Mea Iloga o lo Tatou Talafaasolopito

ʻO le Feʻau e Sili Ona Tāua’

“O LE ā le aogā o nei ogālaau?” O le fesili lenā a George Naish, e faatatau i ni ogālaau e 60 futu le uumi (18 m), sa iai i se fale na teu ai auupega sa faaaogāina i le Taua Muamua a le Lalolagi. E iai se tasi na faapea mai, na faaaogāina nei ogālaau mo pou o fesootaʻiga mo uaealesi i le Taua Muamua a le Lalolagi. Na toe faapea mai le uso o Naish: “Sa ou mafaufau loa e faaaogā nei ogālaau e fai ai ni pou faasalalau. Sa matou manatu loa, e faia se ofisa faasalalau mo le galuega talaʻi.” O lea, i le 1924, na amataina ai loa faasalalauga a le CHUC. O le alāleo muamua lea, ua faasalalauina ai mataupu faalelotu i Kanata.

Ona o Kanata o se atunuu telē, sa talafeagai ai ona faaaogā ofisa faasalalau e faaoo atu ai le feʻau. Na taʻua e Florence Johnson, o se tasi sa galue i le ofisa faasalalau i Saskatoon: “O lenei auala, ua mafai ai ona oo atu le upu moni i le toʻatele o tagata e lē mafai ona feiloaʻi i ai. Ona e fou le iai o leitiō i na taimi, o lea, sa matuā naunau ai tagata e faalogologo i so o se mea lava e faasalalau mai.” E oo ane i le 1926, ua iai alāleo faasalalau a Tagata Aʻoga o le Tusi Paia, (le igoa sa iloa ai Molimau a Ieova i na taimi), i aai e fā i Kanata. *

O ā ni mea e masani ona faalogoina i na alāleo? E masani lava o ni pesepesega a tagata o le faapotopotoga, ma tātaāga a fāʻili. E lē gata i lea, o lauga e faia e uso, faapea talanoaga faale-Tusi Paia. O se tasi o i latou na auai i na talanoaga, o Amy Jones, lea na faapea mai: “Pe a ou auai i le galuega talaʻi, e iai taimi e faapea mai ai lē e ona le fale, ʻSa ou faalogo i lou leo i le leitiō.’”

Sa faaaogāina e Tagata Aʻoga o le Tusi Paia i Halifax i Nova Scotia, se polokalame e fou i tagata i lenā taimi. E tuu le avanoa i tagata e telefoni atu ai i a latou fesili faale-Tusi Paia, ona latou talanoaina loa lea. Na faapea mai se tasi uso: “Na fiafia tagata i lenei polokalame, ma o se tulaga e leʻi faatalitalia le toʻatele o tagata na telefoni mai.”

 I le pei o aso o Paulo, sa eseese le tali mai a tagata i le feʻau, ma e iai nisi na talilelei mai. (Galu. 17:1-5) O se faaaʻoaʻoga, sa talosaga Hector Marshall mo ni tusi se ono o le Studies in the Scriptures, ina ua ia faalogo i ai i luga o le alāleo. Na ia faapea mai: “Sa ou manatu o le a fesoasoani nei tusi i laʻu vasega i le aʻoga Aso Sā.” Ina ua māeʻa ona ia faitauina le tusi muamua, na ia filifili loa e faamavae mai lana lotu. Sa avea o ia o se tagata talaʻi maelega, ma auauna ma le faamaoni iā Ieova seʻia oo i lona maliu i le 1998. Sa faasalalauina i luga o le leitiō se lauga na faaulutalaina, “Malo o le Atua—Le Faamoemoe mo le Lalolagi.” I le aso na sosoo ai i le itu i sasaʻe o Nova Scotia, sa faapea atu ai se taʻitaʻiʻau e suafa iā J. A. MacDonald i se tasi uso: “E ese le tāua o le feʻau sa faalogologo i ai tagata o Cape Breton Island.”

Peitaʻi, e leʻi fiafia ai taʻitaʻi lotu. Sa folafola e nisi tagata Katoliko, le faaleagaina o le ofisa faasalalau sa faaaogāina e Tagata Aʻoga o le Tusi Paia. Ona o uunaʻiga a taʻitaʻi lotu, na faafuaseʻi lava ona faailoa mai e le malo i le 1928, le lē mafai ai ona toe faafouina o laisene mo na ofisa faasalalau. O lea, sa tufatufaina ai loa e uso ma tuafāfine se pepa sa iai se feʻau na faaulutalaina, O Ai e Ana le Alāleo? Sa faaalia ai i lenā pepa le lē fiafia o le ʻauuso ona o nei faiga lē tonu. E ui i lea, e leʻi toe suia ai le faaiʻuga a le malo.

Pe sa faavaivaia ai auauna a Ieova i Kanata ona o na tulaga? Sa faapea mai Isabel Wainwright: “I le taimi muamua, sa foliga mai e pei ua manumalo ē tetee mai. Peitaʻi, sa ou iloa, pe ana finagalo Ieova e faaauau pea ona faaaogā faasalalauga e avatu ai le feʻau, e lē mafai foʻi la ona ia faatagaina taʻitaʻi o malo e taofia faasalalauga. O lona uiga, sa tatau ona toe mafaufau i se isi auala e sili atu, e faaoo atu ai le tala lelei o le Malo.” O lea, na latou toe uaʻi atu ai i le asia o tagata i aiga, nai lo o le tau ina faaaogā o faasalalauga i le leitiō. E mautinoa lava, sa telē se vaegafai a faasalalauga i leitiō, i le faailoaina atu ʻo le feʻau e sili ona tāua.’—Mea iloga o lo tatou talafaasolopito i Kanata.

[Faaopoopoga i lalo]

[Ata i le itulau 31]

[Ata i le itulau 32]

(1) Ofisa faasalalau i Edmonton i Alberta (2) O loo faia e se uso se galuega i le masini (transmitter) o le ofisa faasalalau i Toronto i Ontario

[Ata i le itulau 32]

(3) Ofisa faasalalau o le CHUC i Saskatoon i Saskatchewan

[Ata i le itulau 32]

[Faamatalaga faaopoopo i le itulau 32]

“O se tulaga e leʻi faatalitalia le toʻatele o tagata na telefoni mai”