Le Eukalesitia Mea Moni e Faatatau i na Faiga Faaletapuaʻiga

O LE toʻatele o tagata i le lalolagi e latou te faia e lē aunoa le sauniga lenei o le Eukalesitia—i ni vaitaimi i le tausaga, vaiaso po o aso uma foʻi. Ae peitaʻi, e taʻua o se misitelio po o se mealilo o le faatuatua, ma o le toʻatele o i latou e faia e latou te lē malamalama i ai. E manatu i ai tagata e paia ma o se vavega.

O le sauniga lenei o le Eukalesitia—o le vaega o le Misasā a le Katoliko lea e fai ai e le patele se tatalo mo le falaoa ma le uaina, ma fai atu i le ʻaulotu e talia Keriso e ala i le Komenioga Paia. * Na taʻua e Pope Benedict XVI o le sauniga lenei i tagata Katoliko, “o le vaega aupito i tāua lea o le faatuatua.” E leʻi leva atu, na faamanatuina ai e le lotu le “Tausaga o le Eukalesitia” o se vaega o taumafaiga e “toe fafagu ma faateleina le faatuatua i le Eukalesitia.”

E oo lava i tagata Katoliko o ē e lē o faigofie ona tausisi i lo latou faatuatuaga, e latou te matuā faatāuaina lenei faiga faaletapuaʻiga. O se faataʻitaʻiga, o se tala na tusia i le mekasini e taʻua o le Time talu ai nei, na faamatalaina ai le tusia e se tamaʻitaʻi talavou e agaʻigaʻi i luma i le Katoliko e faapea: “Po o ā lava luʻi e tulaʻi mai i aʻoaʻoga a le lotu Katoliko ma tagata lolotu, ae e matou te pipii pea i le mea o loo autasia ai i matou i le faatuatuaga Katoliko: o lo matou tuutoina lea i le faamanatuina o le Eukalesitia.”

O le ā la le Eukalesitia? Pe e manaʻomia ona faamanatu e soo o Keriso? Seʻi o tatou iloiloina muamua le auala na tupu aʻe ai lenā talitonuga. Ona tatou taulaʻi atu lea i se fesili e sili atu ona tāua: Po o atagia moni i le Eukalesitia le faamanatuga lea na faavaeina e Iesu Keriso i le toetoe 2,000 tausaga ua tuanaʻi?

Eukalesitia ma Lotu ua Faapea Mai o Kerisiano

E lē faigata ona iloa le māfuaaga e vaai ai i le aukalesitia o se vavega. O le taimi tāua lava a o faia lea sauniga, o le taimi e fai ai le tatalo o le Eukalesitia. O le taimi lena, e tusa ai ma le faamatalaga a le tusi Catechism of the Catholic Church, “o le mana o upu ma gaoioiga a Keriso,  ma le mana o le Agaga Paia” e “avea moni ai ma sakalameta” le tino ma le toto o Iesu. Pe a uma ona taumafa le patele i le falaoa (areto) ma le uaina, ona valaaulia lea o tagata lotu e talia le Komenioga, e masani lava ona faia faapea i le taumafaina na o le falaoa.

Ua aʻoaʻoina e le Lotu Katoliko, o le falaoa ma le uaina, e faavavega ona liu i le tino ma le toto moni o Keriso—o se aʻoaʻoga e taʻua o le transubstantiation (liliuina faavavega o le tino ma le toto o Keriso ae o loo foliga mai lava i le falaoa ma le uaina). Sa faasolosolo ona tuputupu mālie aʻe lenei aʻoaʻoga, ma na uluaʻi faamautū le uiga o lenei upu ma faaaogā aloaʻia i le senituri lona sefulutolu. I aso o le Porotesano Toefuataʻiina, na iai ni vala o le Eukalesitia na fesiligiaina e tagata. Na teena e Luteru le aʻoaʻoga o le transubstantiation ae talia le consubstantiation (tuufaatasia o le tino o Keriso i le falaoa ma le uaina). E faigatā ona iloa le eseesega. Na aʻoaʻoina e Luteru faapea o le falaoa ma le uaina e tuufaatasi ma le tino ma le toto o Iesu, na i lo le faaliliuina o le falaoa ma le uaina e avea tino ma toto o Iesu.

A o faagasolo taimi, sa iai isi eseesega e faatatau i le uiga o le Eukalesitia, faapea ma le tulaga ma le tele e fai ai lea faamanatuga na tupu aʻe i lotu ua faapea mai o Kerisiano. E ui i lea, o loo tumau pea lenei faiga faalelotu o se vaega tāua tele i lotu ua faapea mai o Kerisiano. E faapeʻī le uluaʻi faamanatuga na faavaeina e Iesu?

Faavaeina o “Le Talisuaga Afiafi a le Alii”

Na faavaeina e Iesu “le talisuaga afiafi a le Alii,” po o le Faamanatuga o lona maliu. (1 Korinito 11:20, 24) Ae peitaʻi, pe na ia faatulaga se sauniga faalelotu o se misitelio lea e aai moni ai lava ona soo i lona tino ma inu i lona toto?

