1, 2. O le ā na tofia e Ieova Mose e fai, ma o le ā le faamautinoaga na taʻu atu iā Mose?

O Ā NI ou faalogona pe a e tū i luma o se pule e sili ona malosi i le lalolagi, ma tautala atu e fai ma sui o tagata o Ieova? Atonu e te lagona le popole, fefe, ma le lē agavaa. E faapefea ona sauniuni au upu e fai atu? O le ā e te faia ina ia faamaonia atu ai i au upu, o oe o se sui o le Atua e ona le malosi uma lava?

² O le tulaga tonu lava lenā sa oo iā Mose, “o le tagata e sili ona agamalu i tagata uma ua i luga o le fogāeleele.” Na taʻu atu i ai e Ieova o le a auina atu o ia iā Farao, ina ia laveaʻi Ona tagata mai i le sauāina ma le nofo pologa i Aikupito. (Nu. 12:3) Ua faamaonia mai i mea na tutupu, o Farao o se tagata e lē faaaloalo ma faamaualuga. (Eso. 5:1, 2) Peitaʻi, na finagalo Ieova iā Mose ia faatonu Farao e tuu mai le faitau miliona o tagata o loo fai ma ana pologa, e ō ese mai i le atunuu. Na fesili atu Mose iā Ieova: “O ai aʻu ou te alu atu ai iā Farao ma ou aumai le fanauga a Isaraelu mai i Aikupito?” E lē taumatea sa lagona e Mose le lē agavaa, peitaʻi na faamautinoa atu i ai e Ieova e faapea: “Ou te faatasi ma oe.”​—Eso. 3:9-12.

3, 4. (a) O ā mea sa popole ai Mose? (e) O le ā se luʻi e te ono fesagaʻia e pei foʻi ona fesagaʻi ma Mose?

³ O ā mea sa popole ai Mose? E foliga mai sa popole o le a lē  amanaʻia e Farao sē ua avea ma sui o Ieova le Atua. Sa popole foʻi o le a lē talitonu tagata na tofia o ia e Ieova, e taʻitaʻi ese mai i latou mai i Aikupito. O lea na faapea atu ai Mose iā Ieova: “Ae faapefea pe afai latou te lē talitonu iā te aʻu ma lē faalogo i loʻu leo? Auā latou te faapea mai nei, ʻE leʻi faaali atu Ieova iā te oe.’”​—Eso. 3:15-18; 4:1.

⁴ E iai se lesona tāua tele e mafai e i tatou uma ona aʻoaʻoina, mai i le tali a Ieova iā Mose ma mea na tutupu mulimuli ane. Atonu e te lē tū lava i luma o se tagata maualuga o le malo. Peitaʻi, po o avea ma luʻi iā te oe le talanoa atu e faatatau i le Atua ma lona Malo, e oo lava i tagata e te feiloaʻi i ai i aso uma? Pe afai o le tulaga lenā, seʻi iloilo ni lesona e aʻoaʻoina mai i le mea na tupu iā Mose.

5. O le ā na tuu atu e Ieova i le lima o Mose, ma na faapefea i lenā mea ona aveesea ai lona popole? (Tagaʻi i le ata i luga aʻe o le matua.)

⁵ Ina ua faaalia e Mose lona popole o le a lē talia e tagata ana upu, sa saunia o ia e Ieova ina ia feagai ma tulaga o le a tulaʻi mai. Ua taʻua i le Esoto 4:2-5: “Ua fetalai mai Ieova iā te ia: ʻO le ā lenā mea o loo i lou lima?’ ua ia tali atu: ʻO le tootoo.’ Ona ia fetalai mai lea: ʻIa togi i le eleele.’ Ua ia togi le tootoo i le eleele ona liu gata ai lea; ona amata lea ona sola ese ai Mose. Ua fetalai mai Ieova iā Mose: ʻIa aapa atu lou lima ma tago i lona siʻusiʻu.’ Ua aapa atu lona lima ma uu lona siʻusiʻu, ona toe liu tootoo ai lea i lona alofilima. ʻIa faia faapea, ina ia latou talitonu ai na faaali atu iā te oe Ieova.’” Ioe, na faia e Ieova se auala ina ia faamaonia ai o le feʻau a Mose e mai iā te Ia. Sa foliga mai i le manatu o isi o le tootoo o se mea faatauvaa. Peitaʻi, na avea ma se mea malosi ona o le mana o Ieova. O lenā vavega na matuā fesoasoani i upu a Mose na fai atu, ma o se faamaoniga aʻiaʻi o le lagolagosua a Ieova iā te ia. O lea na fetalai mai ai Ieova iā te ia: “E te uu lenei tootoo i lou lima ina ia e faia ai faailoga.” (Eso. 4:17) E ala i le pule na tuuina e le Atua i le lima o Mose, na mafai ai ona ia alu atu ma le mautinoa e fai ma sui o le Atua moni, i luma o ona tagata ma Farao.​—Eso. 4:29-31; 7:8-13.

