1. Aiseā na faafiafiaina ai Paulo ona o uso i Korinito?

NA IAI se fefinauaʻiga i le faapotopotoga i Korinito i le 55 T.A. O le alofa o Paulo iā i latou e pei o se tamā i lana fanau, na ia avatu ai se tusi ina ia faasaʻo ai le mataupu. (1 Kori. 1:11; 4:15) O lea na auina atu ai e Paulo lana uō o Tito ina ia asiasia i latou, ma aumai se lipoti pe a la feiloaʻi i le taulaga i Teroa. Sa umi ona faatali Paulo i Teroa, peitaʻi e leʻi sau Tito. O lea, na ia malaga ai loa i Maketonia ma feiloaʻi ai ma Tito i inā. Na faailoa e Tito iā Paulo le usitaʻia e i latou i Korinito o lana fautuaga, ma ua latou naunau e feiloaʻi ma ia. Ina ua faalogo Paulo i lenā tala, na ʻatili ai lona olioli.’​—2 Kori. 2:12, 13; 7:5-9.

2. (i) O le ā na tusi ai Paulo e faatatau i le faatuatua ma le olioli? (ii) O ā fesili o le a tatou iloiloina?

² E leʻi leva ona mavae atu lenā mea, ae avatu e Paulo le isi ana tusi i Korinito. “Matou te lē fia pule i lo outou faatuatua, ae o i matou o le ʻaufaigaluega faatasi ma outou mo lo outou olioli, auā o lo outou faatuatua ua outou tutumau ai.” (2 Kori. 1:24) O le ā na uiga i ai Paulo? O le ā se lesona e aʻoaʻoina mai ai e toeaina i le faapotopotoga?

3. (i) O le ā na uiga i ai Paulo ina ua ia tusi, “o lo outou faatuatua ua outou tutumau ai”? (ii) E faapefea ona mulimuli toeaina i le faaaʻoaʻoga a Paulo?

³ Na taʻua e Paulo uiga e lua e tatau ona faaalia e se Kerisiano, o le faatuatua ma le olioli. Na ia taʻua muamua le faatuatua ina ua ia tusi: ʻMatou te lē fia pule i lo outou faatuatua, auā o lo outou faatuatua ua outou tutumau ai.’ Na iloa e Paulo,  na māfua ona auauna Kerisiano iā Ieova, ona o lo latou lava faatuatua. Na ia mautinoa foʻi, o le alolofa o le ʻauuso iā Ieova, sa latou naunau ai e faia le mea saʻo. O le māfuaaga lea na ia lē fia pule ai i lo latou faatuatua. (2 Kori. 2:3) E tatau ona mulimuli toeaina i le faaaʻoaʻoga a Paulo, e ala i le talitonuina o le faatuatua o uso, faapea le māfuaaga e latou te auauna ai iā Ieova. (2 Tesa. 3:4) E lē tatau ona faia ni tulafono pulepuletutū i le faapotopotoga. Nai lo o lea, ia latou fesoasoani i uso e faia filifiliga mai le Tusi Paia, ma mulimuli i le taʻitaʻiga mai le faalapotopotoga a Ieova. E lē o avea toeaina i aso nei ma pule i le faatuatua o o latou uso.​—1 Pete. 5:2, 3.

4. (i) O le ā na uiga i ai Paulo ina ua ia tusi, ʻo i matou o le ʻaufaigaluega mo lo outou olioli’? (ii) E faapefea i toeaina i aso nei ona faataʻitaʻi i le faaaʻoaʻoga a Paulo?

⁴ Na faapea mai foʻi Paulo, “o i matou o le ʻaufaigaluega faatasi ma outou mo lo outou olioli.” O ai na ia faasino atu i ai? Na ia tusi e faatatau i ē na latou galulue faatasi e fesoasoani i le faapotopotoga i Korinito. E faapefea ona tatou iloa? Ona i le tusi lava lea, na taʻua ai e Paulo nisi o i latou ina ua ia faapea atu: “O Iesu na matou talaʻiina atu iā te outou, o aʻu, ma Siluano, ma Timoteo.” (2 Kori. 1:19) E lē gata i lea, ina ua taʻua e Paulo ʻē na latou galulue faatasi,’ na ia faasino atu i ē na latou galulue faatasi i le talaʻiga e pei o Apolo, Akula, Piseka, Timoteo, Tito ma isi. (Roma 16:3, 21; 1 Kori. 3:6-9; 2 Kori. 8:23) Ina ua faapea atu Paulo “o i matou o le ʻaufaigaluega faatasi ma outou mo lo outou olioli,” sa ia faamautinoa atu ai i uso i Korinito lo latou faanaunauga, ina ia auauna le faapotopotoga i le Atua ma le olioli. O le mea foʻi lenā o loo faia e toeaina i aso nei. O loo latou fesoasoani i uso ina ʻia auauna iā Ieova ma le fiafia.’​—Sala. 100:2; Fili. 1:25.

