1, 2. (a) O le ā e mafai ona aafia ai la tatou vaai? (e) O le ā ua tatou iloa e faatatau i le Malo o le Atua?

ATONU e te mātauina, e lē manatua e tagata uma ni faamatalaga e faatatau i se mea na tupu. I se tulaga talitutusa, e faigatā i se tasi ona manatua faamatalaga uma a se fomaʻi. O nisi e suʻe solo se ki po o se mata tioata, ae o loo i o latou autafa lava. O le ā le māfuaaga e tutupu ai na mea? Ua faapea mai tagata suʻesuʻe, e aafia lo tatou manatuaina ma le iloaina o se mea, ona o le tele o mea e tatou te taumafai e fai i le taimi e tasi. O o tatou faiʻai, e tasi lava le mea e mafai ona uaʻi i ai i le taimi e tasi.

² E faapena foʻi aso nei. E talitonu le toʻatele o tagata i le telē o le suiga o le lalolagi talu mai le 1914, ae e latou te lē iloa le uiga moni o mea o loo tutupu. I le avea ai o i tatou ma tagata aʻoga o le Tusi Paia, ua tatou iloa na amata ona pule le Malo o le Atua i le 1914, ina ua avea Iesu ma Tupu i le lagi. Peitaʻi, o loo tatou faatali pea i le taimi e taliina atoatoa ai le tatalo: “Ia oo mai lou malo. Ia faia lou finagalo i le lalolagi, e pei ona faia i le lagi.” (Mata. 6:10) O le a taliina atoatoa lenā tatalo pe a faaumatia lenei lalolagi amioleaga. Pe a tupu  lenā mea, ona faia loa lea o le finagalo o le Atua i le lalolagi e pei ona faia i le lagi.

3. O le ā ua tatou aʻoaʻoina mai i le suʻesuʻeina o le Tusi Paia?

³ O le suʻesuʻeina e lē aunoa o le Tusi Paia, ua tatou iloa ai ua faataunuuina valoaga a le Tusi Paia i aso nei. E matuā eseese i tatou ma tagata o le lalolagi. O le pisi tele o o latou olaga ua latou lē iloa ai faamaoniga na pule Keriso talu mai le 1914, ma ua toe o se aga ona faaumatia lea o lenei lalolagi leaga. Ia tatou fesili ifo: ʻPo o oʻu talitonu pea, o loo faamaonia e mea o loo tutupu le lata mai o le iʻuga o le lalolagi? E tusa pe e leʻi leva ona avea oe ma Molimau a Ieova, ae o ā mea o loo faamuamua i lou olaga?’ Po o le ā lava lau tali, ae o le a tatou iloiloina māfuaaga tāua e tolu ua tatou iloa ai, ua toe o se aga ona faia lea o le finagalo o le Atua i le lalolagi.

4, 5. (a) O ā mea na faia e Iesu talu mai le 1914? (Tagaʻi i le ata i luga aʻe o le matua.) (e) O le ā ua faaāta mai e tagata tiʻetiʻe solofanua o loo mulimuli atu iā Iesu, ma ua faapefea ona faataunuuina lenā valoaga?

⁴ I le 1914, na maua ai e Iesu lona palealii faalelagi, ma avea ai o ia ma Tupu i le Malo o le Atua. I le valoaga o loo i le Faaaliga mataupu e 6, o loo faamatalaina ai Iesu o loo tiʻetiʻe i le solofanua paʻepaʻe. Ina ua māeʻa ona avea o ia ma Tupu, ona amata loa lea o lana tiʻetiʻega e faaumatia le lalolagi leaga a Satani. (Faitau le Faaaliga 6:1, 2.) Ua taʻua i le valoaga, pe a amata ona pule le Malo o le Atua, ona vave lea ona faasolo ina leaga le tulaga o le lalolagi. Ua matuā faateteleina i aso nei taua, oge, faamaʻi ma isi māfuaaga e māfua ai le oti. O nei mala o loo faaataina mai i le valoaga e isi tagata tiʻetiʻe solofanua e toʻatolu, o loo mulimuli atu iā Iesu Keriso.​—Faaa. 6:3-8.

