O Aso Nei e Sili Ona Faigatā

NA FOLAFOLA mai e le Tusi Paia o le a ola tagata i “aso e sili ona faigatā.” O loo faamatalaina lenei vaitaimi, o “aso e gata ai.” (2 Timoteo 3:1-5; 2 Peteru 3:3-7) Na fetalai foʻi Iesu i lenā vaitaimi ina ua tali atu i le fesili na lāgā e ona soo e uiga i le “iʻuga o faiga o mea a le lalolagi.” (Mataio 24:3) Po o tatou ola ea i aso e gata ai? Faatusatusa mea na folafola mai e le Tusi Paia ma lipoti talu ai nei o loo sii mai i lalo, ona fai lea o sau lava faaiʻuga.

Mea na folafola mai e le Tusi Paia: fetauaʻiga i le lalolagi—Luka 21:10; Faaaliga 6:4.

O lipoti talu ai nei: “E sili atu i le faatoluina tagata maliliu i taua o le senituri lona 20, nai lo taua o isi senituri ua mavae, e oo atu lava i tuā i aso na fanau ai le Keriso.”—Worldwatch Institute.

Mea na folafola mai e le Tusi Paia: oge ma faamaʻi—Luka 21:11; Faaaliga 6:5–8.

O lipoti talu ai nei: I le tausaga 2004, e tusa e 863 miliona tagata o le lalolagi e leʻi lava mea taumafa, e tusa e 7 miliona e sili atu ai i lo le tausaga 2003.—Faalapotopotoga o Faatoʻaga ma Taumafa a Malo Aufaatasi.

E pe ā ma le tasi piliona tagata o loo nonofo i nofoaga e feomaʻi; 2.6 piliona tagata e nonofo i nofoaga e tele ai lapisi ma leai se tulaga mamā; ae 1.1 piliona tagata e lē o maua se vai mamā.—Worldwatch Institute.

E 500 miliona tagata ua aafia i le maʻi o le malalia; 40 miliona tagata ua maua i le HIV-AIDS; ua maliliu foʻi le 1.6 miliona o tagata i le maʻi o le māmāpala i le 2005.—Faalapotopotoga o le Soifua Mālōlōina i le Lalolagi.

Mea na folafola mai e le Tusi Paia: le faaleagaina o le laueleele—Faaaliga 11:18.

O lipoti talu ai nei: “Ona o mea ua faia e tagata i le paneta, e ono mafai ai ona lē toe ola ituaiga eseese o manu ma laau i se taimi o i luma.” “E toetoe lava o le 2/3 o mea o loo maua mai i le taualumaga o meaola ma lo latou siʻosiʻomaga e faatumau ai le ola, ua matuā paʻū maulalo lava.”—Millennium Ecosystem Assessment.

 “Ona o kasa vevela ua faia e tagata, ua māfua ai ona oo le tau o le Lalolagi i se tulaga matuā leaga, ma e ono mafai lava ona tupu ai se mala mataʻutia mo le paneta.”—NASA, Goddard Institute for Space Studies.

Mea na folafola mai e le Tusi Paia: le talaʻia o le tala lelei o le Malo o le Atua i le lalolagi aoao—Mataio 24:14; Faaaliga 14:6, 7.

O lipoti talu ai nei: A o faagasolo le tausaga 2007, sa faaaluina e se tumutumuga fou o Molimau a Ieova e 6,957,854 le sili atu i le 1.4 piliona itula e talaʻiina ai le tala lelei e uiga i le Malo o le Atua i atunuu e 236.—2008 Yearbook of Jehovah’s Witnesses.

E pei ona taʻua i luga, na folafola mai e le Tusi Paia le iai o se māfuaaga mo se vaaiga mautinoa, e ui lava i le tele o tala leaga i mea o tutupu. Na taʻua e Iesu le “tala lelei” o le Malo o le Atua. O le ā le Malo o le Atua? Aiseā ua ia aumaia ai se māfuaaga mo tagata e maua ai se faamoemoe mo se lumanaʻi sili ona lelei? Ma o le a faapefea ona aafia ai oe i le Malo o le Atua?

[Faamatalaga faaopoopo i le itulau 5]

Na folafola mai e le Tusi Paia tulaga o le lalolagi ua tatou vaaia i aso nei