Po o Taʻitaʻia Oe e le Agaga o le Atua?

“E lelei lou agaga; ia taʻitaʻia ai aʻu i le laueleele o ē ua amio saʻo.”—SALA. 143:10.

1, 2. (a) Taʻu mai ni taimi sa faaaogā ai e Ieova lona agaga paia ona o ana auauna. (e) Pe e na o ni taimi faapitoa e galue ai le agaga paia? Faamatala.

O LE ā e te mafaufau i ai pe a taʻua gaoioiga a le agaga paia? Pe e te faaata i lou mafaufau gaoioiga malolosi sa faia e Kitiona ma Samasoni? (Faama. 6:33, 34; 15:14, 15) Atonu e te mafaufau i le lototetele o uluaʻi Kerisiano, po o le toʻafilemu o Setefano a o ia tulaʻi i luma o le Saniterini. (Galu. 4:31; 6:15) Ae faapefea le olioli e maua i tauaofiaga faavaomalo i aso nei, le faamaoni o uso o loo falepuipui ona o le solitū, ma le faatuputeleina o le galuega talaʻi? O nei faaaʻoaʻoga uma, o faamaoniga ia o gaoioiga a le agaga paia.

² Pe e na o ni taimi faapitoa e gaoioi ai le agaga paia, pe seʻi vaganā ua iai se mea uiga ese ua tupu? E leai. Ua taʻua i le Tusi Paia, o Kerisiano e latou te, “savavali pea i la le agaga,” ʻtaʻitaʻiina e le agaga,’ ma “ola i la le agaga.” (Kala. 5:16, 18, 25) E taʻu mai i nei faaupuga, e mafai ona galue pea le agaga paia i o tatou olaga. I aso taʻitasi, e ao ona tatou talosagaina le taʻitaʻiga a Ieova i o tatou mafaufauga, upu, ma galuega, e ala i lona agaga. (Faitau le Salamo 143:10.) Pe afai e galue le agaga i o tatou olaga, e tatou te maua ai le fua o le agaga e faafouina ai isi, ma viia ai le Atua.

3. (a) Aiseā e manaʻomia ai ona taʻitaʻia i tatou e le agaga paia? (e) O ā fesili o le a tatou iloiloina?

³ Aiseā e tāua ai le taʻitaʻia o i tatou e le agaga paia? Ona o loo iai se isi malosi o loo taumafai e pulea i tatou, o se malosi e tetee i le gaoioiga a le agaga paia. O lenā malosi o loo faaupuina i le Tusi Paia, o “le tino” lea o loo faatatau atu i faanaunauga agasala a o tatou tino augavale, lea na tuufaasolo mai iā Atamu. (Faitau le Kalatia 5:17.) O le ā e aofia ai i le taʻitaʻia o i tatou e le agaga o le Atua? Pe e iai ni gaoioiga aogā e mafai ona tatou mulimulitaʻia, ina ia tetee atu ai i tuʻinanauga o le tino agasala? Seʻi o tatou iloiloina la nei fesili a o tatou talanoaina vala e ono, o loo totoe o “le fua o le agaga,” o le “faapalepale, o le agalelei, o le mataalofa, o le faatuatua, o le agamalu, ma le amio pulea.”—Kala. 5:22, 23.

O le Agamalu ma le Faapalepale e Faatupu ai le Filemu i le Faapotopotoga

4. E faapefea ona saosaolaumea le agamalu ma le faapalepale, i le filemu o le faapotopotoga?

⁴ Faitau le Kolose 3:12, 13. I le faapotopotoga, e galulue faatasi le agamalu ma le faapalepale e faatupuina le filemu. E fesoasoani nei vala e lua o le fua o le agaga iā i tatou, e feagai ai ma isi i le faaaloalo, ma toʻafilemu ai pea i tulaga vevesi e ono tulaʻi mai, ma ʻalofia ai le toe taui atu, pe a fai mai e isi ni tala lē lelei pe agaleaga mai foʻi. Pe afai e iai ni feeseeseaʻiga ma se uso Kerisiano, o le a fesoasoani le faapalepale, po o le onosaʻi e tatou te lē fiu ai i lo tatou uso po o se tuafafine, ae faia mea uma e foʻia ai le faafitauli. Pe e manaʻomia moni le agamalu ma le faapalepale i le faapotopotoga? Ioe, ona o i tatou uma lava e lē lelei atoatoa.