6. (a) O le ā le mea e tatau ona iai i o tatou lima pe a talaʻi, ma aiseā? (e) Faamatala le auala ʻo loo ola ai le afioga a le Atua’ ma le auala e “matuā malosi” ai.

⁶ Pe a tatou ō atu e taʻu i isi le feʻau o loo i le Tusi Paia, e ono fesiligia foʻi i tatou e faapea: “O le ā lenā mea o loo i lou lima?” O le tele o taimi, e iai i o tatou lima le Tusi Paia ma sauni e faaaogā. E ui lava e ono manatu nisi e lē tāua le Tusi Paia, peitaʻi o loo fetalai mai Ieova iā i tatou e ala mai i lana Afioga faagaeeina. (2 Pete. 1:21) O loo iai folafolaga a Ieova e tusa ai o mea o le a tutupu i le pulega o lona Malo. O le pogai lenā na tusi ai Paulo e faapea: “O loo ola le afioga a le Atua ma e matuā malosi foʻi.” (Faitau le Eperu 4:12.) O loo iai le mana i folafolaga uma a Ieova, ona o loo faaauau ona ia galue ina ia faataunuuina. (Isa. 46:10; 55:11) E iloa loa e se tasi lenei manatu e faatatau i le Afioga a Ieova, o le a telē se aafiaga i lona olaga o mea e na te faitauina i le Tusi Paia.

7. E mafai faapefea ona tatou “taulimaina ma le saʻo le upu moni”?

⁷ Ua tuu mai e Ieova iā i tatou lana Afioga tusia o loo ola, ina ia faamaonia atu ai e maufaatuatuaina la tatou feʻau ma e mai iā te ia. E lētioa ina ua uma ona tusi atu Paulo i Kerisiano i Eperu, ona ia uunaʻia lea o Timoteo, o lē na ia fesoasoani i ai faaleagaga, ʻia taumafai malosi e taulima ma le saʻo le upu moni.’ (2 Timo. 2:15) E mafai ona tatou faatatauina le fautuaga a Paulo, e ala i le faitau atu o ni mau e talafeagai lelei, ina ia pāʻia ai loto o ē o loo faalogologo mai iā i tatou. O sāvali na tatalaina i le 2013, na fuafuaina ina ia fesoasoani iā i tatou e faia faapea.

8. O le ā na taʻua e se ovasia o le auaunaga e faatatau i sāvali?

⁸ E tutusa uma lava le auala ua faatulaga ai sāvali fou. O lea, pe a tatou iloa le auala e faaaogā ai se sāvali se tasi, ua tatou iloa foʻi le auala e faaaogā ai nei sāvali uma. Pe e faigofie ona faaaogā? Na tusi se ovasia o le auaunaga i Hawaii e faapea: “E matou te leʻi iloaina le aogā tele o nei meafaigaluega fou, i le talaʻiga i le fale i le fale ma le molimau atu i nofoaga faitele.” E manatu o ia o le auala na tusia ai sāvali, e faigofie ona uunaʻia ai tagata e tali mai, ma e masani lava ona iʻu ai i ni talanoaga faaoso naunau. O le māfuaaga, ona o loo iai i le pito i luma o sāvali taʻitasi le fesili, ma tali e filifili mai ai le tagata o le aiga. E leai se mea e popole ai fua le tagata o le aiga pe a sesē sana tali.

