E Mafai Ona E Fiafia e Ui Ina Faanoanoa

AILOGA ua iai se isi e leʻi oo i ai lagona faanoanoa? E oo lava i lo tatou Tamā o i le lagi, o Ieova le Atua, na oo foʻi iā te ia le faanoanoa. O se faaaʻoaʻoga, na ia laveaʻia Isaraelu mai le nofo pologa i Aikupito ma foaʻi atu le tele o faamanuiaga iā i latou. Ae na taʻua e le Tusi Paia: “Na latou toe tofotofo lava i le Atua; ma latou faaonoono i le Paia o Isaraelu.” (Salamo 78:41) Ae ui lava i lea, na faaauau pea ona avea Ieova ma “Atua fiafia.”—1 Timoteo 1:11.

O le mea moni, e tele mea e māfua ai ona lē fiafia. E faapefea ona tatou ʻalofia na mea ina ia tatou fiafia ai pea? O le ā e tatou te aʻoaʻoina mai le auala na taulima ai e Ieova le faanoanoa?

O Māfuaaga e Faanoanoa Ai

O loo taʻua e le Afioga a le Atua, “O le tausaga ma le mea e tupu ai” e oo lea iā i tatou uma lava. (Failauga 9:11) E faafuaseʻi lava ona tupu se mea leaga, se faalavelave po o se maʻi lea e mafai ona mafatia ma faanoanoa ai. Ua faapea mai foʻi le Tusi Paia: “O le faamoemoe ua tuai ona taunuu e faanoanoa ai le loto.” (Faataoto 13:12) E tatou te fiafia e faatalitali ma le naunau i se mea lelei e oo mai, ae afai e tuai ona oo mai lenā mea, atonu o le a tatou faanoanoa. O se faataʻitaʻiga, o Tanu, * o lē sa iai pea sona faanaunauga e fia misionare, ma sa ia iloaina o le a la toe foʻi i lo la atunuu ma lana avā, ina ua tele tausaga o auai i le auaunaga faamisionare. Na ia faapea mai, “O le taimi muamua lenei i loʻu olaga ua ou lagona ai le lē iloa o le mea a fai. Ua lē toe iai ni oʻu sini. Ua lē o toe iai se mea tāua iā te aʻu.” E mafai ona umi se taimi o mafatia ona o le faanoanoa, e pei o le mea na tupu iā Claire. Na ia taʻua: “E fitu masina o loʻu maʻitaga, ae fafano laʻu pepe. Ua leva ona tupu lenā mea, ae e oo mai lava i le taimi nei, pe a ou toe vaai o faia se lauga a se tamaitiiti i luga o le pulelaa, ona ou faapea ifo lea iā te aʻu, ‘O le matua le la o si aʻu tama pe ana ola.’”

E mafai foʻi ona tatou mafatia pe a faatigā mai isi iā i tatou, e pei o le faauma o se faigāuō,  pe e lē taulau le faaipoipoga, pe a lē usitaʻi se tasi o le fanau, pe a lē faamaoni sau uō, po o le iai o se uō e lē alofa. Ona ua tatou ola faatasi ma tagata lē lelei atoatoa ma ola i aso faigatā, e tele la māfuaaga e tatou te faanoanoa ai.

O lo tatou lē taulau, e māfua ai foʻi ona tatou faanoanoa. O se faataʻitaʻiga, o le lē pasi o se suʻega i le aʻoga, le lē maua o se galuega, po o lou manaʻo foʻi ia tosina mai se tasi iā te oe ae e lē o ano mai lava o ia, atonu e tatou te manatu, ua tatou lē taulau. E mafai foʻi ona tatou faanoanoa pe afai e fulitua se tasi o lo tatou aiga i le upu moni. Na faapea mai Maria: “E foliga mai o loo lelei le agaʻigaʻi i luma o laʻu tama teine i le upu moni. Na ou manatu sa ou faia se faaaʻoaʻoga lelei mo ia. Ae ina ua ia fulitua iā Ieova le Atua ma mea e tāua i lo matou aiga, sa ou lagona loʻu lē taulau. Po o ā lava mea na ou taulau ai, na leʻi mafai ona suia ai lenei faalogona. Na ou matuā lotovaivai lava.”

E faapefea ona tatou fesagaʻi ma nei tulaga faanoanoa? O lo tatou mātauina o le auala na taulima ai e Ieova tulaga faanoanoa, e mafai ai ona tatou iloa le auala e faia ai faapea.

