Ua Faaali Mai e le Atua Lona Alofa iā i Tatou

“[E] pule le agalelei faifua o se tupu ona o le amiotonu e oo ai i le ola e faavavau.”​—ROMA 5:21.

1, 2. O ā meaalofa e lua ua taʻua, ma o lē fea o nei meaalofa e sili atu ona tāua?

NA TAʻUA e se polofesa ma o se faaliliu o le Tusi Paia mai le Iunivesite i Melepone i Ausetalia, ua avea tulafono a le malo o Roma anamua, o se meaalofa e tumau ona aogā mo tagata uma. (Dr. David J. Williams) Ae peitaʻi, ua aʻoaʻo mai i le Tusi Paia, na foaʻi mai e le Atua se meaalofa e sili atu ona tāua. O lenei meaalofa o se auala a le Atua ina ia tatou maua ai se tulaga amiotonu i luma o le Atua, ma le faamoemoe o le faaolataga ma le ola e faavavau.

² E mafai ona tatou faapea atu, e iai ni tafa faaletulafono i le auala na sauniunia ai e le Atua lenei meaalofa. Ae i le Roma mataupu e 5, e leʻi faamatalaina mai ai e Paulo nei tafa i se auala lavelave faaletulafono. Nai lo lea, na ia amata i le faamautinoaga lenei: “Ua taʻuamiotonuina i tatou ona o le faatuatua, [o lea] inā tatou olioli ia i le filemu ma le Atua e ala i lo tatou Alii o Iesu Keriso.” Ua uunaʻia i latou ua maua lenei meaalofa, e alolofa atu i le Atua. O Paulo o se tasi o i latou nei. Na tusi o ia: “Ua liligi mai i o tatou loto le alofa o le Atua e ala i le agaga paia.”​—Roma 5:1, 5.

3. O ā fesili ua lāgā?

³ Aiseā ua manaʻomia ai lenei meaalofa?  Ua faapefea ona saunia e le Atua i se auala e talafeagai ma aogā mo tagata uma? Ma e faapefea ona agavaa se tasi ina ia maua lenei meaalofa? Seʻi o tatou saʻilia tali faamalieloto i nei fesili, ma iloa atili ai le alofa o le Atua.

Le Eseesega o le Alofa o le Atua ma le Agasala

4, 5. (a) O le ā le auala na faaalia ai e Ieova le tele o lona alofa? (e) O ā faamatalaga ua fesoasoani iā i tatou e malamalama ai i le Roma 5:12?

⁴ Ona o le alofa tele o Ieova, na ia auina mai ai lona Alo e toʻatasi e fesoasoani i le fanau a tagata. Na faamatala mai e Paulo: “A ua faaali mai e le Atua lona lava alofa iā i tatou, auā na maliu Keriso mo i tatou a o tatou agasala pea.” (Roma 5:8) Ia manatu i le mea moni o loo taʻua i le mau: “A o tatou agasala.” E tatau la ona malamalama tagata uma i le pogai ua tatou agasala ai.

⁵ Na amata ona faamatala e Paulo lenei mataupu i le manatu lenei: “E pei ona oo mai o le agasala i le lalolagi ona o le tagata e toʻatasi, o le oti foʻi ona o le agasala, ona oo mai ai lea o le oti i tagata uma auā ua agasala uma lava.” (Roma 5:12) Ua tatou malamalama i lenei mea moni, ona ua iai i le Tusi Paia faamaumauga o le amataga o le tagata. Na foafoaina e Ieova ni tagata se toʻalua, o Atamu ma Eva. E lelei atoatoa Lē na foafoaina mea, ma sa lelei atoatoa foʻi na uluaʻi tagata, o o tatou uluaʻi mātua. Ae e tasi le mea na faatonu e le Atua i laʻua e sā ona fai, ma o le a la feoti pe a lē usiusitaʻi i ai. (Kene. 2:17) Ae peitaʻi, sa la filifili e fouvale ma solia le faatonuga a le Atua, ma teena ai o ia o Lē e Faitulafono ma le Pule Silisili Ese.​—Teu. 32:4, 5.

