Ua Taia e se Mala le Atu Solomona

I le Aso Gafua, Aperila 2, 2007, na lūlū ai se mafuiʻe pe tusa ma le 8.1 lona malosi, i se vaega o le Atu Solomona, i mātū i sasaʻe o Ausetalia. E na o ni nai minute lava na va ai, ae fafati mai loa ma ni galu maualuluga, o nisi na oo atu lava i le 30 futu le maualuluga, ma taia ai motu i le itū i Sisifo, ma maliliu ai tagata e toʻa 52 ae tuua ai le 6,000 o tagata ua leai ni o latou fale.

O le nofoaga na pito sili ona mafatia o Gizo, o se aai i le talafatai pe tusa e 7,000 tagata e nonofo ai i totonu o le motu o Ghizo, lea e na o le 28 maila (45 kilomita) le mamao mai le ogatotonu o le mea na tupu ai le mafuiʻe. E iai se faapotopotoga toʻalaiti o Molimau a Ieova i Gizo, sa sauniuni e faamanatu le maliu o Iesu i lenā afiafi. (1 Korinito 11:23–26) Sa amata le aso i le susulu manaia o le lā ma le malū o le sami e pei ona masani ai. Ae i le itula e 7:39 i le taeao, na tupu ai loa le mafuiʻe.

Mafuiʻe!

Sa sauni Ron Parkinson, o se toeaina o se faapotopotoga, ma lana avā o Dorothy, e fai le la mālū taeao i le taimi na oso ai le mafuiʻe. Na taʻua e Ron, “Sa pei le maluelue o le ma fale o le maluelue o se niu, ae e leʻi paʻū i lalo. Sa matuā taalililili le paʻō na iai. O kapoti, o meafale, ma le piano ua malepelepe uma. O ipu ma le tele o isi mea teu fale na taʻei uma. Sa ma taumafai malosi e ō ese atu i fafo ma le fale. Sa lavevea vae o Dorothy i ni tioata taʻei ona e leʻi faia ni ona seevae.”

Sa faapena foʻi ona laga i fafo Tony ma Christine Shaw, o ni misionare latou te tuaoi. Na faapea mai Christine, “Sa matuā galulu le eleele ma na ou paʻū ai ma lē mafai ona toe tū i luga. Sa ou vaaia fale o loo opeopea i luga o le sami. O se galu malosi na liaʻieseina uma na fale mai i mea na tutū ai. Sa feoaʻi tagata i o latou paopao i le va o mea ua faaleagaina, e tau saʻili pe o iai ni tagata o faasaoina. Na sosoo ai ma le isi mafuiʻe malosi, toe sosoo mai ai ma le isi. Sa faaauau pea isi lūlūga laiti mulimuli ane mo aso e lima. O se mea na matuā faamataʻuina ai lava!”

Ona Oo Mai Lea o le Sunami

Sa iai Patson Baea i lona aiga i le motu o Sepo Hite, pe tusa ma le 4 maila (6 kilomita) le mamao mai Gizo, i le taimi na lūlū ai le mafuiʻe. O le ā sa tupu iā Patson ma lona aiga i le taimi o lenei mala?

Na faamatala e Patson le tulaga mataʻutia o le mea na tupu: “Sa ou tamoʻe atu i le mea o loo iai laʻu avā, o Naomi, ma le ma fanau e toʻafā. Na paʻuʻū uma i lalo ona o le mafuiʻe, ae o loo saogalemu pea. Sa matuā fefefe tamaiti, ma o nisi ua fetagisi. Ae na vave ona ma taumafai ma Naomi e faatoʻafilemu i latou.

“Na ou iloa le sousou o le sami i se tulaga e lē masani ai. E mautinoa lava ua lalata mai se sunami. E ono lofia uma lo matou motu i le sami. O loo lamatia foʻi le ola o si oʻu tinā o Evalyn, lea  sa nofo i se motu e lē mamao ese atu. Na vave ona ou faatonuina lo matou aiga e matou te ō i le vaaafi ina ia laveaʻi iā te ia.