5. O le ā o le a tatou iloiloina, ma aiseā?

⁵ Na fesiligia nisi o uso ma tuafāfine maelega mai vaega eseese o le lalolagi i le fesili lenei: ʻO ā faaupuga ma gaoioiga a se toeaina e mafai ona e maua ai le olioli?’ A o tatou iloiloina a latou tali, ia mātau pe faapefea i faaupuga ma gaoioiga a toeaina ona faateleina ai lou olioli. E lē gata i lea, ia mafaufau po o le ā e mafai ona tatou faia ina ia maua ai e le faapotopotoga le olioli. *

6, 7. (i) O le ā se tasi o auala e faataʻitaʻi ai toeaina iā Iesu, Paulo, faapea isi auauna a le Atua? (ii) Aiseā e fiafia ai uso pe a manatuaina o latou igoa?

⁶ O le toʻatele o uso ma tuafāfine e lagona le fiafia pe a faaalia le naunau o toeaina iā i latou. O se tasi o auala e mafai ai e toeaina ona faia faapea, o le mulimuli lea i faaaʻoaʻoga a Tavita, Eliu, ma Iesu. (Faitau le 2 Samuelu 9:6; Iopu 33:1; Luka 19:5.) Na faaalia le manatu mamafa o ia auauna a Ieova i isi tagata, e ala lea i le taʻua o o latou igoa. Na iloa foʻi e Paulo le tāua o le manatua ma le faaaogāina o igoa o uso ma tuafāfine. I le iʻuga o ana tusi, e silia ma le 25 igoa o uso ma tuafāfine  na ia taʻua, ma o se tasi o i latou o Peseti. Na faapea mai Paulo e faatatau iā te ia: “Ia alofa atu iā Peseti o lē e pele iā i tatou.”​—Roma 16:3-15.

⁷ E faigatā i nisi toeaina ona manatuaina igoa. Ae pe a latou taumafai e faia faapea, e iloa ai e uso ma tuafāfine o loo latou manatu mamafa iā i latou. (Eso. 33:17) E fiafia uso pe a faaaogā e toeaina o latou igoa i le Suʻesuʻega o le Olomatamata, po o isi foʻi vaega o le sauniga.​—Faatusatusa i le Ioane 10:3.

8. O le ā se tasi o auala na faataʻitaʻi ai Paulo iā Ieova ma Iesu?

⁸ Na faaalia e Paulo lona manatu mamafa i isi e ala i le avatu o le faamālō iā i latou. O se tasi lenā o auala e fesoasoani ai toeaina i uso ina ia auauna i le Atua ma le fiafia. Ina ua tusi atu Paulo i uso i Korinito, na ia faapea atu: “Ua ou matuā mimita e uiga iā te outou.” (2 Kori. 7:4) E mautinoa na faalaeiauina le faapotopotoga i Korinito i upu a Paulo. E lē gata i lea, na faamālō atu foʻi Paulo i isi faapotopotoga mo galuega lelei. (Roma 1:8; Fili. 1:3-5; 1 Tesa. 1:8) Ina ua māeʻa ona taʻua e Paulo Peseti i lana tusi i Roma, ona ia toe faaopoopo atu lea e faapea, “na galue ma le filigā o ia o se soo o le Alii.” (Roma 16:12) Maʻeu le faalaeiauina o Peseti ina ua ia faalogo i na upu. Na faataʻitaʻi Paulo iā Ieova ma Iesu, e ala i lona viiviia o isi.​—Faitau le Mareko 1:9-11; Ioane 1:47; Faaa. 2:2, 13, 19.