9, 10. (a) E faapefea i a tatou sāvali ona faaosofia ai i tatou e faaaogā le Tusi Paia? (e) O lē fea sāvali e tele ina maua iʻuga lelei pe a e faaaogāina, ma aiseā?

⁹ O sāvali taʻitasi e faaosofia ai i tatou e faitau atu se mau e talafeagai lelei. O se faaaʻoaʻoga, tagaʻi i le sāvali Po o le a Faaiʻuina ea Mafatiaga? E tusa pe tali mai le tagata o le aiga i le “ioe,” “leai,” pe “atonu,” ia suʻe i le itulau e pito i totonu ma faapea atu, “O le manatu lenei o loo taʻua i le Tusi Paia,” ona faitau lea o le Faaaliga 21:3, 4.

¹⁰ E faapena foʻi pe a faaaogā le sāvali O le ā Lau Vaaiga i le Tusi Paia? E lē afāina po o lē fea tali e taʻu mai e le tagata o le aiga, mai i tali e tolu o loo i le pito i luma o le sāvali. E na ona suʻe lava i le itulau e pito i totonu ma faapea atu, “Ua taʻua i le Tusi Paia ʻO Tusitusiga Paia uma e mai i le agaga o le Atua.’” E te ono faapea atili atu, “E iai nisi manatu o loo taʻua i lenā mau,” ona suʻe lea o lau Tusi Paia ma faitau atoa le mau o loo i le 2 Timoteo 3:16, 17.

11, 12. (a) O le ā le faamalieina e te maua mai i le faiva? (e) E faapefea ona fesoasoani sāvali e saunia ai oe mo toe asiga?

¹¹ O le tali mai a le tagata, o le a e iloa ai po o le ā le tele o vaega o le sāvali e te lua faitauina ma talanoaina. Po o le ā lava le tulaga, e lē gata ua e ofo atu sāvali i tagata, ae e faamalieina oe ona ua e faitauina atu se vaega o le Afioga a le Atua, e tusa pe e na o le tasi pe lua ni fuaiupu e te faitauina i le uluaʻi asiasiga. Mulimuli ane, e mafai ona faaauau le lua talanoaga.

¹² O loo i le pito i tua o sāvali taʻitasi se fesili i lalo o le ulutala “Ia Mafaufau i Ai,” ma ni  mau e talanoaina i le asiasiga e sosoo ai. I le sāvali O le ā Sou Manatu e Uiga i le Lumanaʻi?, o loo iai le fesili, “O le a faapefea ona suia e le Atua lo tatou lalolagi i se tulaga e sili ona lelei?” O loo iai le Mataio 6:9, 10 ma le Tanielu 2:44 ina ia tali ai le fesili. I le sāvali Pe Mafai Ona Toe Feola Mai Ē ua Maliliu? o loo iai le fesili, “Aiseā ua tatou ola matutua ai ma feoti?” E tali lenā fesili i le Kenese 3:17-19 ma le Roma 5:12.

13. Faamatala pe faapefea ona faaaogā sāvali ina ia amata ai ni suʻesuʻega faale-Tusi Paia.

¹³ Ia faaaogā sāvali o ni fesoasoani e amata ai ni suʻesuʻega faale-Tusi Paia. Pe a faaaogā e se tagata le QR Code * i le pito i tua o se sāvali, o le a tataʻi saʻo o ia i se manatu o loo i la tatou tuatusi i le Initaneti, e ono faalaeiau ai o ia e suʻesuʻe le Tusi Paia. O loo faamatilatila foʻi i sāvali le polosiua Tala Lelei Mai i le Atua, ma faasino i se lesona patino o loo iai. O se faaaʻoaʻoga, i le sāvali O Ai Moni o Loo Pulea le Lalolagi?, o loo faasino atu i le lesona e 5 o lenā polosiua. I le sāvali E Faapefea Ona Maua e se Aiga le Fiafia Moni? o loo faasino atu i le lesona e 9. Pe a faaaogā sāvali i le auala ua fuafuaina ai, o le a e mulimuli i se faiga masani o le faaaogā o le Tusi Paia i uluaʻi asiasiga ma toe asiga. O le iʻuga, e te ono amata ai nisi suʻesuʻega faale-Tusi Paia. O le ā se isi mea e te faia ina ia faaaogā ai le Afioga a le Atua i lau faiva, i se auala e maua ai ni iʻuga lelei?