5. O le ā le mea na tupu iā Paulo ma Panapa, ma o le ā o loo faamatilatila mai ai?

⁵ Seʻi manatu i le mea na tupu iā Paulo ma  Panapa. Sa la galulue soosootauʻau mo le tele o tausaga i le faaauilumaina o le tala lelei. E tofu i laʻua ma uiga lelei. Peitaʻi, sa iai se taimi na “matuā feita [ai] i laʻua ma fefinauaʻi, ona la ō eseese ai lea.” (Galu. 15:36-39) O lenei mea na tupu, e faamatilatila mai ai, e oo lava i auauna faamaoni a le Atua, e iai taimi e ono tutupu ai ni fefinauaʻiga. Pe a iai se mea e lē malie ai se Kerisiano i se isi uso, o le ā e ao ona faia e lea Kerisiano, ina ia ʻalofia ai le tupu aʻe o se misa ma fai ai so la va?

6, 7. (a) O le ā le fautuaga a le Tusi Paia e ao ona tatou mulimuli ai, a o leʻi oo ina vevesi se talanoaga? (e) O ā aogā o le ʻfaalogologo lelei, ae aua le vave ona tautala, ma aua foʻi le vave ona ita’?

⁶ Ua taʻua i le mau, na faafuaseʻi ona tupu le fefinauaʻiga a Paulo ma Panapa, ma na “matuā feita i laʻua.” Pe a iloa e se Kerisiano ua amata ona oso lona ita a o talanoaina se mataupu ma se uso, o se tulaga atamai le utagiaina o le fautuaga o loo i le Iakopo 1:19, 20: “Ia faalogologo lelei tagata uma, ae aua le vave ona tautala, ma aua foʻi le vave ona ita. Auā o le ita o le tagata e lē tupu mai ai le amiotonu mai le Atua.” E fua lava i le tulaga o loo iai, ae e mafai ona taumafai le uso e sui le mataupu, tolopō le talanoaga, po o le alu ese foʻi a o leʻi oo ina vevesi.—Faata. 12:16; 17:14; 29:11.

⁷ O ā ni aogā o le usitaʻia o lenei fautuaga? O le taumafai e faatoʻafilemu le mafaufau, tatalo mo lea mataupu, ma mafaufau po o le ā le tali talafeagai e fai atu, e faaalia ai o loo taʻitaʻia sea Kerisiano e le agaga o le Atua. (Faata. 15:1, 28) O le taaʻiga a le agaga, e na te faaalia ai le agamalu ma le faapalepale. O le faia faapea, ua ia utagia ai le fautuaga o loo i le Efeso 4:26, 29: “Pe a outou ita, aua neʻi agasala ai . . . Ia aua neʻi alu atu se upuleaga mai i o outou gutu, a ia fai atu ni upu lelei e atiaʻe ai i taimi e tatau ai, ina ia aogā i ē o faalogologo i ai.” A tatou oofu i le agamalu ma le faapalepale, ua tatou saosaolaumea ai, i le filemu ma le autasi o le faapotopotoga.

Ia Faafouina Lou Aiga i le Agalelei ma le Mataalofa

8, 9. O le ā le agalelei ma le mataalofa, ma o le ā le aafiaga o na uiga i se aiga?

⁸ Faitau le Efeso 4:31, 32; 5:8, 9. E pei ona faafouina se tasi i se savili mālū ma se vaiinu mālūlū i se aso vevela, e faapena foʻi ona faafouina se tasi i le agalelei ma le mataalofa. A iai na uiga i se aiga, o le a toʻafimālie le aiga atoa. O le agalelei o se uiga lelei e māfua ona o le naunau moni i isi, e faaalia i galuega fesoasoani ma upu alofa e fai atu. O le mataalofa, e talitutusa ma le agalelei, o se uiga lelei e faaalia i gaoioiga e aogā i isi. E  iloa i le agaga foaʻi. (Galu. 9:36, 39; 16:14, 15) Ae e iai se isi mea e aofia ai i le mataalofa.

