O le ā le Malo o le Atua?

O LE ā le autū o le talaʻiga a Iesu? O le Malo o le Atua. (Luka 4:43) Auā sa ia taʻua pea lenā Malo i ana fetalaiga i tagata. Pe na fia malamalama lana ʻaufaalogologo ma fesili po o le ā lea Malo? E leai. E leai ni faamaumauga o i tusi a Evagelia e tusa ai ma lea tulaga. Po o lona uiga la na avea le Malo o le Atua, ma aʻoaʻoga masani i tagata i lenā vaitaimi?

O le mea moni, na taʻua lenā Malo i Tusitusiga anamua lea sa faatāua e tagata Iutaia o se mea e paia. Na manino mai ai le uiga o lea Malo ma mea o le a faataunuuina ai. I aso nei, i le pei o tagata Iutaia, e tele foʻi mea tatou te aʻoaʻoina e faatatau i le Malo, e ala i le suʻesuʻeina o le Tusi Paia. Seʻi o tatou iloilo aʻoaʻoga moni e fitu o loo i le Tusi Paia e uiga i le Malo. O aʻoaʻoga muamua e tolu, sa masani ai tagata Iutaia i aso o Iesu ma taimi muamua atu. O isi aʻoaʻoga e tolu e sosoo ai, sa aʻoaʻoina e Keriso ma le ʻauaposetolo i le uluaʻi senituri. A o le aʻoaʻoga mulimuli, ua manino mai i o tatou aso.

1. O le Malo o le Atua o se pulega moni, ma e tumau e faavavau. Na faaalia e le valoaga muamua a le Tusi Paia e faapea, o le a auina mai e le Atua sē e faasaoina tagata faamaoni. O ia lea ua taʻua o le “fanau,” ma o le a ia aveesea faafitauli lea na amata e le ʻautetee o Atamu, Eva ma Satani. (Kenese 3:15) Na taʻua  foʻi e le tupu faamaoni o Tavita se vala manaia e faatatau i lea “fanau” po o le Mesia. O le a ese lenei Malo mai pulega uma, ona o le a tumau pea e faavavau.—2 Samuelu 7:12-14.

2. O le a faaumatia e le Malo o le Atua malo uma o tagata. Na avatu i le perofeta o Tanielu se faaaliga lea na ia vaaia ai le faasologa o pulega malolosi o le lalolagi, ma na pule e amata mai i aso anamua e oo mai i o tatou taimi. Ia mātau mai le faataunuuga mataʻina e tusa ai o lenā faaaliga: “O ona po o ia tupu [mulimuli o malo o tagata] e faatūina ai e le Atua o le lagi o le malo e lē faaumatia e faavavau; o lea malo foʻi, e lē tuuina atu ia i se tasi nuu, na te tuʻimomomoina ma faaumatia ia malo uma lava, a o ia e tumau lava e faavavau.” O lona uiga o le a faaumatia e faavavau nei pulega uma o le lalolagi, faatasi ai ma taua, omiga ma faiga lē tonu. E pei ona taʻua i le valoaga a Tanielu, ua toeitiiti ona pule lea o le Malo o le Atua i le lalolagi uma. (Tanielu 2:44, 45) O lea la, o se pulega moni, ma e na o lea le malo o le a pulea le lalolagi aoao.  *

3. O le a faamuta e le Malo o le Atua taua, faamaʻi, oge, ma le oti. O se fiafiaga ona ua faaalia mai e valoaga o le Tusi Paia, mea o le a faia e le Malo o le Atua i le lalolagi. O le a faia e lenā Malo mea e leʻi faia muamua e se pulega faaletagata, ma e lē mafai lava ona faia. Seʻi manatu foʻi, o le a faatamaʻia e faavavau auupega uma o taua! “Ua faaiʻua e ia o taua e oo lava i tuluʻiga o le lalolagi.” (Salamo 46:9) O le a lē toe iai ni fomaʻi, ni falemaʻi po o faamaʻi. “E lē fai mai foʻi se tasi ua mau ai, Ou te maʻi.” (Isaia 33:24) E lē toe iai ni oge, faamaʻi e māfua mai i le lē lava o meataumafa, ma le fia aai. “E taumafa o saito i le nuu i tumutumu lava o mauga.” (Salamo 72:16) O le a lē toe iai ni sauniga o maliu, ni ʻauosilagi, ni fanuaoti, ni falemaliu, po o ni faanoanoaga ona o na mea. O le a faaumatia e faavavau lo tatou fili sili o le oti. O le a “faaumatia e [le Atua] le oti e faavavau; e soloiesea foʻi e le Alii o Ieova o loimata i mata uma lava.”—Isaia 25:8.