“E leʻi mamao lava talu ona matou ō, ae pasia loa lo matou vaa e se galu telē lava. Ua faasolo ina matuā sousou le sami. Ina ua matou taunuu atu i loʻu tinā, sa popole ma lē mautonu ma ua fefe foʻi e sau i le vaa, ona feosofi atu lea i ai o Naomi ma loʻu atalii o Ieremia ua 15 tausaga i le sou o le sami, e fesoasoani i loʻu tinā e aau mai i le vaa. Ona matuā faamalosi lea o le afi o le vaa ae o matou ō atu i le vaega loloto o le sami.

“O le taimi lea ua maui atoa le sami i se tulaga e lē masani ai, ma ua ali uma ai ʻamu o āʻau o loo siʻomia ai nei motu. Ona faafuaseʻi lea ona oso atu se galu telē ma lofia ai motu uma e lua. Na matuā malepe uma lo matou fale talimālō na tū e latalata i le sami. Na oso atu le suāsami i totonu o lo matou fale, ma faaleaga uma a matou meatotino. Ina ua toe toʻa le sami, na matou aumai Tusi Paia ma tusi pese mai le fale ua faaleagaina, ma matou ō atu loa i Gizo.”

O le taimi lea, ua pae solo tagata maliliu ma mea ua faaleagaina i luga o le talafatai. O le itu i sisifo o le motu o Ghizo le nofoaga na pito sili ona faatamaʻia. Pe ā ma le 13 nuu i inā na tafiesea atoatoa e le suāsami, lea na taʻua e 15 futu lona maualuga.

I lenā pō, e toʻa 22 i latou na faapotopoto i le Maota mo Sauniga a Molimau a Ieova i Gizo, ina ia molimauina le Faamanatuga o le maliu o Iesu. O le mea e fiafia ai, e leai ma se isi o nei tagata na tugā ni manuʻaga mai le mala na tupu. Na faamatala e Ron lea na taʻua muamua, “Sa pē le paoa, ma ua taʻe foʻi lo matou molī matagi. Ona faia lea e le Uso o Shaw le lauga e faaaogā ai le molī uila. Sa matou usuina pese o le faafetai iā Ieova i se leo malosi ma le mālū, a o pogisa pea.”

Galuega Fesoasoani

Ina ua faalogo tagata i Honiara le mea o loo iai le taulaga, i le tala o le mala, na vave ona gaoioi le ofisa o le lālā o Molimau a Ieova i inā e saunia mea manaʻomia e fesoasoani ai iā i latou ua aafia i lenei mala. O fesootaʻiga i telefoni na vave ona faamautinoa ai, o loo saogalemu le toʻatele o Molimau o loo i le nofoaga na aafia. Na aauina atu nisi e maufaatuatuaina e saʻili se Molimau o loo nofo mamao ese i le motu o Choiseul. E maua atu lenei tuafafine o loo saogalemu. Na auina atu foʻi fesoasoani tau tupe i Gizo ina ia faatau ai mea manaʻomia.

Na taunuu sui o le Lālā i Gizo i le Aso Tofi, i le vaalele muamua na malaga atu. “Sa ma ō ma ave nisi pusa o fesoasoani manaʻomia,” o le tala lea a Craig Tucker, o se tasi o sui o le Komiti o le Lālā. “Sa lē mafai ona ave ato a isi tagata malaga ona o le mamafa, ae o le mea e faafetai ai, na ave uma a ma pusa o fesoasoani manaʻomia. O nisi na o mea muamua lava sa taunuu i le nofoaga na tupu ai le mala. Ae na taunuu isi uta i aso e lua mulimuli ane ai, na avatu e le vaa.”

Ae i le taimi lea, na malaga atu ai Tony Shaw ma Patson Baea ma isi Molimau mai Gizo mo le lua itula i se vaa e alo, ina ia asia Molimau o loo nonofo solo i le motu o Ranongga. O le motu lenei lea e 20 maila (32 kilomita) lona umi ae 5 maila (8 kilomita) lona lautele, ona o le mafuiʻe, ua siitia ai i luga pe ā ma le 6 futu (2 mita) mai le sami. O fegasoloaʻiga la o le suāsami i autafa o le motu ona o lenā minoi faafuaseʻi o le eleele, atonu na māfua ai le sunami i isi motu latalata ane.