Ina ua faatoʻā uma lava ona faamanatuina e Iesu le Paseka faa-Iutaia ma tuli ese Iuta le Sekara, le aposetolo lea e lē o toe umi ae faalataina o ia. Na lipotia mai e Mataio, o se tasi o aposetolo e 11 na iai e faapea: “A o latou aai, ona tago lea o Iesu i le falaoa, ua faia le faafetai, ona ia vaevae lea ma avatu i ona soo, ma faapea atu: “Ia outou aai. Auā o le faatusa lenei o loʻu tino.” Ua ia tago foʻi i le ipu, ua faia le faafetai, [gagana Eleni, eu·kha·ri·ste΄sas] ma avatu iā i latou, ua faapea atu: “Inā inu ia outou uma i ai; auā o le faatusa lenei o loʻu ‘⁠toto o le feagaiga,’ e faamaligiina mo tagata e toʻatele e faamagalo ai agasala.’”—Mataio 26:26-28.

Iā Iesu, faapea foʻi ma auauna uma lava a le Atua, o le talosagaina o le faamanuia i meaʻai o se mea e masani ai. (Teuteronome 8:10; Mataio 6:11; 14:19; 15:36; Mareko 6:41; 8:6; Ioane 6:11, 23; Galuega 27:35; Roma 14:6) Pe iai ea la se māfuaaga e talitonu ai faapea o le faia o le faafetai, sa faia ai foʻi e Iesu se vavega, ma taumafa ai e ona soo lona tino moni ma lona toto?

“O le Faatusa Lenei” po o “Loʻu Tino Lenei”?

O loo faaliliuina e nisi Tusi Paia upu a Iesu i le auala lenei: “Inā tago ia, inā aai; o loʻu tino lenei,” ma le “Inā inu ia outou uma i ai o loʻu toto lenei.” (Mataio 26:26-28, Conferenza Episcopale Italiana; The New Jerusalem Bible) E faapena foʻi le upu Eleni e·stin, o se vaega o le veape Eleni “e avea ma,” o lona uiga moni “o loʻu.” Ae o le veape lava lenā e mafai foʻi ona uiga “e fai ma sui.” O le tele lava la o faaliliuga o le Tusi Paia, e tele lava ina faaliliuina “o lona uiga” po o le “e fai ma sui.” * O faamatalaga o loo siʻomia ai e iloa ai le faaupuga e aupito sili ona saʻo e faaaogā. O se faataʻitaʻiga, i le Mataio 12: 7, ua faaliliuina ai le e·stin΄ i le upu “le uiga” i le tele o faaliliuga o le Tusi Paia: “Ana outou iloa le uiga [Eleni, e·stin]: o lea upu, Ou te loto i le alofa, a e lē o le taulaga, po ua outou lē faasalaina o ē lē sala.”

 E tusa ai ma lenei tulaga, e toʻatele tagata aloaʻia atamamai o le Tusi Paia e talitonu o le upu “loʻu” e lē o faaliliuina saʻo ai le manatu e pei ona taʻua e Iesu i inei. O se faataʻitaʻiga, na toe iloiloina e Jacques Dupont le aganuu ma le soifuaga o tagata i le vaipanoa na soifua aʻe ai Iesu ma faapea mai “o le tulaga e sili ona talafeagai” e faaupu ai: “O le faatusa lenei o loʻu tino” po o, “O loo fai lenei mea ma sui o loʻu tino.”

Po o le ā lava le tulaga, ae e leʻi uiga atu Iesu faapea, e tatau ona taumafa moni e ona soo lona tino ma inu i lona toto. Aiseā e lē faia ai faapea? Ina ua uma le Lolo i aso o Noa, ma ua tuu atu e le Atua le faatagaga i le tagata e ʻai ai aano o manu, na ia faasāina tuusaʻo le ʻaia e se tagata o le toto. (Kenese 9:3, 4) Na toe faamamafa atu lea tulaga i le Tulafono a Mose, lea na usitaʻia atoatoa e Iesu. (Teuteronome 12:23; 1 Peteru 2:22) Na faagaeeina le ʻau aposetolo e le agaga paia, e toe faafou le poloaʻiga e faatatau i le ʻaia o le toto, ma ia usitaʻia e Kerisiano uma lenā tulafono. (Galuega 15:20, 29) Pe e faavaeina ea e Iesu se faamanatuga e solia ai e ona soo se tulafono paia a le Atua e Ona le Malosi Uma Lava? E lē mafai!

E manino mai la, na faaaogā e Iesu le falaoa ma le uaina e fai ma faatusa. O le falaoa e lē faafefeteina, e fai ma faatusa pe fai ma sui, o lona tino lelei atoatoa o le a faataulagaina. O le uaina mūmū e fai ma sui o lona toto lea o le a faamaligiina “mo tagata e toʻatele e faamagalo ai agasala.”—Mataio 26:28.

