Seʻi o Tatou Olioli Faatasi!

UA MATUĀ faigatā ona maua le fiafia ma le olioli. O le toʻatele o tagata, e foliga mai ua toetoe ina a lē mafai ona mafaufau i ni mea lelei e fai atu i isi. Ua avea le olaga i aso nei, aemaise lava i aai tetele, ma pogai ua lē fiafia ai tagata e faatasitasi ma isi ma ua faaesea i latou.

Ua faapea mai le polofesa o mataupu tau i faalogona ma mafaufau o tagata, o Alberto Oliverio, “Ua matuā taatele i aso nei le lagona o le tuua toʻatasi,” ma “e lē taumatea o le olaga i aai tetele ua manatu ai isi ua faaesea i latou. I le tele o tulaga, ua avea ma pogai e tatou te lē amanaʻia ai le olaga o se tagata e faigaluega i le ofisa, se tuaoi, po o se kesia e faigaluega i se supa maketi i lo tatou vaipanoa.” O lenā faaesea, e masani lava ona iʻu ai i lagona mafatia.

Peitaʻi, e ese mai ai le tulaga ma uiga o uso ma tuafāfine Kerisiano. Na tusi le aposetolo o Paulo: “Ia olioli pea.” (1 Tesa. 5:16) E tele māfuaaga e tatou te fiafia ma olioli faatasi ai. O loo tatou tapuaʻi atu i le Atua Silisili Ese o Ieova; ua tatou malamalama i le upu moni mai le Tusi  Paia; ua tatou maua le faamoemoe o le faaolataga ma le ola e faavavau; ma e mafai foʻi ona tatou fesoasoani atu i isi ia maua na faamanuiaga.—Sala. 106:4, 5; Iere. 15:16; Roma 12:12.

O le fiafia ma olioli faatasi ma isi, o uiga ia o Kerisiano moni. E lē o se mea la e faateʻia ai, le tusi atu o Paulo i Kerisiano i Filipi: “Ua ou fiafia ma ou olioli faatasi ma outou uma. O lea la, ia faapena foʻi ona outou fiafia ma olioli faatasi ma aʻu.” (Fili. 2:17, 18) E puupuu lenei fuaiupu, ae e faalua ona taʻua e Paulo le fiafia ma olioli faatasi ma isi.

O le mea moni, e ao i Kerisiano ona faaeteete ia ʻalofia so o se faanaunauga e faaesea i latou. O sē e na te faaesea o ia lava, e lē mafai ona olioli faatasi ma uso talitonu. E faapefea la ona tatou mulimuli i le apoapoaʻiga a Paulo, ia “faaauau pea ona . . . olioli i le Alii” faatasi ma o tatou uso?—Fili. 3:1.

Ia Olioli Faatasi ma Uso ma Tuafāfine

Ina ua tusi atu e Paulo lana tusi i Kerisiano i Filipi, atonu sa avea o ia ma pagota i Roma ona o lana galuega talaʻi. (Fili. 1:7; 4:22) Peitaʻi, e leʻi avea le faafalepuipuiina o ia ma mea e faaitiitia ai lona maelega i le faiva. Nai lo o lea, sa olioli e auauna iā Ieova i le mea sili e na te mafaia, ma ʻliligi atu o ia e pei o se taulaga i meainu.’ (Fili. 2:17) Ua faaalia mai ai i le uiga o Paulo, e lē faalagolago le mauaina o le olioli i tulaga o se tasi. E ui lava sa faafalepuipuiina, ae na faapea mai o ia: “E faaauau pea ona ou olioli.”—Fili. 1:18.

Sa faavaeina e Paulo le faapotopotoga i Filipi, ma sa alofa faapitoa o ia i ona uso i inā. Sa ia iloaina o le faasoa atu o le olioli na ia maua i le auauna atu iā Ieova, o le a avea ma faalaeiauga iā i latou foʻi. O lea na tusi atu ai o ia: “O lenei le ʻauuso e, ou te manaʻo ina ia outou iloa, o mea na tutupu iā te aʻu ua agaʻigaʻi ai i luma le tala lelei, ae e leʻi faalavelavea ai, o le mea lea, ua iloa ai e Leoleo uma o le Emeperoa o Roma ma isi tagata uma oʻu noanoataga ona o Keriso.” (Fili. 1:12, 13) O le faamatala atu e Paulo o lenei mea na tupu e faalaeiauina ai, o se tasi lea o auala sa fiafia ma olioli faatasi ai ma ona uso. O lea la, sa tatau ona olioli Kerisiano i Filipi faatasi ma Paulo. Peitaʻi, ina ia faia faapea, e lē tatau ona latou lotovaivai ona o mea na tutupu iā Paulo. Nai lo o lea, sa manaʻomia ona latou faataʻitaʻi i lana faaaʻoaʻoga. (Fili. 1:14; 3:17) E lē gata i lea, sa mafai e Kerisiano i Filipi ona taʻua Paulo i a latou tatalo, ma fesoasoani ma lagolagosua atu iā te ia i so o se mea na latou mafaia.—Fili. 1:19; 4:14-16.

