Ua Fesili Mai le ʻAufaitau

Pe e Ave e le Atua Tamaiti e Fai ma Agelu i le Lagi?

Pe a oti se tamaitiiti, e ono taumafai uō a le aiga faavauvau e faamāfanafana i latou i le faapea atu, “Ai ua manaʻomia e le Atua se isi agelu i le lagi?” O le ā sou taofi, e saʻo lenei manatu?

Pe afai e saʻo na faapogaia e le Atua le oti o se tamaitiiti ona na te manaʻomia nisi agelu i le lagi, o lona uiga la e leai ni faalogona o le Atua, ma e sauā foʻi o ia. Ae e lē o le tulaga lenā o loo taʻua i le Tusi Paia. (Iopu 34:10) E lē mafai ona fao mai e se tamā alofa se tamaitiiti mai i ona mātua ina ia faatoʻatele ai tagata o lona aiga. Peitaʻi, e leai se tagata e sili atu lona alofa nai lo Ieova, auā o le alofa o lona uiga autū lea. (1 Ioane 4:8) E lē mafai e lona alofa ona faatagaina o ia e gaoioi i se auala sauā faapena.

Fesili ifo iā te oe lava, ‘Po o manaʻomia e le Atua nisi agelu i le lagi?’ O loo taʻua i le Tusi Paia e sao ma lelei galuega uma na faia e le Atua. (Teuteronome 32:4) Ina ua ia foafoaina le faitau miliona o agelu, na matuā atoatoa ona faataunuuina, ma e lē faapea e leʻi lava agelu. (Tanielu 7:10) Pe na sesē ona faitau e le Atua le aofaʻi o agelu na ia manaʻomia? E lē mafai ona tupu lenā mea! E mautinoa e lē taitai ona faia e le Atua Silisili ese se mea sesē faapena. E moni ua filifilia e Ieova nisi o tagata e avea ma foafoaga agaga i lona Malo faalelagi, peitaʻi, e lē o i latou o ni tamaiti i le taimi na maliliu ai.—Faaaliga 5:9, 10.

O le isi māfuaaga e lē mafai ai e le Atua ona ave tamaiti mai le lalolagi ina ia fai ma agelu i le lagi, ona e lē ōgatusa ma lana uluaʻi fuafuaga mo tamaiti. Na fetalai atu le Atua iā Atamu ma Eva i le faatoʻaga i Etena: “Ia fanafanau ia, ma ia uluola, ma ia tumu ai le lalolagi.” (Kenese 1:28) O fanau, o ni meaalofa mai le Atua, e tāua lea tulaga i lana uluaʻi fuafuaga o le faatumuina lea o le lalolagi i se aiga o tagata amiotonu. E na te leʻi fuafua e feoti vave tamaiti ma faaliliuina i latou e fai ma foafoaga agaga. O loo faaalia manino mai le Tusi Paia o fanau, “o le tofi lea mai iā Ieova.” (Salamo 127:3) Po o le a toe ave ea e Ieova, le Atua alofa, se meaalofa na ia avatu i mātua? E mautinoa e leai!

O le vave ona oti o se tamaitiiti, e matuā faanoanoa ma mafatia ai. O le a la se faamoemoe o loo iai mo mātua faavauvau? Ua folafola mai e le Tusi Paia o le a toetutū mai le faitau miliona o ē ua maliliu i se parataiso i luga o lenei lalolagi. Seʻi faaāta i o tatou mafaufau le toetutū mai o tamaiti i ni tino malolosi, ma toe faatasi ma ē pele iā i latou. (Ioane 5:28, 29) E finagalo le Atua mo tamaiti ina ia tuputupu aʻe, ia fiafia i le olaga, ma iloa lelei o ia ma lana fuafuaga mo le lalolagi. O lea la, o tamaiti ua maliliu e lē fai ma ni agelu i le lagi, ae o loo faatalitali i latou i le toetū i se lalolagi parataiso. I lenā taimi i lalo o le tausiga alofa a Lē na faia i tatou, o le a olioli ai tamaiti ma ē matutua e tapuaʻi iā Ieova le Atua e faavavau.