Saʻili mo se Tali

“E ui tatou te iloa le ‘auala’ e tausia ai le aiga, ma maua ai ni mea na matuā taugatā i aso la, e pei o ea mālūlū i le fale, o se laau pese e fai le CD, ma taavale taugatā, ae o loo tatou fia iloa pea le ‘māfuaaga’ ua tatou ola ai. Aiseā e ola ai i lenei olaga? O le ā le aogā?”—David G. Myers, o se polofesa, i Hope College, i Holland, Michigan, i Amerika.

O LE ā sau tali i ai i fesili nei a le polofesa? E manatu nisi e lē tāua ona saʻili i tali o na fesili. Ae o le lē fia iloa o tali o na fesili, ua pei lenā o le taumafai e lē ano i ni tamaʻi maa o loo i totonu o lou seevae, auā e ui e mafai ona e savali, ae e lē lelei lau savaliga ona o le tigā o lou vae i na tamaʻi maa.

E lē na o oe o loo fia iloa pe e iai se māfuaaga tatou te ola ai. Auā e tusa ai ma le World Values Survey, o se suʻesuʻega tele lea e faatatau i manatu o tagata, o le toʻatele o tagata i le tele o atunuu o loo mafaufau i le “uiga ma le fuafuaga o le olaga.”

Ina ia e maua le toʻafilemu moni o le mafaufau, e tatau ona e iloa tali o nei fesili e tolu:

O le ā le amataga o le tagata?

O le ā le fuafuaga o le olaga?

O le ā lo tatou lumanaʻi?

O fea e tatou te maua ai tali saʻo i nei fesili? O le a taʻu mai e mataupu o sosoo mai ia tali o loo maua i le Afioga a le Atua, le Tusi Paia, ae e lē maua mai i mafaufauga ma le poto o tagata. E matou te valaaulia oe ina ia faitau i lau Tusi Paia ma vaai po o ā mea o loo fai mai ai.