⁵ E pei ona taʻua i le valoaga, ua aveesea e taua “le filemu mai i le lalolagi,” e ui i taumafaiga ma folafolaga a atunuu ina ia tausia le filemu. O le Taua Muamua a le Lalolagi, o le amataga lea o taua tetele na aveesea ai le filemu mai i le lalolagi. E ui i le alualu i luma o le tamaoaiga ma le poto faasaienitisi talu mai le 1914, ae o loo avea pea le lē lava o meataumafa ma pogai o le tele o fetauaʻiga i le lalolagi. E lē natia foʻi le maumau o soifua o le faitau miliona i tausaga taʻitasi ona o faamaʻi, mala faalenatura, ma isi lava mala. Ua tutupu nei mea i le tele o taimi, ua matuā mataʻutia, ma ua fasiotia ai le toʻatele o tagata nai lo o se isi lava taimi i le talafaasolopito. Pe e te silafia le uiga o nei mea uma?

6. O ai na uaʻi totoʻa atu i valoaga o le Tusi Paia, ma o le ā na latou faia ina ua taunuu na valoaga?

⁶ Na tosina ese mafaufau o le toʻatele ina ua gāpā le Taua Muamua a le Lalolagi, faapea le fulū Sepania. Peitaʻi, na faatalitalia e le ʻaufaauuina le iʻuga o Taimi o Nuu Ese, po o le “taimi atofaina o nuu ese” i le 1914. (Luka 21:24) E leʻi mautinoa atoatoa e Kerisiano faauuina le auala e faataunuu ai nisi valoaga o le Tusi Paia. Peitaʻi, na latou iloa o le 1914 e taunuu ai se mea tāua i le Malo o le Atua. Na latou lototetele e faalauiloa atu i isi ua amata le pulega a le Atua, ina ua latou malamalama atoatoa i le faataunuuga o lenā valoaga. Na matuā sauāina i latou na talaʻia atu le feʻau o le Malo. Ae o na sauāga na faataunuu ai foʻi isi valoaga. E tele tausaga o taumafai fili o le Malo o le Atua e faaaogā tulafono, sauāga, faasalaga faafalepuipui, ma e oo lava foʻi i faasalaga oti ina ia taofia ai le galuega talaʻi.​—Sala. 94:20; Faaa. 12:15.

7. Aiseā ua lē malamalama ai tagata i le tāua o mea o loo tutupu i le lalolagi i aso nei?

 ⁷ Ua tele faamaoniga e iloa ai ua pule le Malo o le Atua i le lagi, ae aiseā ua lē iloa ai e tagata? Aiseā ua latou lē iloa ai o mea o loo tutupu i le lalolagi ua faataunuu ai valoaga a le Tusi Paia, e pei ona faailoa atu e tagata o le Atua mo le tele o tausaga? Pe e pau le mea e uaʻi i ai tagata e na o mea e mafai ona latou vaaia? (2 Kori. 5:7) Po ua avea lo latou pisi i le olaga, ma vala ua latou lē iloa ai mea o loo faia e le Atua? (Mata. 24:37-39) Po ua tosina ese i latou ona o manatu ma sini o le lalolagi a Satani? (2 Kori. 4:4) E tatou te manaʻomia le faatuatua ma se vaaiga faaleagaga, ina ia malamalama ai i mea ua faataunuuina e le Malo. Maʻeu lo tatou fiafia ona ua mafai ona tatou malamalama i mea o loo tutupu!

8-10. (a) Ua faapefea ona faataunuuina le 2 Timoteo 3:1-5? (e) Aiseā e tatou te faapea atu ai ua faateteleina le leaga i aso nei?

⁸ O le māfuaaga lona lua e iloa ai ua toe o se aga ona pule lea o le Malo o le Atua i le lalolagi, ona ua faateteleina le leaga o le lalolagi i le taimi lenei, nai lo o se isi lava taimi. Ua pe ā ma le 100 tausaga talu ona tatou vaaia le faataunuuina o le 2 Timoteo 3:1-5. Ua vaaia i le lalolagi atoa uiga o loo faamatalaina i lenā mau. Po ua e vaaia le faataunuuina o lenā valoaga? O lea, seʻi o tatou iloiloina nisi o faamaoniga.​—Faitau le 2 Timoteo 3:1, 13.

⁹ Seʻi o tatou faatusatusa mea na ʻinoʻino i ai tagata i vaitausaga o le 1940 ma le 1950, ma mea ua taatele i fale faigaluega, faafiafiaga, taaloga ma āʻega a le lalolagi i aso nei. Ua taatele faiga sauā ma amioga lē mamā i so o se mea. Ua faatauvā ona fai e tagata faiga sauā, amioga lē mamā ma amioga leaga. O polokalame i televise sa manatu i ai tagata i aso ua mavae e leaga, ua avea ma faafiafiaga e talafeagai mo aiga i aso nei. Ua vaaia aafiaga leaga o faiga faatauatane ma tauafafine, i faafiafiaga, āʻega ma le auala ua ola ai tagata. E tatou te lotofaafetai, ona ua tatou malamalama i le  silafaga a le Atua e faatatau i na mea.​—Faitau le Iuta 14, 15.