6. (a) Aiseā na feoti ai ē na tupuga mai iā Atamu a o leʻi tuuina atu le tulafono faa-Mose, ma ina ua tuanaʻi foʻi? (e) O le ā e mafai ona faataʻitaʻia i se faamaʻi ua tuufaasolo mai?

⁶ Na faatoʻā avea Atamu ma tamā ina ua uma ona agasala, o lea na tuufaasolo mai ai le agasala ma ona āuga i lana fanau. O le mea moni, e leʻi solia e le fanau a Atamu le tulafono a le Atua, ma e lē tuuaʻia i latou i le agasala a Atamu; ma e leʻi iai foʻi i lenā taimi tulafono ia na tuu atu iā Mose. (Kene. 2:17) Peitaʻi, sa tuufaasolo mai pea le agasala i le fanau a Atamu. O lea na pule ai le oti ma le agasala e oo mai i le taimi na avatu ai e le Atua le tulafono i le nuu o Isaraelu, ma manino ai lo latou tulaga agasala. (Faitau le Roma 5:13, 14.) O āuga o le agasala ua tuufaasolo mai, e ono mafai ona faataʻitaʻia i aafiaaga o se faamaʻi ua tuufaasolo mai i o tatou mātua. E tusa lava pe e lē o tamaiti uma o lenā aiga e aafia ai, ae atonu lava o loo latou feavea’ia le faamaʻi. Peitaʻi, e lē o le tulaga lenā o le agasala. Ua tatou aafia uma i le agasala a Atamu, ma o le māfuaaga lenā e tatou te feoti uma ai. Pe e mafai ona foʻia lenā tulaga faigatā?

Sauniuniga a le Atua e Ala iā Iesu Keriso

7, 8. Na faapefea ona eseese iʻuga o olaga o ni tagata lelei atoatoa e toʻalua?

⁷ Na faia ma le alofa e Ieova se sauniuniga mo tagata ina ia foʻia ai le agasala tuufaasolo. Na faamatala mai e Paulo e mafai ona faataunuu lenei mea e ala i se isi tagata lelei atoatoa, o le Atamu mulimuli lea. (1 Kori. 15:45) Ae ua matuā eseese lava iʻuga mo tagata uma ona o le auala na ola ai nei tagata lelei atoatoa e toʻalua. E faapefea?​—Faitau le Roma 5:15, 16.

⁸ Na tusi mai Paulo: “O le iʻuga o le meaalofa e lē pei o le iʻuga o le agasala.” Sa nofosala Atamu ona o lana agasala, ma oo ai iā te ia se faasalaga matuiā, o le oti. Ae, e lē na o ia na faasalaina i le oti. E tatou te faitau e faapea: “Ua oti le toʻatele i le agasala a le tagata e toʻatasi.” Ua tutusa le faasalaga ua oo iā Atamu ma ē ua tupuga mai iā te ia, e aofia ai ma tatou. Ae e mafai ona faamāfanafanaina i tatou i le iloa, o le a maua se iʻuga e matuā ese mai, ona o le tagata lelei atoatoa o Iesu. O le ā le iʻuga? Ua tatou iloa le tali i upu a Paulo o loo taʻua ai, ua “taʻuamiotonuina mo le ola o ituaiga uma o tagata.”​—Roma 5:18.

9. O le ā le uiga o le faaupuga i le Roma 5:16, 18 e faapea, ua taʻuamiotonuina e le Atua tagata?

 ⁹ O le ā le uiga moni o le faaupuga Eleni ua faaliliuina i le “taʻuamiotonuina”? Na tusia e le faaliliu o le Tusi Paia na taʻua muamua, o Dr. Williams: “O lenei faaupuga, e talitutusa i faamatalaga e faaaogā i faamasinoga. E faaalia ai se tagata ua suia e le Atua lona tulaga, ae lē o se suiga e fai e le tagata lava ia . . . Ua faaata mai e lenei faaupuga le avea o le Atua e pei o se faamasino, ua faia se faaiʻuga lelei mo lē ua molia i ona luma ona o le amiolētonu. Ae e lē taʻusalaina e le Atua lea tagata.”