9. E faapefea ona maua e le faapotopotoga le fiafia pe a avatu e toeaina le faamālō?

⁹ E iloa foʻi e toeaina i aso nei le tāua o le faaali atu i uso o le lototalisapaia, e ala i a latou faaupuga. (Faata. 3:27; 15:23) Pe a avatu e toeaina le faamālō i uso, e faailoa atu ai lo latou manatu mamafa iā i latou. E naunau foʻi uso e maua faalaeiauga mai toeaina. Na faapea mai se tuafafine ua silia ma le 50 tausaga lona matua: “E lē taitai faamālō mai nisi mo aʻu galuega mamafa i le fale faigaluega, ona o le taatele o le agaga faatautavā. O lea, ou te lagona le fiafia pe a faamālō mai se toeaina iā te aʻu. Ou te lagona ai le alofagia o aʻu e loʻu Tamā faalelagi.” Na faapea mai se uso ma o se matua nofo toʻatasi o loo tausia aʻe se fanau e toʻalua, e masani ona faailoa atu e se toeaina iā te ia lona talisapaia o ana galuega. Na matuā faalaeiauina o ia i faamatalaga a le toeaina, ina ia faia pea le mea sili i le auaunaga i le Atua. E atagia mai ai, pe a faamālō atu toeaina i uso ma tuafāfine, o le a fesoasoani ai iā i latou e auauna i le Atua ma le olioli, ma “lē taitai lē lavavā ai.”​—Isa. 40:31.

10, 11. (i) E faapefea ona faataʻitaʻi toeaina iā Neemia? (ii) E faapefea ona faamalosia e toeaina uso ma tuafāfine pe a asiasia i latou?

¹⁰ O le ā se tasi o auala tāua e faaali ai e toeaina le alofa i uso, ma fesoasoani iā i latou e auauna iā Ieova ma le fiafia? E ala lea i le vave avatu o le fesoasoani iā i latou o loo manaʻomia faalaeiauga. (Faitau le Galuega 20:28.) O le faia faapea, ua latou faataʻitaʻi ai i auauna faamaoni a Ieova i taimi o le Tusi Paia. O se faataʻitaʻiga, na faalaeiauina e Neemia ona uso Iutaia ina ua ia mātauina lo latou faavaivai. (Nee. 4:14) Ua faapena foʻi ona  faia taumafaiga a toeaina e faamalosia atili le faatuatua o o latou uso. E avatu e toeaina iā i latou se “meaalofa faaleagaga,” i taimi o a latou asiasiga faaleoleo mamoe. (Roma 1:11) E faapefea ona faia e toeaina lenā mea?

¹¹ E tatau ona mafaufau muamua toeaina i tulaga o i latou ua fuafua e asia. O se faataʻitaʻiga, ia fesili ifo: ʻO ā ni faigatā o loo fesagaʻia e lea uso? O ā ni manatu e mafai ona faalaeiauina ai o ia? O ā ni mau ma ni tala mai le Tusi Paia e fetaui lelei ma lona tulaga?’ A faia faapea e se toeaina, o le a mafai ona ia faia ni faamatalaga e faalaeiauina ai lea uso, nai lo o le tau ina talanoa faasamasamanoa. A o faia lana asiasiga, ia faalogologo lelei a o talanoa mai le uso po o le tuafafine. (Iako. 1:19) Na faapea mai se tasi tuafafine: “E matuā faalaeiauina aʻu pe a faalogologo lelei se toeaina, a o oʻu talanoa atu iā te ia.”​—Luka 8:18.

12. O ai i le faapotopotoga e manaʻomia faalaeiauga, ma aiseā?

¹² O ai e manaʻomia faalaeiauga? Na faalaeiauina e Paulo toeaina ina ia uaʻi atu i le “lafu mamoe uma.” O lea, e manaʻomia e sui uma o le faapotopotoga faalaeiauga, e oo lava i tagata talaʻi po o paeonia o loo auauna faamaoni mo le tele o tausaga. Aiseā e latou te manaʻomia ai faalaeiauga mai toeaina? E ui i le malosi o lo latou faatuatua iā Ieova, ae e iai taimi e faigatā ai ona latou onosaia faafitauli mai le lalolagi a Satani. E latou te manaʻomia le fesoasoani, e pei foʻi o le tupu o Tavita i taimi na lamatia ai lona ola.

13. (i) O le ā le taimi na taumafai Isepenopa e fasiotia ai Tavita? (ii) Aiseā na fetaui lelei ai le taimi na fesoasoani ai Apisai iā Tavita?