Uaʻi Atu i Vala Aogā

E ui lava na foaʻi atu ma le alofa e Ieova le Atua mea na manaʻomia i o tatou uluaʻi mātua, ae na la gaoioi i se auala lē alofa ma lē usitaʻi. (Kenese, mataupu e 2 ma le 3) E faapena foʻi le la tama o Kaino, sa ia atiaʻe se uiga leaga. Ona o le lē usitaʻi i le lapataʻiga a Ieova, na fasiotia ai e Kaino lona uso. (Kenese 4:1-8) Seʻi manatu i le faanoanoa o Ieova ona o na mea na tutupu.

Aiseā na lē avea ai lenā faanoanoa o le Atua ma mea e lē toe fiafia ai? Ona na ia finagalo e faatumu le lalolagi i tagata lelei atoatoa, ma o loo faaauau pea ona ia galue e faataunuu lenā fuafuaga. (Ioane 5:17) Ona o lenā fuafuaga, na ia saunia ai le taulaga togiola faapea ma lona Malo. (Mataio 6:9, 10; Roma 5:18, 19) O lona uiga, na uaʻi atu Ieova le Atua i vala aogā e foʻia ai le faafitauli, ae lē o le faafitauli.

O loo faalaeiauina i tatou e le Afioga a le Atua ina ia uaʻi atu i vala aogā, nai lo le mafaufau i mea na lē taulau ai. O loo taʻua i le Tusi Paia: “O mea uma ua moni, o mea uma ua matuā tāua, o mea uma ua tonu, o mea uma ua mamā, o mea uma e faatupu ai le lotofiafia, o mea uma ua taʻuleleia, o amioga lelei uma lava ma mea e viia ai se tasi, ia faaauau ona manatunatu i nei mea.”—Filipi 4:8.

Se Vaaiga Saʻo i le Lē Taulau

O mea e ono tutupu, e mafai ona matuā suia ai o tatou olaga. O se faataʻitaʻiga, atonu e faafuaseʻi ona lē toe faigaluega, lē toe faatasi ma le paaga faaipoipo, po o lē toe iai o o tatou tofiga tāua na tatou galulue ai i le faapotopotoga. Atonu e lē toe iai so tatou malosi, leai ni o tatou aiga, ma o tatou aumea. E faapefea ona tatou fesagaʻia na suiga?

O nisi ua latou iloa o le faatulaga o mea e ao ona faamuamua, e matuā aogā lava. Na faapea mai Tanu, lea na taʻua muamua: “Na ma faanoanoa ma laʻu avā ina ua ma iloa e lē mafai ona toe foʻi i le galuega faamisionare. Ae na ma faatulaga mea nei e lua e ao ona faamuamua: o le tausia o Tinā, ma pe a mafai, ia faaauau pea i le talaʻiga faataimi atoa. Pe a fesagaʻi ma filifiliga, e ma te iloiloina pe faapefea e nei filifiliga ona aafia ai mea o loo ma faamuamuaina. Ua faigofie ai ona faia faaiʻuga lelei.”

O le toʻatele o i tatou, e tele ina tatou faatelē le faafitauli pe a oo ina lē taulau. O se faataʻitaʻiga, atonu e lē taulau a tatou taumafaiga i le tausiaina o le fanau, le faaaogāina o tatou tomai i se galuega, po o le talaʻia o le tala lelei i oganuu i nuu mamao. Atonu tatou te mafaufau e faapea, ‘⁠Ou te lē mafaia lava se mea.’ Peitaʻi, e pei lava ona lē avea le faanoanoa o le Atua i le amataga mai o tagata ma mea e faapea  ua ia lē taulau ai, e faapena foʻi ona lē avea i tatou o ni ē e lē mafaia se mea, pe afai ua lē taulau ni a tatou taumafaiga.—Teuteronome 32:4, 5.

E vave ona tatou gaoioi ma le ita pe a faatigā mai isi iā i tatou. Ae e leʻi faapena Ieova. E ui na lē fiafia Ieova iā Tavita ona o lona faia o le mulilua ma oo ai ina ia fasiotia le tane a le fafine, ae na silafia e Ieova le moni o le salamō o Tavita, ma faaauau ai ona ia talia Tavita e avea ma ana auauna. E faapena foʻi le tulaga o le tupu faamaoni o Iosefatu, ina ua ia fesoasoani ma alofa atu i fili o le Atua. Na fetalai Ieova e ala mai i lana perofeta: “O le mea lea o loo i luga ai iā te oe le toʻasā mai iā Ieova. Ae peitaʻi ua maua mea lelei o iā te oe.” (2 Nofoaiga a Tupu 19:2, 3) Na silafia e Ieova, o le sesē a Iosefatu, e leʻi faapea ai ua lafoaʻia atoatoa ai e Iosefatu o ia. E mafai foʻi ona tatou ʻalofia le lē toe fia uō o isi iā i tatou, pe a aua neʻi vave ona tatou faatigā atu. Atonu o loo iai lava uiga e lelei ai a tatou uō.—Kolose 3:13.

