1. Aiseā na faapea mai ai Paulo ʻua avea Keriso ma mana o le Atua’?

NA FAAILOA mai e Ieova lona mana i auala mataʻina e ala mai iā Iesu Keriso. A o iai Iesu i le lalolagi, sa ia faia le tele o vavega, ma e tatou te faitau i nisi o vavega i le Tusi Paia, lea e faamalosia ai lo tatou faatuatua. (Mata. 9:35; Luka 9:11) Na faaalia mai e Iesu le mana o le Atua. O le māfuaaga lea na faapea mai ai Paulo: ʻUa avea Keriso ma faaaliga o le mana o le Atua.’ (1 Kori. 1:24) Ae o le ā le aafiaga o vavega a Iesu i o tatou olaga?

2. O le ā e tatou te aʻoaʻoina mai i vavega a Iesu?

² Na faapea mai Peteru sa faia e Iesu vavega po o “mea ofoofogia.” (Galu. 2:22) O galuega mamana na faia e Iesu i le lalolagi ua fai ma faaataga o faamanuiaga o le a aumaia i lana pulega. Ua faaāta mai ai vavega o le a faia e Iesu i le lalolagi fou a le Atua. O ana vavega foʻi ua tatou malamalama ai i ona uiga ma uiga o lona Tamā. O lea, seʻi o tatou iloiloina nisi o vavega a Iesu, ma vaai pe e faapefea ona aafia ai o tatou olaga i le taimi lenei ma le lumanaʻi.

3. (a) Faamatala tulaga na māfua ai ona faia le uluaʻi vavega a Iesu. (e) Na faapefea ona faaalia e Iesu le limafoaʻi i Kana?

³ I le ʻaiga o se faaipoipoga na faia i Kana i Kalilaia, na faia ai le uluaʻi vavega a Iesu. Atonu na toʻatele atu le ʻauvalaaulia na auai nai lo o ē na faatalitalia. Po o le ā lava le tulaga, ae na uma le uaina. Sa aofia ai Maria le tinā o Iesu i le ʻauvalaaulia. A o faagasolo tausaga, e lē taumatea sa ia tomānatu i valoaga e faatatau i lana tama, lea o le a taʻua o le “Alo o le Silisili Ese.” (Luka 1:30-32; 2:52) Pe sa talitonu Maria o loo iā Iesu le mana e faia ai se vavega? O le mea na tupu i Kana, na faaalia ai le alolofa o Maria ma Iesu i le ulugalii fou ina neʻi faalumaina i laʻua. O lea na ia liua ai le pe ā ma le 100 kalone vai (380 L) e avea ma “uaina lelei.” (Faitau le Ioane 2:3, 6-11.) Pe sa manaʻomia ona faia e Iesu lenā vavega? E leai. Ae sa ia manatu mamafa i tagata ma faaaʻoaʻo i lona Tamā i le lagi i le faaalia o le limafoaʻi.

4, 5. (a) O le ā le lesona e tatou te aʻoaʻoina mai i le uluaʻi vavega a Iesu? (e) O le ā ua tatou aʻoaʻoina mai i le vavega i Kana e faatatau i le lumanaʻi?

⁴ Na faavavega ona saunia e Iesu se uaina telē mo se vaega o tagata e toʻatele. O le ā e tatou te aʻoaʻoina mai i lenei vavega? O le lotomalie o Iesu e faatino lenā vavega mataʻina, ua faamautinoa mai ai e tāua iā Iesu ma lona Tamā faalogona o tagata. E lē limamau Iesu ma lona Tamā. O lea, seʻi faaāta i o tatou mafaufau le auala o le a faaaogā ai e Ieova lona mana, e foaʻi mai ai le tele o meaʻai “mo tagata uma” i le lalolagi aoao.—Faitau le Isaia 25:6.

⁵ Seʻi mafaufau i le taimi o le a faamalie ai manaʻoga o tagata uma, e pei o le mauaina o meaʻai ma fale. E tatou te matuā olioli pe a mafaufau i le tele o mea lelei o le a foaʻi mai e Ieova mo i tatou i le lalolagi Parataiso.

