UA FAAPEA mai le Salamo 127:3: “Faauta! O le fanau o le tofi lea mai iā Ieova; o ē ua fananau mai o le taui lea mai iā te ia.” E olioli la mātua pe a fanau mai se pepe.

Peitaʻi, e iai tiute tauave tāua i le tausia o se pepe. Ina ia tuputupu aʻe le pepe ma avea ma tagata malosi, e manaʻomia ona fafagaina pea o ia i meaʻai paleni. Ina ia tumau le tamaitiiti i le upu moni, e manaʻomia ai le tausiga faaleagaga ma le taʻitaʻiga mai mātua, ma faaauau ona aʻoaʻoina o ia i taʻiala a le Atua. (Faata. 1:8) O le ā le taimi e tatau ona amata aʻoaʻoina ai le tamaitiiti, ma o ā mea e aofia ai?

Seʻi manatu iā Manoa, o se tagata na nofo i le aai o Soraa i Isaraelu. E lē fanau le avā a Manoa. Peitaʻi, na faailoa atu e le agelu a Ieova iā te ia, o le a ia fanauina se tamaitiiti. (Faama. 13:2, 3) Na matuā fiafia Manoa ma lana avā i lenā folafolaga. Ae na popole foʻi Manoa ma lana avā i le tausia aʻe ai le tamaitiiti. O lea, na tatalo ai Manoa: “Faamolemole Ieova e. O le tagata o le Atua moni lea na e auina mai, seʻi toe sau lava e faailoa mai iā i maʻua le mea e ma te faia i le tama o le a fanau mai.” (Faama. 13:8) E mautinoa na la tausia Samasoni i tulafono a le Atua, ma na iʻu manuia a la taumafaiga. Ua taʻua i le Tusi Paia na fesoasoani le agaga o Ieova iā Samasoni e faia ai galuega mamana, a o avea o ia ma faamasino i Isaraelu.​—Faama. 13:25; 14:5, 6; 15:14, 15.

O le ā le vave e tatau ona amata aʻoaʻo ai le tamaitiiti? Na aʻoaʻoina Timoteo i “tusitusiga paia” e Eunike lona tinā ma Loi le tinā o lona tinā ʻtalu ona ia laʻitiiti.’ (2 Timo. 1:5; 3:15) O lea, na amata ona aʻoaʻoina Timoteo a o laʻitiiti lava o ia.

E atamai mo mātua Kerisiano ona tatalo iā Ieova mo taʻiala, ma fuafua mamao ina ia mafai ona la aʻoaʻoina le la tama ʻa o laʻitiiti.’ Ua taʻua i le Faataoto 21:5: “O fuafuaga a le tagata toʻaga e manuia ai o ia.” A o leʻi fanau mai le pepe, e mautinoa le sauniuni lelei o mātua. Atonu e la te faia se lisi o mea e manaʻomia e le pepe, aemaise le fuafuaina o le toleniga faaleagaga. O lo la sini, ia amata ona aʻoaʻoina le tamaitiiti a o tamameamea.

Ua taʻua i se tusi e faamatala ai le tuputupu aʻe o le tamaitiiti e faapea, o masina e sosoo ma le fanau mai o se pepe, o loo faasolosolo ona tuputupu pea lona faiʻai. O lea, e tāua tele i mātua ona faaaogā tatau le taimi e aʻoaʻo ai le tamaitiiti e faatatau iā Ieova ma ana taʻiala a o laʻitiiti lava.

Na faapea mai se tinā paeonia e faatatau i lana tama teine: ʻOu te alu ma ave o ia i le talaʻiga a o faatoʻā tasi lona masina. E ui e leʻi malamalama o ia i ni mea, ae ou te talitonu na iai se aafiaga lelei o le ave o ia i le talaʻiga a o laʻitiiti. Ina ua lua ona tausaga, na ia maua le lototele e ofoina ai sāvali i tagata i le oganuu.’

O le vave ona aʻoaʻoina o le tamaitiiti e maua ai iʻuga lelei. Peitaʻi, ua iloa e mātua, e lē faigofie le faia faapea.