10. O le ā sa faia e Iesu ina ia mafai ona taʻuamiotonuina ai tagata?

¹⁰ E faapefea ona lē taʻusalaina tagata amiolētonu e le “Faamasino o le lalolagi uma”? (Kene. 18:25) Muamua, sa auina mai e le Atua lona Alo e toʻatasi i le lalolagi ona o lona alofa. Sa faataunuu atoatoa e Iesu le finagalo o lona Tamā e ui i faaosoosoga, tauemuga leaga, ma sauāga. Sa tumau pea o ia i le faamaoni e oo i lona maliu i le laau e faapuapuagatia ai. (Epe. 2:10) O le faataulagaina o lona ola lelei atoatoa, ua saunia ai e Iesu se togiola e faasaʻoloto ai le fanau a Atamu mai i le agasala ma le oti.​—Mata. 20:28; Roma 5:6-8.

11. I le ā le itu ua fetaui lelei ai le togiola?

¹¹ I nisi taimi, na taʻua ai e Paulo lenei mea o se “togiola e fetaui lelei.” (1 Timo. 2:6) Ua fetaui lelei i le ā le itu? Ua tuufaasolo mai e Atamu le lē lelei atoatoa ma le oti i le faitau piliona o ē na tupuga mai iā te ia. O le mea moni, ona o Iesu o se tagata lelei atoatoa, sa ono mafai la ona tupuga mai iā te ia le faitau piliona o tagata lelei atoatoa. * O lea la, o le malamalamaga sa iai, o se tuufaatasiga o le soifua lelei atoatoa o Iesu ma tagata lelei atoatoa uma na ono tupuga mai iā te ia, na faia ai se taulaga e fetaui lelei i le ola lelei atoatoa, lea na melea e Atamu mo ia ma ē uma na tupuga mai iā te ia. Ae peitaʻi, e lē o taʻua i le Tusi Paia na iai se vaega a tagata na ono tupuga mai iā Iesu, i le togiola. Ua taʻua i le Roma 5:15-19, o le maliu o le “tagata e toʻatasi” ua saunia ai le togiola. Ioe, sa fetaui lelei le soifua lelei atoatoa o Iesu ma le ola lelei atoatoa o Atamu. E ao ona taulaʻi atu tau lava o Iesu Keriso. Ua mafai ona maua e ituaiga uma o tagata le meaalofa foaʻifua ma le ola, ona o le gaoioiga “amiotonu” e tasi a Iesu, o lona usiusitaʻi ma le faamaoni e oo lava i le oti. (2 Kori. 5:14, 15; 1 Pete. 3:18) Na faapefea ona tupu lenā mea?

Ua Lē Taʻusalaina Ona o le Togiola

12, 13. Aiseā ua manaʻomia ai e i latou ua taʻuamiotonuina le alofa mutimutivale o le Atua ma lona alofa?

¹² Sa talia e Ieova le Atua le togiola sa ofo atu e lona Alo. (Epe. 9:24; 10:10, 12) Ae sa tumau pea ona lē lelei atoatoa soo o Iesu, e aofia ai ma aposetolo faamaoni. E ui sa latou tauivi  e ʻalofia le faia o mea sesē, ae sa iai taimi na latou lē taulau ai. Aiseā? Ona o le agasala tuufaasolo. (Roma 7:18-20) Ae sa mafai ona gaoioi le Atua, ma sa ia faia faapea. Na ia talia le “togiola e fetaui lelei,” ma nofosauni e faaaogā mo le lelei o ana auauna.

¹³ E lē faapea sa tatau ona faaaogā e le Atua le togiola mo aposetolo ma isi, ona ua latou faia ni galuega lelei. Nai lo lea, sa faatatau e le Atua le aogā o le togiola iā i latou ona o lona alofa mutimutivale ma le tele o lona alofa. Sa finagalo o ia e taʻumamāina le ʻau aposetolo ma isi mai le faasalaina, ma i lana silafaga e lē o toe nofosala i latou. Sa manino ona taʻua e Paulo lenā manatu: “O le mea moni, o lenei agalelei faifua ua faaolaina ai outou e ala i le faatuatua; e lē ona o outou, ae ona o le meaalofa a le Atua.”​—Efe. 2:8.

14, 15. O le ā le taui sa tuu i luma o i latou e taʻuamiotonuina e le Atua, ma o le ā sa manaʻomia pea ona latou faia?

