1. O le ā le tāua o le talaʻiga iā Iesu? Faamatala.

SA FIAFIA Iesu e talanoa e faatatau i le Malo o le Atua. E tusa ai ma faamaumauga a le Tusi Paia, e tele atu taimi sa ia talanoa ai e faatatau i le Malo nai lo o se isi lava mataupu, ma e silia i le 100 taimi na ia taʻua ai le Malo i lana faiva. E faailoa mai ai sa tāua tele le Malo i lona loto.—Faitau le Mataio 12:34.

2. E toʻafia atonu na auai ina ua tuuina mai le faatonuga i le Mataio 28:19, 20, ma aiseā ua tatou faapea atu ai?

² E leʻi umi talu ona mavae le toetū o Iesu, ae ia feiloaʻi loa ma le silia i le 500 o ē na ono avea ma soo. (1 Kori. 15:6) Atonu o le faatasiga lenā na ia tuuina mai ai le faatonuga ina ia faaoo atu le feʻau o le Malo i “tagata o nuu uma,” o se galuega telē i lenā taimi. * Na valoia mai e Iesu o lenei galuega telē o le a faia seʻia oo i le “taufaaiʻuiʻuga o le faiga o mea a le  lalolagi,” ma o le mea lenā ua faataunuuina nei. O lea, ua faia so tatou sao i le faataunuuina o lenā faatonuga ma lenā valoaga.—Mata. 28:19, 20.

3. O ā vala e tolu ua faaauupegaina ai i tatou e faataunuu le faatonuga e talaʻi atu le tala lelei?

³ I le māeʻa ai ona aumaia e Iesu le faatonuga ina ia talaʻi atu, na ia folafola atu i ona soo: “Ou te faatasi ma outou.” (Mata. 28:20) O lea, o le a faia lenei galuega talaʻi mataʻina i lalo o lana taʻitaʻiga. Ua faaauupegaina i tatou e le Atua i “mea lelei uma” ina ia faataunuuina ai lenā faatonuga. (Epe. 13:20, 21) I lenei mataupu, o le a tatou iloiloina ai nei mea lelei e tolu: (1) o meafaigaluega ua tuuina mai, (2) o metotia ua tatou faaaogāina, ma lona (3) o toleniga ua tatou mauaina. Muamua, seʻi o tatou iloiloina nisi o meafaigaluega na tatou faaaogāina i le 100 tausaga ua mavae.

4. Aiseā na tatou faaaogāina ai le tele o meafaigaluega eseese i le talaʻiga?

⁴ Na faatusa e Iesu “le upu o le malo” i se fatu e lūlūina i palapala eseese. (Mata. 13:18, 19) E faaaogā e se faifaatoʻaga ni meafaigaluega eseese e sauniunia ai le palapala, a o leʻi lūlūina i ai fatu laau. I se tulaga talitutusa, ua tuuina mai e lo tatou Tupu le tele o meafaigaluega e sauniunia ai loto o le faitau miliona mo le feʻau o le Malo. O nisi o nei meafaigaluega na faaaogā mo le sefulu tausaga pe sili atu, ae o nisi o loo faaaogāina pea lava. Peitaʻi, o nei meafaigaluega uma ua mafai ona atiaʻe ai o tatou tomai o ni faievagelia.

5. O le ā le pepa e avatu ai se molimau, ma na faapefea ona faaaogā?

⁵ O se tasi o meafaigaluega na fesoasoani i le toʻatele e amata ai i le talaʻiga, o le pepa e avatu ai se molimau lea na amata ona faaaogā e tagata talaʻi o le Malo i le 1933. O le telē o lenei pepa e tai pei o le telē o le pepa lipoti mo le faiva i le fanua, ma e tusia ai se feʻau puupuu ma faigofie mai i le Tusi Paia. A o faagasolo taimi, na lomia nisi pepa fou faatasi ma se feʻau fou na tusia ai. E pe ā ma le sefulu tausaga o C. W. Erlenmeyer i le taimi muamua na ia auai ai i lenei talaʻiga. Ua ia faapea mai: “O le faatomuaga lenei sa fai, ʻPe e te fia faitau i le pepa lenei?’ Pe a māeʻa ona faitau le tagata i le pepa, ona ofo lea i ai se lomiga ma tuumuli ese.”