6. Na faapefea ona faaaogā e Iesu lona mana, ma e faapefea ona tatou faaaʻoaʻo iā te ia?

⁶ I le taimi na faaosooso ai e le Tiapolo Iesu e liua maa e avea ma falaoa, na teena e Keriso le faaaogāina o lona mana e faamalie ai ona lava manaʻoga. (Mata. 4:2-4) Peitaʻi, na faaaogā e Iesu lona mana e faamalie ai manaʻoga o isi. E faapefea ona tatou faaaʻoaʻo i lenā uiga lē manatu faapito o Iesu? Ua ia faalaeiauina auauna a le Atua ina ia “foaʻi atu pea.” (Luka 6:38) Pe e mafai ona tatou faaalia lenā uiga e ala i le valaaulia o isi i o tatou aiga mo se taumafataga ma talatalanoa ai faaleagaga? Pe e mafai ona faaavanoa lo tatou taimi pe a māeʻa le sauniga e fesoasoani ai i isi, e pei o le faalogologo i se uso o loo faataʻitaʻi lana lauga? E faapefea ona tatou fesoasoani i se tagata talaʻi o loo manaʻomia le fesoasoani i le faiva? E tatou te  faaaʻoaʻo iā Iesu pe a tatou limafoaʻi i i isi i meafaitino ma le itu faaleagaga.

7. O le ā le tulaga o le a iai pea i lenei faiga o mea?

⁷ O le mativa e lē o se faafitauli fou. Na faailoa atu e Ieova i tagata Isaraelu o le a iai pea tagata matitiva i le laueleele. (Teu. 15:11) I senituri mulimuli ane, na fetalai Iesu: ʻE tou te faatasi pea ma tagata matitiva.’ (Mata. 26:11) Po o le uiga o le fetalaiga a Iesu o le a iai pea tagata matitiva i le lalolagi? E leai. O le uiga o lana faamatalaga, o le umi ona iai o lenei faiga o mea faapiʻopiʻo, o le umi foʻi lenā ona iai o tagata matitiva. O lea, e faamāfanafanaina i tatou i le iloaina o vavega na faia e Iesu, ua avea ma faaataga o mea lelei o le a faia pe a pule le Malo, lea o le a fau ma soloi meataumafa ma faamalieina ai.

8, 9. (a) Aiseā na fafaga ai e Iesu le faitau afe o tagata? (e) O ā ni ou faalogona e faatatau i lenā vavega?

⁸ Na faapea mai le faisalamo e faatatau iā Ieova: “Ua e faamafola lou aao ma faamalie le manaʻo o mea ola uma lava.” (Sala. 145:16) A o iai Iesu i le lalolagi, sa ia faaaʻoaʻo atoatoa i lona Tamā ma faamalie manaʻoga o isi. E na te leʻi faia vavega e tau ina ia faaalia ai lona mana. Peitaʻi, na ia manatu mamafa i tagata. Seʻi o tatou iloiloina le Mataio 14:14-21. (Faitau.) Na savavali se motu o tagata mai i le aai e mulimuli iā Iesu. (Mata. 14:13) E oo ane i le afiafi, ua fia ʻaai le ʻausoo ma ua popole foʻi i le vaivai ma le fia ʻaai o tagata. O lea, na latou talosaga atu ai iā Iesu ina ia auina atu le motu o tagata e faatau a latou lava meaʻai. O le ā na faia e Iesu?

⁹ Na fafaga e Iesu le pe ā ma le 5,000 tamāloloa, faapea fafine ma tamaiti i falaoa e lima ma iʻa e lua. Aiseā na faia e Iesu lenei vavega? Sa ia alofa moni i tagata ma manatu mamafa iā i latou. Na saunia foʻi e Iesu le tele o meaʻai mo le motu o tagata, auā na latou ʻaai ma maoona.’ O nei meaʻai na latou maua ai le malosi e toe foʻi ai mo le malaga umi i o latou aiga. (Luka 9:10-17) Sa maoona tagata uma ma na tutumu ato e 12 i meaʻai na totoe.

