1. O le ā na faalaeiauina e le aposetolo o Ioane Kerisiano e mafaufau i ai, ma aiseā?

E TĀUA tele ona tatou manatunatu loloto i faamatalaga a le aposetolo o Ioane o loo maua i le 1 Ioane 3:1. Ua ia faapea mai: “Seʻi manatu i le silisili o le alofa o le Tamā ua faaalia mai iā i tatou.” Na faalaeiauina e Ioane Kerisiano ia mafaufau i le uiga ma le tele o le alofa o le Atua iā i latou. O le malamalama lelei i le alofa o le Atua, o le a faalolotoina ai lo tatou alofa mo ia ma faamalosia ai la tatou faiā.

2. Aiseā ua faigatā ai ona malamalama nisi e alofa le Atua iā i latou?

² Ua lē malamalama nisi i le alofa o le Atua. Ua latou manatu, e tatau ona matataʻu ma usiusitaʻi i le Atua. Atonu o aʻoaʻoga sesē, ua latou manatu ai e lē alofa le Atua ma e lē mafai foʻi ona tatou alolofa iā te ia. I le isi itu, ua talitonu nisi e alofa le Atua i taimi uma ma e alofa o ia iā i latou e tusa lava po o ā a latou gaoioiga e fai. A o e suʻesuʻeina le Tusi Paia, ua e aʻoaʻoina ai o le alofa, o le uiga autū lea o Ieova, lea na uunaʻia ai o ia e auina mai lona Alo e fai ma togiola mo i tatou. (Ioa. 3:16; 1 Ioa. 4:8) O lea, o le auala na tatou ola aʻe ai ma lo tatou talaaga, e mafai ona aafia ai o tatou manatu e faatatau i le alofa o le Atua.

3. O le ā e fesoasoani iā i tatou e malamalama ai i le alofa o le Atua mo i tatou?

 ³ O ā auala ua alofa mai ai Ieova iā i tatou? O le tali o lenā fesili, o lo tatou malamalama lea i la tatou faiā ma Ieova le Atua. Na foafoaina e Ieova tagata uma. (Faitau le Salamo 100:3-5.) O le māfuaaga lenā ua taʻua ai e le Tusi Paia Atamu “o le atalii o le Atua,” ma na aʻoaʻoina e Iesu ona soo ina ia taʻua le Atua o lo latou ʻTamā o i le lagi.’ (Luka 3:38; Mata. 6:9) Talu ai o Ieova lo tatou Tamā o ia o le Foaʻi Ola, o la tatou faiā la ma ia e tai pei o le faiā a se tamā ma lana fanau. E alofa Ieova iā i tatou e pei ona alofa o se tamā i lana fanau.

4. (a) E faapefea ona eseese Ieova ma tamā faaletagata? (e) O le ā o le a tatou iloiloina i lenei mataupu ma le mataupu o sosoo mai?

⁴ E lē lelei atoatoa tamā faaletagata. E ui i a latou taumafaiga malolosi, peitaʻi e lē mafai ona latou faataʻitaʻi atoatoa i le alofa faatamā o Ieova. Talu ai le manatuaina e nisi o le sauāina o i latou e o latou tamā, ua matuā aafia ai o latou faalogona ma mafaufau. E matuā tigā ma faanoanoa na tulaga. Peitaʻi e lē faapena lo tatou tamā o Ieova. (Sala. 27:10) O le iloaina o le auala e alofa ma tausia ai i tatou e Ieova, e tatou te mafuta vavalalata atu ai iā te ia. (Iako. 4:8) O le a tatou iloiloina i lenei mataupu auala e fā ua faaalia ai le alofa o Ieova iā i tatou. I le mataupu o sosoo mai, o le a iloiloina ai auala e fā e mafai ona tatou faaalia ai lo tatou alolofa iā te ia.

5. O le ā na taʻu atu e Paulo i tagata Atenai e faatatau i le Atua?

⁵ A o iai le aposetolo o Paulo i Atenai i Eleni, na ia mātauina e tumu le aai i tupua o atua sesē, ia na talitonu tagata e maua ai le ola ma mea manaʻomia o le olaga. Na uunaʻia Paulo e faapea atu: “O le Atua o lē na faia le lalolagi ma mea uma ua iai . . . ua ia foaʻi mai lava i tagata uma le ola, ma le mānava, ma mea uma lava. Auā o ia ua tatou ola ai, gaoioi ai, ma ua tatou iai foʻi ona o ia.” (Galu. 17:24, 25, 28) O lea, o le alofa o Ieova ua ia saunia ai “mea uma” e manaʻomia e faatumauina ai lo tatou ola. Seʻi mafaufau i lenā manatu.