6. O le ā le aogā o le pepa e avatu ai se molimau?

⁶ Sa eseese auala na aogā ai pepa e avatu ai se molimau. Sa naunau nisi tagata talaʻi e auai i le talaʻiga, ae sa latou matamumuli e fai atu se faamatalaga. O isi sa tele a latou faamatalaga na fai atu. Sa latou taʻuina atu i tagata le tele o mea i se taimi puupuu, ae sa lē faautauta a latou taulimaga. O lea, sa aogā tele le feʻau puupuu ma upu filifilia lelei sa iai i le pepa e avatu ai se molimau.

7. O ā luʻi na tulaʻi mai ona o le faaaogāina o pepa e avatu ai se molimau?

⁷ Sa iai luʻi i le faaaogāina o lenei meafaigaluega. Ua faapea mai le tuafafine matua o Grace A. Estep: “E iai taimi e fesiligia ai i matou, ʻO le ā le faamatalaga o loo tusia ai? E lē mafai ona e taʻuina mai?’” E lē gata i lea, e iai nisi tagata e lē iloa faitau. Ae o nisi sa latou manatu o se pepa e tuuina mo i latou, ona tapuni lea o le faitotoʻa. Ae pe a tetee le tagata e ona le fale, o le a ia sasaeina le pepa. E ui i lea, na fesoasoani nei pepa i tagata talaʻi e feiloaʻi ai ma isi tagata, ma faailoa atu ai o i latou o tagata talaʻi o le Malo.

8. Faamatala le auala na faaaogā ai laau e tā ai lauga. (Tagaʻi i le ata i luga aʻe o le matua.)

 ⁸ O se tasi o meafaigaluega na faaaogā i vaitausaga o le 1930 ma le amatamataga o vaitausaga o le 1940, o laau na tā ai lauga faale-Tusi Paia. Na faaigoa e nisi nei laau iā Arona, auā sa tautala le laau mo i latou. (Faitau le Esoto 4:14-16.) Pe a faataga e le tagata e ona le fale, ona tā lea e le tagata talaʻi se lauga faale-Tusi Paia e silia ma le fā minute le umi, ona ofo lea o ni lomiga. O nisi taimi, e faapotopoto aiga e faalogologo i nei lauga faale-Tusi Paia. I le 1934, na amata ai ona fai e le Sosaiete o le Olomatamata nei laau mo le talaʻiga. O le iʻuga, na puʻeina e uso lauga e 92 e faatatau i mataupu eseese.

9. Na faapefea ona aogā laau na tā ai lauga?

⁹ Ina ua māeʻa ona faalogo Hillary Goslin i se lauga faale-Tusi Paia, na ia talosaga i le tagata talaʻi pe mafai ona ia faaaogāina le laau mo se vaiaso, ina ia faailoa atu i ona tuaoi le feʻau o le Tusi Paia. O le iʻuga, e foʻi ane le tagata talaʻi o loo faatali atu le toʻatele o tagata fiafia. Sa tuuina atu le toʻatele o nei tagata iā Ieova, ma e toʻalua afafine o Hillary na auai i le Aʻoga o Kiliata ma auauna o ni misionare. E pei o pepa na avatu ai le molimau, na fesoasoani laau e tā ai lauga i le toʻatele e amata ai i le talaʻiga. Mulimuli ane, na aʻoaʻoina e le Tupu ona tagata i le auala e talaʻi atu ai e ala i le Aʻoga o le Faiva Faatiokarate.

10, 11. Na faapefea ona faaaogā nusipepa ma leitiō e faalauiloa ai upu moni o le Tusi Paia, ma aiseā na matuā aogā ai nei auala?

¹⁰ I lalo o le taʻitaʻiga a le Tupu, ua mafai ai e tagata o le Atua ona faaaogā metotia eseese ina ia faaoo atu ai le tala lelei i le toʻatele e mafai ai. Sa tāua tele lenei vala ona sa “toʻaitiiti le ʻaufaigaluega.” (Faitau le Mataio 9:37.) I le amataga o le senituri lona 20, na faaaogā ai nusipepa e faaoo atu ai le feʻau i vaipanoa e toʻatele ai tagata, ae toʻaitiiti le ʻautalaʻi. I vaiaso taʻitasi, e avatu ai e Charles Taze Russell ana lauga i se fale faasalalau, ona auina atu lea e fale faasalalau nei lauga i nusipepa i Kanata, Europa ma le Iunaite Setete. E oo ane i le 1913, ua lomia lauga a le uso o Russell i nusipepa eseese e 2,000 ma ua faitau i ai le pe ā ma le 15,000,000 tagata.