Po o tatou faaalia le uiga olioli faapena e pei ona faia e Paulo? Po o tatou taumafai e vāai i  vala lelei o o tatou tulaga i le olaga, ma la tatou faiva faa-Kerisiano? Pe a faatasitasi ma uso, o se mea lelei ona olioli e faatatau i le galuega talaʻi. E tatou te lē faatalitali seʻi tutupu ni mea mataʻina ona faia lea faapea. Atonu sa mafai ona tatou faagaee le fiafia o se tasi i le feʻau o le Malo, e ala i se faatomuaga uigā po o le auala na fefulifulisaʻi ai i se mataupu. Atonu sa tatou faia se talanoaga manaia ma se tagata o se aiga e faatatau i se mau o le Tusi Paia. Ia pe atonu na mātauina i tatou i le oganuu o ni Molimau a Ieova, ma o lenei mea na avatu ai se molimau lelei. O le fefaasoaaʻi i mea faapena, o se auala lea e olioli faatasi ai.

O le toʻatele o tagata o Ieova na latou faia ni faataulagaina, ma o loo faia pea ina ia faatinoina ai le galuega talaʻi. O loo galulue mamafa paeonia, ovasia femalagaaʻi, sui o Peteli, misionare ma auauna faavaomalo i le auaunaga faataimi atoa, ma olioli a o latou faia faapea. Po o tatou fiafia ma olioli faatasi ma i latou? O lea la, ia faaalia atu lo tatou lotofaafetai i nei uso ma tuafāfine pele, o ē o loo “galulue faatasi mo le malo o le Atua.” (Kolo. 4:11) Pe a tatou faatasitasi i sauniga a le faapotopotoga po o fonotaga tetele faa-Kerisiano, e mafai ona tatou faalaeiau atu ma le māfana iā i latou. E mafai foʻi ona tatou faataʻitaʻi i la latou faaaʻoaʻoga maelega. Ma e mafai ona tatou maua se “avanoa” e faalogologo atu ai i tala o mea na tutupu iā i latou, ma faamatalaga e atiaʻe ai, e ala i le faaalia o le uiga talimālō iā i latou, atonu e ala i le faiʻaiga faatasi.—Fili. 4:10.

Olioli Faatasi ma Ē o Loo Fesagaʻi ma Tulaga Faigatā

O le tumau i sauāga ma manumalo i tulaga faigatā, sa faamalosia ai le faanaunauga o Paulo e tumau i le faamaoni iā Ieova. (Kolo. 1:24; Iako. 1:2, 3) Sa iloa e Paulo e ono fesagaʻi foʻi uso i Filipi ma tulaga faigatā faapena, ma o le a faalaeiauina i latou ona o lona onosaia o faigatā. O māfuaaga na sa fiafia ma olioli ai o ia faatasi ma i latou. O lea na tusi atu ai: “Ua tuuina atu iā te outou le faaeaga ona o Keriso, e lē gata ina ia outou faatuatua ai iā te ia, ae ia puapuagatia foʻi ona o ia. Auā ua outou tauivi e pei o aʻu, lea na outou vāai mai i ai ma faalogo i ai.”—Fili. 1:29, 30.

E faapena foʻi i aso nei, o loo mafatia Kerisiano i teteega ona o la latou talaʻiga. O nisi taimi o nei teteega o ni faiga sauā, ae e masani ona iloagatā. Atonu e ala mai i ni tuuaʻiga sesē mai i ē ua liliuese mai le upu moni, teteega a tagata o le aiga, po o tauemuga mai i ē e galulue pe aʻoʻoga faatasi. Na lapataʻi mai Iesu e lē tatau ona faateʻia pe faavaivaia ai i tatou i nei tulaga faigatā. Nai lo o lea, e ao ona avea ma pogai e olioli ai. Na fetalai o ia: “E fiafia outou pe a upuleagaina, sauāina, ma tuuaʻia pepelo outou i mea leaga uma ona o aʻu. Ia outou olioli ma fiafia, auā o loo i le lagi lo outou taui e tele.”—Mata. 5:11, 12.

E lē tatau ona tatou fefefe pe matataʻu pe a faalogo o loo feagai o tatou uso i nisi o atunuu ma sauāga ogaoga. Nai lo o lea, e tatau ona tatou olioli ona o lo latou maumauaʻi. E mafai ona tatou tatalo mo i latou, ma talosaga atu iā Ieova ia faatumauina lo latou faatuatua ma le onosaʻi. (Fili. 1:3, 4) Atonu e na o le pau lenā o le mea e mafai ona tatou faia mo na uso pele, ae e mafai ona tatou fesoasoani atu i nisi i la tatou faapotopotoga, o ē o loo feagai ma tulaga faigatā. E mafai ona tatou faaalia le naunau iā i latou ma lagolagosua atu i ai. E mafai ona tatou saʻilia ni avanoa e olioli faatasi ai ma i latou, e ala i le fai ma valaaulia i latou e auai mai i le afiafi o la tatou Tapuaʻiga a le Aiga, galulue ma i latou i le galuega talaʻi, ma faatasitasi ma i latou i taimi o faafiafiaga.

E tele māfuaaga e tatou te olioli faatasi ai. Seʻi o tatou teena le uiga fia faaesea o lenei lalolagi, ae faaauau ona olioli faatasi ma o tatou uso. O le faia faapea, e lē gata o le a saosaolaumea i le alofa ma le autasi o le faapotopotoga, ae o le a tatou matuā olioli ai foʻi i le aufaatasi ma le ʻauuso Kerisiano. (Fili. 2:1, 2) Ioe, “ia olioli e lē aunoa i le Alii,” auā ua faalaeiau mai Paulo iā i tatou: “Ou te toe fai atu foʻi, Ia olioli!”—Fili. 4:4.

[Ē Ana le Ata i le itulau 6]

Globe: Courtesy of Replogle Globes