¹⁰ E lē gata i lea, seʻi o tatou faatusatusa le uiga fouvale o talavou i aso ua mavae ma aso nei. O se faaaʻoaʻoga, i vaitausaga o le 1950, e popole mātua pe a ulaula, inu ʻava malosi, ma sisiva a latou fanau i se auala lē talafeagai. Ae i aso nei, ua masani ona tatou faalogo i tala faapenei: Na tafana e se tamaitiiti aʻoga e 15 tausaga tamaiti o lana vasega, ma maliliu ai le toʻalua ae 13 na manunuʻa. Na fasiotia e se kegi o talavou e onanā se teineitiiti e 9 tausaga, ma osofaʻia lona tamā ma lona tausoga. Na lipotia mai foʻi i se tasi atunuu i Asia, na faia e talavou le silia ma le ʻafa o soligatulafono na faamauina i le 10 tausaga ua mavae. Pe e mafai ona tatou faafitia le mea moni, ua matuā leaga le tulaga o le lalolagi i aso nei?

11. Aiseā ua lē iloa ai e le toʻatele le faateteleina o le leaga i aso nei?

¹¹ Na faapea mai ma le manino le aposetolo o Peteru: “O aso e gata ai e ō mai ai tagata tauemu ma latou faatauemu mai, ma ua latou faia faapea e tusa ai ma o latou lava tuʻinanauga ma faapea ane: ʻNa folafola mai o ia e faatasi mai, ae o fea o iai? Auā e mai lava i le aso na maliliu ai o tatou augātamā, e leai lava se mea o suia talu mai le foafoaga o le lalolagi.’” (2 Pete. 3:3, 4) Aiseā ua faapena ai manatu o tagata? E foliga mai o le tele o taimi e tatou te vāai ai i se mea, o le itiiti foʻi lenā o lo tatou uaʻi atu i ai. Atonu e faateʻia oe pe a suia faafuaseʻi le amio a sau uō vavalalata. Ae atonu e tatou te lē o mātauina le faasolosolo ina matuā leaga o uiga ma amioga a tagata lautele. Peitaʻi, e lē tatau ona tatou faalēano i na suiga, auā e mataʻutia tele.

12, 13. (a) Aiseā e lē tatau ai ona tatou lotovaivai ona o mea o loo tutupu i le lalolagi? (e) O le ā e fesoasoani iā i tatou e tumau ai i aso e gata ai lea e “sili ona faigatā”?

¹² Na lapataʻi mai le aposetolo o Paulo, o le a “sili ona faigatā” aso e gata ai. (2 Timo. 3:1) Peitaʻi e lē mafai ona tatou ō ese mai le lalolagi, ae mafai ona tatou faafetaiaʻia faigatā o loo tatou fesagaʻia. O le fesoasoani a Ieova, o lona agaga paia ma le faapotopotoga Kerisiano, e mafai ai ona tatou tutumau faamaoni. O le a foaʻi mai e Ieova “le mana lea e sili atu,” nai lo o lo tatou malosi.​—2 Kori. 4:7-10.

¹³ Na amata e Paulo le valoaga i aso e gata ai i le faapea mai, “ia iloa lenei mea.” O na upu e faamautinoa mai ai o le a taunuu lenā valoaga. Ua tatou iloa o le a faasolo lava ina matuā leaga le tulaga o le lalolagi, seʻia oo i le taimi e aumaia ai e Ieova le iʻuga. Ua tatou iloa mai i talafaasolopito, o le faasolo ina paʻū maulalo o tulaga tau amio, o le lalata mai foʻi lenā o le iʻuga. E leai se isi taimi ua sili atu ai ona paʻū maulalo le tulaga tau amio i le lalolagi nai lo o le taimi lenei. O loo faalēano pea tagata i mea o loo tutupu i le lalolagi. Peitaʻi, o mea na tutupu talu mai le 1914, ua faailoa mai ai ua lē o toe umi ona aumaia lea e le Malo o le Atua le iʻuga i ē amioleaga.

14-16. O le ā le māfuaaga lona tolu e tatou te talitonu ai, ua toe o se aga ona “oo” mai lea o le Malo o le Atua?