⁹ O le tagata e mataalofa o se tagata e amiolelei tele. E aofia ai e lē gata i mea e tatou te faia, ae e sili atu i lenā, o lo tatou tagata moni. E tai pei o se fualaau ʻaina, ua pula lelei ma suamalie i le ʻai, e leai se faalētonu i fafo ma totonu. I se auala talitutusa o loo iai le mataalofa e maua mai i le agaga paia, i vala uma o le olaga o se Kerisiano.

10. O le ā e mafai ona fai ina ia fesoasoani i tagata o le aiga e atiaʻe le fua o le agaga?

¹⁰ O le ā e ono fesoasoani i tagata uma o se aiga Kerisiano, ina ia faaalia le agalelei ma le mataalofa? E tāua le vaegafai a le poto saʻo mai le Afioga a le Atua. (Kolo. 3:9, 10) O nisi ulu o aiga, ua latou faaaofia le suʻesuʻeina o le fua o le agaga paia, i Tapuaʻiga Afiafi a le Aiga i vaiaso taʻitasi. E lē faigatā le faatulagaina o lea ituaiga o suʻesuʻega. Faaaogā auala eseese e saʻiliʻili ai faamatalaga i lau lava gagana, ma fili mai ni mataupu o loo talanoaina ai vala eseese o le fua o le agaga. Atonu tou te talanoaina ni nai palakalafa i vaiaso taʻitasi, ma faaalu ni nai vaiaso i vala taʻitasi. A o faasolo le suʻesuʻeina o mataupu, faitau ma talanoa i mau faasino. Ia vaai i auala e faatatauina ai mea o loo aʻoaʻoina, ma ia tatalo mo le faamanuiaga a Ieova i au taumafaiga. (1 Timo. 4:15; 1 Ioa. 5:14, 15) Pe mafai moni e na suʻesuʻega ona faaleleia ai feutagaʻiga i totonu o le aiga?

11, 12. O ā aogā sa mauaina e ni ulugalii Kerisiano se toʻalua mai le suʻesuʻeina o le agalelei?

¹¹ Sa mananaʻo se ulugalii talavou ina ia taulau manuia le la faaipoipoga, o lea sa la faia ai ni saʻiliʻiliga loloto i le fua o le agaga. O ā aogā ua la mauaina? Ua faapea mai le avā: “Ina ua ma aʻoaʻoina o le agalelei e aofia ai le faamaoni i le va o le ulugalii, ua telē se aafiaga i le ma faiā e oo mai lava i le aso nei. Ua ma iloa ai le manaʻomia ona fefaamagaloaʻi ma ia lolo atu le tasi i le isi. Ma ua fesoasoani iā i maʻua ina ia iloa ai le taimi e tatau ai ona faapea atu ʻfaafetai’ ma le ʻfaamalie atu.’”

¹² O se isi foʻi ulugalii Kerisiano na oo i ai faafitauli i le la faaipoipoga, na la mātauina ua tau leai se agalelei i le la faiā. Na la manatu e lelei ona suʻesuʻe faatasi le mataupu e faatatau i le agalelei. Ma o le ā le iʻuga? Ua taʻua e le tane: “Ua iloa mai le ma suʻesuʻega e faapea, e manaʻomia ona talitonuina lau paaga, nai lo le masalosalo i ana tala, ma mātaʻitū uiga lelei o le isi. Na amata ai loa  ona naunau le tasi i manaʻoga o le isi. O le agalelei, e aofia ai le tuu atu i si aʻu avā e faamatala mai ona faalogona, e aunoa ma loʻu ita. O lona uiga sa manaʻomia ona tuu ese loʻu faamaualuga. Ina ua amata ona ma faataʻitaʻia le agalelei i la ma faaipoipoga, ua mou malie atu ai le feʻainaʻi. Ma ua pei ua tuu ese atu se avega mamafa.” Pe e aogā i lou aiga le suʻesuʻeina o le fua o le agaga?

