Na Ou Iloaina ai e Tāua Tele le Ola

NA TUPU LE FAALAVELAVE I LE TAEAO O APERILA 16, 2007. A o oʻu lafi i le tulimanu o se ofisa i le fogāfale tolu o Norris Hall o le aʻoga o Virginia Tech, na toe faamanatu mai ai iā te aʻu, ia tatou maua pea le loto faafetai, mo aso taʻitasi o loo tatou ola ai.

Sa ou i loʻu ofisa, o loo oʻu sauni e alu e piki mai laʻu meli mai le fogāfale lua. Ae na sau se polofesa, e ma te ō seʻi siaki se faalētonu i le komepiuta i lona ofisa. A o ma ulu atu i lona ofisa, na lagona atu le pāpā o se fana mai le fogāfale lua. Talu ai e ma te lē o iloa le mea ua tupu, na vave ona ma meʻi i totonu o le ofisa, ma loka le faitotoʻa, ma tatali ma le popole po o le ā o le a tupu mai i ni nai minute o i luma. A o ou lafi i se tulimanu o le ofisa, na ou talosaga atu ai iā Ieova le Atua mo lana taʻitaʻiga i le feagai ai po o le ā lava le mea o le a tupu, ia faasino mai le mea e ao ona fai.

A o ma faatali, na ou toe manatua ai se mea na tupu e tusa o le 15 tausaga ua tuanaʻi. O le taimi lea a o oʻu faigaluega i se fale fai taavale. Sa uu e se alii e ma te faigaluega se apa laʻitiiti o iai le penisini, ma na sasao faafuaseʻi aʻe ai le afi. Na teʻi o ia, ma togi ese le apa, ae na lele mai tau i oʻu mata! Na ou mānavaina le vevela o le mumū o le afi, ma na mū leaga le vaega i luga o loʻu tino. Na ave aʻu i le helikopa i se falemaʻi e faapitoa i mū, ma na tausi faapitoa ai aʻu i inā i le tolu ma le ʻafa masina, ma tauivi ina ia ou ola pea. E lima masina o fai oʻu togafitiga, ona ou teʻa lea i tua, ma na ou lagona lava le faafetai tele, ona o le ola na ou maua. Na ou iloa ai i lenā mea na tupu, ia faatāua aso taʻitasi ou te ola ai. Na faamautū ai foʻi laʻu filifiliga ia faaaogā loʻu ola i le auaunaga a Lē na foaʻi maia le ola, o Ieova le Atua, i le avea lea ma ana Molimau.—Salamo 90:12; Isaia 43:10.

Na lē mafai ona ou toe galue o se inisinia, ona o oʻu manuʻa mai le mū, ma sa ou aʻoaʻo i komepiuta ma faigaluega ai i Virgina Tech. O le māfuaaga lea o loʻu iai i Norris Hall i le taeao o le faalavelave.

A o faaauau le pāpā o le fana i le fogāfale i lalo ifo, e ma te lē o iloa, o lea faalavelave, ua sili ona toʻatele tagata ua feoti ai i mea faapea, i le talafaasolopito o Amerika. Na toe fana e le tagata faatupu faalavelave o ia lava, ma uma ai le vevesi, ae e toʻa 32 ē na maliliu ai. Pe ā ma le 20 minute talu ona tupu le faalavelave, ae ma lagona loa leo o leoleo i le faalava o le fogāfale lea e ma te iai. Na ma tauvalaau i ai, ma na latou ō mai ma ave i maʻua i le mea e saogalemu ai.

Ua avea lea faalavelave, ma mea ua ou iloa ai, e puupuu tele le olaga, ma e lē mailoa, po o le ā e tupu a taeao. (Iakopo 4:14) E ese la le tāua o le tuu atu o lo tatou faatuatuaga i Lē na foaʻi maia le ola, ma ia vaai i aso taʻitasi e tusa o se meaalofa tāua mai iā te ia!—Salamo 23:4; 91:2.

[Ē Ana le Ata i le itulau 30]

AP Photo/The Roanoke Times, Alan Kim