¹⁴ O le talafaasolopito o tagata o le Atua, ua aumaia ai le māfuaaga lona tolu e tatou te mautinoa ai ua lata mai le iʻuga. O se faaaʻoaʻoga, na iai se vaega o Kerisiano faauuina faamaoni na auauna  i le Atua, a o leʻi pule le Malo o le Atua i le lagi. O le ā na latou faia ina ua lē taunuu valoaga i le auala na latou faatalitalia ai i le 1914? O le toʻatele o i latou na faaauau pea ona auauna ma le faamaoni, ma tutumau i lalo o tofotofoga ma sauāga. A o faagasolo tausaga, o le toʻatele o lenā vaega o le ʻaufaauuina po o i latou uma foʻi, ua faaiʻuina o latou soifuaga faalelalolagi.

¹⁵ Na fetalai Iesu i le valoaga e faatatau i aso e gata ai o le lalolagi a Satani: “E lē mavae atu lenei tupulaga seʻia taunuu mea uma.” (Faitau le Mataio 24:33-35.) Ina ua fetalai Iesu e faatatau i “lenei tupulaga,” ua tatou iloa na ia faasino atu i ni vaega se lua o Kerisiano faauuina. O le vaega muamua, o i latou ia na soifua pea i le 1914, ma malamalama na avea Iesu ma Tupu i lenā tausaga. E lē gata i lea, na avea foʻi i latou ma vaega faauuina i lenā tausaga, po o le faauuina foʻi a o leʻi oo i le 1914.​—Roma 8:14-17.

¹⁶ O i latou e faia aʻe ai le vaega lona lua o “lenei tupulaga,” e lē gata na latou ola faatasi ma nisi o le vaega muamua, ae na faauuina foʻi i latou a o iai pea nisi o le vaega muamua i le lalolagi. O lea, e lē o Kerisiano faauuina uma i aso nei, e aofia i “lenei tupulaga” lea na fetalai i ai Iesu. I aso nei, ua faasolo ina matutua Kerisiano faauuina o loo faia aʻe ai le vaega lona lua. O lea, o le fetalaiga a Iesu i le Mataio 24:34, ua tatou mautinoa ai o le a lē mavae atu nisi o lenei tupulaga, a o leʻi gāpā le puapuaga tele. O lea, ua tatou mautinoa ai ua toe o se aga ona faaumatia lea e le Tupu o le Malo o le Atua tagata amioleaga, ma aumaia le lalolagi fou amiotonu.​—2 Pete. 3:13.

17. O le ā ua tatou aʻoaʻoina mai i faamaoniga na tatou iloiloina?

¹⁷ O le ā ua tatou aʻoaʻoina mai i faamaoniga faale-Tusi Paia e tolu lea na tatou iloiloina? Na lapataʻi mai Iesu, e tatou te lē iloa le aso ma le itula e oo mai ai le iʻuga. (Mata. 24:36; 25:13) Peitaʻi, na faapea mai Paulo ʻua oo mai le itula e feala ai.’ (Faitau le Roma 13:11.) Ua tatou ola i aso e gata ai. Pe a tatou uaʻi totoʻa atu i valoaga a le Tusi Paia, ma mea ua faia e Ieova ma Iesu, ona tatou iloa lea o faamaoniga manino ua lata mai le iʻuga o lenei lalolagi leaga.

18. O le ā o le a tupu iā i latou e teena le avea o Iesu ma o latou Tupu?

¹⁸ Ua toe o se aga ona iloa lea e i latou e teena le pule a Iesu Keriso lo latou sesē. E lē mafai ona latou sosola ese mai i le faasalaga ua faaloloʻi mai iā i latou. Pe a tupu lenā mea: “O ai ea sē e mafai ona tū atu i ai?” (Faaa. 6:15-17) E maua le tali o lenā fesili i le Faaaliga mataupu e 7. O le a “tū” atu le ʻaufaauuina ma le “motu o tagata e toʻatele,” ona ua latou maua le finagalo malie o le Atua. O le a faasaoina mai i le puapuaga tele le “motu o tagata e toʻatele” o isi mamoe, ma ulu atu i le lalolagi fou.​—Faaa. 7:9, 13-15.

19. O le ā ua tulimataʻia e i latou ua mautinoa le lata mai o le iʻuga?

¹⁹ E lē mafai e le lalolagi a Satani ona faatosina ese o tatou mafaufau, pe a tatou uaʻi atu pea i valoaga ua faataunuuina i o tatou aso. Ua tatou malamalama i mea o loo tutupu i aso nei. Ua toe o se aga ona manumalo aʻiaʻi lea o Keriso ma faaumatia lenei lalolagi leaga i le taua iā Amaketo. (Faaa. 19:11, 19-21) Maʻeu lo tatou fiafia o le a iai i le lumanaʻi!​—Faaa. 20:1-3, 6; 21:3, 4.