6. Ua faapefea ona faaatagia mai i le lalolagi le alofa o le Atua mo i tatou? (Tagaʻi i le ata i luga aʻe o le matua.)

⁶ Seʻi mafaufau i le lalolagi lea na faia e Ieova, ma ʻua ia tuuina mai i le fanau a tagata.’ (Sala. 115:15, 16) Ua faaalu e saienitisi le tele o tupe e faia ai a latou saʻiliʻiliga i le vateatea pe maua nisi paneta e pei o le lalolagi. E ui ua latou maua le faitau selau o paneta, ae ua faanoanoa le ʻausaienitisi ona e augapiu ma se tasi o nei paneta e pei o le lalolagi, e mafai ona ola ai se tagata. E tutasi le lalolagi i mea uma na faia e le Atua. O le itu e maofa ai, e mai i le anoanoaʻi o paneta o loo iai i le aniva e taʻua o le Milky Way ma isi aniva, na faia e Ieova le lalolagi o se nofoaga matagofie e nonofo ai ma le saogalemu tagata, ma olioli ai! (Isa. 45:18) Ua faaatagia mai ai le alofa o Ieova mo i tatou.—Faitau le Iopu 38:4, 7; Salamo 8:3-5.

7. E faapefea i le auala na faia ai i tatou e le Atua, ona faaalia ai lona alofa mo i tatou?

⁷ E ui na saunia e Ieova se lalolagi matagofie mo i tatou, ae ua ia silafia e lē na o sauniuniga faaletino e tatou te maua ai le fiafia ma le faamalieina. E lagona e se tamaitiiti le saogalemu pe a ia iloa le alofa ma le uaʻi atu a ona mātua. Na faia e Ieova tagata i lona faatusa, ma tuu i ai faanaunauga mo mea faaleagaga ina ia latou iloa ma tali atu i lona alofa ma lana tausiga.  (Kene. 1:27) Na fetalai Iesu: “E fiafia o ē e naunau i mea faaleagaga.” (Mata. 5:3) I le avea o Ieova o se Tamā alofa, ua ia foaʻi mai “le tele o mea iā i tatou ina ia tatou fiafia ai,” e lē gata i le itu faaletino a o le itu faaleagaga.—1 Timo. 6:17; Sala. 145:16.

8. Aiseā e tatou te mananaʻo ai e taʻitaʻia i tatou e Ieova?

⁸ E alolofa tamā i a latou fanau, ma e mananaʻo e puipui i latou mai le taʻitaʻisesēina. Ua lē mafai e le toʻatele o mātua ona saunia ni taʻitaʻiga lelei mo a latou fanau, auā ua teena e i latou lava tapulaa o loo i le Afioga a le Atua. O le iʻuga, ua lē mautonu ma fenuminumiaʻi ai le aiga. (Faata. 14:12) Ae o Ieova, o ia o “le Atua faamaoni.” (Sala. 31:5) E alofa o ia i lana fanau, ma e fiafia e faasusulu mai le malamalama o le upu moni e taʻitaʻia ai i latou i so o se vala o le olaga, aemaise lava i mataupu tau i le tapuaʻiga. (Faitau le Salamo 43:3.) O ā upu moni ua faailoa mai e Ieova, ma e faapefea ona faamaonia mai ai lona alofa mo i tatou?

9, 10. Ua faapefea ona faaalia le alofa o Ieova iā i tatou e ala i le faailoa mai o le upu moni (a) e faatatau iā te ia? (e) e faatatau iā i tatou?

⁹ Muamua, ua faailoa mai e Ieova le upu moni e faatatau iā te ia lava. Ua ia faailoa mai lona suafa, lea e tele atu taimi ua taʻua ai i le Tusi Paia nai lo o se isi lava igoa. O lenei auala, ua mafuta vavalalata mai ai Ieova iā i tatou, ma maua ai le avanoa e tatou te iloa ai o ia. (Iako. 4:8) Ua faailoa mai foʻi e Ieova ona uiga. Ua faaalia mai e le vateatea lona mana ma lona atamai, ua faailoa mai foʻi e Ieova e ala i le Tusi Paia lona faamasinotonu ma le tele o lona alofa. (Roma 1:20) Ua pei o ia o se tamā e malosi, atamai, faimeatonu, ae e alofa foʻi, lea ua faigofie ai i lana fanau ona maua se faiā vavalalata ma ia.