Na faapea mai Tony, “Na matuā olioli tagata o le faapotopotoga ina ua matou feiloaʻi. Sa saogalemu ma malolosi uma i latou, ma sa nonofo i fafo ona o le matataʻu i lūlūga sa iai ina ua uma le mafuiʻe. O le matou vaa le vaa muamua na taunuu atu e avatu le fesoasoani. A o leʻi tuua inā, na faaalia lo matou lotofaafetai iā Ieova e ala i le tatalo.”

Na faapea mai Patson: “I nai aso mulimuli ane, na matou toe foʻi ai i Ranongga e ave isi mea manaʻomia, ma saʻili se tasi o aiga Molimau o loo nonofo mamao ese i le taufaasiʻusiʻuga o le motu. Na matou maua atu Mataio Itu ma lona aiga o nonofo i se vaipanoa mamao i totonu o le togāvao. Sa latou fetagisi i le fiafia, ona e matou te leʻi tuulafoaʻia i latou. Na faatamaʻia e le mafuiʻe lo latou fale ma le tele o fale o lo latou nuu. Ae ui i lea, o lo latou popolega autū sa iai, o le toe maua lea o ni a latou Tusi Paia, auā ua leiloloa uma i le taimi o le mala.”

 Ua Faamālō Mai Isi na Vaavaai Ane

Na mātauina e isi tagata le alofa faa-Kerisiano lea na faaalia e o tatou uso. Na faapea mai Craig Tucker, “Sa faateʻia se tasi o tusitala lea sa faaseā i le galuega fesoasoani mo tagata lautele, ina ua ia iloa na saunia e Molimau a Ieova mea manaʻomia mo o latou tagata, e pei o meaʻai, tapoleni, ma isi mea aogā i le taimi o le mafuiʻe.” Na faaopoopo mai Patson, “Na faamālō mai tagata o le nuu a Ranongga ona o le vave o la matou fesoasoani, ae na latou faitioina a latou lotu ona o le lē lava o le fesoasoani.” Na taʻutino mai se fafine, “Na vave ona gaoioi ma fesoasoani mai la outou faapotopotoga!”

Na faasafua atu foʻi le fesoasoani a Molimau i o latou tuaoi. Na faamatala e Christine Shaw e faapea, “A o asiasi atu i se falemaʻi lē tumau i Gizo, na ma vaaia ai se ulugalii faaipoipo lea na latou feiloaʻi talu ai i le talaʻiga. Na matuā manunuʻa ma mafatia uma i laʻua. Na mamulu ese atu le tama a le tama a le fafine ma malemo ona o le sunami. Na faavave ona ma toe foʻi atu i le fale ma avatu meaʻai ma lavalava o loo manaʻomia. Na faaalia lo la lototalisapaia.”

O le mea moni, e sili atu se isi mea e manaʻomia e tagata na aafia i lenei mala, nai lo fesoasoani faaletino. E latou te matuā manaʻomia le faamāfanafanaga lea e na o le Tusi Paia e maua ai. Na taʻua e Ron, “Na fai mai nisi o faifeʻau a lotu, ua faasala e le Atua tagata ona o a latou agasala. Ae sa matou faailoa atu iā i latou e ala mai le Tusi Paia, e lē mafai ona tuuaʻia le Atua i mea leaga. Sa faafetai mai le toʻatele ona o lo matou faasoaina atu o nei faalaeiauga faaleagaga iā i latou.”—2 Korinito 1:3, 4; Iakopo 1:13. *

[Faaopoopoga i lalo]

[Siata/Faafanua i le itulau 13]

(Tagaʻi i le lomiga mo le ata atoa)

Choiseul

Ghizo

Gizo

Ranongga

HONIARA

AUSETALIA

[Ata i le itulau 15]

O le aiga o Baea i totonu o lo latou vaaafi

[Ata i le itulau 15]

Mea na faaleagaina e le Sunami i Gizo

[Ata i le itulau 15]

E na o le Maota mo Sauniga le fale e leʻi faatamaʻiaina i le nuu o Lale, i le motu o Ranongga