14, 15. E faapefea ona e faaaʻoaʻo i le uiga sa iā Paulo e faatatau i le faiva?

¹⁴ Sa matuā naunau Paulo ia oo atu i “le toʻatele o tagata” lana faiva. (Faitau le 1 Korinito 9:19-23.) Sa faamoemoe Paulo ia ʻmaua tagata Iutaia, ia maua ē e nonofo i le tulafono, ia maua ē e lē o nonofo i le tulafono, ma ia maua ē ua vaivai.’ Ioe, sa manaʻo Paulo ia oo atu i ʻtagata o ituaiga uma, ina ia iʻu lava ina faaolaina nisi iā te ia.’ (Galu. 20:21) E faapefea ona tatou faaaʻoaʻo i le uiga sa iā Paulo, a o sauni e taʻu atu le upu moni i “ituaiga uma o tagata” i la tatou oganuu?​—1 Timo. 2:3, 4.

¹⁵ Ia taumafai e faaaogā taulimaga ua fautuaina mai i La Tatou Faiva o le Malo i masina taʻitasi. Ae afai e iai nisi mataupu o loo popole ai tagata o lau oganuu, ia fai ni taulimaga faaoso naunau e talafeagai ma na mataupu. Ia mafaufau i le siʻomaga o le mea o loo e nofo ai, isi tagata o loo nonofo ai i inā, ma mea e tele ina popole ai na tagata. Pe a uma, ona mafaufau lea i se mau e fetaui ma o latou manaʻoga. O le faamatalaga lenei a se ovasia matagaluega, e faatatau i le auala e la te faauaʻi ai ma lana avā tagata i le Tusi Paia: “O le toʻatele o tagata o aiga e latou te faataga i maʻua e faitau se fuaiupu se tasi, pe afai e faapuupuu ma faga saʻo le malama. Pe a uma se faafeiloaʻiga e masani ai, ona faitau loa lea o le mau mai i le Tusi Paia lea o loo uu i o ma lima.” Seʻi iloilo ni faaaʻoaʻoga na faataʻitaʻi muamua, o mataupu, fesili, ma mau e te ono faataʻitaʻi i lau oganuu.

16. Faamatala le auala e faaaogā ai le Isaia 14:7 i le talaʻiga.

¹⁶ Pe afai e te nofo i se vaipanoa e tele ai fevesiaʻiga, e te ono fesili atu i le tagata: “Pe mafai ona faaāta i lou mafaufau tala fou o le aso ae faatomua mai i le tala lenei: ʻUa iai le mapusaga i le lalolagi atoa, ua saʻoloto mai i vevesi. Ua olioli ma alalaga fiafia tagata’? O le manatu lenā o loo i le Isaia 14:7. O loo iai i le Tusi Paia le tele o folafolaga a le Atua e faatatau i taimi filemu o le a iai i le lumanaʻi.” Pe a uma, ona fai lea i ai seʻi faitau atu se tasi o na folafolaga mai i le Tusi Paia.

17. E faapefea ona e faaaofia le Mataio 5:3 i se talanoaga?

¹⁷ Pe e faigatā i tamāloloa i lou vaipanoa ona  maua mea e tausia ai o latou aiga? Pe afai o lea, e te ono amata se talanoaga i le fesili i ai: “O le ā le aofaʻi o tupe e tatau ona suʻe e se tamāloa, ina ia maua ai e lona aiga le fiafia?” Pe a uma ona tali mai le tagata, ona faapea atu lea: “O le toʻatele o tamāloloa e tele atu tupe e latou te mauaina nai lo o le aofaʻi lenā, peitaʻi, e lē o faamalieina lava o latou aiga. O lea, o le ā tonu lava la le mea lea e manaʻomia?” Pe a uma, ona faitau lea o le Mataio 5:3 ma ofo atu se suʻesuʻega faale-Tusi Paia.