¹⁰ Ua faailoa mai foʻi e Ieova le upu moni e faatatau iā i tatou, ma lo tatou tulaga i lana faatulagaga o mea. Ua saosaolaumea lea i le mauaina o le filemu ma le maopoopo i lona aiga i le aoao o mea. Ua tatou aʻoaʻoina mai i le Tusi Paia e leʻi faia le tagata ma le tomai e filifili ai i le lelei po o le leaga, ma tutoʻatasi ese mai i le Atua. O le lē amanaʻiaina o lenā upu moni tāua, o le a iʻu ai i āuga faanoanoa. (Iere. 10:23) E matuā aogā tele lenei mea mo lo tatou lelei. E pau le auala e tatou te maua ai le filemu ma le autasi, o le amanaʻia lea o le pule a le Atua. Maʻeu le alofa o Ieova ua ia filifili ai e faailoa mai lenei upu moni tāua!

11. O le ā ua folafola mai e Ieova e faaalia mai ai lona alofa ma lona manatu mamafa iā i tatou?

¹¹ O se tamā alofa e manatu mamafa i le lumanaʻi o lana fanau, e manaʻo ia latou maua se fuafuaga aogā i le olaga. Ua lē malamalama nisi e faatatau i le lumanaʻi, pe ua alu uma o latou olaga i le tuliloaina o sini e leai ni aogā tumau. (Sala. 90:10) Ae i le avea o i tatou o ni fanau a le Atua, e tatou te lagona le alofa faapelepele o Ieova iā i tatou ona ua ia folafola mai se lumanaʻi matagofie. E tatou te maua ai se fuafuaga aogā i le olaga.

12. Na faapefea i fautuaga ma le taʻitaʻiga a Ieova iā Kaino ma Paruka ona faaalia ai lona alofa ma lona manatu mamafa iā i laʻua?

¹² Na fetalai Ieova iā Kaino e faapea: ʻAiseā ua e matuā ita ai ma ua e faaʻūʻū ai? Pe afai e suia ou ala ma faia le mea lelei, po ou te lē taliaina ea oe? Ae pe e te pule ea i le agasala?’ (Kene. 4:6, 7) Na talafeagai lelei  le fautuaga ma le taʻitaʻiga a Ieova. Na lapataʻia e Ieova Kaino ina ua foliga mai o le a ia faia se gaoioiga mataʻutia. E faanoanoa, ona e leʻi utagia e Kaino le lapataʻiga, ma sa ia puapuagatia ai. (Kene. 4:11-13) Ina ua lotovaivai ma faanoanoa le failautusi a Ieremia o Paruka, na fautuaina o ia e Ieova ma fesoasoani iā te ia e iloa lona faafitauli. I le lē pei o Kaino, sa talia e Paruka fautuaga a Ieova, ma na faasaoina ai lona ola.—Iere. 45:2-5.

13. Aiseā na faataga ai e Ieova tofotofoga e oo i ana auauna faamaoni?

¹³ Na tusi Paulo: “E aʻoaʻia e Ieova o lē e alofa i ai; o le mea moni, e na te faasalaina foʻi atalii uma ua ia taliaina.” (Epe. 12:6) O aʻoaʻiga e lē faapea e na o faasalaga e faasino atu i ai. E eseese auala e faatino ai aʻoaʻiga. E tele faaaʻoaʻoga i le Tusi Paia o auauna faamaoni na feagai ma tofotofoga ogaoga, atonu na aofia ai aʻoaʻiga ma na aogā iā i latou. Seʻi manatu iā Iosefa, Mose ma Tavita. E tele faamatalaga a le Tusi Paia e faatatau i o latou soifuaga. Pe a faitau i le auala na faatasi ai Ieova ma i latou i taimi o tofotofoga, ma le auala na faaaogā ai i latou e Ieova, e tatou te lagona ai le alofa o Ieova i ana auauna.—Faitau le Faataoto 3:11, 12.