10. O le ā o le a tupu i le mativa i le lumanaʻi?

¹⁰ E lē o faamalieina manaʻoga o le faitau selau miliona o tagata ona o pulega faapiʻopiʻo a tagata. E oo lava i nisi o uso, e lē lava a latou meaʻai. Peitaʻi, ua lata mai le taimi o le a olioli ai tagata usiusitaʻi i se lalolagi o le a lē toe iai ni faiga piʻopiʻo ma le mativa. Pe afai e iai sou mana, po o le a e faamalieina manaʻoga o tagata? E iai i le Atua e ou le malosi uma lava le mana ma le faanaunauga e faamalie ai manaʻoga o tagata, ma ua lata mai le taimi e faataunuu ai lenā mea.—Faitau le Salamo 72:16.

11. Aiseā e tatou te mautinoa ai ua toe o se aga ona faaaogā lea e Keriso lona mana i le lalolagi aoao, ma o le ā ua tatou naunau e fai?

¹¹ A o iai Iesu i le lalolagi, sa ia faia vavega i se vaipanoa laʻitiiti mo le tolu ma le ʻafa tausaga. (Mata. 15:24) Ae i le avea ai o ia ma Tupu, o le a ia fesoasoani i tagata i le lalolagi aoao a o faagasolo lana Pulega i le Afe Tausaga. (Sala. 72:8) O vavega na faia e Iesu ua faamautinoa mai ai iā i tatou lona tomai ma lona faanaunauga e faaaogā lona mana mo lo tatou lelei. E ui e lē mafai ona tatou faia ni vavega, ae e mafai ona tatou faauaʻi mai tagata i le Afioga a le Atua. Ua faamautinoa  mai i valoaga a le Tusi Paia mea mataʻina o le a tutupu i le lumanaʻi. Talu ai o i tatou o Molimau tuuina atu a Ieova ua malamalama i le lumanaʻi, pe e lē o lo tatou tiute tauave ea le faailoa atu i isi o na folafolaga? (Roma 1:14, 15) O le manatunatu i mea ua toe o se aga ona faia lea e Keriso, o le a tatou naunau ai e taʻu atu i isi na mea.—Sala. 45:1; 49:3.

12. Aiseā e tatou te mautinoa ai e malamalama lelei Iesu i le siʻosiʻomaga o le lalolagi?

¹² I le taimi na foafoaina ai e le Atua le lalolagi ma mea uma, sa avea Iesu ma ana “tufuga poto.” (Faata. 8:22, 30, 31; Kolo. 1:15-17) E malamalama lelei Iesu i le siʻosiʻomaga o le lalolagi. E na te silafia lelei foʻi le auala e faaaogā ma faatonutonu ai punaʻoa faalenatura o le lalolagi.

13, 14. Aumai se faaaʻoaʻoga o le auala na faatonutonu ai e Iesu malosiaga faalenatura.

¹³ A o iai Iesu i le lalolagi, sa ia faailoa mai o ia o le “mana o le Atua” e ala i le puleaina o malosiaga faalenatura. O se faaaʻoaʻoga, seʻi mafaufau i le auala na faatonutonu ai e Iesu se matagi. (Faitau le Mareko 4:37-39.) Ua faamatala mai e se faitofā o le Tusi Paia, o le upu Eleni mo le “matagi” i le Mareko 4:37 e faamatala ai se matagi malosi po o se afā. E faasino atu i se matagi e masani ona faauli ai le lagi, e malolosi ai savili, o faititili ma mamafa ai timuga. Pe a māeʻa atu lenā mala, e faaleagaina ai le tele o mea.

¹⁴ Seʻi mafaufau i le vaaiga lenei, o loo taia pea e peau o le sami le vaa ma ua sao atu le vai i totonu. E ui i le malosi o le matagi ma le felafoaʻiina o le vaa, ae o loo tofā pea Iesu, ua matuā vaivai lava. Peitaʻi, ua fefefe le ʻausoo. Ua latou fafagu iā Iesu ma faapea atu: “O le a matou feoti!” (Mata. 8:25) Ae na faapefea ona tali atu Iesu? Na ia nofo aʻe i luga, ma faapea atu i le sami: “Ia fifilemu, ma ia malū!” (Mare. 4:39) Na taofia le matagi ma ua matuā “malū” lava. Maʻeu se faaaliga o le mana o Iesu!

