Ia Mafuta Atu i le Atua

Le Tamā e Leai Sē La te Tutusa

Mataio 3:16, 17

O LE faaupuga “Tamā,” e oso aʻe ai ni lagona māfana i tagata, auā o se tamā e alofa moni i lana fanau, e taumafai ia latou taulau manuia. O lea, ua alagatatau ai ona taʻua e le Tusi Paia Ieova le Atua o le “Tamā.” (Mataio 6:9) Ina ia iloa pe faapeʻī uiga o Ieova le Tamā, seʻi o tatou iloiloina ana fetalaiga iā Iesu i le taimi o lona papatisoga. Auā o le auala e talanoa ai se tamā i lana fanau, e iloa ai le ituaiga matua e iai o ia.

Na papatisoina Iesu iā Oketopa 29 T.A., i le vaitafe o Ioritana. Ua faapea mai le Tusi Paia: “Ua uma ona papatisoina Iesu, ona maliu aʻe loa lea o ia mai le vai. Tagaʻi foʻi! Ua matala mai le lagi, ma ua iloa atu ai e Ioane le agaga o le Atua e pei o se lupe ua alu ifo i ona luga. Vaai foʻi! Ua faapea mai le siʻufofoga mai le lagi: ‘O loʻu Atalii pele lenā, o lē ua malie i ai loʻu loto.’” * (Mataio 3:16, 17) O na upu, ua taʻu mai ai uiga o Ieova le Tamā. Seʻi mātau foʻi vala e tolu na fetalai atu ai Ieova i lona Atalii.

Muamua, e ala i lona taʻua o ia “o loʻu Atalii.” Pe a toe faaupu le fetalaiga a Ieova, na faapea atu o ia, ‘Ua ou fiafia lava ua taʻua aʻu o lou Tamā.’ E faamalie e se tamā faautauta manaʻoga o lana fanau, e ala i le faamālō ma uaʻi atu iā i latou. E manaʻomia ona iloa e fanau, e tāua i latou i le aiga. E mautinoa lava sa matuā tāua iā Iesu, le mauaina o le finagalo malie o lona Tamā, e oo lava foʻi ina ua avea ma tagata matua!

Lona lua, e ala i lona taʻua o lona Alo o le Atalii “pele,” ua faailoa atu ai e Ieova lona alofa iā Iesu. E tusa ua faapea atu Ieova, ‘Ou te alofa iā te oe.’ O upu na e fai atu e se tamā alofa i lana fanau. A ō faatasi na upu ma gaoioiga alofa, o le a taulau manuia ai le fanau. E mautinoa lava na pāʻia le loto o Iesu ina ua taʻu atu e lona Tamā Lona alofa mo ia!

Lona tolu, ua faailoa atu e Ieova lona fiafia i lona Alo e ala i lona fetalai atu, “o lē ua malie i ai loʻu loto.” Na pei ua ia faapea atu, ‘Ua ou fiafia i le mea ua e faia.’ E faaaogā e se tamā alofa ni avanoa e faailoa atu ai i le fanau lona fiafia i mea lelei ma tala na latou faia. O le a faalaeiauina fanau pe afai e fiafia mātua i mea e latou faia. E mautinoa lava na faalaeiauina Iesu, a o ia faalogo atu i fetalaiga e faailoa mai ai le fiafia o lona Tamā iā te ia!

O le mea moni, o Ieova o le Tamā e leai se tasi la te tutusa. Po o e moomoo i se tamā faapena? Afai o lea, e faamāfanafanaina oe i lou iloaina e mafai ona maua se lua faiā ma Ieova. O le a fiafia mai o ia pe afai e te faamaoni e aʻoaʻo mea e faatatau iā te ia ma taumafai e fai lona finagalo. Ua faapea mai le Tusi Paia: “Ia outou mafuta vavalalata atu i le Atua, ona mafuta vavalalata mai lea o ia iā te outou.” (Iakopo 4:8) E leai se isi mea e sili atu ona e lagona ai le fiafia, nai lo le iai o se mafutaga māfana ma Ieova le Atua, o le Tamā e sili ona lelei.

[Faaopoopoga i lalo]