¹³ E leʻi umi ona faauuina Tavita e avea ma tupu, ae la tau loa ma Koliata, o se sauʻai mai le ituaiga o Rafaimi. Na  lototele Tavita ma ia fasiotia ai le sauʻai. (1 Samu. 17:4, 48-51; 1 No. 20:5, 8) Ina ua mavae ni tausaga, ona toe tau lea o Filisitia ma Isaraelu. I inā, na toe tau ai Tavita ma se isi sauʻai, o lona igoa o Isepenopa, e mai le ituaiga foʻi o Rafaimi. (2 Samu. 21:16) Peitaʻi, na toeitiiti lava fasiotia ai Tavita. Aiseā? E leʻi faapea ua palaai Tavita, peitaʻi, ua faapea mai le Tusi Paia, ʻua oo ina vaivai o ia.’ Ina ua iloa e Isepenopa ua vaivai Tavita, ona ia taumafai loa lea e fasiotia o ia. Peitaʻi, na ʻfaavave atu Apisai’ ma fesoasoani iā Tavita ma fasiotia ai le Filisitia. (2 Samu. 21:15-17) Maʻeu lona lotofaafetai iā Apisai, ona o lana fesoasoani na faasaoina ai lona ola. O le ā e tatou te aʻoaʻoina mai i lenā tala?

14. (i) O le ā e fesoasoani iā i tatou e tumau faamaoni ai i taimi faigatā? (ii) E faapefea ona fesoasoani toeaina i isi ina ia tumau faamaoni, ma toe maua le fiafia? Aumai se faataʻitaʻiga.

¹⁴ O loo faaauau pea ona tatou auauna iā Ieova, e ui i luʻi mai iā Satani ma ē tetee mai. O nisi o i tatou e feagai ma faafitauli e pei o ni mauga tetele. Peitaʻi, e tatou te maufaatuatuaina atoatoa Ieova. E lē gata i lea, e tatou te maua foʻi le malosi e tumau faamaoni ai e ui i faigatā. O le malosi foʻi lenā na fasiotia ai e Tavita Koliata. Peitaʻi, e iai taimi e tatou te manatu ai ua leai so tatou malosi e tetee atu ai i le lalolagi a Satani. E faigofie ona faavaivaia ai i tatou, e ui o faafitauli e mafai ona tatou taulimaina. I taimi faapena, o faalaeiauga mai toeaina e mafai ona tatou faaauau ai i le auaunaga iā Ieova ma le fiafia. Na taʻua e se tuafafine paeonia ua silia ma le 60 ona tausaga e faapea: “E iai le taimi na ou maʻi ma faavaivai ai i le talaʻiga. Na talanoa mai se toeaina iā te aʻu, ina ua ia maitauina lea tulaga. Na faalaeiauina aʻu i la ma talanoaga faale-Tusi Paia. Na ou maua aogā ina ua ou faatatauina fautuaga na tuuina mai.” Na ia toe faaopoopo mai: “Maʻeu le alofa o lea toeaina, ina ua ia maitauina loʻu vaivai ma tuuina mai le fesoasoani.” E mataʻina le iai o toeaina e nofosauni e fesoasoani mai, e pei ona nofosauni Apisai e fesoasoani iā Tavita.

15, 16. (i) Aiseā na alofagia ai e uso Paulo? (ii) Aiseā e tatou te alolofa ai i toeaina?

¹⁵ O toeaina o ni ē e galulue mamafa. O nisi taimi e latou te lē momoe ona o le popole i o latou uso ma tuafāfine. Pe atonu foʻi e toe feala i le leva o le pō e tatalo mo i latou, pe ave foʻi i ai le fesoasoani pe a manaʻomia. (2 Kori. 11:27, 28) E pei o Paulo, e fiafia toeaina e fesoasoani i isi. Na ia tusi atu iā i latou i Korinito e faapea: “Ua ou naunau tele e faaaogā mea uma ua iā te aʻu, ma loʻu malosi atoa ona o o outou ola.” (2 Kori. 12:15) O le alofa o Paulo i ona uso, na ia faaalu ai lona malosi e fesoasoani ai iā i latou. (Faitau le 2 Korinito 2:4; Fili. 2:17; 1 Tesa. 2:8) O le māfuaaga lea na alofagia ai e le ʻauuso Paulo.—Galu. 20:31-38.

¹⁶ E tatou te alolofa foʻi i toeaina, ma faafetaia Ieova mo le foaʻiina mai o i latou. E tatou te lagona le fiafia ona e latou te manatu mamafa ma asiasia i tatou pe a manaʻomia le fesoasoani. E tatou te faafetaia foʻi i latou, ona o le nofosauni e fesoasoani mai i taimi e tatou te aafia ai i faafitauli. O le mea moni, o toeaina, o ni ē galulue malolosi mo lo tatou olioli.