15. Ua faapefea ona faailoa mai e le Atua Silisili Ese e mafai ona ia puleaina malosiaga faalenatura?

¹⁵ O Ieova le puna o le mana o Keriso, o lea ua tatou iloa ai e mafai ona puleaina e le Atua Silisili Ese malosiaga faalenatura. Seʻi mafaufau i nisi o faaaʻoaʻoga. A o leʻi tupu le Lolo, na fetalai Ieova: “E toe fitu aso ona ou faatotōina ifo lea o le timu i le lalolagi, mo ao e fā sefulu ma pō e fā sefulu.” (Kene. 7:4) I se tulaga talitutusa, i le Esoto 14:21 e tatou te faitau ai “ona faapogaia lea e Ieova le sami e alu i tua e ala i le agi malosi mai o le matagi mai i sasaʻe.” Ua tatou faitau i le Iona 1:4: “Ua faaoo e Ieova le matagi tele i le sami ma ua matuā sousou ai le sami; ma ua toetoe lava ina a malepe ai le vaa.” E faalaeiau i tatou i le iloaina e mafai e Ieova ona puleaina malosiaga faalenatura i le lalolagi fou.

16. Aiseā e faamāfanafanaina ai i tatou i le iloa e iai iā Ieova ma Iesu le mana e pulea ai malosiaga faalenatura?

¹⁶ E faamāfanafanaina i tatou i le iloaina e iai iā Ieova ma Iesu le mana e pulea ai malosiaga faalenatura. A o faagasolo le Pulega a Keriso i le Afe Tausaga, o le a saogalemu tagata uma e nonofo i le lalolagi. E leai se tasi o le a faamanuʻalia pe faaumatia i mala faalenatura e pei o afā, galulolo, mauga mū po o mafuiʻe. O le a tatou lē fefefe i ni mala auā ʻo le a iai i tagata le faleʻie o le Atua.’ (Faaa. 21:3, 4) E tatou te mautinoa o le a tuuina atu e  Ieova iā Keriso le mana e pulea ai mea o le natura a o faagasolo le Pulega i le Afe Tausaga.

17. O le ā se tasi o auala e tatou te faaaʻoaʻo ai i le Atua ma Keriso i aso nei?

¹⁷ E lē mafai ona tatou taofia mala faalenatura. E na o Ieova ma Iesu e mafai ona faia lenā mea. Peitaʻi, e iai se mea e mafai ona tatou faia. E mafai ona tatou faatatauina le Faataoto 3:27. (Faitau.) Pe a mafatia o tatou uso, e mafai ona tatou fesoasoani i o latou manaʻoga faaletino, le itu taufaalogona, ma le faaleagaga. (Faata. 17:17) O se faaaʻoaʻoga, e mafai ona tatou fesoasoani iā i latou pe a māeʻa mala faalenatura. Na faapea mai se tuafafine ua oti lana tane na faaleagaina lona fale i se afā: “Ou te matuā lotofaafetai i le faalapotopotoga a Ieova, e lē gata i le itu faaletino ae faapea le fesoasoani faaleagaga.” Na pei ua leai se faamoemoe o se tuafafine nofofua ina ua faaleagaina lona fale i le matagi. Na ia faapea mai ina ua māeʻa ona fesoasoani uso e faaleleia lona fale: “Ua lē mafai e upu ona faamatala oʻu faalogona.” Na ia toe faaopoopo mai: “Faafetai lava Ieova!” E tatou te lotofaafetai i le manatu mamafa o uso ma tuafāfine i manaʻoga o isi. Ae e sili atu i lenā, o le manatu mamafa o Ieova ma Iesu Keriso iā i tatou.

18. Aiseā e mataʻina ai le uunaʻiga na faia ai e Iesu vavega?

¹⁸ A o faagasolo le faiva a Iesu, na ia faamaonia o ia o le “mana o le Atua.” Ae e na te leʻi faaaogāina lona mana e faaofo ai isi pe ina ia mauaina ai foʻi e ia lava aogā. Peitaʻi, na faaaogā e Iesu lona mana e fai ai vavega ona o lona alofa moni i tagata. O le vala lenā o le a iloiloina i le mataupu o loo sosoo mai.