Le Fuafuaga o le Talisuaga Afiafi a le Alii

Na faaiʻuina e Iesu le uluaʻi faamanatuga o le Talisuaga Afiafi a le Alii i upu nei: “Ia faia pea  lenei mea e fai ma faamanatuga iā te aʻu.” (Luka 22:19) O le faamanatuga e fesoasoani iā i tatou e manatua ai Iesu ma mea ofoofogia na faataunuu e ala i lona maliu. E faamanatu mai ai iā i tatou le lagolagoina e Iesu o le pule silisiliese a lona tamā o Ieova. E faamanatu mai ai foʻi iā i tatou, e ala i lona maliu o se tagata lelei atoatoa, e leai sana agasala, na foaʻi atu ai e Iesu “lona ola e fai ma togiola e sui aʻi tagata e toʻatele.” Ua mafai ona saʻoloto so o se tasi mai le agasala, ma maua le ola e faavavau e ala i le faaalia o le faatuatua i le togiola.—Mataio 20:28.

O le mea tāua la ia mātau mai, o le Talisuaga Afiafi a le Alii e iai i latou e talisua faatasi ai. O i latou e aofia ai o (1) Ieova le Atua, lea na ia faatulagaina le togiola, (2) Iesu Keriso, “le Tamaʻi Mamoe a le Atua,” lea na ia saunia le togiola, ma (3) Uso faaleagaga o Iesu. O le taumafaina o le falaoa ma le uaina, ua faaalia ai a o faagasolo mea lo latou autasi atoatoa ma Keriso. (Ioane 1:29; 1 Korinito 10:16, 17) Ua latou faaalia ai foʻi lo latou iai i “le feagaiga fou” o ni soo o Iesu ua faauuina i le agaga. O i latou nei o le a nofotupu ma Keriso i le lagi o ni tupu ma ositaulaga.—Luka 22:20; Ioane 14:2, 3; Faaaliga 5:9, 10.

O āfea e ao ona faamanatuina ai le Faamanatuga? E manino le tali pe a tatou manatua le aso patino na filifilia e Iesu e faavaeina ai lenei faamanatuga—le Paseka. E faamanatu e tagata o le Atua i tausaga taʻitasi lenā aso, iā Nisani 14 i la latou kalena, ua silia nei i le 1,500 tausaga ina ia faamanatu ai le faaolataga mataʻina na faia e Ieova mo ona tagata. E manino, sa faatonu e Iesu ona soo e faaaogā le aso lava lea e tasi e faamanatu ai le gaoioiga aupito sili ona tāua, o le faaolataga lea ua mafai ona faia e le Atua e ala i le maliu o Keriso. O lea la, e auai soo moni o Iesu i le Talisuaga Afiafi a le Alii i tausaga taʻitasi i le aso e fetaui lelei ma Nisani 14 i le kalena Eperu.

Pe e ala ona latou faia ona o lo latou fiafia e faamanatu lea faiga faaletapuaʻiga? E mautinoa lava o le tulaga lenā i tagata e faamanatuina le Eukalesitia. Na taʻua e le tusitala o le mekasini o le Time e pei ona taʻua muamua atu: “E iai se mea e matuā manaia lava e faatatau i le auai i faiga faatapuaʻiga anamua e pei ona faia e le toʻatele o tagata.” E pei lava o le toʻatele o tagata Katoliko i aso nei, e sili atu i le tusitala lenei ona faia le faamanatuga i le faa-Latina e pei ona sa faia ai i aso ua teʻa. Aiseā? Na ia tusi e faapea: “Ou te manaʻo e faalogo i le usuina o le Misasā i le gagana ou te lē malamalama i ai, ona e masani lava ona ou lē fia faalogo i mea ou te faalogo i ai i le faa-Peretania.”

E fiafia Molimau a Ieova ma le faitau miliona o tagata loto fiafia, e faamanatu le Talisuaga Afiafi a le Alii i a latou lava gagana po o fea lava o nonofo ai. E latou te fiafia e faaleleia atili lo latou malamalamaga i le uiga ma le tāua o le maliu o Keriso. O na mea moni e aogā ona mafaufau i ai ma talanoaina a o faagasolo le tausaga. E iloa e Molimau a Ieova o le faamanatuina o le Faamanatuga, o le auala sili lea e manatuaina ai le alofa tele o Ieova le Atua ma lona Alo o Iesu Keriso. E fesoasoani iā i latou e “faalauiloa atu ai pea le maliu o le Alii seʻia taunuu mai o ia.”—1 Korinito 11:26.

[Faaopoopoga i lalo]

[Faamatalaga faaopoopo i le itulau 27]

E faapeʻī le uluaʻi faamanatuga na faavaeina e Iesu?

[Ata i le itulau 28]

Na faavaeina e Iesu le Faamanatuga o lona maliu

[Ata i le itulau 29]

Faamanatuina o le maliu o Iesu Keriso