18. E faapefea ona tatou faaaogā le Ieremia 29:11 e faamāfanafana ai isi?

¹⁸ Po o mafatia tagata i lou vaipanoa i se mala na tupu talu ai nei? E mafai ona amata lau taulimaga i le faapea atu: “Ua ou asiasi mai i lou aiga ina ia taʻu atu se faamāfanafanaga. (Faitau le Ieremia 29:11.) Pe na e mātauina mai mea e tolu e finagalo le Atua ia tatou maua? O le ʻfilemu,’ ʻse lumanaʻi,’ ma ʻse faamoemoe.’ E ese le manaia o le iloaina e finagalo le Atua ia tatou maua se olaga lelei, a ea? Ae e faapefea ona maua lenā olaga?” Pe a uma, ona tataʻi lea o le tagata i se lesona e fetaui lelei i le polosiua o le Tala Lelei.

19. Faamatala le auala e faaaogā ai le Faaaliga 14:6, 7 pe a talanoa i tagata lotu.

¹⁹ Pe e te nofo i se vaipanoa e fiafia tagata i lotu? Pe afai o lea, e te ono amata se talanoaga i le fesili atu: “Pe a faapea e talanoa mai se agelu iā te oe, po o le a e faalogo atu i lana faamatalaga o le a fai mai? (Faitau le Faaaliga 14:6, 7.) Talu ai ua faapea mai le agelu ʻia matataʻu i le Atua,’ pe e lē tatau la ona iloa po o lē fea Atua o loo ia mafaufau i ai? Ua fesoasoani mai le agelu ia maua le tali e ala i le faapea mai, o ʻLē na faia le lagi, ma le lalolagi.’ O ai lenā?” Pe a uma, ona faitau lea o le Salamo 124:8: “O lo tatou fesoasoani o loo i le suafa o Ieova, o Lē na faia le lagi ma le lalolagi.” Ia faaiʻu i le fai i ai e mafai ona e faamatala atili atu nisi mea e faatatau iā Ieova le Atua.

20. (a) E mafai faapefea ona faaaogā le Faataoto 30:4, ina ia aʻoaʻo ai i se tasi le suafa o le Atua? (e) Pe e iai se mau patino ua e faaaogāina ma maua ai ni iʻuga lelei?

²⁰ E te ono amata se talanoaga ma se talavou i le faapea atu: “Ou te fia faitau atu se mau o loo iai ni fesili tāua. (Faitau le Faataoto 30:4.) E leai se tagata e fetaui i ai nei faaupuga. O lea, e tatau ona faatatau atu i Lē na foafoaina i tatou. * E faapefea ona tatou iloa lona suafa? Ou te fiafia e faailoa atu iā te oe mai i le Tusi Paia.”

21, 22. (a) E faapefea i se mau e talafeagai lelei ona suia ai le olaga o se tagata? (e) O le ā e te maumauaʻi e fai a o faataunuu lau faiva?

²¹ E te lē iloa lava le auala e tali mai ai tagata pe a faaaogā se mau e talafeagai lelei. O se faaaʻoaʻoga, na tuʻituʻi atu ni Molimau se toʻalua i Ausetalia i le fale o se fafine talavou. Na fesili atu se tasi o i laʻua, “Pe e te iloa le suafa o le Atua?” ona faitau lea o le Salamo 83:18. Ua faapea mai le fafine: “Sa matuā faateʻia aʻu! Ina ua la tuumuli, sa ou alu loa i laʻu taavale mo le mamao e 35 maila (56 km), i se faletusi ina ia suʻe isi faaliliuga o le Tusi Paia, ma suʻe lenā igoa i se lomifefiloi. Ina ua faatalitonuina aʻu o le suafa o le Atua o Ieova, sa ou taumānatu po o ā nisi mea ou te lē o iloaina.” E leʻi umi ae la suʻesuʻeina ma lē o le a avea ma ana tane le Tusi Paia, ma mulimuli ane papatiso i laʻua.

²² E suia e le Afioga a le Atua olaga o ē e faitau i ai, ma atiaʻe lo latou faatuatua i folafolaga mautinoa a Ieova. (Faitau le 1 Tesalonia 2:13.) E sili atu ona malosi le feʻau o le Tusi Paia, i lo o se isi lava faamatalaga e tatou te ono faia, e taumafai e pāʻia ai le loto o se isi tagata. E moni lava o loo ola le Afioga a le Atua! O lea, e tatau ona tatou faaaogā le Afioga a le Atua i so o se avanoa lava e maua.