14. E faapefea ona tatou iloa le alofa o Ieova pe a ia aʻoaʻia i tatou?

¹⁴ O aʻoaʻiga mai iā Ieova, e fesoasoani iā i tatou e iloa se isi vala o lona alofa. Pe a aʻoaʻia e Ieova i latou na faia mea sesē ma ua latou faaalia le salamō, “e na te matuā faamagaloina lava” i latou. (Isa. 55:7) O le ā lona uiga? Na faaaogā e Tavita ni faaupuga faamomoiloto e faamatala ai le  faamagaloga a Ieova: “O Ia o lē e faamagaloina au mea sesē uma, o Lē na te faamālōlōina ou maʻi uma, o Lē na te toe faafoʻisia lou ola mai i le lua, o Lē foʻi na te faapaleina oe i le alofa faamaoni ma le alofa mutimutivale. E pei ona vavamamao o le mea e oso aʻe ai le lā mai i le mea e goto ifo ai, e faapea foʻi ona faamamao e ia o a tatou solitulafono mai iā i tatou.” (Sala. 103:3, 4, 12) Tau ina ia tatou gauaʻi pea i fautuaga ma aʻoaʻiga a Ieova. Ia vave ona tali atu i ai, ma ia iloa o le faaaliga lea o le tele o lona alofa mo i tatou.—Sala. 30:5.

15. O le ā e faaalia ai e tautele iā Ieova ona tagata?

¹⁵ O se tasi o matafaioi muamua a se tamā alofa, o le puipuia ma le leoleoina o lona aiga mai so o se lamatiaga mataʻutia. O le mea lenā o loo faia e Ieova lo tatou Tamā. Ua faapea mai le faisalamo: “O loo ia leoleoina ona tagata faamaoni; e na te laveaʻiina i latou mai i lima o ē e amioleaga.” (Sala. 97:10) Seʻi fai se faaaʻoaʻoga. E matuā tāua iā i tatou o tatou mata! E faapena foʻi faalogona o Ieova e faatatau i ona tagata. (Faitau le Sakaria 2:8.) Maʻeu le tautele o tagata o Ieova iā te ia!

16, 17. Faamatala auala ua puipuia ai e Ieova ona tagata e oo lava i aso nei.

¹⁶ O se tasi o auala e puipuia ai e Ieova ona tagata e auala mai i ana agelu. (Sala. 91:11) Na faasaoina e se agelu Ierusalema mai le osofaʻiga a Asuria, ma faaumatia se ʻautau e 185,000 i le pō e tasi. (2 Tupu 19:35) Na laveaʻiina e agelu aposetolo o Peteru, Paulo ma isi mai i le falepuipui. (Galu. 5:18-20; 12:6-11) O loo fesoasoani foʻi Ieova iā i tatou i aso nei. Na lipotia mai e se sui o le ofisa ulu sa asiasi atu i le lālā i Aferika e faapea, ua matuā aafia le atunuu ona o feeseeseaʻiga faapolotiki ma faalelotu. Ua lē maopoopo ma faateteleina le amioleaga i le atunuu ona o fetauaʻiga, o tagata gāoi, toso teine ma le fasioti tagata. E ui e leai se uso na maliu ai, ae e toʻatele na faaleagaina a latou meatotino. Pe a fesiligia po o ā mai i latou, e latou te ʻataʻata ma faapea mai: “O loo manuia, faafetai lava iā Ieova.” Na latou iloa le alofa o le Atua iā i latou.

¹⁷ E iai taimi e faatagaina ai e Ieova ona fili e faaoo le oti i nisi o ana auauna faamaoni e pei o Setefano. Peitaʻi e puipuia e le Atua ona tagata o se vaega, e ala i le saunia o lapataʻiga i taimi tatau faasaga i togafiti a Satani. (Efe. 6:10-12) E ala mai i lana Afioga ma lomiga faale-Tusi Paia mai i lana faalapotopotoga, ua tatou iloa ai le upu moni e faatatau i le taufaaʻoleʻole o le ʻoa, faafiafiaga lē māmā ma sauā, faaaogā sesē o le Initaneti ma isi mea. I le avea o Ieova o se Tamā alofa, ua ia puipuia ai le saogalemu ma le lelei o ona tagata.

18. O le ā sou manatu e faatatau i le alofa o Ieova mo oe?

¹⁸ O le iloiloina o auala lelei ua faaalia mai ai le alofa o Ieova mo i tatou, o le a talitutusa ai o tatou faalogona ma Mose. A o manatunatu i lana auaunaga umi iā Ieova, na faapea mai Mose: “Ia e faamalieina i matou i le taeao i lou alofa faamaoni, ina ia matou alalaga fiafia atu ai ma olioli i o matou aso uma.” (Sala. 90:14) O le iloaina o le alofa o Ieova mo i tatou o se tasi lea o faaeaga ma faamanuiaga sili ua tatou maua i aso nei. E pei o le aposetolo o Ioane, ua uunaʻia i tatou e faalauiloa atu: “Seʻi manatu i le silisili o le alofa o le Tamā ua faaalia mai iā i tatou.”—1 Ioa. 3:1.