4. Ua iai sē e avea ma Tupu o le Malo o le Atua, lea na tofia e le Atua. E leʻi tofia e le Mesia o ia lava e fai ma Tupu, pe filifilia foʻi e ni tagata e lē lelei atoatoa. Na tofia o ia e Ieova le Atua. Ua taʻu o ia o le Mesia po o le Keriso, ma o le uiga o na taʻu, o “Lē ua Faauuina.” O lona uiga la, o lenei Tupu ua faauuina pe tofia e Ieova mo se tofiga maualuga. Sa fetalai le Atua e uiga i lē na ia tofia e faapea: “Faauta i laʻu auauna, ou te taofia o ia i luga; o lē na aʻu filifilia ua fiafia i ai loʻu loto; ua ou tuuina atu loʻu Agaga i ona luga; na te avatua le faamasinoga mo nuu ese.” (Isaia 42:1; Mataio 12:17, 18) O ai sē e sili atu lona silafia po o ai se Tupu e tatou te manaʻomia, nai lo Lē na faia i tatou?

5. Na faaalia e le Tupu o le Malo o le Atua lona agavaa i luma o tagata. Na faamaonia mai e Iesu le Nasareta o ia o le Mesia na folafolaina. Na fanau mai o ia i se aiga ua uma ona filifilia e le Atua. (Kenese 22:18; 1 Nofoaiga a Tupu 17:11; Mataio 1:1) A o iai i le lalolagi, na ia faataunuuina le tele o valoaga ua leva ona folafolaina e uiga i le Mesia. E lē gata i lenā, na faamaonia mai foʻi i le lagi o ia o le Mesia. E faapefea? Na fetalai mai le Atua mai le lagi, o ia o Lona lava Alo; ma na taʻua e agelu o Iesu o le Mesia na valoia; ma na ia faia vavega i luma o tagata e toʻatele na vāai i ai, ma ua manino mai ai sa iā te ia le mana o le Atua. * E tele taimi na faailoa mai ai pea e Iesu le ituaiga o Tupu o le a iai o ia. E lē gata na iā te ia le mana, ae sa manaʻo foʻi e fesoasoani i tagata. (Mataio 8:1-3) O ia o se tagata e lē manatu faapito, ae e alofa, lototele ma lotomaulalo. Ua faamaumauina i le Tusi Paia mea na ia faia a o iai i le lalolagi, ina ia faitau i ai tagata uma.

 6. E 144,000 tupu lagolago faatasi ma Keriso i le Malo o le Atua. Na fetalai Iesu o le a pule nisi faatasi ma ia i le lagi, e aofia ai ma ona aposetolo. Na ia taʻua i latou nei o le “lafu mamoe itiiti.” (Luka 12:32) Na taʻu mulimuli atu i le aposetolo o Ioane e faapea, o le aofaʻi o lenei lafu mamoe itiiti e 144,000. O le a iai so latou tofiga mataʻina i le lagi, e ala i le avea ma tupu ma auauna o ni ositaulaga faatasi ma Keriso.—Faaaliga 5:9, 10; 14:1, 3.

7. O loo pule nei le Malo o le Atua i le lagi, ma ua sauni e pule mai i le lalolagi. O lenei aʻoaʻoga moni mulimuli, o se mea e matuā mataʻina ua tatou aʻoaʻoina. Ua iai i le Tusi Paia le tele o faamaoniga e faailoa mai ai ua tuuina atu iā Iesu le pule e avea ai ma Tupu i le lagi. O loo pule nei o ia i le lagi, ma o le a ia faalautele mai lana pulega i le lalolagi atoa, ma faataunuu valoaga matagofie ua uma ona taʻua. Ae faapefea ona tatou mautinoa o loo pule le Malo o le Atua i le taimi nei? O afea o le a amata ai lana pulega i le lalolagi?

[Faaopoopoga i lalo]