¹⁴ Seʻi manatu i le mataʻina o le meaalofa mai i Lē e ona le malosi uma lava, o le faamagaloina lea o le agasala ua tuufaasolo mai i se tagata, atoa ma mea sesē ua na faia! A o leʻi avea se tasi ma Kerisiano, e lē mafaitaulia le tele o ana agasala, ae ona o le togiola, ua mafai ai ona faamagalo e le Atua na agasala. Sa tusi Paulo: “O le meaalofa foaʻifua, ua oo mai ona o le tele o solitulafono, ma ua taʻuamiotonuina ai.” (Roma 5:16) O aposetolo ma isi ua maua lenei meaalofa (o le taʻuamiotonuina), e ao ona faaauau ona tapuaʻi ma le faamaoni i le Atua moni. O le ā lo latou taui i le lumanaʻi? “[O] i latou ua maua le tele o le agalelei faifua ma le meaalofa foaʻifua o le amiotonu, [o le a] pule o ni tupu i le ola, e ala i le tagata e toʻatasi o Iesu Keriso.” E moni, o le meaalofa o le amiotonu, e iʻu ai i le ola.​—Roma 5:17; faitau le Luka 22:28-30.

¹⁵ O i latou ua maua le meaalofa o le taʻuamiotonuina, ua avea ma atalii faaleagaga o le Atua. O le avea ma suli faatasi ma Keriso, ua latou maua ai le faamoemoe o le toetutū i le lagi o ni atalii agaga, e “pule o ni tupu” faatasi ma Iesu Keriso.​—Faitau le Roma 8:15-17, 23.

Ua Faaalia le Alofa o le Atua i Isi

16. E faapefea ona maua e i latou e faamoemoe mo le lalolagi se meaalofa?

¹⁶ E lē o i latou uma e faatuatua ma auauna i le Atua o ni Kerisiano faamaoni, e faatalitalia e “pule o ni tupu” faatasi ma Keriso i le lagi. E tutusa le faamoemoe o le toʻatele, ma auauna a le Atua i aso anamua a o leʻi oo i taimi o Kerisiano. E latou te faamoemoe e ola e faavavau i se lalolagi parataiso. Pe e mafai ona latou maua se meaalofa mai le Atua i le taimi nei, ma avea ma tagata amiotonu a o latou taulaʻi atu i le ola e faavavau i le lalolagi? E tusa ai ma mea na tusia e Paulo i tagata i Roma, o le tali mautinoa, o le ioe!

17, 18. (a) E tusa ai o le faatuatua o Aperaamo, o le ā le silafaga a le Atua iā te ia? (e) Sa faapefea ona silasila Ieova iā Aperaamo o sē e amiotonu?

¹⁷ Sa talanoaina e Paulo le faaaʻoaʻoga lelei a Aperaamo, o se tagata faatuatua na ola a o leʻi aumaia e Ieova le tulafono iā Isaraelu, ma a o leʻi saunia e Keriso le ala i le ola i le lagi. (Epe. 10:19, 20) E tatou te faitau ai e faapea: “E lē o tulafono na maua ai e Aperaamo po o lana fanau le folafolaga e fai o ia ma suli o le lalolagi, ae e ala i le amiotonu ona o le faatuatua.” (Roma 4:13; Iako. 2:23, 24) O lea la, na silasila le Atua iā Aperaamo o sē e amiotonu.​—Faitau le Roma 4:20-22.

¹⁸ E lē uiga ai e faapea e leʻi agasala Aperaamo, a o auauna atu iā Ieova i le faitau fia sefulu o tausaga. E leai, e lē o le uiga lea o le avea o ia ma sē e amiotonu. (Roma 3:10, 23) Peitaʻi, ona e lē gata mai le atamai o Ieova, ua ia silafia ai le maoaʻe o le faatuatua o Aperaamo, ma galuega lelei sa ia faia. Aemaise lona faatuatua i le “fanau” folafolaina lea o le a tupuga mai iā te ia. O lenā Fanau, o le Mesia po o Keriso lea. (Kene. 15:6; 22:15-18) E tusa ai ma “le togiola [na faia e] Keriso Iesu,” ua mafai ai e le Faamasino o Ieova, ona faamagalo agasala  ua tuanaʻi. O lea la, o le a maua e Aperaamo ma isi tagata faatuatua sa iai a o lumanaʻi le faa-Kerisiano, le toetū.​—Faitau le Roma 3:24, 25; Sala. 32:1, 2.