Talu ai e vave ona tosina ese se tamaitiiti, e faigatā ai mo mātua ona aʻoaʻoina i latou. E fia iloa e fanau mea uma ma taumafai e malamalama i mea o loo siʻomia ai i latou. E faapefea ona fesoasoani mātua i fanau ia uaʻi lelei i mea ua aʻoaʻoina ai i latou?

Mātau upu a Mose i le Teuteronome 6:6, 7: “Ia teu i lou loto upu ia ua ou poloaʻi atu ai iā te oe i le asō, ia e matuā aʻoaʻo soo ai i lau fanau; ia e tautala ai pe a e nofo i lou fale, pe a e savali i le ala, pe a e taoto pe a e tulaʻi foʻi.” O le ā le uiga ia “matuā aʻoaʻo soo” e mātua fanau i tapulaa a le Atua? O lona uiga e manaʻomia ona faaauau pea ona aʻoaʻo le tamaitiiti i se mataupu patino. O le tamaitiiti e tai pei o se tamaʻi laau, e manaʻomia ona fui pea i aso uma. E pei lava ona faigofie ona aʻoaʻoina e tagata matutua se mataupu pe a faalogologo soo i ai, e faapena foʻi ona sili atu ona faigofie mo fanau.

E tele se taimi e faaalu e mātua e aʻoaʻoina ai fanau e uiga i le upu moni mai le Atua. Ae e mafai ona avea ma luʻi pe a masani ona pisi mātua. Na timaʻi atu Paulo i Kerisiano ia ʻfaaaogā tatau le taimi’ mo mea tāua. (Efe. 5:15, 16) E faapefea ona faia faapea e mātua? Sa fuafuaina ma le faaeteete e se uso toeaina ma lana avā o se paeonia sauatoa e pisi tele, le taimi e aʻoaʻoina ai le la tama, le taimi e lagolagoina ai le faapotopotoga ma le taimi e faigaluega ai. E faapefea ona la maua le taimi e aʻoaʻoina ai le la tama? Ua taʻua e le tamā: ʻO taeao uma lava ae ou te leʻi usu i le galuega, e ma te faitauina ai ma laʻu avā le tusi Laʻu Tusi o Tala o le Tusi Paia po o le  tusi mau i le ma tama teine. I le afiafi, e ma te faitauina se tusi iā te ia a o leʻi moe. E ma te ō foʻi ma ave o ia i le talaʻiga, ona e ma te lē mananaʻo e misia le avanoa e toleni ai o ia a o laʻitiiti.’

E tatou te mananaʻo e tuputupu aʻe a tatou fanau ma avea ma tagata matutua e taʻumatuaina. Ae o le māfuaaga autū e toleniina ai i latou, ina ia latou alolofa iā Ieova mai i o latou loto.​—Mare. 12:28-30.

Ua faapea mai le Salamo 127:4: “E pei o aū i le lima o le tagata malosi, e faapea foʻi atalii o tauleleʻa.” Ua faatusaina e le Tusi Paia fanau i aū, lea e tatau ona tau tonu i le taulaʻiga. E puupuu lava le taimi e uu ai e le tagata fanafana le aū, ma e lē mafai ona ia toe faafoʻi maia le aū pe a ia fanaina. I se tulaga talitutusa, e puupuu le taimi e mafuta ai mātua ma fanau, a o leʻi avea i latou ma tagata matutua. E tāua ai ona faaaogā tatau le taimi e aʻoaʻo ai fanau ia naunau ma mulimuli i tulafono a le Atua.

Na tusi le aposetolo o Ioane e faatatau i lana fanau faaleagaga: “E leai se isi mea e sili ai ona ou lotofaafetai, ina ua ou faalogo atu o loo savavali pea laʻu fanau i le upu moni.” (3 Ioa. 4) E lotofaafetai mātua Kerisiano pe a vāai atu i a latou fanau o loo ʻsavavali pea i le upu moni.’