¹¹ E iai se isi auala lelei na amata ona faaaogā e faaoo atu ai le tala lelei ina ua mavae le maliu o le uso o Russell. Iā Aperila 16 i le 1922, na faia ai e Joseph F. Rutherford se tasi o ana uluaʻi lauga i le leitiō ma e pe ā ma le 50,000 tagata na faalogologo i ai. Ae iā Fepuari 24 i le 1924, na amata ai faasalalauga a le uluaʻi leitiō a le faalapotopotoga lea na faaigoaina o le WBBR. Na taʻua i le Watch Tower o Tesema 1, 1924: “E matou te talitonu o le leitiō, o le auala sili ona taugofie ma lelei lea e leʻi faaaogāina muamua e folafola atu ai le tala lelei.” E pei o le nusipepa, sa matuā aogā le leitiō e faaoo atu ai le tala lelei i vaipanoa e toʻatele ai tagata ae toʻaitiiti tagata talaʻi o le Malo.”

12. (a) O ā vala o le molimau atu i nofoaga faitele e sili ona e fiafia i ai? (e) O le ā e fesoasoani iā i tatou e ʻalofia ai le fefe e talaʻi atu i nofoaga faitele?

¹² Ua faatāua foʻi i le taimi lenei le molimau i nofoaga faitele, e pei o fale faatali ai pasi ma nofoaafi, paka o taavale, maketi ma isi nofoaga e tumutumu ai tagata. Pe a e popole e molimau atu i nisi o nei  nofoaga, ia tatalo ma mafaufau i le manatu lenei o se tasi o uso ua leva ona auauna o se ovasia femalagaaʻi o Angelo Manera, Jr: “E tatou te vāai i nei vala fou o le auaunaga o se isi auala e auauna ai iā Ieova, o se isi auala e faaalia ma tofotofo ai lo tatou faamaoni iā te ia, ma e tatou te naunau e faamaonia lo tatou lotomalilie e auauna iā te ia i so o se auala e talosagaina ai i tatou.” O le auai i se vala fou o le auaunaga, atonu e tatou te lē masani ai, o le a fesoasoani e atiaʻe ai lo tatou faatuatuaina o Ieova, ma faamalosia ai lo tatou itu faaleagaga.—Faitau le 2 Korinito 12:9, 10.

13. O le ā ua mafai ona faataunuuina i la tatou upega tafaʻilagi o le jw.org, ma pe e iai se mea na tupu ina ua e faaaogāina lea auala?

¹³ E toʻatele tagata talaʻi ua fiafia e faasino tagata i la tatou upega tafaʻilagi o le jw.org, lea e mafai ona faitau ma kopiina mai ai lomiga faale-Tusi Paia i le silia i le 700 gagana. I aso taʻitasi, e silia i le 1.6 miliona tagata e asiasi i la tatou upega tafaʻilagi. E pei lava o le leitiō, o la tatou upega tafaʻilagi ua mafai ona oo atu ai le tala lelei i tagata, e oo lava i vaipanoa maotua.

14. O le ā le toleniga na manaʻomia e tagata talaʻi, ma o le ā le aʻoga ua fesoasoani iā i latou e avea o ni faiaʻoga lelei?

¹⁴ Ua māeʻa ona tatou iloiloina nisi o meafaigaluega ma metotia na faaaogā e folafola atu ai le tala lelei. Ae o ā ni toleniga ua tatou mauaina? Seʻi faapea e tetee se tagata i se lauga na tā i le laau, pe na fiafia foʻi i mea na faitau ai i le pepa e avatu ai se molimau. E tatau i le tagata talaʻi ona iloa le auala faautauta e taulima ai teteega, ma aʻoaʻo foʻi le tagata lotofiafia i se auala lelei. E mautinoa o le agaga paia na uunaʻia ai le uso o Nathan H. Knorr e iloa le tāua o le toleniina o tagata e faaaogā a latou meaalofa o le tautala i le faiva. O lea na amata i le 1943 ona faamaopoopo i faapotopotoga le Aʻoga o le Faiva Faatiokarate. Ua fesoasoani lenei aʻoga i tagata uma e avea o ni faiaʻoga lelei.

15. (a) O ā ni faalogona o nisi ina ua faatoʻā auai i le Aʻoga o le Faiva Faatiokarate? (e) Ua faapefea ona e faamaonia le moni o le folafolaga a Ieova i le Salamo 32:8?