Olioli Ona ua Iai i se Tulaga Amiotonu

19. Aiseā e avea ai ma faamāfanafanaga i le toʻatele i aso nei, le silafaga a le Atua iā Aperaamo?

¹⁹ O le mea moni e faapea sa silasila le Atua alofa iā Aperaamo o sē e amiotonu, e tatau ona avea ma faamāfanafanaga i Kerisiano moni i aso nei. E ese le uiga o le taʻuamiotonuina o Aperaamo e Ieova, mai le taʻuamiotonuina o i latou o le a avea ma “suli faatasi ma Keriso.” O lenā vaega e tapula lo latou aofaʻi, “ua valaauina e avea [o] le ʻaupaia,” ma ua avea ma ʻatalii o le Atua.’ (Roma 1:7; 8:14, 17, 33) E ese mai i lea tulaga, sa taʻua Aperaamo o le “uō a Ieova,” a o lumanaʻi le ofoina atu o le taulaga togiola. (Iako. 2:23; Isa. 41:8) Ae faapefea la Kerisiano moni, o ē o loo faamoemoe e ola i se lalolagi parataiso ua toe faafouina?

20. O le ā o loo faatalitalia e le Atua mai iā i latou o ē ua silasila i ai e amiotonu, e pei ona sa ia faatalitalia iā Aperaamo?

²⁰ E leʻi maua e nei Kerisiano “le meaalofa foaʻifua o le amiotonu,” e faamoemoe atu ai e ola i le lagi e ala ʻi le faasaʻolotoina i le togiola lea na faia e Keriso Iesu.’ (Roma 3:24; 5:15, 17) Ae e latou te faaalia le faatuatua moni i le Atua ma ana sauniuniga, e ala i a latou galuega lelei. O se tasi o nei galuega lelei o le “talaʻi atu [o] le malo o le Atua . . . ma aʻoaʻo atu mea e faatatau i le Alii o Iesu Keriso.” (Galu. 28:31) O lea, ua silasila ai Ieova iā i latou o nisi e amiotonu e pei ona silasila iā Aperaamo. E maua e i latou nei le meaalofa o se faauōga ma le Atua, e ese mai i “le meaalofa foaʻifua” lea e maua e ē ua faauuina. Ae e mautinoa lava e latou te matuā talisapaia lenā meaalofa.

21. O ā aogā ua mafai ona maua ona o le faamasinotonu ma le alofa o Ieova?

²¹ Afai o lou faamoemoe o le ola e faavavau i le lalolagi, e tatau ona e iloa e te leʻi maua lenei avanoa ona o se gaoioiga a se pule faaletagata. Nai lo lea, ua maua ona o le finagalo atamai o Lē e Pule Silisili Ese. Ua faasolosolo ona faia e Ieova laasaga e faataunuu ai lona finagalo. O nei laasaga ua faia ma le faamasinotonu. Ma e sili atu i lea, ua faaatagia ai le tele o lona alofa. Ua talafeagai ai upu nei a Paulo: “Ua faaali mai e le Atua lona lava alofa iā i tatou, auā na maliu Keriso mo i tatou a o tatou agasala pea.”​—Roma 5:8.

[Faaopoopoga i lalo]

Pe E te Manatua?

• O le ā le tofi sa maua e ē na tupuga mai iā Atamu, ma o le ā le iʻuga?

• Na faapefea ona saunia se togiola e fetaui lelei, ma aiseā ua fetaui lelei ai?

• O le ā le faamoemoe ua e maua ona o le meaalofa o le taʻuamiotonuina?

[Fesili mo le Suʻesuʻega]

[Ata i le itulau 13]

Na agasala le tagata lelei atoatoa o Atamu. Na ofoina atu e le tagata lelei atoatoa o Iesu le “togiola e fetaui lelei”

[Ata i le itulau 15]

Maʻeu se tala lelei e ala iā Iesu, lea ua mafai ai ona taʻuamiotonuina i tatou!