O ni faanoanoaga, o ni mea e lē mafai ona ʻalofia a o tatou taumafai ia taulau a tatou taumafaiga. Atonu e tatou te faanoanoa pe a tatou faia se agasala. Ae e mafai ona tatou manumalo mai lenā lagona, pe a tatou faia se taumafaiga lelei ma faaauau pea. Ina ua matuā  mafatia le tupu o Tavita iā te ia lava, na ia tusi e faapea: “Ona palagia ai lea o oʻu ivi i loʻu faataiō i le aso atoa. . . . Ona ou faailoa atu ai lea iā te oe [Ieova] o laʻu agasala . . . , ona e aveesea ai lea o le leaga o laʻu agasala.” (Salamo 32:3-5) Afai o loo tatou iloa e lē o ōgatusa mea o loo tatou faia ma le finagalo o le Atua, e tatau la ona ōle atu i le Atua ina ia faamagalo i tatou, ma ia suia o tatou ala ma filifili e mulimuli i taʻiala a le Atua.—1 Ioane 2:1, 2.

Le Auala e Sauni ai e Fesagaʻia le Faanoanoa

E mautinoa lava lo tatou feagai uma ma ni faanoanoaga i le lumanaʻi. E faapefea ona tatou nofosauni? Seʻi mātau le manatu o Bruno, o se tamāloa Kerisiano matua o lē sa mafatia ona o faanoanoaga lea na suia ai lona olaga. Na ia faapea mai: “E tusa ai ma loʻu tulaga, o le auala e pito i sili ona tāua e fesagaʻia ai le faanoanoa, o le faaauau pea ona ou faia mea ia na ou masani ai ina ia malosi ai la ma faiā ma le Atua. Ua ou iloa le māfuaaga ua faataga ai e le Atua lenei lalolagi amioleaga. E tele tausaga o oʻu taumafai e atiaʻe se faiā māfana ma Ieova. Maʻeu loʻu faafetai ona o loʻu faia o lea tulaga. O loʻu iloaina o loo ia faatasi mai iā te aʻu, na fesoasoani lenā e onosaia ai faanoanoaga na ou mafatia ai.”

A o tatou manatunatu i le lumanaʻi, e mafai ona tatou mautinoa i le vala lenei: E ui lava atonu e tatou te faatigā iā i tatou lava pe faatigā mai isi, ae e lē taitai ona faatigā mai le Atua iā i tatou. Ioe, na taʻua e le Atua le uiga o lona suafa o Ieova, “o aʻu o lē ola, o loo ola lava.” (Esoto 3:14) E aumaia e lenā manatu iā i tatou le talitonu moni e na te faia so o se mea manaʻomia, ina ia faataunuu ai ana folafolaga. Na ia folafola mai e faapea, e ala i lona Malo, o le a faia lona finagalo i le “lalolagi, e pei ona faia i le lagi.” O le pogai lenā na tusi ai le aposetolo o Paulo: “Ua ou mautinoa, e lē mafai e le oti, po o le ola, po o agelu, po o malo . . . po o se isi lava foafoaga, ona faateʻaeseina i tatou mai le alofa o le Atua ua iā Keriso Iesu.”—Mataio 6:10; Roma 8:38, 39.

E mafai ona tatou faatalitali ma le mautinoa i le faataunuuina o folafolaga a le Atua, lea na taʻua e le perofeta o Isaia: “Faauta mai, ou te faia le lagi fou ma le lalolagi fou; e lē toe manatua mea na muamua, e lē alu aʻe foʻi i le loto.”(Isaia 65:17) O se faamoemoe mataʻina le oo mai o lenā taimi, lea o le a lē toe manatua ai faanoanoaga na tatou fesagaʻia.

[Faaopoopoga i lalo]

[Faamatalaga faaopoopo i le itulau 13]

E lē avea i tatou o ni ē e lē mafaia se mea, pe afai ua lē taulau ni a tatou taumafaiga

[Faamatalaga faaopoopo i le itulau 14]

O loo faalaeiauina i tatou e le Afioga a le Atua ina ia uaʻi atu i vala aogā nai lo le mafaufau i mea na lē taulau ai

[Ata i le itulau 15]

E ui i le lē taulau o tagata, ae fiafia pea le Atua, auā o loo ia mautinoa o le a faataunuu lona finagalo

[Ata i le itulau 16]

E aogā le faamuamua o mea faaleagaga e fesagaʻia ai le faanoanoa