Faaalia Pea le Faatuatua pe a na o Oe

13. O le ā le lamatiaga i lo tatou itu faaleagaga e manaʻomia ona puipuia mai ai?

¹³ E ao ona taʻitaʻia se Kerisiano e le agaga o le Atua, pe a iai ma tagata pe na o ia foʻi. I aso nei, ua faateteleina le iai o ata ma faafiafiaga matagā i le lalolagi a Satani. Ua lamatia ai lo tatou itu faaleagaga. O le ā e ao ona faia e se Kerisiano? Ua fautuaina i tatou e le Afioga a le Atua: “Inā lafoaʻi ia o mea eleelea uma ma le amioleaga lea e lē aogā, ae ia talia ma le agamalu le upu ua aʻoaʻoina, lea ua mafai ai ona faasaoina o outou ola.” (Iako. 1:21) Seʻi o tatou iloiloina le faatuatua, o se isi vala o le fua o le agaga, lea e mafai ona fesoasoani iā i tatou ina ia tumau ai pea ona mamā i luma o Ieova.

14. Aiseā e faigofie ai ona faia mea sesē pe a leai se faatuatua?

¹⁴ Afai e iā i tatou le faatuatua, o lona uiga e moni Ieova le Atua iā i tatou. Afai e lē moni le Atua iā i tatou, e faigofie lava ona faia mea sesē. Manatu i le mea na tupu i tagata o le Atua i aso anamua. Na faailoa mai e Ieova i le perofeta o Esekielu le faia o mea sesē e tagata i taimi sa na o i latou ai, i lona faapea atu: “Le atalii e o le tagata, po ua e vaai atu i mea o loo faia e toeaina o le aiga o Isaraelu i le pōuliuli, ua taʻitasi ma alu i le potu pito i totonu ua iai ana tupua ua tā? Auā ua latou faapea ane, ʻE lē o silasila mai Ieova iā i tatou. Ua tuua e Ieova le atunuu.’” (Eseki. 8:12) Po o e mātauina se tasi o māfuaaga o le faafitauli? Latou te leʻi talitonu o loo silasila mai le Atua i mea o loo latou faia. O lona uiga ua pei e lē o soifua Ieova iā i latou.

15. E faapefea ona puipuia i tatou ona o le malosi o lo tatou faatuatua iā Ieova?

¹⁵ Seʻi tagaʻi i le eseesega ma le faataʻitaʻiga iā Iosefa. E ui sa mamao ese o ia mai lona aiga ma lona nuu, ae sa teena e Iosefa le faia o le mulilua ma le avā a Potifara. Aiseā? Ua faapea mai o ia: “Pe faapefea ona ou faia lenei mea leaga tele ma ou agasala ai i le Atua?” (Kene. 39:7-9) Ioe, sa moni Ieova iā te ia. Afai e moni le Atua iā i tatou, e tatou te lē matamata la i faafiafiaga matagā, pe faia se mea e lē finagalo i ai le Atua pe a na o oe. E tatou te ioe faatasi i upu a le faisalamo: “Ou te savali ma le faamaoni o loʻu loto i totonu o loʻu fale. Ou te lē tuu i oʻu luma se mea e lē aogā.”—Sala. 101:2, 3.

 Leoleo Lou Loto e Ala i le Amio Pulea

16, 17. (a) E pei ona taʻua i le tusi o Faataoto, e faapefea ona maileia i le agasala se tauleʻaleʻa “ua leai sona mafaufau”? (e) E faapefea ona tupu se mea talitutusa i aso nei, e tusa lava po o le ā le matua o le tagata, e pei ona faaalia i le ata i le itulau e 26?

¹⁶ O le amio pulea, o le vala mulimuli lea o le fua o le agaga, e mafai ai ona tatou teena mea ua taʻusalaina e le Atua. E fesoasoani foʻi ina ia leoleoina ai o tatou loto. (Faata. 4:23) Seʻi manatu i le tala o loo i le Faataoto 7:6-23, lea na faamatala mai ai “se tasi tauleʻaleʻa . . . ua leai sona mafaufau” lea na lolo atu i se fafine talitane. Ua maileia o ia a o “ui ane i le ala e latalata i le tulimanu e nofo ai le fafine.” Atonu ua oo i lenā vaipanoa ona o lona isuisu fua. Ae pagā lea, e na te leʻi iloa ua taʻitaʻiina o ia e fai se gaoioiga valea e “lamatia ai lona lava ola.”