¹⁵ E manaʻomia e le toʻatele se taimi umi e faamasani ai i le tautala i luma o tagata. E manatua e Julio S. Ramu le taimi  muamua na fai ai lana lauga i le 1944. O lana lauga e faatatau iā Toeka, o se tamāloa e na o le lima mau o le Tusi Paia o loo taʻua ai. Na ia faapea mai: “Na tetete oʻu tuli, o oʻu lima ma loʻu auvae.” Na ia faapea atili mai: “O le taimi muamua lea na ou lauga ai i se pulelaa, ae ou te leʻi faavaivai ai.” Sa faia foʻi lauga a tamaiti e ui e leʻi faigofie. E manatua e Angelo Manera le taimi muamua na fai ai le lauga a se tasi o tamaitiiti. “Sa matuā popole o ia, ma na tagi ina ua amata lana lauga. Na faaauau pea lana lauga ma sa tagi o ia i lana lauga atoa.” Pe e faigatā ona faia sou sao po o sau vaega i sauniga ona o lou matamuli po o se isi māfuaaga? Ia tatalo iā Ieova e fesoasoani mai e foʻia lou fefe. O le a fesoasoani mai o ia iā te oe, e pei lava ona ia fesoasoani iā i latou na uluaʻi auai i le Aʻoga o le Faiva Faatiokarate.—Faitau le Salamo 32:8.

16. O le ā le fuafuaga o le Aʻoga o Kiliata (a) i tausaga ua mavae ma (e) talu mai le 2011?

¹⁶ E lē na o le Aʻoga o le Faiva Faatiokarate le toleniga ua maua e tagata o Ieova. Ua maua e misionare ma isi aogā mai i le Aʻoga o Kiliata. Na taʻua e se tasi o faiaʻoga, o se tasi o fuafuaga o lenei aʻoga, “o le faamalosia lea o le faanaunauga o le ʻauaʻoʻoga e auai i le galuega faaevagelia.” Na amata le Aʻoga o Kiliata i le 1943, ma ua silia nei i le 8,500 i latou ua toleniina ai. O misionare na toleniina i Kiliata ua auauna nei i le pe ā ma le 170 atunuu. Talu mai le 2011, e pau i latou ua valaaulia e auai i lenei aʻoga o i latou ua auai i le auaunaga faapitoa faataimi atoa e pei o paeonia faapito, ovasia femalagaaʻi, tagata Peteli, po o misionare o loo galulue i le fanua e leʻi auai i Kiliata.

17. O le ā le aogā o le Aʻoga o Kiliata?

¹⁷ Pe e iai se aogā o le Aʻoga o Kiliata? O le tulaga moni lenā. Seʻi manatu i le mea na tupu i Iapani. Iā Aokuso i le 1949, e lē atoa se toʻasefulu o tagata talaʻi i lenā atunuu. E oo ane i le faaiʻuga o lenā tausaga, e 13 misionare na aʻoʻoga i Kiliata ua galulue faatasi ma le ʻautalaʻi. I aso nei, ua pe ā ma le 216,000 tagata talaʻi i Iapani, ma o le toetoe ʻafa o i latou e paeonia.

18. O ā nisi o aʻoga ua faaauupegaina ai tagata o Ieova?

¹⁸ Ua saosaolaumea foʻi isi aʻoga i le faaleleia o tomai ma le itu faaleagaga o tagata o Ieova, e pei o le Aʻoga o le Faiva o le Malo, Aʻoga mo le Auaunaga Paeonia, Aʻoga mo Tagata Talaʻi o le Malo, Aʻoga mo Ovasia Femalagaaʻi ma a Latou Avā, ma le Aʻoga mo Sui o Komiti o Lālā ma a Latou Avā. E mautinoa o loo faaauau ona toleni e le Tupu ona tagatānuu!

19. O le ā na talitonu i ai Charles Taze Russell, ma ua faapefea ona faamaonia lenā manatu?

¹⁹ Ua silia i le 100 tausaga talu ona faavaeina le Malo o le Atua. O loo faaauau ona toleni e lo tatou Tupu o Iesu Keriso i tatou. A o toeitiiti maliu Charles Taze Russell i le 1916, na ia talitonu o le a oo atu le tala lelei i le lalolagi aoao. Na ia faapea atu i se tasi o ana aumea vavalalata: “Ua faatuputeleina ma o le a faaauau ona faatuputeleina le galuega, ona e manaʻomia ona talaʻiina i le lalolagi atoa le ʻfeʻau o le malo.’” (Faith on the March, tusia e A. H. Macmillan, itu. 69) Ua faataunuuina lenā galuega i o tatou aso! Maʻeu lo tatou lotofaafetai ona o loo faaauau ona faaauupegaina i tatou e le Atua o le filemu ina ia faataunuuina lenei galuega! Ua ia foaʻiina mai “mea lelei uma” ina ia faataunuu ai lona finagalo!