nuu, e mafai ona manatu i se tama o se toa, pe afai e lelei lana fusu ma na te fasia isi tamaiti. O lea sa aʻo ai loa laʻu fusu!

Ina ua māeʻa laʻu aʻoga, sa ou nofo loa i le tuagane o loʻu tinā i se aai tū matafaga o  Swakopmund. E leʻi leva ona ou taunuu i inā, ae ou auai loa i se kegi fouvale a tama talavou. E matou te ō i ni taulaga e lē talia ai tagata uli, e pei o faletalimālō ma pā pia, ina ia faatupu se vevesi. E tele taimi na matou fufusu ai ma sikulatī ma leoleo. E iai lava laʻu naifi umī i pō uma, e sauni ai e osofaʻia se tasi e faalavelave mai.

A o faia se matou fetauaʻiga ma se kegi i se tasi pō, na toetoe lava a ou oti ai. Na savali mai i oʻu tua se tagata o le isi kegi, ma a o toetoe lava ia tāina loʻu ulu ae tuʻi loa e se tagata o la matou kegi, ma paʻū ai loa ma lē iloa se mea. E ui lava ina toetoe a ou oti, ae sa faaauau pea ona ou matuā sauā. Pe a ma tauupu ma se isi, po o se tamāloa po o se fafine, o aʻu lava e muamua alu atu laʻu tuʻi.

LE AUALA NA SUIA AI E LE TUSI PAIA LOʻU OLAGA: Ina ua ou feiloaʻi muamua i se fafine Molimau a Ieova, sa ia faitau maia ni fuaiupu mai le Salamo e 37, ona ia faapea mai lea, o loo iai foʻi isi folafolaga matagofie mo le lumanaʻi o loo i le tusi o Faaaliga. Ae ona e na te leʻi taʻu maia po o fea o le tusi e maua ai folafolaga, sa ou aumaia loa se Tusi Paia ma faitau atoa le Faaaliga i lenā pō. Na ou fiafia i le folafolaga o loo i le Faaaliga 21:3, 4 e faapea, “e lē toe iai se oti, po o se faanoanoa, po o se tagiauē, e lē toe iai foʻi se tigā.” Ina ua toe asiasi mai Molimau, na ou talia loa le ofo e faia se lesona faale-Tusi Paia.

Sa faigatā iā te aʻu ona suia le auala e mafaufau ma gaoioi ai. Ae na ou aʻoaʻoina mai i le Galuega 10:34, 35 “e lē faailoga tagata le Atua, ae o lē e mataʻu iā te ia i nuu uma lava, ma fai le amiotonu, e talia e ia.” Na ou faia foʻi ni taumafaiga e faatatau ai le Roma 12:18: “Afai e mafai iā te outou, ia nonofo filemu ma tagata uma.”

E lē gata sa ou taumafai e pulea loʻu ita, ae sa ou taumafai foʻi e taofia le malosi o laʻu ulaula tapaa. Sa ou tatalo ma loimata i le tele o taimi iā Ieova, ina ia fesoasoani mai. I le taimi muamua, sa sesē le auala na ou faia ai, i loʻu faapea o laʻu sikareti “mulimuli” lea, ona tatalo loa lea. O le Molimau lea sa faia laʻu lesona faale-Tusi Paia, na fesoasoani mai ina ia ou iloa le tāua o le tatalo muamua a o leʻi tago atu i se sikareti. Sa manaʻomia foʻi ona ou ʻalofia le faifaimea faatasi ma ē e ulaula. E lē gata i lea, sa ou usitaia foʻi le fautuaga e talanoa atu i ē e matou te faigaluega, i le leaga o le ulaula tapaa. Na aogā tele lenā iā te aʻu ona ua lē o toe ulaina ai se tapaa e ofo mai e isi.

Na oo ina tuu laʻu ulaula ma lafoaʻi loʻu olaga tuai sa iai. Ina ua mavae le ono masina o le aʻoaʻo ma faatatau mataupu silisili o le Tusi Paia, na ou agavaa loa e papatiso e avea o se Molimau a Ieova.

LE AUALA NA AOGĀ AI IĀ TE AʻU: Ua ou talitonu nei o Molimau a Ieova o le tapuaʻiga moni ina ua ou mātauina le alofa o loo iā i latou, e tusa lava po o le ā le ituaiga po o le lanu. A o oʻu leʻi papatiso e avea o se Molimau, na valaaulia aʻu e se palagi o le faapotopotoga e fai ʻaiga faatasi i lona fale. E pei o se miti lenā mea. E leʻi mafai muamua ona ou māfana atu i se palagi, e oo lava i le aai faatasi. Ua avea nei aʻu ma vaega o le ʻauuso moni faavaomalo.

I le taimi ua teʻa, sa taumafai ai sikulatī ma leoleo e faamalosia aʻu e suia le auala ou te mafaufau ma gaoioi ai, ae e leʻi taulau. E na o le Tusi Paia o loo iai le mana e suia ai oʻu uiga, ma avea ai o se tagata fiafia.

[Faamatalaga faaopoopo i le itulau 29]

“Sa ou tatalo ma loimata i le tele o taimi iā Ieova, ina ia fesoasoani mai”