¹⁷ Na ono ʻalofia faapefea e lenei tauleʻaleʻa lenei mea sesē? E ala i le usitaʻia o le lapataʻiga: ʻAua neʻi e ui atu i ona ala.’ (Faata. 7:25) E iai se lesona mo i tatou: Afai e tatou te mananaʻo ina ia taʻitaʻiina i tatou e le agaga o le Atua, aua neʻi tuua i tatou i tulaga e ono faaosoosoina ai i tatou. O se tasi o auala e mafai ai ona faia e se tasi nei gaoioiga valea, e pei ona faia e le tauleʻaleʻa “ua leai sona mafaufau,” o le fesuisuiaʻi solo o ālā ata o le TV, po o le saʻiliʻili solo i luga o le Initaneti. Po o le faia ma le loto i ai pe leai, ae e ono tau le vaai i ata e faaosofia ai faalogona i feusuaʻiga. E faasolosolo mālie lava ona masani i le matamata i ata matagā o feusuaʻiga, ma oo ai ina afāina lona lotofuatiaifo, ma lana faiā ma le Atua. E mafai foʻi ona lamatia ai lona ola.—Faitau le Roma 8:5-8.

18. O ā gaoioiga e mafai ona faia e se Kerisiano ina ia puipuia ai lona loto, ma e faapefea ona aofia ai le amio pulea?

¹⁸ O le mea moni, e mafai ma e tatau ona tatou faaalia le amio pulea, e ala i le gaoioi vave pe a tatou vaai i se ata faatosina. Ae pe e lē sili ea le ʻalofia atoatoa o tulaga faapena! (Faata. 22:3) O le faia o ni gaoioiga e puipuia ai ma tausisi i ai, e manaʻomia ai le amio pulea. O se faataʻitaʻiga, o le tuu o le komepiuta i se nofoaga e iloa lelei atu e isi pe a faaaogā, o se puipuiga lea. O isi ua manatu e sili ona matamata i le TV pe faaaogā le komepiuta, pe afai o loo iai isi tagata. A o isi ua latou manatu e sili pe a lē faaolaina le Initaneti i a latou komepiuta. (Faitau le Mataio 5:27-30.) Tau ina ia tatou faia gaoioiga uma ina ia puipuia ai o tatou aiga ma i tatou lava, ina ia tatou tapuaʻi iā Ieova “i se lotomamā ma se lotofuatiaifo lelei, ma le faatuatua e lē faatagāfai.”—1 Timo. 1:5.

19. O ā aogā o le taʻitaʻia o i tatou e le agaga paia?

¹⁹ O le fua e maua mai i le gaoioiga a le agaga paia, e maua ai aogā e tele. O le agamalu ma le faapalepale e faatupu ai le filemu i le faapotopotoga. O le agalelei ma le mataalofa, e atiaʻe ai le fiafia i se aiga. O le faatuatua ma le amio pulea e fesoasoani ina ia tatou mamā ma faalatalata atu ai pea iā Ieova. Ma ua faamautinoa mai i le Kalatia 6:8: “O lē e lūlū e tusa ma le agaga, e na te selesele mai le ola e faavavau mai i le agaga.” Ioe, e faavae i le togiola a Keriso, o le a faaaogā e Ieova le agaga paia, ina ia maua ai le ola e faavavau e i latou ua taʻitaʻia e le agaga.

E Faapefea Ona E Tali?

• E faapefea ona faatupu le filemu i le faapotopotoga e ala i le agamalu ma le faapalepale?

• O le ā e fesoasoani i Kerisiano e faaalia ai le agalelei ma le mataalofa i le aiga?

• E faapefea ona leoleoina le loto o se Kerisiano i le faatuatua ma le amio pulea?

[Fesili mo le Suʻesuʻega]

[Ata i le itulau 24]

E faapefea ona taofia le oo atu o se talanoaga i se tulaga vevesi?

[Ata i le itulau 25]

E mafai ona aogā i lou aiga le faia o se suʻesuʻega i le fua o le agaga

[Ata i le itulau 26]

O ā lamatiaga e tatou te ʻalofia e ala i le faaalia o le faatuatua ma le amio pulea?